MORA SONGGOT

Penulis: Monang Naipopos

Uju masa haugahan masurbu onan (pasar) Senen di Jakarta godang do angka partigatiga marsak ala suda boniagana. Alai munar do pangkorhonna di Ama ni Pongot. Tutu martigatiga do ibana disi alai rengge-rengge do boniagana. Dung mintop sipusipu, ro do deba angka partigatiga i mangalului turtur ni ugasanna, alai godang do na laos didoloshon rohana ndang ro ala dokdok ni rohana di namasa i.

Ala so apala dokdok harugian ni Ama ni Pongot, ro do ibana mandulo, sai dijungkiti ma angka ngarngar, dihaishon agong, tep adong ma tarbereng ibana songon simbora na malala. Dipamanat ibana, songgot ma rohana huhut las situtu, dianto rohana do disi inganan ni angka partigatiga mas. Dung loja ibana papunguhon, mulak ma ibana, dipaias ma nadapotna i jala dipapita, ditimbang ma adong lobi sakilo mas na dapotna i.

Mamora songgot ma Ama ni Pongot tarbarita tu nahumaliang sahat ro di Toba. Ah, tung sadihari ma songon i morana, so adong dope dua taon di Jakarta, ninna angka sisolhotna na di huta manampin angka alualu na ro. Sada tingki mulak ma Ama ni Pongot tu huta, disi ma dibereng angka sisolhot naung munar pamaheonna sian andorang mulana borhat tu Jakarta.
“Barita ni lampedang Ama ni Pongot marsaor bulung bira, barita ni hamoraonmu nunga gira naung sahat di huta.

Aha ma nuaeng baliga sibaligahononmu, barita sihatahononmu?”, ninna angka sisolhotna ma manungkun ibana.
“Ima da ale angka amang, tung tinumpak ni sahala ni ompu do na hujalo pinasaut ni martua Debata, ingkon patuduon ma i nian dibagasan las ni roha dung tapahehe tambak ni ompunta parsadaan”, ninna mangalusi natorop i.
Saut ma dibulangbulangi natorop Ama ni Pongot mardongan gondang sabangunan dung dipahehe tambak ni ompunasida.
Uju laho mulak ibana tu Jakarta sude do pataru ibana tu harbangan huhut dibagasan las ni roha. “Ah, ibana dope sian gomparan ni ompunta na tingkos, Nunga sampulu taon Ama ni Barita naung di Jakarta matua so binege do mullop goarna. Ro pe ibana nataon sada napadondonhon haumana do asa adong mangudut balanjona”, ninna nasida be angka na tinggal di huta i.

Dung sahat di Jakarta, ndang manigor ditopot ulaonna hian marrengge-rengge, ai sai lohot dope tu pangkilalaan ni rohana habonggalon ni dirina uju manjalo bulang-bulang i sian huta. Dung lam marmetmet baluang, ipe asa tubu rohana muse manopot ulaonna i. Alai dang dapot rohana be partigatigaon i, langgus ma ibana mangadopi panuhor ujungna hurang ma langku ni tigatigana. Hinorhon ni i lam manjonok ma ngoluna tu parmulaanna hinan. Marsak ma ibana, geno pingkiranna, mangadangi rohana marhosa ganjang ibana. Di laon ni ari lam songon na tondo-tondo ma ibana. Ripena pe tong do diantusi aha namanginsombut tu roha ni parhalanguluna i, ai dohot do ibana siborngin siarian marhosa ganjang, pola sipata marderek dorpi ala gogo ni hosanna.

Hais-hais ma Ama ni Pongot tu boniagana i, ujungna marsargean, murmat idaon laos so lomo be roha ni halak marnida. Sipata uju mardalan ibana sai haishais tu rapanrapan, ujungna dipinsang halak ibana ai dirimpu “pemulung” mangalului angka na bolong na boi pargunahonon tu panggadisan. Muningan ma roha ni sisolhotna marnida pangalaho ni Ama ni Pongot, tubu ma tu roha nasida mamboan tu namalo mangaraksa.

Sai diandorsup ma ibana alai ndang dialusi, diboan tu parpuleher, didok ndang adong sahitna. Ujungna diboan ma ibana tu dokter jiwa. Disungkun ma parsondukna i manang songon dia mulana, laos dipatorang ma. Alai ala hurang dope di roha ni dokter i, sai dipatangkas; “Aha holso ni roha ni amanta on na hea dihatahon tu hamu inang”, ninna manungkun Nai Pongot. Ujungna taringot ma Nai Pongot holso ni roha ni Ama ni Pongot naung hea dihatahon tu ibana, laos didok ma tu dokter i: “I ma da dokternami, hea do dihatahon holsona dung dibagasan na sataon on ndang hea adong onan na matutung”, ninna mangalusi.
(ide: R.B. Marpaung)

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s