MOLO MANONGOS HO MUSE

Monang Naipospos

Uju rongking paradongan olo do dadapdadap tangan tu toru ni rere, japajapa langka tu balian ni huta, jorhujorhu hata tu dongan sahuta, anggiat adong ninna roha na boi patukhon na sungkot dabudabu i. Molo adong namora di hutana i, olo ma i mangudut gonting ni ngolu di natorop. Ido umbahen ditonggohon natuatua najolo asa tubu anak natau gabe raja urat ni uhum, namora urat ni hosa.

Hira tihas do najolo molo adong na so mangan di jolma nirajaanna, gari paisolat diloas do mangolu, dilehon pangulaanna.
Ianggo tung nuaeng on, nunga maol luluan na boi mangudut hosa ni napogos sian angka namora. Molo tung adong pe manungkun, manigor suhar do alusna, ndang pangulaula ni nalosok au, ninna do. Deba tung godang do dibahen sidalian asa unang mimir artana i tu parsalian, lam ma mangurupi na so mangan? Dang adong be dapot luluan nuaeng on partohap raja na hot i uhum pangunsandean ni nagale, namora na hot di ruhut panarusan ni napogos.

Hinorhon ni porsuk ni parngoluon, mampar ma roha ni Ama ni Marhusoran songon hortuk ni lombu jonggi. Mangelek sian dongan, ndang adong mala, mengellem tu namora ndang ra mangudut. Nunga sude hauma ni Ama ni Marhusoran tardondon ala ni parutangan holan laho paborhat anakna tu parsingkolaan na so marna ujung i, lumobi dung leleng ibana ditadingkon Nai Marhusoran nahinan. Nunga lam mago rohana sian hasintongan hasiangan on, ndang adong be dietong rohana pangaluanna patuk ibana hepeng 200 ribu rupia. Holan Tuhan i nama pangaluan, i do haporusan ni namarsak, i do didok angka parjamita sipadauk roha, ninna rohana. Sai martamiangi ibana, alai ndang adong na ro, mangido ibana tu sintua Hornop didok nunga suda hepengna mangurupi angka namarsahit, jala ibana pe dibagasan parsahiton do. Ujungna, dibuat ibana ma harotas dohot pitolot, manurat ma ibana ala hea do ibana singkola buta huruf najolo.

“Tuhan, ndang adong be pangaluanhu di tano on, asi ma jolo roham, tongos ma jolo diahu hepeng 200 ribu rupia, di siala ni pangurupion mu godang hudok mauliate”, ninna dibagasan suratna i. Ditongoshon ma surat na i marhite parsingkola asa dilehon tu kantor pos.
Longang do roha ni amanta Silaen partohap ni kantor pos i mamereng alamat dohot tujuan ni surat i; “Tuhan, di banuaginjang”.

Dang pamotoan ni amanta Silaen na diparrohahon Amata Humosing Silalahi ibana di halongangonna i, ujungna disungkun ma ibana:
“Boasa songon na bubuason hamu amang Silaen”, ninna.
“Ah, songon na so dapot rohangku do lapatan ni tujuan ni surat on”, ninna huhut dipatuduhon tu amanta Humosing Silalahi sahalak polisi natarbarita ala ni haburjuonna di luat i.
“Bah tutu, beha ia tung tajaha ma jolo aha isi ni surat i, asa taboto hasintonganna tu dia do tongoshononna surat on sasintongna”, ninna.
“Sasintongna nian ndang boi songon i, alai unang apala so tartongos on, ba tapareso ma jolo”, ninna Silaen, ala pos rohana polisi do donganna.

Dung tarjaha nasida isi ni surat i, tarbobok roha ni amanta si Humosing Silalahi, mangindorap tu pangkilalaanna. Diingot ma haporsuhon ni natorasna uju paborhat ibana tu singkola polisi, suda horbo, targade hauma, suda eme, marsingkor amangna namabalu i. Dang sanga dope tarbalos ibana sude hadengganon ni pambahenon ni natorasna i hape marujung ma ngoluna.
Marningot i manetek ma iluna, ala adong do tona ni natorasna i, asa burju ibana tu ganup natuatua dohot tu donganna jolma, ai ala ni haporsuhon do sude umbahen boi ibana songon i gabe polisi.

“Boti ma i amang Silaen”, ninna si Humosing. “Tabalos ma suratna on, adong dope hepeng hutiop alai holan 180 ribu nama, ima tataruhon tu ibana tadok ma i balos ni suratna i”.
“Antong nauli, beta ma hita borhat laho manaruhon” ninna Silaen dibagasan hinsa ni roha mamereng pangkilalaan dohot haburjuon ni polisi i. Dietong rohana dang adong be piga haluluan jolma sisongon on, lumobi angka polisi.

Dung sahat nasida di jabu ni Ama ni Marhusoran, dipaboa nasida ma sangkap nasida laho pataruhon balos ni suratna i. Dibereng nasida ma antong haadongon ni Ama ni Marhusoran i ndang tarpasurasura ndang tarpasarisari, suman songon ngolu naung suda ndang adong pararon sadari.
Las ma antong roha ni Ama ni Marhusoran ala ni balos ni surat sian “Tuhan” i, jala dibereng muse adong hepeng dibagasan.

Dung mulak nasida nadua, disigat Ama ni Marhusoran ma amplop i, dibilang ma godang ni hepeng i 180 ribu rupia. Marningot sian hata ni jamita dang olo Tuhan i mangorui asi ni rohana, tontu na dong do mangorui i didalan, ninna rohana. Nang pe songon i, tong do ndang lupa ibana mandok mauliate, matamiang ma ibana: “Mauliate ma Tuhan ala asi ni roham na mangalehon pangidoanhi, alai molo manongos Ho muse unang ma marhite polisi ai dipotong do 20 ribu….. !
(ide: R.H. Silalahi)

Iklan

8 thoughts on “MOLO MANONGOS HO MUSE

  1. Mengkel ahu manjaha on 🙂
    Alai adong sada na sangkot dibagasan rohaku “nungga lam godang jolma saonari on naung mago haporseaonna tu donganna jolma, nungga mago be sude holong sian roha ni hajolmaon saonari on” gabe bubuason iba siganup ari, bohanama tahe ari sogot ?

  2. On dope ra na ummuli ahu mengkel suping. ala moral carita ni donganta na metmet, na pogos na tertinggal di masyarakat sisongon on.
    Kepolosan, kejujuran ungkapan yang sungguh sungguh keluar dari hati adalah sesuatu yang indah, dapat dinikmati banyak orang.

    Ra boi dohonon di zamanta si saonari on dapot hita dope hira hira senyum dohot ungkapan najujur mandok mauliate sisongoni tu dongan ??? dohot tu . . ??? . . . semoga.

    Horas
    Spl

  3. Songani ma ate molo dang adong be haporseaon tu sada profesi; ai ise matutu halak di saonarion na totop dope porsea tu polisi? Hape tupa ra, sai adong dope akka polisi naburju. Ai molo magoan hambing inna sasahalak molo lao mangalapor tu kantor ni polisi, gabe suda do sada horbo.

  4. Santabi.. ai manukkun majolo iba Amang Monang..
    Boasa di suratmuna on adong piga-piga hata na tarsurat miring. Selain “penekanan makna”, “umpama & umpasa”, “jargon”, hira aha do fungsi na naasing..?
    Misal na, nasukkun-sukkun di rohakku :
    rongking dohot gonting di paragraf 1. Na bahasa asing do i ?

  5. tanobatak berkata:

    @ Lae Charly
    Hata i dang somal be dibege deba dongan, asa unang dietong sala ketik, dibaen ma hurup miring. Rongking dohot gonting hira sarupa do i alai panggunahonna adong parasinganna.
    “Mangudut hosa”, asing do i “tu siudut hosa”.
    Sasintongna nang so pola binahen sisongon i dang pola dia. Molo dung lam somal annon manjaha hata Batak, lam paluaon nama panuraton sisongon i.
    Mauliate di panangkasionmuna.

  6. Humbang Hasundutan berkata:

    “Hira tihas do najolo molo adong na so mangan di jolma nirajaanna, gari paisolat diloas do mangolu, dilehon pangulaanna.” >>>Nang so adong dope Investor dohot teknologi najolo i ate. Saonari on, ndang hira ‘tihas’ be ate? Nunga tung apala himpal ‘te ni horbo’ sian inalum dohot tplestari, naeng dope tipahononna ‘te ni manuk’ sian Tele, alai ianggo panarihononhon tu jolma nirajaanna i ndang adong. Adong dope ulaning sada tingki haduan na gabe sada tihas i sisongon i?

    *** 😉

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s