Monang Naipospos

Ndang sude luat hatubuan ni hotang dohot mallo na suman bahen tungkot. Alai ianggo sialagundi, mura do i dapot nang pe so ingkon tu harangan. Sai tigor do partubu ni sialagundi sian mulai metmet sahat tu na timbo. Dangkana pe tigor do jala suman bahen tungkot di pardalanan manuati dolok. Dung sahat di adaran natipak, ditinggalhon do tungkot i. Ai holan na mangaramoti langka na tumolsutolsu do i di angka na manuati dolok. Iangggo na manangkohi dolok, sumuhasuha do i, jala boi do tioponna angka ramba manang batu na adong di rahis i pagogohon parnangkokna, sipata dugulna diodothon.

Ianggo angka natuatua, molo dung suda gogo jala ngendul simanjojak, sai dibahen do tungkotna mangurupi pagopas dohot patulus pardalanna. Ima di angka naung mumut gogo. Di angka pardalan nagopas pe sipata do ringkot adong tungkotna, molo landit dalan dohot molo golap ari. Dibahen ma i mandodo aek sadia bagas, mamopo ramba napotpot, huathuat uju golap ari. Paluahon dirina do i, unang unjom di aek nabagas, unang tarjulluk di ramba napotpot, unang tombom tu na bongbong di jolona.

Adong do nang tungkot i gabe tanda hatongamon dohot tanda harajaon. Ndang apala ulaula tu pardalanan be didok i. Hombar tu pangalaho dohot ulaonna do rumang ni angka tungkot i, ala ni i, olo do dang sarupa rupana agan pe sipata adong sarupa goar.
Sada Raja olo do adong dua manang lima tungkotna, hombar tu pamaheonna. Tu harajaon diboan ma tungkot balehat, tu pardalanan diboan ma tungkot mundi, tu balian diboan ma tungkot dodo. Molo datu pangulpuk sijou sumangot diboan ma tungkot tunggal panaluan. Asa dang tungkot ni Raja hape tunggal panaluan. Sian on dapot antusan, ia tungkot, ulaula do i manata pardalanan dohot tanda hatongamon dohot hadirion.

Adong do nang tungkot manoto dohot manata parrohaon dipungka natuatua, didok ma i patik. Dilapati angka natuatua do patik i, tungkot di pardalanan huathuat di nagolap. Raja do pandapotan di patik dohot uhum. Ima na andap di tonga ni natorop manungkoli roha marhite patik, nanaongi marhite uhum, i do umbahen didok Raja i partungkot balehat/malehat raja.
Hadosan do di angka ompunta najolo mambahen patik hombar tu hasintongan marojahan dibagasan holong dohot dame. Ala ni i ndang adong dingkan di patik i tu ganup jolma naung dohot martuptup sisada lulu di patik naung pinahotna. Molo adong nalipe sian patik, hona uhum ma ibana. Ala dohot ibana napajongjong patik, digora halak ma ibana tungkotna jumulluk munsungna. Sada tihas do on di angka natuatua naparjolo, ala ni i sai jamot do nasida di angka ulaonna, asa unang tartiha tu patik naung pinahotna i.

Halak na maruhum do didok jolma na hot di patik dohot padan. Patik dohot padan i do pahothon parsaoran nadenggan dibagasan paradaton dohot ulaon siganup ari. Silaosi uhum do sitompas patik, ima natartuhas di angka parroha silangkai sabor ala jempek, sisuruk sabor ala ginjang. Talaktak siugari, ibana pahot patik ibana manursari.

Paruhuman do didok angka loloan ni raja manimbang uhum tu angka silaosi patik. Disi ma ditimbangi angka pangalaho ni natorop na mangalaosi patik. Raja pe ndang boi mangarambashon tungkotna tu nirajaanna. Hona uhum do ibana disi, ima marhite salenggam dohot batuan jinalona na gabe martoru tu dirina sahat ro di pinomparna. Dumokdok do uhum i tu Raja dohot pinomparna molo mangarobohon patik mangalaosi uhum di halak Batak.

Patik dohot uhum, naung taruji do i sian angka ompunta nagalia na gabe siihuthonon ni angka pinomparna. Dipodai do angka pinomparna i asa mangihuthon adat, ima na marpatik dohot na maruhum sahat ro di angka pinomparna di pagian ni ari.
Halak napatupahon adatna na so marsihor tu angka ruhut na marharoroan sian patik dohot uhum pinunghka ni angka ompunta najolo, ima na jotjot mangalaosi marhite hatangkangon mardongan hata na lemes, pinungka ni ompunta pinature sian pudi, ninna.

Didok angka ompunta do; adat pinaradat uhum pinaruhum. Nanidokna disi; adat niulahon marpator sian uhum, diramoti patik nauli patik nadenggan na tau gabe hangoluan ni angka natorop. Unang gabe sidokdohi adat dohot uhum i tu angka nabile dohot napogos, alai dang lipe sian adat nauli dohot uhum natingkos i. Ndang dung hea didok; asing adat ni namora asing adat ni napogos, asing uhum ni raja asing uhum ni nabile. Hadosan do i di saluhut angka jolma halak Batak gomparan ni ompunta Siraja Batak napajongjong Bangso Batak na marpatik dohot maruhum, jala parsaoranna ditupehon dibagasan sada adat nauli jala sampuborna hombar tu angka hasomalan di luatna be. Ido umbahen diupamahon angka ompunta; tuat na di dolok matungkothon sialagundi, adat dohot uhum pinungka ni ompunta parjolo ihuthon hita sian pudi.
Ima tona ni angka ompunta na marisi poda siulahonon asa martua. Patik ima mangaramoti jolma unang lipe sian dalanna, uhum ima sitindangi hatigoran. Dilapati angka ompunta do; tona ima toto, poda ima sulusulu, patik ima tungkot, uhum ima lombulombu.
Sulusulu bintang tu laklak ni antaladan, niarit batang garudu bahen simpe ni tagan. Na so lupa di uhum na so lolos di padan, na talu diundangundang, i ma na so haulahan.

About these ads