ANAK TUBU BORU SORANG 4

Penulis : RB. Marpaung

SIBUHA-BUHAI

Dialap manang ditaruhon jual, sipatupaon ni paranak do sibuhabuhai, alai molo naung hea muli do boru na marunjuk i, ndang sipatupaon be sibuhabuhai, ai tung na maiturun pe boru i, gabe sirang nunga naung dijalo huta ihur-ihur siboaboai. Molo adong pe na masa ditingki saonari on na so patupa sibuhabuhai ala na so haru diantusi be lapatan ni ulaon UNJUK.

Manganhon sibuhabuhai pe ndada sipanganon tulbu i, holan hasuhuton do dohot tutur na solhot dohot dongan sahuta, manganhon i. Nuaeng on molo so dialapi manang marpaima suhut laho manganhon indahan sibuhabuhai gabe sarita bolon ma i tu hasuhoton. Ima na umbahen gabe lam masursur adat i.

Sibuhabuhai dibagasan jual do i marlapikhon ampang. Na marlapatan do i tu hata SUHI NI AMPANG NA OPAT, alana ampang i do sanggul ni siulaon (partanda). Molo sibolang tutup ni jual nunga dipatuduhon tutup ni jual i lomuk ma na gabe parjuhut, molo ragi hotang tutup ni jual ima patuduhon sisemet imbulu (lombu) parjuhut, pinunsaan manang ragi idup ima patuduhon sitingko tanduk parjuhut, jala boru tubu manang iboto ni pangoli do sihunti jual.

MARUNJUK
Dung simpul marsipanganon dohot marbagi parjambaran hombar tu hapeahanna be, marlolo ma angka raja dohot suhut, suang songon i na ginongkon ni suhut paranak dohot parboru, ima na ginoaranna na humaliang na humaloho. Holan di ulaon unjuk do dapot i, alana paranak manggongkon hula-hulana, boru, dongan sahuta, ale-ale dohot tulang rorobotna. Suang songon i nang parboru sarupa do panggongkon ni nasida, tamban i rap marsuhi ni ampang na opat.

Suhi ni ampang na opat sian paranak:
PANGAMAI (Bapauda manang Bapatua)
PANGGONGKON (Haha ni pangoli)
PAROROT (Namboru ni pangoli)
SIHUNTI AMPANG (Iboto ni pangoli)

Suhi ni ampang na opat sian Parboru:
PAMARAI (Bapa uda/Amang tua sijalo pai dua ni sinamot)
SIMOLOHON (Ibotoni na muli)
PAROROT (Namboru ni na muli)
TULANG NI NA MULI (Sijalo sinamot paidua)

Dinamarlolo angka raja dipatupa paranak ma Pinggan Panungkunan na marisihon:
Boras Parbue Santi
Tanggo-Tanggo (Ungkapan)
Napuran Sitopakon
Ringgit (Hepeng)
Gambiri (Miak-Miak)
Polin do ringgit na di pinggan panunghunan i jambar ni parboru ndang dohot paranak nampuna i (marbagi).
Dung dipasahat paranak tu parboru asa dihatahon nasida: “Masisisean ma hita raja ni boru nunga rade hamu”?

Paranak:
“Ima tutu rajanami nunga rade be hami”. Jala laos songon boa-boa do i tu situan natorop asa martangi-tangian.

Parboru:
Gokhon sipaimaon jou-jou sialusan di na ro gongkon dohot ontang muna tu hami di antaran na bidang on, hundul hita di amak tiar, tiar ma panggabean, tiar ma nang parhorasan gabe ma na niula sinur na pinahan. Nunga pinangan indahan na las hinabosurhon, pinangan lompan na tabo hinasagathon, pamurnas tu daging ma i saudara laho tu bohi, sipasindak panaili ma i sipaneang holi-holi. HORAS ma hami na maganhon tubu ma singhat ni marlompit ganda di hamu na patupahon.

Dison pinggan puti, pinggan na hot di hundulanna, asa puti ma di hamu so haliapan, puti so hapurpuran panggabean parhorasan di bona ni hasuhuton tu joloan ni ari on.
Dison parbue santi parbue bota-bota, boaboa ni jolma gabe ma i, boa-boa ni jolma mamora, di bona ni hasuhutonon di hela dohot borunami sahat tu joloanon.
Dison tanggo-tanggo na godang, boa-boa ni haroan ro. Haroan ma antong marharoan muse di bona ni hasuhuton, di hela dohot di borunami sahat tu ari na mangihut.
Dison napuran sitopakon sai topak ma anak tubu, topak ma boru sorang di bona ni hasuhuton, di hela dohot di borunami sahat tu ari na naeng ro.
Dison ringgit sitio soara, asa tangkas ma uju purba, tangkas uju pastima, tangkas ma na maduma, sai tumangkas ma na mamora di suhut sihabolonan, di hela dohot di borunami, pinasu-pasu ni raja, pinasaut ni Ompunta Namartua DEBATA
Dison gambiri simarmiakmiak, miak-miak mahasa, asi ma roha ni Ompunta na martua DEBATA sai dimiahi ma hasuhuton on, songon i nang di hela dohot diborunami sahat tu pagian ni ari. Hata ni i paboa paidua ni suhut.

Paranak:
Ia manise ma hamu rajanami di sise ni indahan masak dohot lompan na tabo. Sitiktik ma rajanami marsigompa, golang-golang ma pangarompuna, tung songon i pe na tarpatupa hami, panggabean parhorasan ma pinasuna. Tumpak ma tondimuna, sai gabe ma na niula, asa adong habosurhononhon, sinur ma na pinahan asa adong hasagathononta
Ia nunga tording-tording didok hamu songon na mamilangi, jojor bona songon na manuani. Taringot tu pinggan na hot di hundulanna, hata ni gabe-gabe horas-horas do hata ni rajanami

Parboru:
Ba ido hape raja ni boru gabe-gabe do hape angkup ni na horas. Asi ma roha ni ompunta DEBATA tumpak ma roha ni uhum dipasaurhon ma tu hita sigabe-gabe si horas-horas. Alai marangkup do na uli mardongan do na denggan siudur na songon na mardalan siangkup na songon na hundul, siudur ni na uli angkup ni na denggan, tangkas ma paboa hamu sitangihonon ni sipareon sipeopon ni roha di antaran na bidang di bisara na godang on.

Paranak:
Olo ma tutu rajanami manungkun ma hamu digok ni na uli di saur ni na denggan siangkupna songon na hundul siudurna songon na mardalan, songon gaja maradu songon dengke mudur-udur paboaon ma rajanami.
Ia diari na salpu i, mardalani anaknami tu huta ni raja i, pajumpang ma dohot boru ni rajai i, masipaidaan ma nasida di rupa, masi botoan di roha, unduk masioloan ma nasida. Marunung ma hami di boa-boa ni anaknami na olo do boru ni raja i pangunsandean ni anaknami songon hariara na bolon, songon pasi ni sopo gorga. Molo boru ni raja na sumurung na gabe jala namora alapon, ingkon sombaon do raja i dohot jari-jari sampulu lapik ni tapian sitio-tio, di bisara na godang di antaran na bidang, huhut mangido pasu-pasu sian raja ni hula-hula, dongan tubu, pariban, dongan sahuta, ale-ale dohot boru, asa manggabei manghorasi nasida pasauton ni ompunta DEBATA, i do hatani i rajanami.

Parboru:
Ido hape raja ni boru, di ginjang bogas ni hora, di toru bogas ni gaja. Anak ni namora do hamu, pomparan ni raja. Uli do nipinami olo anakmuna marhaseang borunami. Nang pangidoan tu ompunta DEBATA sai marrongkap ma nasida songon tuak marsibar songon ambalang rongkapna gabe ma borunami i, rongkapna horas.

Pirma toras ni pongki, bahul-bahul pansalongan.
Pir ma tondi ni borunami i, siboan tua ma i tu jolomuna
Marangkup sinaadongan
Giring-giring gosta-gosta
Sai mangiring ma nasida
Huhut marompa-ompa
Na tangkas di arina
Na ontong di bulanna
Bintang narumiris, ombun nasumorop
Maranak nasida riris, marboru torop

Madakdak ma singkoru,
Bontar songon simbora
Maranak ma nasida marboru
Gabe jala mamora.

Ima hata sipaliaton Raja ni boru? Dialusi paranak ma, ima dipaliat rajai, dipaliat ma i, tu raja, raja na niontang ni paranak dohot na tinogihon ni parboru. Ido umbahen didok hata mangaliat, hata saur- saur hata sigabe gabe.

Parboru:
Nunga mangaliat hata sigabe-gabe hata horas-horas, liat ma di hamuna hagabeon liat nang parhorasan. Nunga nauli nipinami namora do hape pamoruannami, pagodang hamuma panamotanmuna, ia mas do asa binahen tu pinggol ia ringgit do asa binahen tu puro, ia lombu manang horbo asa binuat batahi.

Paranak:
Ndang parmas hami rajanami, ndang parringgit di hombung jala ndang parhorbo manang parlombu. Ia adong otik na pinuhutan ni borumuna i, ido na tarpatupa hami.
Jadi dipasahat paranak ma sinamot tu parboru hombar tu naung digoli, dung dipasahat paranak sinamot tu parboru, dipangido parboru ma muse urat ni sinamot, didok hata nuaeng on panggurgurina, jala polin do i jambar ni raja panise ndang jambar marsitaripar i tu raja parsinabul.
Dung simpul panamotan mangampu ma suhut paranak.

Pangintubu:
Nunga marliat liat hamu rajanami mangalehon pasu gabe pasu horas tu anak dohot parumaennami on, ima tutu na gabe taor jala na gabe pagar di anak dohot parumaennami pasauton ni ompunta DEBATA. Jujung ma di simanjujungnami, tuak di abaranami ampu ma di ampuannami panggabean parhorasan.

Naung sampulu pitu
Jumadi sampulu ualu
Hata pasugabe pasuhoras
Ampuonnami ma i tangkas
Martonga ni jabu
Turtu ninna anduhur
Tio-tio ninna lote
Hata pasu-pasumuna i
Unang muba unang mose.

Iklan

2 thoughts on “ANAK TUBU BORU SORANG 4

  1. Sehat.P.Simatupang berkata:

    Horas.. Mauliate to pengurus Website,Boi Iba marsiajar Adat Budaya Batak..
    Horas..

  2. rtm sibuea berkata:

    Sian na jolo, anggo dipomparan ni Sipaettua, di Laguboti, ndang haru masa marsibuhabuhai. Ndang hataringotan i, huboto manang na so huboto hami lapatan ni marsibuhabuhai, gabe do hami pomparanna mangulahon songon i.

    Nuaeng on, ditaruhon jual do unjuk ni anak/boru di Laguboti. Holan pangoli i do dohot donganna sian naposo laho mangalap boru muli tu huta ni suhut parboru. Diboan ma bus dohot Parmusik, molo dipatupa. Pajumpang di Gareja do suhut paranak dohot suhut parboru. Sidung pamasumasuon, rap udur ma suhut na dua tu alaman ni paranak rap dohot pangoli/boru muli. Dipatupa ma unjuk ditaruhonjual.
    Nuaeng on, di ragam ni angka parmusik sanghindat, sai dipatupa do patortor parumaen, alai sipata maniak do ate-ate marnida, ndang apala songon uli ni nanguluhon paniaran na jolo be.

    Santabi ma di amang Naipospos, gurithon hamu jo saotik amang taringot to poda ni na manguluhon paniaran.
    Mauliate.

    _
    **** Lae Sibuea, Molo najolo adong do tahapanna. Taon 1960 nunga najolo be i, taon 1945 najolo do tong, sahat tu pudi-an dao nai angka najolo.

    Molo adong nuaeng on uju “taruhon jual” dipaksahon parboru nasida naniambangan, nunga sala be.

    Adong do partingkian masa nahinan uju “alap jual” boru di jolo ni parboru do ulaon. Di tingki sisongon on ma didok nasida (parboru) ma naniambangan. Lomo ni nasida ma sude parjuhut dohot rumang ni angka parjambaron. Sai jolo dibuhai do manogot rap marsipanganon, tar songon partingkian parmanganon parhobas nuaeng. Alai dijabu ma i angka suhut. Juhut binoan ni paranak i di dipangan nasida. Nang pe na so ingkon wajib i bahenon, alai didok ma i, “ondo pe hita mamuhai partuturon rap marsipanganon”.

    Ianggo “taruhon jual” do ulaon tontu dang adong disi “marsibuhabuhai” tung diluat dia pe i. Godang ma nuaeng on sidalian asa “sarapan” didok ma “sibuhabuhai”.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s