Monang Naipospos

Baliga binaligagon, barita binaritahon….

Adong ma ninna si Hendry Lumbangaol di sada inganan marbalokhon Pakkat tarsoding pareak harangan. Disi jongjong do sada Singkola Dasar, ima nasomal didok SD. Ndang apala sadia anak singkolana, jala guru pangajari pe ndang piga.

Marhatohoan pangisi ni luat i angka marga Marbun do dohot Sihotang. Guruna i pe tong do Marbun. Molo tung adong pe sian anak singkola i marga na asing ba, na marhatohoan ma angka bere ni luat i.
Ompu Jatingkos do guru nalumeleng disi jala nunga pareak pensiun. Sugari pensiun ibana olo ma holan sada guru pangajari di singkola i.

Jotjot do sai jolo minum tuak Ompu Jatingkos asa masuk tu kalas laho mangajari. Napistar do Ompu jatingkos, alai molo dung dirajai tuakna ibana, olo ma dang diboto na mangajari maretong do ibana manang marpoda.

Mabiar do si Garja dohot si Jongga mamereng guru on, ala dihilala roha nasida tung jungkat do. Hea do disonggahi nasida nadua, ala hea dialo guru i.

“Ai na so diajari amam do ho? Ai boha do partaromboonmu tu ahu?”

“Marbapatua do, bapa”

“Ima hape, boasa mangalo-alo dope ho”, ninna huhut dipastap hurumna sahali be.

Hira nadua on do naummalo maretong di kalas i. Jotjot do dapot punten nadenggan nasida 6 manang 5,5. Alai molo pandok ni guru i, molo na malo ingkon sahat tu punten 7 do. Molo punten 8 guru nama i, ima au. Molo ummalo hamu sian ahu, bah hamu ma gabe ahu, ba ahu ma gabe hamu, ninna do.

Maretong ma diajari dakdanak i di sada tingki. Nunga diboto dakdalak i naung hona guruna i, jala hosana pe mansai bangkos ala ni tuak.

Huhut redem simalolongna, disungkun ma dakdanak i. “Sottoh sssoaal”, ninna huhut dihindat tangganna nanget.

“Molo dao ni Pakkat tu Medan 380 kilometer, dao ni Medan tu Binje 80 kilometer, sadia leleng ma dalanan i molo hatop ni pardalanan 46 kilometer parjom”, ninna tu angka anak singkola i.

Hatop ma si Garja dohot si Jongga mangetong.

Toppu ma martudu si Garja, lao mangalusi sukkun-sukkun i, dibereng ibana tu meja bariba, sai maretongi dope si Jongga. Diloppiti dope jari-jarina, jala songon na marhusip-husip simangkudapna. Mekkel suping si garja ala dihilala ibana ummalo saulak on.

“Sampulu jom gurunami”, ninna ibana.

“Bah, boasa sampulu jom, ai nantoari pe au sian i, dang adong nanggo sampulu jom, patorang jo”, ninna guru i.

Humitir ma Garja, dibaen ma nabinotona, songon na hatop disurathon di papan tulis i, jala dapotsa 10 jom.

Diapusi guru parmabuk on ma matana, sai dipanotnoti papan tulis i. Marpingkir ibana muse. Diingot ibana ma nantoari, adong mandok tu ibana, ai lima jom do tusi, hape didok Garja dang lima jom alai 10 jom do. Ise do halahon nadua pargabus nuaeng, ninna rohana.

Dungi, martudu ma muse si Jongga.

“Dang sappulu jom guru, sia do, sia jom do”, ninna

“Bah sian dia dapotmu i, unang pajago-jagohon ho”, ninna.

Dialusi si Jongga do guru i, dipatorang ma antong denggan. Didok ibana andorang naeng sahat tu Medan, adong dongan ni ibana mamolus, kebetulan markareta, gabe di bonceng ma ibana, ido asa gabe sia jom.

Didok guru parmabuk i ma mandok nasida. “Ise do hamu nadua na toho, nuaeng, ise do na manggabusi au”, ninna.

Humitir ma nasida nadua, ai diboto molo margabus nasida, ba, olo mallapak balobas ganjang tu tanggurung i.

Botima i guru nami, ninna si Garja. “Ai na mardongantubu do hami, bah songon nidok ni situa-tua ma, ba manat mardongan tubu ninna, angkup ni i, satolop ma hami, sia satonga be ma hami”.

“Ido…ido…ingkon songon i do antong, unang marsigodangi, ai ido nang tona ni ompunta”, ninna guru parmabuk i mangalusi, huhut ma disuru nasida nadua hundul……

 

ide cerita : Hendry Lumbangaol

Baca Juga Guru Parmabuk cerita Adonia Sihotang

About these ads