Monang Naipospos

Naburju do si Sahat mulaulaon. Nunut jala irik do ibana di angka siulaonna. Alai jotjot do ibana dipaingot halak ala hurang toho pangulahonna, ala manigor diantusi dohot dioloi, didok halak do ibana nabisuk ala dioloi siajaron. Nang pe songon i, godang do halak mandok naoto do si Sahat ala godangan sipatureon do ulaonna. Ala tobok ni rohana, sai dituluthon do halak molo adong marnida ibana mulaulaon, betak tung adong nahurang suman asa dipaingot ibana dirohana.
Sipata adong do najuit manjekjehi ibana diulaonna i, nang pe naung suman sai ditihai paula songon na mangajari tu na toho, hape lehe do pandohan ni halak najekjek i, ujungna loja ma ibana dung dipatingkos naburju roha muse.

Di sada tingki, tuat ma ibana sian dolok ni Habinsaran laho manggadis kopi tu Toba. Halode do dibahen manuhuk boanboanna. Angka donganna na asing hoda do dibahen, hombar tu tuk ni sinadonganna. Diampehon ma boanboanna i tu tanggurung ni halode i laos dirahuti asa gopas dirohana, hape dung mardalan halode i, runsur ma boanboanna i laos mambal ma dohot halodena.
Adong ma halak pamolus marnida, dipinsang ma ibana; “Oto ma hamu da ale, ua rahut ma sada nari goni na dos dokdokna, ampehon ma goni nadua i tu tanggurung ni halodemi, sada disiamun sada dihambirang”, ninna pamolus i. Dung mangulon ibana sangombas, ditipani ma hata ni pamolus ondeng; “Adong tutu tohona”, ninna rohana dibagasan. Dibuat ma goni sadanari sian hajutna, digohi ma rihit, ditimbang dos dokdokna dohot kopina i. Dibahen ma songon binegena sian pamolus i, ujungna hot ma tutu pardalanna agan pe lam soratan halodena i.

Mamolus ma ibana sian sada inganan na tar godang pangisina. Disise angka na di dalan i ma si Sahat. “Bah, ai aha do binoanmuna i ale amang”, ninna nasida. “Ah kopi do i tulang”, ninna huhut dinunuti mardalan. “Ah, tung ramosan do huroha kopimuna i pola soratan halodemi mamboan parbuena maradu naeng masuak hau tanggurungna”, ninna panise na asing.
Mengkel supping ma si Sahat dibagasan rohana; Apala naoto do huroha angka jolma on, ia kopi i duansa, hape so diboto rihit do i sagoni, ninna huhut dinunuti dalanna. Dibagasan rohana dang adong be nahumurang angka pangulahonna i, ai angka pujian nama dijalo sian angka jolma nilaosanna i.

Dung lam dao pardalananna, nunga loja dihilala jala halodena i pe nunga songon na mambal mardalan ala ni soratna manuhuk boanboanna i. Dipahombar ma tu sada bona ni hau na tar rugun bulungna parlinggoman maradian. Dung dipatuat ibana boanboan ni halode i, dipillit ma inganan laho hundulanna, hape sian na so diparrohahon hian nunga adong dapotna disi sada halak baoa tarpodom huhut dilangkophon tahulukna tu bohina.
Tarsunggul ma baoa i di haroro ni si Sahat tu lambungna, huhut disise ma ibana.
“Ise do hamu, sian dia, laho tudia, aha binoanmuna?”, ninna manungkun si Sahat. Songon na mogap ma si Sahat umbege doras ni sungkun-sungkun i, alai di pasabar do rohana mangalusi.
“Ia goarhu si Sahat do marga Tanjung, sian dolok an do ahu laho tu Toba an mamboan kopi, ninna ma mangalusi. “Ia hamu ise do sian dia laho tudia?”
“Ia ahu si Sarli do goarhu marga Silaban, di Siborongborong do hutanami, holan mardalani do ahu tuson mamereng angka luat humaliang”, ninna mangalusi si Sahat. “Tung godang ma kopimuna i, pola soratan halodemi manuhuk, tung so asi do huroha roham holan laho mangadu hepeng tuhor ni kopi i”, ninna si Sarli ma tu si Sahat.
Ala tulus ni rohana dipaboa ma na holan sagoni do i kopi, rihit do i sagoni holan timbang sidokdohi do i. Ditagam rohana do dapot pujian ibana sian si Sarli ala ni bisukna, alai balik na do ro.
“Bah, tung ho nama huroha naummoto ni jolma. Ianggo holan mambahen timbang dosna do, ua apala kopi i bagi dua tu goni na sadanari, nda hot ma borat ni kopi i hallungon ni halodemi?”, ninna si Sarli. Bah, tahe toho do nidok ni baoa on, ninna rohana.

Ala marningot nabisuk do si Sarli sai disungkuni si Sahat ma angka habisuhonna i. Hehe ma antong rak ni si Sarli paboahon sude hamaloonna, habisuhonna, hapistaronna, boi diraksa banua ginjang, ditorsa banua toru, dijaha banua tonga, bilang ni dolok dohot bolak ni tao. Pangalaho ni jolma, dorbia dohot suansuanan. Tarsonggot ma roha ni si Sahat ala didok si Sarli diboto do mambahen ramos marlompit ganda parbue ni kopi.

Maradu so diingot si Sahat be naung leleng ibana namangulon i holan ala ni lengen ni parbinegeanna di angka torsa habisuhon ni si Sarli i. Ianggo tung on, didok rohangku on nama jolma naumbisuk ditanoon, tuson nama au marguru. Sadia dao pe hutana tung ingkon huebati nama asa huida jolo sude angka parbue ni hamaloonna i laho tiruonhu, ninna rohana dibagasan.
Disungkun ibana ma si Sarli: “Didia ma lae hutamuna asa hupangguruhon jolo parbue ni naniulamuna i, anggiat lam tamba parbue ni kopinami on”, ninna. Tarsonggot ma si Sarli, alai dialusi ma si Sahat. “Holan ruhutna do huboto, alai ianggo mangulahon ndang hea sanga dope”, Ninna.
Marsak ma si Sahat umbege alus ni si Sarli i, hehe ma ibana, diampehon ma kopi dohot rihit i tu tanggurung ni halodena i. Hobas ma ibana huhut didok tu halodena i; “Umpistar dope hape au dohot ho halode, so taboto ruhut alai taulahon”, ninna huhut ditinggalhon baoa i.

(ide : Ir Tahsin Tanjung)

About these ads