ANGGUK BOBAR

Monang Naipospos

Tung hira so tarpasiding do so tangis molo dung ro hamatean lumobi di angka na hinaholongan. Ianggo najolo radot do angka natuatua mamutihi hata andung hombar tu dirina dohot na marujung ngolu i. Sipata tung lengen do pinggol umbegesa sian anit ni angka hata pandohanna sipata boi mambahen ro ilu ni na maningkir.

Molo adong najolo mangandung ndang toho “hata andung” hatana dipinsang do i, ai tung roa do begeon agan pe toho nidokna, lapatanna; molo hata andung mandok tulang “sibijaon” ma, mandok pat “simanjojak” ma, mandok jarijari “sirimpuron” ma, mandok butuha “siubeon” ma, mandok indahan “paiogon” ma, mandok horbo “silumantahon” ma, dohot angka na sing na so hagoaran dison.
Nunga guga parak, asom raru molo adong pangandung mandok “O…tulang so na so adong indahanmu, godang do horbom allangonmu ditaon ho male butuham…. Amaaaang tulaaaang….”, ninna.

Ianggo Pangojong, jolma nuaeng nama ibana. Tung unang mamboto hata ni andung, umbegesa pe nungga hira so hea. Tung adong pe dibege angka andung nuaeng hira godangan nama “andung salik”, seder tu alona, dungkon i angka “angguk bobar” nama, jala i nama nabinotona.

Mate ma Tulang ni Pangojong, tung apala haholongan ni rohana. Lumobi adong do padan-padan nasida na naneg siudutan nasida hian di angka panghataion taringot tu paradaton. Godang dope sungkun-sungkun ni Pangojong na so dipatorang Tulangna i dope. Nunga dijanjihon tulangna i tu ibana, sude angka sungkun-sungkuna i patorangonna pe muse di ari na asing.
Humalaput ma ibana mangadu tulangna i sian sihadaonan, jimput rohana dang haulahan be on songon na tading, ninna rohana. Tu ise be sungkunonhu poda, damang so adong be, sungkun-sungkun au tu halak hape nabisuk do datulang, mate datulang sungkun-sungkun tu dia ma au, ninna rohana dibagasan.

Sahat ibana tu jabu mangambur ma ibana pola naeng dilonjani angka ina namaningkir huhut mangangguk bobar; “Tulaaaang, pulut nai roham tulaaang, ndang alusanmu be sungkun-sungkunhon tulaaaaang”, ninna huhut sai manggarpasi, pola songon na beguon ibana. Lam dihojoti mangulahi taringot tu sungkun-sungkunna i. “Tulaaaang alusi jo suk…suk…kon tulaaaang”, ninna. Lam risi ma tu pinggol ni na umbegesa ai lam marpilitan do hatana. “Tulaaang..suksukkon tulang alusi joooo, susukkon… tulaang”, ninna.

Hehe ma sahalak paingothon ibana dalanna pasohothon aggukna naung rarat i nian rohana. “Ee.. Pangojong, Sibijaon do dohononmu tu tulangmi”, ninna. Alai gorso do ibana mangalusi ala so diantusi. “Bah, bijaon dope nimmu nunga mate, eee, atik na hamu do mamija on tulanghon”. Alai dipatorang ma lapatan ni Sibijaon i tu Pangojong, alai ndang dijangkon rohana jala runtus do ibana mangalusi mardongan muruk; Bijahon ma bijam, dibahen na pambija i ho. Tulang on tulanghu do”, ninna.

(ide: R.B. Marpaung)

Iklan

4 thoughts on “ANGGUK BOBAR

  1. “nabijaon” do antong i hahaha..
    Ai tarsingotna amang.., adong do diamang literatur manang bukku tarsingot tu hata batak maninggoring on ? Adong do bukku-ku “Hata Batak Maninggoring – Rangsa ni Andung dohot Hadatuon” terbitan ni Balai Pustaka. Alai 2 jilid on bukku on. Hape holan jilid sada dope dapothu jala dang tarluluan manang na tudia jilid 2 na. Na rara lappak ni bukku on. Molo adong do di Amang, baen barita da amang.. Asa pinangido nanggo apala fotokopi-na pe taho. mauliate godang.. 🙂

  2. Santun Silaban berkata:

    Molosai pinabereng-bereng do ditingki sisaonari on memang biar do roha taringot tu kelestarian ni bahasa batak sekaligus adat batak lumobi tu anak yg lahir diluar Tapanuli, jangankan hata andung gari arti ni hata batak pe nungga olo dang diantusi, jadi napaling ampuh sabotulna melatih anak2 bicara bahasa batak dan adat batak ingkon dimulai sian tonga ni bagas. Orang tua ingkon berperan artina molo dijabu ingkon marbahasa batak ma jala ajaran ma nasida nang tu ruhut2ni partuturan dohot adat batak.
    Nang pe poso anakkontai molo adong kesempatan taboan nasida untuk menghadiri angka acara2 pesta adat batak, dohot tujuan gabe dihilala nasida hinauli ni adat bataki marhite ima gabe termotivasi nasida marsiajar hata batak dht adat batak.
    Molo dang dimulai sian tonga ni jabunta antong didia be angka anakkontai marsiajar?
    Horas!

  3. Monang Naipospos berkata:

    Dang adong diahu buku i lae? Alai molo adong di angka dongan asa dilehon jolo tu lae Charly ate?

  4. Humbang Hasundutan berkata:

    Ra, ala ni na dijou i do ibana “Ee…Pangojong! Umbahen na gorso jala runtus ibana mangalusi huhut mardongan muruk.

    *** Mungkin …. 😀

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s