RUHUT MAMUNGKA HUTA DOHOT JABU

Bonar Siahaan

“Ganjang pe banjar ganjang, mandapot di Raja Huta”. “Bolon pe rumah gorga, mandapot do di jabu bona”.
Poda umpama ni natua-tua najolo mandok: “Sai tubu anak sipungka parik, sai tubu boru si hodohon hudon bolon”.

Ia anak sipungka parik, sai anak nabegu do i, jala na todos di ari. Ai molo mamungka huta jolma najolo, nungnga adong sangkap dohot tujuanna, lumobi di tano nagonting, pintor adong do alona. Songon on ma hinadokdok ni na mamungka huta. Undungna jumolo dipajongjong, hadudu tarupna, hadudu dohot dorpina, manangkas do tu tano podomanna, dung i muse sai godang dope binatang harangan disi.
Patik ni pungkaon huta; Nang tung godang batu di ingananna i, dang boi pintor boi i bahenon gabe dalihan, ingkon hau do jolo pantikhonon, i ma na nigoaranna “Balikkuhu”, mangalap sian balikkuhu do dalihan natolu. Ai ianggo somalna lima dalihan najolo.
Dang na mangarehei angka panurat dohot angka siboto adat hata on, ala na songon on ma umbahen salpu-salpu sinurat ni panurat. Songon bangko ni asu, ala dang borhat sian Si sia-sia ni hata Batak dohot Adat Batak. Nungnga nian haruar ditaon 1965 si sia-sia ni hata Batak dohot si sia-sia ni “Gumbal” (Pargolatan) ni halak Batak, alai dang ringkot mangguruhon. Sai umpama dohot umpasa do dilului, hape dasor ni umpama i, dang diguruhon, gabe godang ma sala mamangke. Tabo dibege sipareon, alai tujuan ni hata i di na mangantusi (datu panusur) nungnga tu ulaon na humurang “tondi” di pandohan i, dang martondi hata i, gabe mangulpuk ma datu tu suhut dohot tu raja namandok i. Alai ianggo nagalia, dang lolo horja godang, ia so jolo ro Guru Bisara mangadopi ulaon i, ai i do na gabe panurirang najolo. Dang songon sinuaeng on, jahul petaho, barat pe taho, di olophon suhut do.
Asa ianggo najolo naung pinillit ni horja do naboi mandok hata, dang masa manjukjukhon dirina.

Hak Ni Parhutaon.

Dung dipukka parik pintor disuan ma bulu, disuan ma hau, disuan ma bangun-bangun. Umbahen na pintor disuan bulu dohot hau, asa pintor tanda do ibana siusung bunti (bukti) tu huta i manang na ampuna huta. Ai manang ise nampuna bulu dohot hau, ibana do raja huta di huta i. Marlapatan do bulu, molo bulu duri, bulu ni anak nabegu ma i, bulu suraton, bulu hariapan ma i, alai bulu godang, bulu ni raja huta do i. Dang barani jolma mambuat bulu godang manang tubisna, ia so jolo dipangido tu nampuna bulu i, ima hasurungan ni bulu godang. Alana molo soada do bulu godangna, dang targoar i nampuna huta.

Patik Ni Raja Huta.

“Ganjang pe banjar ganjang, mandapot di Raja Huta”. “Bolon pe rumah gorga, mandapot do di jabu bona”. Asa manang aha pe ulaon di huta i, dang tarpajadi i, ia so jumolo disukkun Raja Huta. Manang gabe pe, manang mora halak, dang boi joloanan Raja Huta mangkatahon parbue manang napuran pelean tu Debata. Sian Raja Huta do muse pilliton nagabe Raja ni Bius, jala ido naboi manullang horbo bius dohot horbo satti.
Alai ditingki on nungnga mumpat tuhe, nungnga sesa gadu, nungnga muba uhum, dung tuat sori dalu ni Bolanda, songon naung sinurathon dibaritani si Sarbut Tampubolon, taon 1982. Asa manang ise namar ale-ale tu soridalu ni Bolanda najolo, i ma naboi pabalik uhum dohot manengsang adat. I do umbahen na boi nuaeng nang boru gomgoman mangkatahon parbue di parbiusan.

Sihodohon Hudon Bolon
Ia boru sihodohon hudon bolon, ruhut tu harajaon ma i, panggalangon ma i, jala sian dia ma boi ibana manggalang ia so adong indahanna dohot juhut tanggoanna. “Holit mula ni hamoraon, panggalangan mulani harajaon, hasingalon jumadi hatangkangon”.
Nungnga tangkas dipatorang hata on di Sitombuk Surik tahun 1965, bonana dohot ujungna. Asa saut tahi nadenggan, ingkon adong do na olo manggalang. Songon mamungka bondar rupani, laho mamungka galung (hauma), ido umbahen jumolo tapian dilului asa huta dipukka, ido alana umbahen dos dipadomu parik tu hudon bolon.
Di indahan do na upa na pande, napantas marboru, siparosu ale-ale, sipasorta hula-hula. Asa rosu na marale-ale, ingkon masitopot-topotan do i disipanganon, asa sorta marhula-hula, tagilon do juhut tu hula-hula. Asa tek-tek do mula ni godang, serser mula ni tor-tor, siup mula ni tabas, buhu mula ni pollung, indahan mangula adat, juhut mangula uhum. Hombar tu angka i “tradisi” ni halak Batak dohot ruhut pandohan ni pasu-pasu.

Bangun-bangun.

Dang pola ganjang be patorangon taringot tu bangun-bagun, na padiri tu haroan do i, jala na pinatomu do i tu hata ni tonggo-tonggo manang tangiang tu Debata, asa pintor tibu ro haroan.

M A M U K K A J A B U

Godang ruhut ni namamukka jabu, na deba olo songon na mamukka huta, jolo dirobo manuk diampang (tondung) ingananna dohot manang siadop dia bahenonna. Dung tulus sangkap i, diririt ma hau di harangan. Jumolo ma tustus diririt, dung dapotna, dililit ma hau i, manang ditallik-tallik humaliang paima disuru tukkang martaba, ima na margoar lilit, dos ma i dohot na manandehon sige tubona ni bagot, nungnga di-oro hau i, manang bagoti, sada patik do i. Tallik (lilit) mangoro hau, sige mangoro bagot sinamot mangoro boru manang tanda hata, ima tuhe sigaton, batangi dapoton.
Sai jumolo do tustus mardalan dibuat, asa hau na asing, asa pintor lintas (tiur) jabu i paulion. Dibunti i do i, lapatanna: diboan sagu-sagu dihatahon do i tu nampuna harangan i, jala hatana didok ma: “Diho do bonana, diho do punsuna, tonga-tonga na do dihami”, ninna.
Marnappuna do tombak i jala adong do parbalohan ni ganup tombak, dang boi buaton ni halak na asing hau tu tombak ni halak, ia sojolo mangido tu raja ni luat i, jala mangalehon bunga hau do i.
Hinorhon ni na masihotang najolo sian Lumban Julu Sipahutar tu dolok Saut Pangaribuan, gabe pul ma parmusuan ni Lumban Julu tu Lumban Sormin. Ala Ompu Soduduhon Pakpahan do Raja di Lumban Sormin, jala guru Sumillam Raja Lumban Julu, gabe raja nadua on ma manuhuk gora ni na nirajaannana uju i. Jala ima bingkas ni porang Bolanda tu Lumban Julu Pea Linta Sipahutar, barita ni si Sarbut Tampubolon.

Maniktik

Dung laho sude parhau i jala nungnga sae dibahen tiang-tiang, manuhil ma. Dipaturut ma tiang i dipapillithon ma tu suhut manang dia jabu bona, jala dipapillitton ma tu natorop manang dia jabu bona. Dipillit tukkang ma di ibana, di tiktik ma tiang natolu i sada-sada, maralatan ma ibana.
Molo pinillit ni natorop do adong hombar, ni ulpuk ma masa gora ni begu manang gora ni jolma. Molo pinillit suhut do hombar, tusuhut mangupa (manaem). Molo pinillit ni tukkang do hombar, tukkang ma maneam. Jala ima asal usul ni hata Batak na mandok: “Sitiktik sigompa, golang-golang pangalangguna, otik pe pinatupa ni inanta i, tu godangna pinasuna. Ia gompa, suhul (gagang) ni tuhil do i, jala gomal, golang-golang, ima sampok ni tuhil i. Jala manjalo tiktik tiang ma tukkang disi. Hata pasu-pasu disi holan manggabei suhut dohot tukkang dope, hata disi asa hipas-hipas suhut dohot tukkang unang marmara, jala asa lu pangomoan. Hombar tusi ma umpasa dohonon.

Paraithon

Dung sidung hau i hona tuhil dohot jongjong, paraithon ma. Manjalo jongjong rait ma tukkang, jala hata pasu-pasu sian na torop hombar tu hata rait ma, manang nakkok dipanggabean, tu hata nakkok ma umpasa sibahenon.

Pamuli Tungkang

Dung sidung jabu i, di pamuli ma tukkang, jala ditulak ma hunsi tu suhut. Hata pasu-pasu tusi: “Naung parduru on gabe partonga-tonga, sideak pangisi, sitorop pinompar”, hombar tusi ma umpasa sieneton.
Ganup mangula siulaon halak Batak adong do digoari nasida na margoar “borhat-borhatna”. Haru patiur bondar adong do dibahen nasida borhat-borhatna. Tung sura adong na mamboan sipanganon tu bagas ni nasida, sitongka do ninna nasida molo so adong pinatupa ulakna manang borhat-borhat ni namamboan sipanganonna i. Hira na manalup do na ro i molo so dipatupa sisongon i. I dope na masa sahat tu tingki on. Molo so adong be tarpatupa, nanggo apala boras satangkar na ingkon do lehenon borhat-borhat ni namamboan sipanganon i (na mangebati jabu ni bagas nasida). Lumobi muse di na manungkangi bagas sibagandingtua ni ina, sipanguliman ni ama, na ingkon do suman bahenon paborhat tukang dohot pamuli tukang, asa si ripe gabe na mangingani bagas i si ripe horas. Di angka na mambahen na jagar pe tu angka ompu naung jumolo, molo pinature tambakna na ingkon do bahenon adat tu pande borhat-borhatna dohot adat pamuli tukang (pande).
Siingoton; Molo adong di nasida masa “gora tanga”. Ditungkangi pe undung-undungna ndang dipatupa nasida borhat-borhat ni tukang dohot pumuli tukang. Ai manangkas do na manalup nasida, jala sitalupon do angka si songon i.

Manopong-nopongi

Dung adong pitu ari, jouon ma natunggane mangan, 3-4 halak na so hea mabalu naung gabe ibana manang mora. Jala dung sidung mangan, mulak ma nasida, ipe asa boi marlaho-ro jolma tu jabu i, na pogos nang na dangol dohot na asing.

Parjambaran

Ia parjambaran, sirampas harajaon do i dohot jambar ni dongan tubu. Tukkang do sibagi i, ise sitiop jabu bona, ido nampuna tuk-tuk ginjang, jala sitiop jabu suhut, ido nampuna tuk-tuk toru, jala ondolan dohot ojahan (hae-hae), tukkang do nampunasa. Jambar ni natorop sian panamboli dohot hae-hae deba.

Mangompoi

Laho mangompoi, boi ma masiboan siluana be, hula-hula mamboan sipirnitondi, boru ale-ale, dongan tubu mangalehon pangurupion,. Umpasa sidohonon, boi ma patomu-tomuon hombar tu isi ni jabu, lumobi molo mangkuling ogung.

Ruhut Pauli Jabu

Ndang boi mamintor anak manjae, ia so jumolo mamungka bale-bale. Ingkon jolo ser-ser do asa tor-tor, dohot udutna, ima umbahen didok umpama: “Jolo marjabu bale-bale, asa marjabu sopo, jolo sian natunggane, asa tu naumposo”. Diruhut ni pangkataion jabu ruma. Molo marjabu ruma halak, naboi panungkunan ma i di indahan manang eme. Ido alana umbahen dibahen tanda-tanda ualu tarus ni ruma, paboa boi ibana panungkunan tu desa na ualu. Mangenet sian i ma goar Sibagot Ni Pohan, bagot, tarus manang tuak. Pohan, meme, poda. Namarlapatan do goar i sude. Ala tu bagot ni pohan dipasahat tu Tuan Sori Mangaraja batu hula dohot boni (eme) ima mula ni saba.
Umpama namardomu tusi: “Hotang sasa pangarahut ni ruma, tu porhis lumunta-lunta, dos do raja dohot namora, padenggan uhum dibagasan ni huta”.

Parbagianan Ni Jabu

Ia di jabu bona, anak siampudan. Di jabu suhut, anak sihahan, dijabu soding, sibitonga dohot dijabu sitappar piring. Jala molo tuk bahenon ni natorasna, jabu sopo di Sihahan, jabu ruma i ma di siampudan. Jala molo massitantanan marsisur-suran di jabu tiningggalhon ni natorasna, tama dapotan parbagian pahoppu sihahaan.
Ianggo adong do jabu ruma, sai tu jabu ruma ma hasangkotan ni ogung, jala dang marimbar pinomparna mamakke i, molo mamungkul ogung. Jala molo adong dope ruma hadomuan parsantian, sai disi do inganan ni Parsibasoan dohot Debata idup. Jala disi do manggohi parmiahan (Parsibasoan).


Bookmark and Share

Tautan ;
PAJONGJONG RUMA DOHOT SOPO
SOPO DOHOT ULOS
MULA NI GORGA BATAK
SANGKAMADEHA
MENYIBAK TABIR MENAMPAK ISI
hasil penelitian Sandrine Germain tentang Rumah Batak Toba
RUMA GORGA BATAK

27 thoughts on “RUHUT MAMUNGKA HUTA DOHOT JABU

  1. sian dia do diboto hamu sudeon alana di jaman saonari nungga jarang sumber-sumber na patolhas hon sude nai molo boi tulis hamu sumberna, buku. jurnal molo adong tolong kirim tu mail hu mauliate

    *** Dang tilushon dope i tu bukku, sian blog on ma putihi hamu ate.

  2. Ahu tinggal di Medan, jala marpindah pindah do tiap dua taon. Naposo dope ahu alai mansai hirim do roha laho marsiajar adat batak, 15 tahun di Jawa, sulawesi baru pe 2 tahun terakhir on mulak tu siantar dohot Medan..
    Sai anggiat ma lam maju PARTUNGKOAN…. Horas, haras, horas

  3. Molo ni jaha hatorangan na di ginjang, boi do i dang tarpatupa tarlumobi di pangarantoan tarlumobi ma i taringot ni na mangompoi jabu (marmasuk jabu ?), alana angka tukang nungga be digaji, boha do pardalan ni paradaton tu namangompoi jabu?
    Mauliate.

  4. Molo binereng angka paradongan namora i, olo do piga-piga hali mambaen ulaon marmasuk jabu ala lobi sian sada jabuna. Boha do sasintong na, boi do i manang holan jabu parjolo do?
    Mauliate

  5. a.tu lae ramlan sihombing;sian catatan ni natua-tua i do husalin,jala turun temurun do sian angka ompung manurathon angka namardomu tu habatahon.

    Molo soadong abat sinangkapan do mambahen buku namardomu tu habatahon,alai adong do biar ni roha molo soadong manuhor alana molo panurat hurang malo do i martiga-tiga.Autma nian adong dongan naolo pacetakhon asa boi holan manurat piningkiran.

    Horas.

  6. Tulisannya bagus dan dapat menambah pengalaman dan perbendaharaan adat batak. Lanjutkan menulis. Horas.

  7. Horas,

    Santabi tu saluhut, molo adong niambaan saotik:

    1) Parjolo ma mamillit partapahan, ia dung dapot i, dipasahat ma sombaan na tu ‘BORASPATI NI TANO’ (dewa penguasa tanah).

    2) Dipaborhat inanta parjabu bona ma angka parhau ni bagas (tukang/orang yang disuruh mengambil kayu untuk rumah). Dilehon do ‘Bunti’ dan persembahan berupa: dau sirih 3 helai, bunga, dan itak gurgur boanon ni angka parhau asa adong pasahaton ni nasida tu dewa BORASPATI NI RUMA, huhut mandok: “Asa tangkas hau marobo, jala ro siarum martunas. Asa dao andor na ambat, dao panggaran goligoli, dao pamgguluti; Alai asa manumpak Debata Mulajadi Nabolon, najumadihon anak tubu, boru tubu, nang parhorasan pardinginan”.

    3) Dung sahat parhau di harangan parjolo ma dilului hau na gabe TUSTUS (pohon yang paling besar, paling lurus, paling kuat dan paling bagus). Marsantabi ma nasida tu Ompung boru Sindardolok (Dewi penguasa hutan) huhun pasahaton pelean, ninna ma:
    “I ma da Ompung boru Sindardolok, dison huboan hami do parbue santi, santi madingin santi matogu, napuran saur rudang na jagar, dohot ringgit sitio soara. On ma pelean nami tu ho Ompung. Na maulae do hami Ompun di suan-suananmon, naeng paturehon asarasar nami. Ai gari amporik so martuhil so martangke di pauli do jabuna, apalagi ma hami on ale Ompung?
    Namaulae do hami Ompung sian hamu, anggo bonana dohot punsuna di hamu do Ompung, holan tongatonga nai do di hami. Bahen hamu ma Ompung partiuran parhorason, si gabe na niula si sinur na pinahan, dohot si torop ni hajolmaon”

    4) Tustus,
    Dalam rumah, tustus terdapat pada barisan tiang dalam. Ada dua jenis sesuai : TUSTUS UNJUR (membujur) dan TUSTUS BARAT (membarat/melintang). Tustus harus kayu paling kuat dan paling lurus, karena TUSTUS lah yang menjadi penopang utama bagian rumah mulai dari bawah lantai.

    Ido umbahen na adong umpama: “Songon tustus tulus, alai tustus do sitean na dokdok” manang “Tigor tustus didodoni”. Didok do i tu halak na burju tobok, tigor, tulus jala dang mandele manang mambalos natape dioto-otoi mananng diunjuni halak na asing.

    5) Martiktik
    On ma horja na parjolo na tardok paulihon/pajong-jong hon jabu. Mangaradehon angka tiang, manjojorhon, dan mamillit. diantuk ma sada-sada hau i, sian soara na i do gabe dipillit. Ingkon hau na ngiar jala tio do soara ni hau na laho gebe tiang tu jabu bona.

    6) Ndang marhunsi (kunci) anggo ruma Batak. Jala dang hea nibege Tukang pasahaton kunci tu suhut. Molo nga sidung ruma dipauli, Datu do maniti ari manang andigan masuhan na jabu i mangihuthon ‘porhalaan (kalender)’ dohot ‘Pane na bolon (semacam: zodiak)’.

    7) Borhat-borhat?
    Ndang pala tangkas aha maksudna di son. Molo dung sidung jabu dipauli (sahat tu dua bulan na naeng ro), tung naso jadi adong haruar sian jabu i manang aha. Sagari api sian tungku pe tung na so jadi lehonon tu hombar jabu; Mangan pe ingkon di bagas jabu do di tingki mamasuhi jabu. Molo torop do naro, gabe mardeba deba ma masuk laho mangan tu jabu. Tung naso jadi adong haruar aek, manang indahan sian bagas.

    8) Tolu ‘level’ do ruma Batak, ima namanggombarhon Banua Ginjang, Banua Tonga, Dohot Banua Toru. Banua tonga dibagi ma muse gabe: 1) Jabu Bona, 2) Jabu Soding, 3) Jabu Suhat, 4) Jabu Tampar Piring/Tampiring/Soding Jolojolo.

    Songon on ma parbagian na molo ‘Keluarga Inti’:

    a) Jabu Bona ( bagian sudut kanan di belakang pintu masuk). Diperuntukkan bagi tuan rumah/suhut/ayah bunda)

    b) Jabu Soding (bagian sudut kiri di belakang pintu masuk). Diperuntukkan bagi puteri tuan rumah yang belum menikah juga anak-anak /belum dewasa/belum akil balig.

    c) Jabu Suhat (bagian kiri di depan pintu masuk). Diperuntukkan bagi anak tertua yang sudah menikah.

    d) Jabu Tampiring ((bagian kanan di depan pintu masuk). Diperuntukkan untuk menyambu tamu.

    Masa do sada jabu diingani lobi sian sada keluarga digoari mai ‘BAGAS RIPERIPE. Parbagaianan dison dimusyawarahon do, sebelum pajonjong jabu. Sude biaya di mula na ditanggung par Jabu Bona, dungi rap mananggung.

    ) Dua do natardok jabu anggo di halak Batak, ima: 1) Sitolumbea 2) Sisampuran/ Sibaba ni Amporik.

    Perbedaan utamanya adalah: pintu dan tangga.

    Ruma Sitolumbea, Tangga dan Pintu berada di dalam (tangga: antara tiang depan dan tiang dalam; pintu: di lantai). Ruma sitolumbe on do na paling lengkap, jala digoari do on sipata Ruma jantan.

    Ruma sibaba ni Amporik, Tangga dan pintu berada pada bagian luar. (Tangga: di muka tiang paling depan dan melekat pada ambang pintu; Pintu: terletak pada dinding muka). Ingkon manuruk do jolma molo naeng masuk tu bagas.

    Sopo, joro, dohot ruma saruangkola, dang ‘tergolong’ I sebagai ruma/jabu Batak.
    ============

    Raphon holong

    Sidabutar

    sumber utama:
    Rumah Batak Toba, oleh: Pastor Tano Simamora

  8. @ Rimhot Sidabutar
    Mauliate di hatorangan muna i,sai anggiatma gabe lamtamba angka pangantusion dihita ganup. Dang apala hea hubege ruma “sitolumbe” (sitolu bue?) di goari ruma jantan,alai molo jabu ruma digoari “simanguliman” jala jabu sopo digoari “siatungkolan”
    Sahali nari mauliate dipasahat roha tu hamu.
    Horas.

  9. Horas tu Amang Siahaan,

    Adong tutu na pilit di surat hu na parjolo.

    Masuk tu ruma Sitolumbea do na ingkon jolo manuruk iba tu bagas,

    Ruma Sisampuran/sibaba ni amporik do na ‘berjenis kelamin jantan’, anggo Ruma Sitolumbea ‘berjenis kelamin betina’ do.

    Adong do di:

    gombar na suman tu ruma Batak (hudok suman, ala di gombari ‘seng’ do tarup na, hape anggo ruma aslina sian ‘ijuk’ do anggo tarup.

    Anggo mamereng sian balatuk dohot pintu na, gombar no. 1 & 3 ma Ruma Sitolumbea; ruma no. 2 & 4= ruma sibaba ni amporik.
    =====

    ‘Sitolumbea’ didok ‘berjenis kelamin betina’ ala na masuk hubagas do balatuk na, jala pintu na rata tu lante.

    ‘Sibaba ni amporik’ didok berjenis kelamin Jantan di luar do balatukna, manggantung jala longkot tu dinding di jolo ni pintu.
    ========

    BEA , adong do hubunganna tu ‘BAO’, i ma nampuna adat parsaoran na khas, na ingkon: PANTUN, HORMAT, jala BIAR. Las on ma na patuduhon ‘kosmologi’ ni BANUA GINJANG, BANUA TONGA, BANUA TORU’.
    ========

    Songoni ma na boi pinasahat tu hamu. Mauliate ma.

    Raphon holong,

    Sidabutar

    p.s..

    Atik boha olo hamu manjaha buku karangan ni Pastor Tano Simamora i, bulan Agustus on mardalani do ahu tu Sianjur Mulamula, jala singgah do tu Museum na adong di Gereja Katolik Pangururan, hutuhor pe sada buku i, jala hukirim pe tu hamu. Tulis hamu ma alamat na lengkap.

    Anggo menurut hu, i dope buku na mambahas RUMA BATAK TOBA na paling lengkap, lengkap dohot gambar dohot sketsa item per item.
    ==
    =========

  10. Amanta Rimhot Sidabutar

    Mauliate di rade ni roha muna naolo manghalojahon (mangkirim buku sijahaon namardomu tu “jabu ruma”,mansai las roha molo adong dapot jahaon anka buku namardomu tu “habatahonta”.
    Molo alamat hu bereng hamu ma di blog on di sosok dan perilaku lengkap do dohot no hp & e mail.
    Sahalinari mauliate pinasahat tu hamu.

    Horas.

  11. Amanta Rimhot Sidabutar.

    Nunga sahat tu ahu buku nakinirim muna i,jala holan sekilas dope hujaha. Alai godang do na marasing sian ruma batak naadong di daerah balige,jadi molo dung tangkas hujaha paandaron ma di blog tanobatak on manang dia parasinganna.

    Marhite on hupasahat mauliate tu hamu.

    Horas.

  12. Halo… saya seorang arsitek yg sangat tertarik dengan khasanah arsitektur tradisional indonesia. Hanya saja sayangnya tulisan ini dalam bahasa batak, sehingga saya tidak mengerti. Saya sangat berharap tulisan ini dapat diterjemahkan dalam bahasa indonesia, sehingga akan lebih bermanfaat bagi kita semua, bangsa indonesia. Atau paling tidak tolonglah saya di beri rujukan siapa kiranya yang dapat saya jadikan tempat untuk bertanya lebih jauh tentang khasanah arsitektur Batak. ( kontak email saya: priyadi_d_n@yahoo.com ) Terimakasih.
    Horas!
    _
    **** Sebenarnya ada tulisan bahasa indonesianya pak. Bila ingin konsultasi secara ilmuah tentang ini dapatmeng hubingi Sandrine Germain dr Prancis. Dia S2 Arsitektur dengan thesis rumah batak.lamamelakukan penelitian di tanah batak danbisa mengukir. Dapat konsultasi di Facebook-nya. Atau klik ENCOPAC di sidebar blog ini menemukan situsnya

  13. Horas lae
    molo mamasuki jabu,mamestahon jabu,mangompoi jabu,partangiangan mamasuki jabu ,dia do beda nion sude gabe bingung angka iba jala adong mandok molo mamestahon manang mamasuki jabu sude angka naro mandapot pansituak natonggi,jala molo adong dibahen sijagaron (tudu2 ni sipanganon hasahatan gabe tu tulang ni namamasuki jabu,munkin boi patorangon muna ate lae
    mauliate

  14. @ Huntal Marpaung

    Nahuboto dang mangalean pasituak natonggi hasuhuton, alai molo mangarajahon parhutaan mangalehon “upa panggabei” ma hasuhuton.

    Molo adong mangalehon pasituak natonggi tingki mamasuhi jabu holan naeng pataridahon haboion do i, hape gabe “maringkat-ingkat nadijolo mangihut-ihut nadipudi”.

    Taringot tu tudu-tudu ni sipanganon dang sarupa i diganup luat, ai jot-jot do marasing nang parjambaran diluat ni hita batak.

  15. Mauliate, alai lae hea huihut hon ulaon mamasuki jabu ris do sude jolmai dapotan passituak natonngi,alai adong dope nasohuantusi beda ni :partangiangan mamasuki jabu,mamestahon jabu,mangompoi jabu, molo diulaon ni halak batak mauliate ma lae

  16. @ Huntal Marpaung
    Dua bagian do horong ni siulaon di hita batak.
    a. Loloan Mangajana (ulaon parolop-olopon)
    b. Loloan Maujana (Ulaon na marhabot ni roha), nunga dohot ulaon “partangiangan” tu loloan maujana.

  17. Santabi ma dihamu angka dongan namangalehon roha dohot pingkiran taringot tu ruma batak adangdo saotik sidohononku taringot tu ruma jantan alai anggo dihutanami didokmai ruma tuggal.ia ruma tunggal on ndang sarupai tu ruma sibabaniamporik alana pintuni ruma tunggal ndang sisuruhonni songon pintuni ruma sibabani amporik.jala ndang sude jolma boi pajong-jong ruma tunggal ingkon halak na sang do naboi pajong-jong rumai

  18. mauliate godang amang di sude akka info muna on…
    anggiat lam ni anttusan..
    amang,,nga adg bukku ni on??
    didia do tuhoron on??
    mauliate..
    horas…

  19. Situs on asa dikelola muse ma nian dohot angka kekayaan budaya batak, manang angka filosfi kehiduapan, sai anggiatma ringgas angka naposo manjaha lumobi na di pangarattoan Ayo…. ! maju terus sebarkan kebudayaan batak supaya orang lebih mengenal Nya.

  20. @Hermanto Tambun. Dang terbit dope bukuna….mangarumbung dope asa boi umbuk tu Ruma dht Sopo. Horas

  21. ito Priyadi, argado ilmu, bah molo naeng marsiajar hamu sila datang ke tanah batak, molo naeng marsiajar bahasa batak bah mardongan ma hamuna antong tu halak batak, dangi? unang porlu ilmuna di hamu alai di jolma tak, naboha do itoanon, ? tanda hiansileban,holanuntung do dirimangi alaidang olorugi/modal

  22. Bonar Siahaan.
    bah boasa mabiar hamuna dang laku buku naditulis munai? bah otik majo antong cetak ito dijual di Fb kan bisa to? dititip di gereja2, baenma antong no.HP manang email, dangi? mol ito olo berkorban untuk kebaikan sai nadapotan uli dohot tua do ito sian Tuhani, emma tutu

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s