PARSAORAN NI NAPOSO BULUNG

Pinatomu ni : R. B. MARPAUNG (Ompu Miduk)

DOLI DOLI SAMPE BUNGA

Natardok doli naposo bulung ima naung mamungka hadirionna jala mangharingoti diangka pambahenan na uli. Ai bulung i do patuduhon hinauli ni suan suanan. Naposo bulung ima pungan ni angka naposo. Molo torop doli doli dohot namarbaju disada huta jala naung tardok naposo bulung, mansai pos do roha ni pangisi ni huta i disi, ai molo adong ulaon adong ma na manghobasi.

Doli doli na mamungka arta, dipalolo bagasna, adong jumana na so nilehon ni natorasna, pangalapan dihata, pangalapan di gogo jala naung tung marroha ima naginoaranna doli doli sampe bunga .
Baoa naung sohot (mardongan sajabu) alai dang adong dope dakdanak dinasida digoari ma i parbaju baju hinadang.

BORU SISANGGUL SANGGULAN

Dos do lapatan ni hataon dohot hatorangon tarsingot doli doli sampe bunga, na asing holan hadirion na do. Ditaon 1965 ni dohotan do Gondang ni naposo di Onanrunggu. Digokkon do ro tusi naposo marluat luat.

Dimasa sisongon i, diangka namartomu panghataion, disi ma boi disanggul sangguli angka doli doli namarbaju. Doli doli na bontor marroha sai, di ninggor do namarbaju na donda dohot na dom dom. Ianggo namarbaju sihatuit dohot sihadoat dang ditodo i laho sanggul sanggulanna. Namarbaju na donda dohot domdom naung dipadonok i do hadirionna di nalaho manganangkohi balatuk ni hinalomoanna, songon i ma hadirion ni boru sisanggul sanggulan.

Andorang di haposoon ni doli-doli dohot namarbaju disi do gumodang diguruhon jala diulahon angka ENDE-ENDE, TURI-TURIAN, HULING-HULINGAN, UNDANG-UNDANG, TORKAN-TORKANAN dohot angka na hombar tusi. Ai sian angka i do dapot poda dohot parbinotoan, asa ganup paserep diri dohot patoras pingkiran. Turi-turian ni Siboru Parhorasan, poda do i tu angka doli-doli di ruhut ni parnatorason. Turi-turian ni Siboru Tapiomas Palangki poda do i tu angka namarbaju unang sai tuit-tuit jala tingkal-tingkal. Tamba ni i diguruhon nasida do angka umpama dohot umpasa nang pe gumodang diparsiajari umpama ni ampangardang. Angka namarbaju pe olo do nasida marpungu dialaman ni huta, molo dirondang ni bulan didapothon angka doli-doli partandang ma i, olo do nasida margala martumba manang marende-ende.

Ende-ende ni naposo

Sulu-sulu ni bintang tu laklak ni antaladan
Niarit batang garudu bahen simpe ni ampang
Na so lupa di uhum na so lolos di padan
Natalu di undang-undang ima na so haulahan

Ho! Ale bintang unang ho marbintang-bintang,
Sinuan do bintatar manjojori dompak ginjang.
Da baoa unang ho marbilang-bilang,
Husuan do padanta ho do nagir-giran sirang.

Bungkulan ni ruma i parasaran ni borong-borong
Hamu panduda i lehon hamu ahu sanggolom
Molo lehononmu asa ginolom-golom
Molo solehonon mu asa laho ahu modom

Ngalut mada sasabi naso marlanggudua
Mangedat bulu holbung eatan ni siruba
Ngalut ma auon naso marulos dua
Molo manorop ombun manaria tubutuha

Gir-gir bonang nabara tau simanggila-gila
Ndang tarbahen impolni mata, ibotonta do nasida
Sibotol ni botol, botol ni pagar sinondi
I botonta petaho, asal ma sirongkap ni tondi

Pege sangkarimpang halas sahadang-hadangan
Nunga jumpang siporiban lehon ahu jolo marnapuran
Molo lehononmu jolo atup ma asa denggan hupangan
Molo solehohonmu asa laho ahu tubalian hundul martutungkian

Tutur bulung ni bulu, dompak mataniari
Ianggo ende i, tole jolo tarungkai
Naso tupa mansohot be, mareak torang ari
Ia loja hita mansohot, jolo mandaon bari

Por udan di julu ditanghupi leang-leang
Sabur uban diulu so mansadi meam-meam
Andorang so langge niaithon podom-podom
Andorang somate binahen sisunggul na modom

Ende-Ende Arur; ima ginoaran ni hata Batak manogu roha ni namarbaju manang roha ni doli-doli tu roha sibuk, manang pardagingon.

Ende-ende Aur.

Tubis na tumandok uram-uram ni situma
Doli-doli na hinonghop ro ma joloho asa huumma

Tubis na tumandok uram-uram ni sipasing
Doli na hinokkop ro ma jolo ho asa huabing

Harambir ni Sibolga disonggopi lampu-lampu
Na mandung-dung singhoru diaithon hambiranghu
Mardalan ho pariban naeng panghulinganhu
Mangido gambir sian hajut dohot lage podomanhu

UNDANG-UNDANGAN

Ia undang-undangan ndang piga be angka doli-doli dohot namarbaju sinuaeng on umbotosa, alai tung manangkas pasunggul parbinotoan do i tu jolma angka naumposo asa tasak dinasida roha dohot pamingkiron. Ansa-ansaan dohot torhan-torhanan pinatorang ma jolo saotik (samborhos);

LULUI MA JOLO DI AHU SADA ULOS NATINONUN SADARI, DISI PAMULOSINA DOHOT PANGHOTANG-HOTANGINA

Alus na: na mandok hepeng do i ai hepeng do naboi humatop manuhor i.

LULUI MAJOLO DI AHU PORHIS NAMATE MAGULANG

Alusna: dibagasan tahul-tahul do dapot i.

LULUI MAJOLO DI AHU SADA ULOS, IA NILUNLUN NASA SIPORHOT PINA HERBANG NASA BIDANG NI LANGIT

Alusna: parrohaon do nidok ni i

PATUDU MA JOLO PORHIS BORU-BORU MANANG TUNGGAL

Alusna: buaton maporhis i manang napiga bahenon ma tu aek ia i laho tutonga-tonga ima porhis jantan.

PATUDU MA JOLO TUNGKOTON DI DIA DO BONANA MANANG PUNSUNA

Alusna: bahenon ma tuaek lononghonon molo i parjolo lonong ima bonana laos mardomu tusi nang huling-hulingan alai olo do naso tutu alusni naso tutu.

Adong ma sada namarbaju mandok tu doli-doli: “Adong do nian dison siseaton bahen lompan na so huboto do maneat, homa jolo maneat asa adong lompanta”, laos diboan namarbaju i ma sada pira ni manuk. Didok doli-doli i ma: “Tiop ma patna dohot habongna asa huseat rungkungna”. Dos ma pangalus nasida be rap naso tutu.

“Huling-Huling Ansa” molo didok doli-doli dohot namarbaju. Alusna “Ansa”
“Pinsur songon sigirik piusongon tali. Birong ia maridi bontar di dadang ari”
Alusna: langkitang do

“Gatna gutna patna uluna”
Alusna: mandar do

“Gantung mok-mok, gantung marniang”
Alusna: pinasa do i dohot palia

“Jolo malamun asa bibi”
Alusna: mare-mare ni borta do i manang harambir

“lului majolo diahu duhut-duhut na sungkot di langit”
Alusna: duhut-duhut na tubu di sada liang

“molo borngin ibana raja, alai molo arian ibana tutalaga”
Alusna: palito

“Tinaba madabu tuginjang”
Alusna: ima limut dibagasan tao

“ia tiris dompak ginjang tirisna”
Alusna: Solu bolon do i.

Molo so dapot alusna, boi do i ditobus dohot ansa-ansaan, alana olo tunduk pamerengna tu donganna molo somaralus.

“Sadia dao dalanon tu lumban julu aha do daon ni namale ingkon sada dapotna”
Alusna: suhat

Godang dope angka mean-mean ni doli-doli namarbaju alai tung holan sisaotik i pe napatuduhon, pataridahon paandaphon habatahon i do. (Ida; Ardang dohor Undangundangan)

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s