Monang Naipospos

Marnida halindo ni ngolu di angka bangso na ingot jala arga di angka ugari na pinalolo jala nisantihon ni angka siompungon nasida be, mangkorhon tua pasu-pasu jala belut diparngoluon siapari do nasida huhut mangolu di harentaon.
Mangkilala do roha nang diangka ugari napinalolo ni angka ompu bona nasumundut ni halak Batak naung diturasihon di tona panamian namangolu tong-tong dipangarohai ni nagka pinomparna na tanda sinuaeng didok “halak Batak”. Dirajumi roha do naung godang namanitipi ginjang mangorui bolon, laos lipe sian tona panamian i, gabe so marguru tu amana jala laos lupa sian tona ni Ompuna.

Manarisik do tupangkilalaan di deba halak angka naingot marsituriak di tona panamian i, na mangolu dirohana jala laos dipangkilalahon diparulanna na gabe tua sahala ni dirina laos pahothon Habatahonna.

Molo sai pinarrohahon do si nuaeng parulan parngoluon di ruhut dohot ulaon habatahon, i ma natarida di parsaoran adat dohot parngoluon siapari, nunga tung dao tu ipar ni ruhut habatahon i. Godang do halak na umboto hasintongan ni adat paula so umboto, ujung na ndang olo manotari narundut. Deba, natua-tua manuntun pailing ruhut habatahon i mangihuthon halak na telhang pamiokhon dirina sian gogotan parsaoran.

Na umbernit, ima pangalaho ni angka namora marangkup hapistaran huhut maringan di luat naleban, ro ma ibana mamboan hagogoonna tu tano Batak mangarupa patupahon adat, alai dang dipaguruhon be tu na tumua. Molo tung pe dipaguruhon, sipalensem nama, alana ingkon na dirohana i do na saut. Mangihut ma angka natua-tuanta si boto adat i tusi manehe-nehe manghirim sileanlean, dohot ma ibana manengsang adat habatahon i.

Pangarupaon nama godangan adat dohot parsaoran habatahon i, ianggo “tondina” nunga mate. Masiasupan ma namarhula-boru, masihosoman namarhaha-maranggi, ndang piga be sipahot uhum mandimposi narundut paojakhon parrosuon manupehon hadameon.

Ianggo habatahon i nunga tarrompu hian i dibagasan sapean habonggalon namarisi ruhut parpatihon, paruhumon, paradaton, parrajaon dohot pardebataon. Rompu ni habonggalon i diuhirhon ma i dibagasan sada bagas nauli ima ruma gorga. Pajengkarhon panamionna diolophon ma i dibagasan sada tortor marhite gondang sabangunan. Di jampi tua ma i di tonga ni alaman marhite liat tortor paniaran. Sudena i namarlapatan do jala dang riang-riang sambing, ingkon pantun do mangulahon.

Dung lipe halak Batak sian impola ni habatahonna i, dang marisi hapantunon be mangulahon ulaon Batak i. Tubu ma angka pabinotoan naimbaru na manengsang uhir haulion i. Masa ma ulaon sadari; disi paulak une, disi tingkir tangga, suman ma tu ulaon tondur-tonduran. Ditortori ma musik eropa mangarupa ma halak Batak paula maminta gondang dohot pangalualuan laos ditortori dohot tortor Batak.

Hinorhon ni na diboto nadeba do i meam-meam, laos dipangido ma gondang na so dung gondang Batak laos ditortorhon ma hombar tu parngolu ni dagingna, mago ma hapantunon dohot hahormaton, pulpal ma dohot natua-tua, jorhujorhu dohot naposo.

Nunga maol luluan angka natua-tua na ampit dohonon jadi Raja panotari adat dohot uhum di halak Batak. Molo tung adong pe na mangoris tusi, ndang siat be hatana tu angka naumposo na sai dibagasan goso mangalusi natua-tua mandok; “najolo nama i”, ninna. Godang ma sian natua-tua i sumurut dimulana alai mangihut tu halenjengon i di pudian ni ari ala nunga lam tilil ibana.
Marnida sian i, suraon lam leleng lintun ma hasintongan ni adat dohot ruhut parsaoran ni halak Batak i manongnong songon bubu tangkoan, dang haeahan sogot. Mago di na sae lilu di nahornop ma Ugari Habatahon i di pudian ni ari.

Didok natua-tua; Raja do urat ni Uhum, Namora urat ni Hosa. Ido umbahen sai ditonggo Raja di ganup ulaon adat dohot ulaon uhum parsaoran (patotahon hadameaon, mamungka parpatihan) di halak Batak. Suhi ni ampang naopat do ojahan ni paradaton, paruhumon dohot harajaon ni halak Batak. Diulaon na rumatangga do didok dalihan natolu (tataring), ima na so pola taripar tu alaman (huta) horja dohot bius. Molo patotahon parartaon ni sa-ama uju mangolu dope ibana, sae do holan dalihan natolu ojahan ni rompu hadameonna. Alai molo dung lam bidang, sipata ma ingkon ojak suhu ni ampang naopat, ima paopat Raja nangkin.

Nuaeng on nunga tung diagohon Raja sian paradaton. Tataring (dalihan natolu) nama diboan tu alaman, horja dohot bius, jala laos didok angka napistar nuaeng ma; dalihan natolu ojahan ni adat Batak.
Sian i ma tubu tu roha marsangkap maminta haradeon ni angka nabisuk na hot di pator habatahon i, palolo adian patiarhon di angka ugari habatahon naung tarsirat hian dibagasan harentaon ni paradaton, paruhumon, partuturon, parpatihon dohon pardebataon, jala tinonahon ni ompu bona i, asa anggiat nian ditomu gorak ni habatahon i mausandar tu roha ni halak Batak laho patubotohon, patubegehon na tau jadi sitindangi di angka naumposo na olo mangalului hasintongan ni habatahonna i. Na tau jadi sulu dohot tongkot dipardalanon mandopang hahijangon, huhut parentahon raksa ni ualaon dohot parsaoran.

Siradotan jala sipadimunon ma i marojahan di roha hapantason, ias ni roha huhut dibagasan hatongamon. Asa marbungaran ugari habatahon i ro di sundung banua desa naualu, dibagasan hatigoran, mangulahon nasintong asa taruli tua sangap jala horas.
Patimbulhon habatahon, ima na gabe sorminan ni hadirion ni halak Batak patambor diri margogo manjanggap angka sangkap mangihut tu hamajuon jala so lupa di ugari nasintong.

About these ads