RAPOT NI ANGKA PIDONG

Dari Ceritera Rakyat Batak

Boi dohonon ianggo angka Ompunta parjolo tung nabisuk situtu do.
Parpoda do nasida jala siboto ruhut Si Pahot Paruhuman. Ragam do dalan dipatupa nasida manupehon ajar dohot poda na tur, sada sian i ima marhite angka turiturian. Diraksahon angka ompunta parjolo do rumang ni angka bangko dohot parrohaon ni angka jolma marhite sian angka jadi-jadian na asing tinompa ni Debata.

RAPOT NI ANGKA PIDONG

Pidong Patiaraja do raja ni sandok nasa pidong, didok sijolo-jolo tubu, dung i pidong Imbulubuntal do paidua.
Asa ro ma sahali Amporik manopot pidong Patiaraja, didok ma hatana songon on: “Asi ma roham di ahu, ale rajanami, asa bahen ma ahu dohot raja Sitimbang uhum di rapot na di jolom”.

Dung i didok pidong Imbulubuntal ma mangalusi Amporik i : “ai aha do uhum na ture di ula ho, umbahen na hum roham ro tu jolonami mangido tohonan na sai balga?”

Alus ni Amporik i : ”Olo da rajanami, paboaonku ma pangalahona. Ia saluhutna hami nanirajaanmi, ingkon marhudali tanganna do, asa adong dapotsa panganonna. Ba ianggo ahu rajanami, so sijalo sisip ahu nian manang si ula sihataon, ai sai jolma do mangula sipanganonhu. Manang boa pe bolak ni hauma ni halak, hauma ni namora pe manang na sangap, tung so jadi do i gotilonna, nda ingkon ahu jumolo matumona”, ninna.

Dung i didok pidong Patiaraja ma tu Amporik i :”nunga didok ho naung didok mi. Beha ia hahuranganmu, adong do diboto ho?”

Alus ni Amporik i : ”Ndang adong ale rajanami ba aha ma hahuranganhu?”

Dung i didok pidong Patiaraja i ma muse : ”Antong molo songon i, di rapot pardomuanta naro ma nialusan hatam i, mulak ma jolo ho. Dung pe salpu pitu ari on ro ma ho mangulahi, ai disi ma rapot i”, ninna.

Ia dung songon i panghataion nasida, disuru pidong Patiaraja ma naposona martingting tu nasa ragam ni pidong, asa marpungu tu jolona dung salpu pitu ari on, unang so ro be di ari naung binuhulna i. Dung salpu antong pitu ari, ro be ma nasa pidong, mandapothon pidong Patiaraja. Tung mansai torop do nasida marpungu tu parrapotan i.

Ia dung pungu nasida di parrapotan i, mangkuling ma pidong Imbulubuntal manungkun pidong Patiaraja, ninna ma : ”Ba nunga domu hita sude dison ale rajanami, dia ma natadomuhon dia ma na tarapothon?”

Dung i didok pidong Patiaraja i ma mangalusi : ”Olo da, ianggo na tarapothon, on do, na ro do raja ni Amporik manopot ahu mangido naeng pabangkitonta ibana gabe raja panimbang di rapotta. Ba ima nuaeng na hupartimbangkon tu hamu sudena, manang na oloan do pangidoanna i manang ndang”, ninna.

Dung i mangkuling ma pidong Araroma, ninna ma : ”Tangan do bothon da rajanami, ujungna jari-jari. Husomba ma hamu rajanami, hatangku ma marsantabi. Ba ia ho Amporik, dia ma hasurunganmu sian hamion, umbahen na mangido gabe raja panimbang ho di rapot on?” ninna.

“Ianggo i, ninna Amporik mangalusi, adong do hasurunganhu sian hamu sude. Ianggo hamu ingkon marhudali tangan do hamu mangula asa adong panganonmuna, ingkon naniulamuna do asa adong daionmuna. Alai ianggo ahu do, jolma i do loja mangulai haumana, ba ahu do bosuran mangallangi. Manang boha pe bolak ni hauma ni halak di tur manang di saba, hauma ni namora pe i manang hauma nia nasangap, tung so jadi do i buatonna, anggo so ahu jomolo matumona. Ba, dang hasurunganhu dope i sian hamu sudena? Ima da antong alana umbahen na barani ahu mangido masuk gabe raja panimbang di rapot on. Asi ma roha ni rajanta, sai di pasiat ma pangidoanki”, ninna.

Alai di dok Araroma i ma muse : ”Nunga i ma lae, so diboto ho magom. Ho ma sipanihus, ho ma sipanangko, sipangan na so na niulana. Holan natinangko do hangoluanmu. Inang daba amang, songon i do pangalahom, tung barani do homangido masuk naeng gabe raja panimbang di rapot on? sombanghu ma di ho, unang nunuti be hatami, paso ma i!”, ninna.

Dung songon i muruk ma Amporik i, gabe masisonggahan ma nasida dohot Araroma i.
Ia dung leleng nasida na masisonggahan i, mangkuling ma pidong Imbulubuntal, paidua ni pidong Patiaraja, ninna ma : ”Sae ma i ale, unang be masisonggahan hamu, ai ndada i umbahen sidungna. Boti ma i, unang be sai marbadai hamu. Ia ho ale Amporik, tung na so boi do ho raja, ai tutu do ho panangko, tutu dohot panihus. Sai dipangido roham do dao mata ni nampuna eme i, asa boi emena i tangkoonmu. Nasai torop hamu saripe, sai holan na marhanalomhon natinangko do dohot nasinisipan. Ba tung na so bahenon do panangko gabe raja, ai ianggo raja, mangaramoti do i diugasan ni donganna” ninna.

Dung i sip ma Amporik i dang adong be didok agiaha.
Dungi didok pidong Imbulubuntal ima tu napungu di parrapotan i : ‘Ia adong sian hamu angka dongan na naeng mandok sidohononna, manang paboahon pangidoanna tu rajanta, ba, boi do paluaonna nonangna, asa ditangihon juara natorop na liat na lolo on” ninna.

Jadi mangkulingma Araroma, didokma hatana, ninna ma : ”Ianggo ahu ale rajanami, tama ma ahu nian pabangkitonmuna, asa gabe dohot ahu raja panimbangi diloloanta. Ima pangidoanku”.

“Ba, molo songon i, paboa ma dalanna, manang na dia do alanna umbahen na hum roham mangido harajaon nasai balga diloloan ni rapot on”, ninna pidong Imbulubuntal manungkun.

Dung i didok Araroma i ma mangalusi : ”Ummalo do ahu marhata sian angka dongan on saluhutna. Huboto do pasuman soara ni Amporik, soara ni Lote, soara ni talektek, soara ni Binsakbinsak, soara ni Anduhur dohot soara ni angka na asing pe. Ba, ima hamaloonku dohot harudunganku sian angka dongan, umbahen na barani ahu mangungkaphon pangidoanku, asa masuk ahu nian gabe raja panimbang di rapotta”, ninna.

Dung i ninna pidong Imbulubuntal mangalusi hata na i : ”Apala hatami ma tinimbang, umbaen na so boi ho pampeon gabe raja, ai tung pangansi do ho. Ai molo diida ho Amporik ba dibahen ho ma soaram songon soara ni Amporik, gabe dirimpu ma ho donganna, dipajonok Amporik i tu ho. Hape nung jonok, ditangkup ho ma i laos dipanganho, ia adong lobi-lobim na so suda di panganho, diraishon ho ma i tu sanggar. Ia mangkuling Lote dibege ho dibahen ho soaram songon soara ni Lote, ia nung jonok Lote i tu ho, ditangkup ho ma i laos dipangan ho, ia adong lobi-lobim na so suda dipangan ho, ba diraishon ho ma i tu sanggar. Sai songon i ma tutu dibahenho soaram i mangago angka naginoaranmi. Ala ni i ingkon sipaduruan do ho, ai hatam hata dongan, ia roham roha mangago. Dang diboto ho antong sapata ni pambahenanmi naung manginona tu ho. Ai sai tolu do piram, ba sai matua padua-dua do o. Sapata ni angka na jinahatan mi ma i namangisombut tu ho. Asa tung sipaduruon doho. Ima hata tuho”, ninna.

Ia mangkuling Lote, didok ma : ”Ianggo ahu nian ale angka rajanami, tama do ahu pabangkiton muna gabe raja panimbang diloloanta on. Alana umbahen na hudok songon i on do manang tudia pe ahu lao, dang adong hea na roa hatangku, ai sai tio do hudok. Nda ture ma ahu nian gabe raja panimbang angkup muna di rapot on?’.

Alai dialusi pidong Imbulubuntal ma hata na i, didok ma : “Apala hatami ma ale umbahen ho so boi raja, ai pargabus situtu do ho. Litok do aek simare, sai tio didok ho. Aut tung sura binahen ho gabe raja, ba nang geduk i sai tigor do dohononmu. Nda nungnga guntur banua molo songon i? Asa tung so boi do ho gabe raja. Angkup ni i, adong dope magom apala na umbalga na so diboto ho. Mago do ho dibahen tiur ni dalan. Di bahen halak do dalan balobung bolusonmu, di taon ma sitarihon disi mambuat ho. Ala so manaili ho mamereng manang aha, suruk ma ulum tusi, disongkik ma rungkungmu, pidom ma ho. Dung pe dipapahani porhis dagingmu, asa diboto halak naung mate ho. Tung na so boi do ho pampeon gabe raja, ai pargabus do ho jala na so umboto parmaraan. Paso ma hatam, ima sae hata tuho”, ninna.

Ia dung sae i, mangkulingma talektek, ninna ma : ”Ianggo dirohangku ale angka rajanami, tinggil ni pinggol do harajaon. Dibahen i unang hamu lilu, ahu do na tama gabe raja panimbang diloloanta. Boi do ahu marhuta di topi ni dalan dibahen tinggil ni pinggolhu. Otik pe humeres ramba, sai pintor hehe do ahu sian asarhu laho manangkasi namasa. Asa didok rohangku, tama ma ahu pabangkitonmuna, asa dohot ahu raja panimbang di rapotta”, ninna.

Dungi mangkuling ma raja i, ima pidong Patiaraja, didok ma tu talaektek i : ”Tung ho ma na so boi raja, alana umbahen na hudok songon i, tangihon ma unang songon na so mardalan hata niba ditonga-tonga lobuan na godang. Tutu do nian olo ho marhuta dilambung ni dalan, alai atik pe songon i, tung parbiar situtu do ho. Na o musu pe mamolus di dalan i, sai pintor dihunti ho do rerem, ganup tongkin do ho laho bungkas. Tutu do na tinggil pinggolmu, ndada soadahononhon i, alai tinggil ni pinggolmi ma mangago ho. Ba tung boi ma parbungkas-bungkas gabe raja?. Sombangku ma di ho, unang be sai nunuti hatam i, sae ma i !”, ninna.

Dungi didok Ambaroba ma pangidoanna, ninna ma : ”Ahu do nian tama bahenon gabe raja, ai natutu do na nidok ni harajaon. Alana umbahen na hudok songon i, on do. Manang tudia pe ahu laho, sai bik-bik do hudok. Ba, ulos ni ise ma tutu na so ra mabik-bik? Jadi ala parhata na tingkos ahu, didok rohangku, umbahen na barani ahu mangido asa pabangkitonmuna ahu gabe raja”, ninna.

Dialusi pidong Patiaraja ma hatana i, ninna ma : “Ho pe ale, tung na so boi do ho gabe raja , ai so doboto ho ujung ni na nidok mu. Ai nang apala naimbaru ulos ni halak, tung nambura sidung pe ditonun, sai namabikbik do i didok ho. Aut sura binahen ho gabe raja, nda dohot ma nadenggan i dohononmu na roa ? Palias ma hatam tung na so boi do ho gabe raja, ima sae ni hata tu ho”.

Ro ma muse pidong Siburuk, didok ma hatana : “Ahu ma nian ale angka rajanami pampeonmu gabe raja. Alana umbahenna barani ahu mandok songon i, on do : ”Manang tudia pe ahu laho sai holan na gukguk do hudok. Ba sude do hita sai holan na gukguk do pangidoanna. Angkup ni i huhutna, ubat ni hadatuon pe, di ahu do, ai malo do ahu mambaen dampol tongosan. On pe, ture ma dirohangku pampeonmuna ahu gabe raja. Ima pangidoanhu”.

Dung i dialusi pidong Patiarajama hatana i, ninna ma : “Unag songon na so nialusan hata, tangihon ma nahudok on. Tung na so bolas do ho raja, ai nang longa hudon ni partuaek, sai gukguk do didok ho, ba tung natingkos ma i? Angkup ni i, usat ni hadatuon ditaringoti ho, molo ho nimmu mambahen dampol tongosan, dang tutu i. Alai umbahen na hudok so situtu i on do ; Disi ho tinutung, pintor angkagetem do sibukmu, malala dohot ate-atem. Asa dang boi ho raja. Unang pangasahon hapistaranmu tu hami on. Pasonang ma roham, hadatuonmi ma datdati. Ia ditipulhon halak pat ni anakkonmi ba ima padampol-dampol”, ninna.

Dung i mangkuling ma Leangleangmandi, didok ma hatana : “Ahu do nian tama bahenon gabe raja. Alana umbahen na hum rohangku mandok songon i, on do : Neang ni daging do dohot hipas ni pat sibahen harajaon. Ba ahu do na humipas, ai holan dibagasan satongkin do nunga boi ahu sahat tu nadao binahen ni hahipasonhu. Dung i sudena angka na naeng mangido harajaon, luhutna do i ditorungku. Jotjot do hubahentu angka na rotakku, so pola tung manang aha didok tu ahu. Gari angka jolma i tahe, jotjot do hurotahi sipanganonna, dohot jabuna jotjot do hu ingani so pola tung dia didok tu ahu. Nda tama manian ahu gabe raja? Ima dialusi raja i!”, ninna.

Dung i dialusi pidong Patiaraja ma hatana i, ninna ma : ”Ndang sialusan nian hatami, ai na songon alogo do ho. Laho tu dolok so aha na nialapmu, maringkat ho tu toruan so aha tinaruhonmu, dang na hainganan ho huta ai na simaon do patmu. Ba tung boi ma raja na so piga hali mangingani huta? Alai angkup ni i, so diboto ho huhut na maila, ai dohot do narotakmu dipangasahon ho, tung sitongka do i di harajaon. Ipe, sotung hirim roham, tung na so boi do ho raja, ima ingot”, ninna.

Dung i ro ma Sitapitapi, didok ma hatana : ”Manomba ujung do ahu rajanami, manomba huhuasi. Anggo siat pangidoan, ahu ma nian patampilonmuna, asa dohot ahu gabe raja panimbang di rapotta”, ninna.
Paboa ma dalanna umbahen na didokho pangidoanmu songon i”, ninna pidong Patiarajama manungkun.
“Anggo i, da rajanami, paboaon ma tutu”, ninna Sitapitapi i mangalusi. ”Umbahen margoar pe ahu Sitapitapi, ala ni malongku do mangkuling, binahen ni pandengku do mangkatai. Ba harajaon pe, dirohangku, hamaloan mangkuling do dohot hapandean mangkatai, asa boi ulaon. Ima umbahen na hupangido pabangkitonmuna ahu gabe raja panimbang”, ninna.
Dung i didok pidong Patiaraja ma mangalusi hatana i : ”Beha, ia hahuranganmu, adong do diboto ho?”, ninna.
“Tung na so adong do hahuranganhu, ale rajanami; holan na so raja i do ahu, rajanami, sai asi ma roham, tung unang ahu paujat di pangidoanki ninna Sitapitapi i mangalusi.
Alai didok pidong Patiarajai ma tu ibana: ”Ndang boi ho ale bahenon gabe raja, ai so diboto ho hahuranganmu. Tutu do nagortip ho mangkuling, pola do umpama ni na deba ho. Molo adong anakkon ni halak na mateptephu mangkatai, didok natorasna do tusi : Aa, magartiphu do ho mangkuling, Sitapitapi do ho mangkatai, ndada na iran dois ni bibirmon”, ninna. Asa ndada na ture halak magartiphu mangkatai. Alai angkup ni i na pande ho nimmu mangkatai, hape, apala ho ma na umoto ; Denggan do nian patmu duansa, alai sai mangkatengkat do ho mardalan di tano i hinorhon ni otom, ai sai dirimpu ho do, dumokdok ho sian tano on, sai didok roham do, marongrong tano on degehononmu molo duansa pat mi ojakkononmu. Nda asing ma haotoonmu, ai tu dangka ni hau ho songgop duansa do patmi di ojakhon ho; alai tu tano ho mardalan, mellakhellak patmu dibahen ho, so na mahua i nian? Ba tung na so boi do ho raja bahenon, ai nda na manggunturi iba di na nirajaan i, molo pangkiton halak na oto gabe raja, na so umboto manimbang manang aha? Ipe paso ma roham, unang be datdati hatam i, ndada talmis ni pangkuling sibahen harajaon”, ninna.

Ia mangkuling ma Anduhur, disorohon ma hatana, ninna ma : ”Ahu ma nian, ale rajanami, pabangkithamu gabe raja, asa bolas ahu manimbangi diloloanta uju marrapot songon on. Alai umbahen na hudok songon i, on do ; Manang tudia pe ahu laho, sai holan natutu do hudok, so olo ahu mandok na so tutu. Ba harajaon pe dirohangku, nang hata timbangan, sai holan situtu do jinalahan. Asa anggo siat do pangidoan, tung bahen hamu ma ahu gabe raja!” ninna.

Alai didok pidong Patiaraja ma manglusi : “Ndang boi ho, ale, gabe raja, ai na songon Lote i do ho. Ia Lote, sai tio do sude didok, litok pe Aek Simare, maradu songon purik idaon, sai tong do i tio ninna. Apala suman do ho tusi. Alai umbahen na hudok songon i on do ; Jotjot do pilit barita ni paronan di paboa, jotjot do so tingkos namasa di hatahon, hape, sai holan na tutu do i didok ho. Sintong do nian na didokmi, sai situtu do na niluluan, tingkos na jinalahan, alai anggo tung dohot do napilit i sai tutu dohonon, nda nunga guntur banua? Asa, i ma umbahen na hudok, na so bolas do ho bahenon gabe raja.
Ala ni na so tingkos i jotjot hatam, manginona do i tu ho, ai sai tartolu do piram, jotjot do i dua diporpori ho, ba tung sipata do holan sada. Gabus i do na mangisombut tu ho. Umbahen na olo ho maningkot, disurukkon ho ulum tu solot-solot, asa mate ho. Asa tung na so boi do ho gabe raja. I ma ingot, sae hata tuho”, ninna.

Ro ma muse Silogologo, didok ma hatana : “Ahu ma nian tama bahenon gabe raja, ai holan tortorhu do hupangsahon, tuk do panganonku,” ninna.

Dialusi Imbulubuntal hatana i dodok ma : “Paso ma da sangkap mi. Tung na so boi do ho gabe raja. Nda hamaloon manortor harajaon. Tutu nian lomo do roha marnida halak na malo manortor. Alai ianggo ho, tung ala ni panortoronmu ma mangago ho. Ditortori ho do satua, lalap ma i paidaida panortoronmu, dung i manigor manihus ma ho tutoru laho manoro asa adong panganonmu. Dirimpu ho ma sipata naung lalap satua marnida tortormu, ditahop ho ma i, hape napa ni horbo do. Sap narotak ma pamanganmu habang manggarpasi. Paso ma pangidoanmi”

Mangkuling ma muse Lalisilopak, didok ma hatana : ”Ahu do nian tama raja pabangkitonmuna, ai manang sadia pe torop ni jolma mamahan manuk, ba ahu do mahapan mangan manuk, so na hutuhor i, so na hupangido, guru rohangku do mambuat i. Nda tama ma ahu bahenon gabe raja?” ninna.

Alai pintor didok pidong Patiarajama mangalusi hatana i : ”Apala tung ho ma sada, na so boi raja, ai panangko doho, pamangus do ho, pangalaum do ho, ndada sipujion ho di na binahen mi, ai sai diburai halak do ho, ai pintor tarhiap do manuk dibahen ho. Ala ni hajahatonmi ma umbahen na so boi ho gabe raja. Aut bahenon ho gabe raja, nda sude ma hami on palengseonmu? Ai gari manuk, ugasan ni jolma manisia, sun dipangani ho, ba lam beha ma hami bahenonmu, tung sura pinabangkit ho gabe raja, na mago ma hami pasudaonmu? Palias ma hatam, tung na so bolas do ho gabe raja bahenon,” ninna.

Dung i ro ma muse Lalipiuan, dipagogo ma soarana mandok : ”aha do hinataanmuna, umbahen na sai simaon hamu sude? Ai aha do haraja on, ndada habisuhon, ndada hagogoon dohot hagabeon? Anggo toho do songon na hudok i, ba luhut doi di ahu, ahu ma raja, ai ditorungku do hamu sude. Paboa sintong na hudok i, dao dope ahu mamolus, nunga monjap hamu sude ditorungku, ala ni biar muna mida ahu. Ba, dang tama dope ahu bahenon muna gabe raja?” ninna.

Dung i didok pidong Patiaraja ma mangalusi hatana i : “Tutu do, diulahon ho do nasa hajahatonmu, alai apala ala ni i ma umbahen na so boi ho raja, ai luhut do musum, so adong agia ise donganmu. Mabiar do iba mida ulok, atik beha di turbing iba. Songon i ma ho, luhut mabiar mida ho, ala ni jahatmu. Asa sihampir gabe gambir do ho, tandiang gabe toras; tudia pe ho so tampil, tu aha pe so bolas; songon halakhalak na tarpunjung do ho, songon tandiang na hapuloan; naung pinaduru do ho. So adong na mangebati hutam. Ala ni jatamu antong. Di tongan dalan do mamolus, so sude do digomahi ho dohot na so sipanganon di papangani ho; tarida do huhut jahatmu sian inganan mu, ai sai tu sapsap batu na so hasigean do ho marhuta. Tungkap pe ho, soada na manogu; marsahit pe ho, so adong na mandaoni ; haudanan pe ho, soada na marsaongi; hagolapan pe ho, so adong na mangalehon sulusulu; mate pe ho, so adong na mananom ho, jadi suda ma bangkem dipangani porhis. So dihilala ho sapata ni angka na jinahatan mi, ai lobi do nian sipata tolu piram, alai sai holan dua do na hasea. Anakkonmu pe, sai holan na hisapan do, alai jotjotan do i mate sollopon, gabe balik parbilean ni deba ro manggulut juhut na niradem, angka na jinahat mi. Alai atik pe songon i, laos so diboto ho do mamilangi na binahen ni Debata tu ho. Ipe, ala ni hajahaton mu, tung na so boi do ho raja, ai molo raja iba, ingkon saor do tu na torop, alai anggo ho, luhut do halak mabiar mida ho”, ninna.

Alai didok Lalipiuan i ma : ”Aa, unang godang hatahatam tu ahu, beta ma hita na dua jolo marsiadu habang dompak langit an!. Molo ho tumimbo habang tu aoangaoang i, ba ho ma tutu raja; alai anggo ahu do annon tumimbo, dumao dompak langit, ba ahu ma tutu raja”, ninna.

Dung i marsak ma roha ni pidong Patiaraja umbege hatana i, ai nunga diboto ibana, tung na so taralosa do i marsiadu habang. Alai atik pe songoni didok ma : ”Ndang daba i uhum, ndada bolon ni bitis pangasahononhon dohot tombol ni botohon. Jotjot do humipas hatoban sian namora, jotjotan do i gumogo mamorsan si porsan on, alai sai raja i do raja, hatoban i do hatoban. Asa ndada oloanku i hatami”, ninna.

Alai ninna Lalipiuan i ma muse : ”Ndang songon i, ingkon beta do; unang be sai nonang ganjangi tu ahu”.

Dungi lam marsak ma roha ni pidong Patiaraja umbege hatana i. Alai ro ma sibarung, dipajonok ma tu lambung ni pidong Patiaraja, dihusuphon ma nanget : “Unang pola marsak roham, ale rajanami, ba molo marsiadu habang ninna, oloi unang mabiar ho. Dongkon ma dipalojo ibana habang tu ginjang, asa jolo loja ibana. Ia dung loja ibana annon ndang hanangkohansa be tu ginjang, mijur ma ibana, asa di na mandok loja ibnana dietong rohanta, disi ma hita borhat, di tanggurungkon pe ho songgop, ahu pe manghabangkon ho tu ginjang, ai haroro ni gogom ma disi. Alai anggo ahu, ihuthononhu ma ibana mijur tu toru. Dung leleng hami ro di toru, ba mijur ma ho sian ginjang, jadi ho ma monang. Songon i pe tabahen, unang pola marsak ho, dongkon ma ibana borhat”, ninna sibarung i.

Dung i las ma roha ni pidong Patiaraja i umbege hata ni sibarung i, dung i didok ma tu Lalipiuan i : “Molo sai tole hita nimmu, marsiadu habang ale Lalipiuan, ba tole, pajolo ma habang tu ginjang, huihuthon pe ho sian pudi. Ba molo ho tutu umpudi annon mulak tu lobuantaon, homa na monang , ai ima tandana paboa na dumao ho tu ginajang,” ninna.

Dung i pintor maletes ma antong Lalipiuan i digogo ma habang tu ginjang, tung mansai dao do tu aoang aoang i. Alai dung marhira loja ibana di roha ni sibarung, di dok ma tu pidong Patiaraja: “Ro maho ale rajanami tu atas tanggurungkon, asa taihuthon ibana tu ginjang”, ninna. Dung i laho ma pidong Patiaraja i tu tanggurung ni sibarung i, adung i dihabanghon sibarung i ma ibana tu ginjang.

Ia Lalipiuan i, nunga sai ngolngolan ibana paima-imahon di ginjang, matua so adong diida ro pidong Patiaraja sian toru. Jadi dung dang tartaonsa be lojana na habang i mijur ma ibana.
Alai di nalaho mijur i ibana, pajumpang ma ibana dohot sibarung, na mamboan pidong Patiaraja i. Dung i disungkun sibarung ima Lalipiuan i. “Ndang adong dope ibana ro tu ginjang on,” ninan Lalipiuan i mangalusi.
Hape nunga disiluhon pidong Patiaraja i habang tu ginjang sian tanggurung ni sibarung i, so pamotoan ni Lalipiuan i, gabe dumao ma ibana muse tu ginjang. Ianggo sibarung i diihuthon ma Lalipiuan i mijur tu toru. Dung pe adong lobi sangombas nasida di toru, asa mijur muse pidong paitaraja i sian ginjang.

Dung i muruk ma Lalipiuan i, didok ma: “Na so uhum do na binahenmi, ale sibarung, ai manjalo sisip do ho sian pidong Patiaraja. Ho do mamboan i tu ginjang umbahen na gabe ibana monang”, ninna.
Alai didok sibarung i ma mangalusi: “Ndang adong tutu ahu manjalo sisip sian raja i. Alai molo so porsea ho di na hudok i, manang dia gana sibahen namate, bahen, asa hutolon”, ninna.
Dung i didok Lalipiuan i ma muse: “Manang na adong dijalo ho sisipi sian ibana manang na soada, ho ma sipabotoboto i, alai sandok sala do ho disi, ai diurupi ho alongku manaluhon ahu, siuhumon do ho”, ninna.
“Ndang hea songon i uhum, sala iba hape molo niurupan na ro manjalo tu iba. Alai molo tung adong patik ni ompunta, na mandok, siuhumon do iba molo niurupan dongan, nioloan raja, ba paboa asa hubege”, ninna sibarung i mangalusi.
Dung i didok Lalipiuan i ma: “Anggo songon i do, dang olo ahu marraja tu pidong Patiaraja, rohamu ma disi molo pasangaponmu ibana. Tung na so huoloi do marraja tusi, ai so aha pangasahononna tu ahu”, ninna.
Alai didok pidong Patiaraja i ma tu ibana: “Hudok hian do tu ho, ala ni jahatmu sipaduruon do ho. Dang pola dope nian hupaduru hami ho, alai nunga sai naeng ho huroha tarpulik, ba roham do, laho ho!” ninna.
Dung i marmurukmuruk ma Lalipiuan i laho, ditogihon ma donganna: Lalisilopak, Silogologo dohot Leang-leang, marpadan ma nasida naopat mandok ; na so jadi nasida marraja tu pidong Patiaraja.

Iklan

12 thoughts on “RAPOT NI ANGKA PIDONG

  1. Konsep “marraja tu sahalak jolma” dalam masyarakat Batak tidak ada. Tidak seorang pun mau melakukan itu dalam lingkup kekeluargaan masyarakat Batak. Jadi, kalau Lalipiuan i laho, ditogihon ma donganna: Lalisilopak, Silogologo dohot Leang-leang, marpadan mandok ; na so jadi nasida marraja tu pidong Patiaraja, maka itu bisa dibenarkan kalau mereka menggunakan konsep kekeluargaan Batak. Dan lagi pula, analog raja seperti pidong Patiaraja tidak ada dalam konsep Dalihan Natolu.
    Ini artinya, bahwa

  2. PANAHATAN TAMBUNAN berkata:

    Salut, atas koleksi turi turian sisongonon. Gabe taringot do iba ditingki sihaetehon, uju mangolu dope akka daompung.Saonarion nungnga tung langka angka turi turian sisongon on. Molo bai nian adong nabersedia mambahen di sada buku, songon koleksi budaya.
    Intina naboi dapot ahu :
    1)Ndada sipangidoon ianggo harajaon,tarlumobi mai alani angka ‘ha boi on’.
    2)Godang do tamba kosa kata,hata batak melalui turi turian on.

    Horas Mauliate, Parlopes Tambunan

  3. Anjuk Bornawan berkata:

    Molo adong nian ate bukku turi turian , mansai tabo ma nian. Ba sai turi turian ni halak Denmark dohot halak Sunda ma pinajaha jaha hape adong do godang turi turianta, dang sala nian manjaha turi turian ni halak, alai apala turi turianta sandiri dang jinaha ??????
    Horas

  4. Tigor Sitohang berkata:

    Na jolo di taon 86 an dipangido halak Jerman tu ahu asa mangalului barita (informasi) tarsingot rupa manang tompa ni pidong Patiaradja. Alai indang dapothu. Gabe tarsingot ahu dung manjaha turiturian on. Sian dia do dapot muna turiturian on. Jala hira-hira boha do tampa ni pidong Patiaradja (balgana, warna ni imbuluna manang bentukna).
    Mauliate, Tigor Sitohang

  5. tanobatak berkata:

    Na hea binereng adong baringbingna, balgana nasa anduhur. habang lambat jala jonok-jonok. sai hira manuk jambe namera (mira polin)

  6. Alfian Simanjuntak berkata:

    Molo di parlemen saonari (pansus century) adong do sitapi tapi. Ise mai?
    Alai Patiaraja…. konspirasi do hape. Sekedar informasi.Pidong na metmet do on. Taon 1996 hea dope jumpang nami di hutan perbatasan Kabupaten Karo dan Dairi. Sada do goarni ni pidong on bahasa batak karo, toba, simalungun, pakpak. Tohoma tahe PATIA RAJA.

  7. Gom gultom berkata:

    Horas amang panurat! Tung massa tabo do nian turi turian ni halak hita on. Alai molo boi pangidoanku tu hamu asa di bahen mai jadi sada buku, asa adong muse sicaritahonon tu akka ianakkon niba. Mauliate!

  8. b.Parningotan berkata:

    molo naeng mamboto tompani pidong Patiaraja i sai mura ma i,
    laho ma tu angke perpustakaan , jalal luluima ensiklopedia ni angka pidong na adong di saluhut portibion, molo nunga dapotan, boan ma buku i tu angka ompunta di huta si botoboto pidong, jala patuduhon ma gombarannni angka pidong na disi, jadi sungkun ma sian sude gombaran i dia do na suman, jadi botima, lului hamu ma, ai molo ahu, diluat sileban da ahu nuaeng, jadi ndang tarbahenonsa sisiongon i
    Horas

  9. b.Parningotan berkata:

    Kalau ingin mengetahui jenis pindong patiaraja, harus dibuat pertanyaan yang diskriptif pada orangtua kita yang pernah melihat pidong Patiaraja tersebut, sebagai contoh pertanyaan deskirptif: bagai mana bentuk paruhnya, apa ia mempunyai barimbing, bagai mana bentuk sayapnya, bagai mana bulunya, warnanya, bagai mana bentuk kakinya, dimana dia sering bermain dsb, persis seperti upaya polisi mendiskripsi penjahat. Dengan demikian kita mengetahui apa ini jenis burung buas, atau pemakan bijih2an, atau peminum madu,atau burung air seperti burung bangau, burung yang di tanah seperti burung kaswari dll. Setelah itu kita membuat sketsa pidong Patiaraja tersebut, dan dicocokkan pada gambar burung2 pada Ensiklopedia Burung… dari beberapa gambar yang mirip, tunjukkan pada orang tua tersebut, dan mudah2an kita mendapat tahu bagai mana bentuk pidong Patiaraja., yang penting ini harus dilakukan selagi masih ada yang pernah melihat bentuk pidong Patiaraja tersebut.
    Horas

  10. JARUDIN MAURITZ PURBA berkata:

    Horas…
    cerita parrapotan ni akka pidong ini juga sampai ke kita orang simalungun. tahun 1996 orangtua pernah buka ladang dekat hutan di desa Purba Tongah Kec Purba Kab Simalungun, segerombolan burung lewat terbang, ada beberapa jenis, terdiri dari beberapa warna dan terdiri dari ukuran yang berbeda. orang tua saya bilang yang merah,(lebih besar dari burung pipit) itulah raja burung namanya burung patiaraja. beberapa kali saya melihat burung ini terbang, mereka selalu bergerombol, posisi burung warna merah didepan dan yang lain mengikuti. sungguh berbeda memang dengan kebiasaan burung pada lazimnya. mauliate

  11. Parlin Manalu berkata:

    Mauliaeta ma di mamaritahon turi-turian on. on gambaran hidup ni jolma namambahen segala cara laho manggulut angka jabatan, sinamot, jala songonoi ma manisia i, marpangalaho, adong nabagak pangkulingna, alai adong na pura-pura,
    alai adong na bernas hata ni patia rajai : Ianggo Raja siramoti ugasan ni donganna do, ndang manangko songon ampori i.

  12. Sahabat Tampubolon berkata:

    sombu do ni hilala, dung sidung ni jaha turi turian on bah. gabe taringot uju metmet dope iba, alai tamba do sodap na molo ni jaha marsoara

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s