GIGI MAS

Penulis : Monang Naipospos

Ringkot do angka na naeng marsaripe jolo masitandaan di roha dohot pangalaho. Molo holan haulion ni rupa do idaon olo do muse tata roha dung tarida hurang denggan ni pangalaho. Songon i do nang molo holan sian na marnida sinadongan manang hamoraon.

Ia sar ma ninna barita, pur ninna alualu taringot haulion ni si boru Pininta na songon garaga na songon garugu, pangeol ni gontingna songon dengke na mangolu. Godang do angka baoa manguji masitandaan dalan manopot ibana. Alai godang do sian nasida sumurut be ala ni bangko ni si Pininta natuit jala tihal marpangalaho jala girgiran bingkas songon baor. Rumosros do ibana mangangkupi baoa manghatai molo dibereng songon na tama pamaheonna, songon tanda di rohana paradongan baoa i. Ianggo songon na dorsun do diida, marpaula do ibana dang adong tingki manghatai jala eles rohana laos ditinggalhon.

Di sada tingki, tarbobok ma rohana marnida sada baoa nahoding sinolo ni rohana, alai apala niontom ni rohana, ima marnida ipon ni baoa i “sian mas”. Ah, ndang lat be on ndang lipe, na ingkon anak ni namora jong nama naboi manumpan lapik ni ngingi sian mas, ninna rohana dibagasan.

Marbellat ma ibana tu dolok tu toruan patuduhon bunga-bunga ni rohana i, tumuittuit songon anak ni puhut, panihalnihalon songon anak ni hoda, gumerenggereng songon manuk na marpira. Dang adong be angka donganna na so umboto barita “gigi mas” ni baoa na mangaririt ibana i, jala godang do na mangapian nasib ni ibana i; “Denggan ni nasibmi ale Pininta”, ninna nasida be, laos didok muse; “Sai humatop ma pasaut hamu”, ninna.

Sahat ma sangkap ni rohana i tu natorasna, jala tung gomos do pandokna; i nama nilonggi ni lilina tinoptop ni pordana, sinolo ni panailina tinodo ni rohana. Nunga sada be rohana songon daion mual, ndang mardua be songon daion tuak, ingkon i nama saut hamulianna, donganna gabe sahat tu saur matua, sidangka ni arirang tung na so tupa sirang, ia so sinirang ni hamatean. Ujungna, saut ma parbogason ni nasida ditotas natuatua.

Ianggo di adat najolo, somalna diupa do di jabu ni parboru, rap mangan pangoli dohot na nioli andorang so ulaon unjuk, tanda naung gomos panjangkonon ni parboru, pangoli i jadi helana. Alai dung laho mangan, ndang boi be diallang baoa i jagal. Disungkun si Pininta ma baoa hasudungan ni rohana i: “Boasa ndang allangonmu upaupanta i?”, ninna. “Ndang boi be hupangan jagal, ai ndang adong be iponhu. Nunga suda ditolpangi halak, ala hea hupisat jolma”, ninna baoa i.
Tarsonggot ma si Pininta; “Ba… ai parjahat do on huroha”, ninna, ujungna sirang.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s