Monang Naipospos

Ia Datu Paronggal nunga tarbarita di luat Sipadang Ursa. Malo do ibana mambahen taor jala malo manorsa parngoluon ni jolma. Paralamat pandang torus do ibana si deak boto-botoan. Hira so adong dope na mulak parsahiton ni halak naro so jolo malum sian tanganna. Holan sada do holso ni rohana di ngoluna, ima dongganna sada datu sian hombar luatna Dolok Sinungka, ima Datu Panusur Enggang Banua.

Di sada tingki tandang ibana di luat Siampapaga Dolok, manghatiha ma ibana di desa naualu di jaha ni bindu matoga. Dipantom ibana ma pira ni ambalungan di tonga ni gorga pardesaan di alaman i. Ianggo sian hasomalan dohot hamaloonna mamantom dang adong latna so hona pira ni manuk i, alai tung di ombas on mangalbas do tunggal panaluan i tu duru ni gorga pardesaan.

Dia do rampe ni suhul hasangkotan ni piso di pandingdingan. Tung dia do ulaning silpe nu ruhut umbahen mampar pantoman sian alatan?. Tarnono datu Paronggal di namasa i, natorop pe longang. Mangaranap ma ibana humaliang, tarpaidasa ma Datu Panusur Enggang Banua huhut mengkel suping tu ibana.

Sar ma ninna barita, pur ma ninna alu-alu. Di luat Sipagongga ninna Datu Panusur pinadatu. Hinsat ma Datu paronggal laho tusi. Ianggo dison ibana ma maila bahenonhu, ninna rohana.

Ianggo pamotoan ni halak, tung margogo do Tunggal Panaluan, hape sasintongna datu i do namargogo. Marpaula ma Datu Panusur Enggang Banua marhusip tu Tunggal Panaluan i. Alai diboto Datu Paronggal do holan sipalensem ni nasida angka datu do i, ianggo hagogoon dohot habisuhon, songon i nang panurirangon di nasida do.

Dipantikhon Datu Panusur Enggang Banua tungkot i dilambungna andos so laho mamantom pira ni manuk di tonga ni gorga Bindu Matoga. Paula ma tar songon na di tatap humaliang, hape holan mangalathon atik adong do donganna datu di nahumaliang i. Pos ma rohana ala ndang adong tarpaidasa. Hape sian na so pamotoanna marholip-holip do Datu Paronggal dipudina papungu gogo. Nunga dipogo ibana tungkot i tung na so bolas mumpat sian tano.

Uju laho mamantom Datu Panusur Enggang Banua, diumpat ma tungkot i alai ndang bolas. Dibahen dua tanganna tong dang ra tolap. Hodohan ma ibana, diranap ma muse humaliang, dipatangkas muse, tarpaidasa ma Datu Paronggal huhut redem simalolongna juguk tar holang dipudina mangasa gogo mamogo tungkot i unang boi mumpat.

Hinait dangka bahen soban parbodarian. Sungkot langka, Datu Paronggal do hape marutiutian. Aha ma dalan asa malua sian pangujian? Dibereng ibana ma manuk napinadar dibagasan ampang ulian ni ibana dung sidung manurirang. Dialathon muse, nunga sai manjonok angka asu donok loloan i ala dianggo uap ni jagal. Digomak ma napinadar i, disampathon tu jolo ni Datu Paronggal. Marnida i, marlojong ma angka asu i huhut masiorsongan tu jolo ni Datu Paronggal. Tarsonggot ma ibana ai dirimpu ibana do niorsong ni angka asu i, mangambur ma ibana marsiding. Tep, manigor diumpat Datu Panusur Enggang Banua ma tungkot na tarpogo nangkin, laos dipantom ma pira ni manuk i… hona.

About these ads