SI ROGO HATA

Monang Naipospos

Adong do nuaeng on hata mandok: “Manghatai ma hita tutu, asa songon ogung nauli …..” Dia do pangkatai ni ogung?. Lengen do begeon soara ni ogung alai ianggo patudoson do panghataion tu ogung, nahurang denggan do i.
Sahali manghuling ogung oloan, nungnga pintor dua hali ihutan. Sahali pangalusi, nungnga dua hali panggora. Jadi molo nietong sahali panghuling ni ogung oloan nungnga opat hali panggora (doal). Tingkos do sisongon i di panghataion na marhadohoan?

Asa marboho panghataion ingkon ma nian marsitangi-tangian jala marsipasangap-sangapan. Molo angka natua-tua manghatai didok: “ Marsitangi tangian ma hita ”. Molo angka naposo manghatai didok: “ Pahohom hita…..”
Panghataion na marboho dapot ma na marbuhu. Sasaruas do hata i asa dapot na marbuhu. Umbahen didok: “Unang manuan bulu ho na so ruas” dohot “Unang manuan buhu ditonga ni ruas”
Jotjot do dihatahon sipaingot ni natua-tua; “Urat ni gandar bulu tu urat ni pansopan, patampak tampak hundul paasing asing pandohan”. Angkup tusi do hata na mandok: “Sande ma gandar bulu tu soban na tata, unang hita pagulut, ta bege sidok hata”.
Naginoaranna Gandar bulu ima sambuhu bulu na sirsir parbalgana, jala somal do on dipangke bulu suraton. Sian lubang ni bulu i ma diombushon hosana laho pagalak api naung dibahen hian angka rapan rapan manang ranting ranting laho panggorina.

Jotjot binege molo marulaon halak Batak sai humotok do partandana. Hira naung dietong do na so adong ulaon i molo so masisoroan hata. Ima gabe bangko di halak hita umbahen dodok deba halak Batak “gaduh”.

Molo tinangihon andos masisisean, tung uli do begeon, sai jolo marpaima asa dialusi. Bangko ni angka ompunta najolo do i, molo naeng mangalusi hata ni donganna, sai matua disungkun do “nunga ujung?, nunga boi alusan?, tu au ma muse?”, dohot angka pandohan na asing asa adong paho ni hata. Alai holan di tingki masisisean i do adong paho ni hata, alana dung di angka pangkataion namarudut nunga jotjot masisoroan, masialus-alusan, pola tahe sai songon na naeng tu bada do ujungna idaon.

Sineat ni hata, ima tu pangaturan ni jambar, parpeak ni panghataion, hombar tu angka parbagian ni parjambaran, angka sidok hata dohot sijalo tohonan di ulaon. Alai ianggo hata na maneat dohot masiseatan, bada do i, jala dang sidohonon i di loloan antaran nabidang.

Si rogo hata i ma deba na jorbut begeon. Molo mangkatai on, sude do diolophon. Molo songon na godang mandok sala, dohot ma ibana mandok sala. Alai molo hehe muse angka panangkasi di sihataan i gabe adong deba mandok tingkos, dohot ibana mandok tingkos. Di ibana uluna, ihurna, bilalangna, rambusanna dohot manarui napana.
Sihabiaran do jolma sisongon on molo ro tu loloan na manghatai ruhut, ai so hundul dope ibana, nunga dirogo hata, ima mambahen jotjot “sibahuton hata”. Ai na di jaga halak do tambing ni sibahut manarbingi tu angka duru ni panghataion.

Molo so dipasiat sirogo hata manghatai di loloan, sude rimpunan ni hata naung tinoptop ni loloan, ndang olo i manjangkon. Di duru ni loloan manginsahi ma ibana jala marsintip dalan paurakhon. Jotjot do on martingting tu desa naualu papurpur hinamago ni donganna, tihas ni donganna, pangkuling ni donganna jala laos manguhumi do nang hatana. Ima na lupa di hata ni ompunta sijolo-jolo tubu na gabe poda; “Dang jadi tihaan dongan ianggo so jolo tangkas binoto didia hahuranganna, jala ndang jadi uhumon dongan so jolo binoto didia salana.

Iklan

One thought on “SI ROGO HATA

  1. Humbang Hasundutan berkata:

    Attar songon dia nama molo adong blog ni si rogo hata on ate?

    **** Bah …. gaor ma pollung, ujung na bubar … 😀

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s