Monang Naipospos

Parsaripeon na so mehon jamiron, bias do pinggol ni dongan sahuta manangihon. Rap tartiha do nasida di hajongkasonna be. Gondok mauhon nasida mamorsan toktokna. Gea-giu ma parugasanon dohot ulaonna.
Dagul ni daging tinoktok ni jongkas, paula so idaon do i. Lea do na hinirap molo usoan sijogal aruaru. Molo pinasingot sijogal aruaru, tudoshon manijuri langit do iba disi. Tudoshon hail do sijogal aruaru, pengkukna i do hatigoranna. Ingkon benget do mangorom pardabudabuan dompak sijogal aruaru, ia hatiha pinangido, halak do paondongonna.
Molo hantor paradonganna, talmis do pangkulingna. Girgir do i manihai ugasan ni donganna agan pe naung pia simalolongna. Ndang sipahembangon pangalahona, sibalunon do. Ingkon hohom do iba manabunihon hatalmisonna.
Molo pinarsalian sijogal aruaru, manghudus do ibana mangido jala posi do hatana.

Adong do sijogal aruaru sian namora na manghalupahon napogos hian ibana, halak nagabe na manghalupahon nabile hian natuatuana. Olo do tubu sijogal aruaru di halak na sai olo mangasahon hamoraon ni natuatuana nasailaon, hape nunga pogos ibana. Na sai olo mangasahon hagabeon ni natuatuana nasailaon, hape nunga bile ibana.
Hape, ndang tarpangasahon hasangapon dohot harajaon ni natuatuaniba nasailaon ianggo dung do marlea iba so binoto uhum so binoto patik ni adat.

Molo mian dua halak sijogal aruaru di sada huta masitihaan, marjembur ma angka hata naronsam. Masiboan palaitna ma angka panehenehe mambuat paruntungan. Ndang haintopan be api hosom sian nasida. Tuptup ma angka musu na holip dohot na paltak; jala dongan hian pe, jadi musu ma. Mabikbik ma paradaton, parngoluon pe malala, parsaripeon ndang himpal.
Haotoon sambing do pinangasahon ni sijogal aruaru, ndang tarsolanghon poda tu ibana. Jolo masoksok do alona ditahi rohana asa saut sangkapna. Uju redem hotok ni sijogal aruaru ro mandapothon loloan ni na mardame-dame, manjukjukhon pangilasan do ibana. Molo gale do ojahan ni na mardame-dame, olo do magargar molo pinasiat sijogal aruaru.
Na manghilap insak-insak do molo pinajolo sijogal aruaru tu parriaan. Na paonsophon mudarniba do molo pinaraja sijogal aruaru pasaut partahian.
Molo jumpang sangkap ni sijogal aruaru gabe partogi, manimung ma angka na sadalan dohot ibana marsiodop tu lambungna. Rap manihai ma nasida di angka nabisuk ala so olo sapartahian dohot nasida. Sabalikna, manihai ma angka nabisuk na so olo mangamini tahi ni sijogal aruaru. Manderse ma napogos nabenget roha ala so tuk soarana paingothon.
Molo diasungi sijogal aruaru naburju, gabe alona do i. Tung dipahoris pe di lambungna, ianggo rohana nunga manjamot. Pareuteut do ujungna pajembur api manoksohi dirina, ai uju dompak mamuji, ia dung tundal manginsahi.

Molo marharajaon sijogal aruaru, uju sinosohon tu ibana tohap siaulaon nadenggan, manigor didok do i naung disangkapi hian. Marioho do roha ni angka nabisuk na manurdukhon hobasna, ai magotap do i tu sijogal aruaru. Tandi do sijogal aruaru na pinaraja tu donganna Raja, marsipaula na umbisuk ibana huhut sai manihai donganna. Hape sian na so pamotoanna, sip do angka Raja nabisuk manelak ibana, pangulaonna i do patuduhon haotoonna.
Mauhom pe angka natorop mamorsan haporsuhonna binahen ni sijogal aruaru, alai ianggo rohana nunga martuptup tung na so sipajoloon jolma sisongon i. Jengkar pe tortor ni sijogal aruaru di loloan napinarsangapan, pinasangap ni pahean nama i.
Dibagasan panghirimon ni halak Batak na marojahan di hasintongan ni patik dohot uhum habatahon, sai sorang ma Raja panuhuk, penghehei nasorat, sipalua natorop sian hapogoson, partahi jala ulubalang nagogo patiurhon dalan naung rundut binahen ni angka sijogal aruaru.

About these ads