TINGGAL PANGALAHONA NAMA …

Penulis; Monang Naipospos

Busiason do Raja Pangambe mamereng pangalaho ni jolma di luatna, na so tupa adong be na gabe sihalashonon ni roha hombar tu patik ni adat dohot uhum habatahon. Dibereng ibana jolma napinajolo gabe raja uluan, gabe dipangus do ngolu ni natorop, tung digora pe ibana di hahuranganna i, nunga paula so dibege, nengel ma ibana di harajaonna i.

Dibereng angka pangalaho diparadaton, nunga gamua sude masibahen binotona, jorhu-jorhu songon tortor ni nabegu dang adong be hahormaton manghatai di loloan. Dibereng muse angka ama, na sai marbangkohon butong di anggapan, sipata mangansi pasaut sangkap ni rohana, manimung mangihuthon pangalaho ni raja pinajolonasida i di hahermungon. Adong deba dilalapi parpollungon, ndang diingot mulaulaon, rambaon jumana, rimba porlakna, merung pinahanna laos rasip, songon halode ma ibana paihutihut gaja marhonong, laos mogap di parngoluon.

Dibereng muse angka ina, nunga dohot dilalapi parjujion, jamiron tusan, manggete pollung dison, mampar songon hortuk ni lombu jonggi.
Najumorbut muse di parnidaanna mamereng angka pangalaho ni naposo na sai girgir mardo-ardo pasuda arta ni natorasna, mangasahon hisap ni dagingna, rorang di pangalaho parsaoran haposoon i. Nunga godang nasida na narkobaon na so dung hea ditanda Raja Pangambe i uju di haposoonna.

Di na sahali lao raja Pangambe tu sihatoropan, dibereng angka ama, ina, naposo ringgas manjaha, alai jinahana i angka barita hasusaan marangkup ela-ela tu harorangon, ai tung angka gombaran ni na marsaemara dohot barita ni pangalangkup do godangan di surat barita jinahana i. “Bah …”, ninna rohana dibagasan.
Na umbernit, hea dipasingot ibana sada naposo ala rorang pagalahona. Mangalu ma naposo i tu nagodangna, dung i, ro ma nagodangna i manorui Raja Pangambe huhut didok: “Pinompar mi ma pareso”, ninna.

Hundul ma Raja Pangambe diharbangan ni hutana i, martutukkian mangarimangi angka namasa di angka pangalaho ni jolma di luatna i. Dietong rohana ndang tolap pingkiranna be manupehon poda nauli tu natorop dohot raja napinajolo, asa adong nian pangkorhon tu hamubaon.
Tarsonggot ma ibana di pangadangon ni rohana i ala adong manggora ibana.
“Amang Rajanami, Raja Pangambe, santabi, manungkun jolo ahu”, ninna huhut dipatandahon dirina.

Tarjolma ma Raja Pangambe ala adong manise ibana jala ditanda muse ibana. Dang pola nian haru muningan rohana dipanandaon ni halak, ai jolma natarbarita hian do ibana uju di hatungganeonna ala ni panghophoponna di donganna jolma.
“Apala aha ma ale Inang, ro hamu tu luatnami on?”, ninna Raja Pangambe mangalusi.
“I ma da Rajanami, tarbarita do luatmuna on tu luatnami, napadot mangula, na sinur marpinahan. I do alana umbahen ro ahu Rajanami mangalului pinahan panggararan, anggiat muba paruntungan songon sinur ni parpinahanon di luatmuna on. Tung na mangalului babi pahanon do ahu Rajanami”, ninna mangalusi Raja Pangambe.

Tarhiap ma roha ni Raja Pangambe umbege alus dohot sangkap ni ina na ro i. Ndang tardokna be manang dia patuduhon las ni roha, laos dialusi ma Inanta na ro i.
“Ale inang, tutu do nidokmi ianggo najolo i torop do mamahan babi di luat on. Alai ianggo nuaeng, nunga rasip be babi i, holan pangalahona nama namangolu”, ninna huhut dipaunduk simanjujungna. (ide: Lokkot Hutahaean)

Iklan

2 thoughts on “TINGGAL PANGALAHONA NAMA …

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s