NDANG TARHAISHON SORI NI ARI

Monang Naipospos

Molo matua natua-tua siganjang umur alai martilaha matua ibana, didok ma i sori matua. Natua-tua na gabe, siganjang umur alai otik gomparanna ipe didok do i sori matua.
Atik pe godang pinomparna alai sai adong dope panarihonna di ianakhonna i, ima na so marrumatangga, na so tuk balanjo atik pe naung marruma tangga, na so tubuan anak, boru, didok ma i na sari matua. Alai molo so adong tilahana huhut gabe, didok ma i saur matua, atik pe so mamora. Naung sampur sude hagabeonna, sinadonganna rungkup sude ndang adong laok di parianakononna dohot parngoluonna didok ma i saur matua mauli bulung.

Tung mauli bulung pe natuatua, uju di ujung ni ngoluna dipasangap marhite gondang sabangunan ndang mangerbang tangan ni anak dohot boruna manortor, ai tong do ibana namatean ama/ina goaron. Angka pahompu, nini, nono do nampuna tohap mangirjak disi. Dangka do anak dohot boru, pahompu dohot nini, nono do bulung namangerbang i.
Tung marujung pe ngolu ni na mauli bulung, molo adong dope namanghabaluhon, ingkon manjalo tujung do ibana di parbaluonna i. Rongkap do tujung i di namabalu jala ndang tihas i di na mauli bulung. Saput do sahat tu na marujung ngolu i, hombar tu hasomalanna be nahombar ise do manaputi.

Uju adong hamatean di sada luat, ditonggo do raja asa adong manotari ulaon i. Raja i ma mangalehon timbangan ni adat nahombar sipatupaon tu marujung ngolu hombar tu tohap parngoluonna. Diboto Raja do dia napatut manghalang gordang bolon, dia na so patut tusi. Molo tung adong pe suhut mangido manghalang gordang, ingkon jolo adong do totaran sian Raja, alai nang pe songon i ndang piga halak manosohon hasuhutonna i molo so hombar dope di partuaon i agia pe mamora.

Raja nuaeng, ndang piga be napatut mangaramoti adat jala hot di patik ni adat i dohot paruhumonna. Dang tiala be roha nasida manunggalinghon sapean ni adat i mambahen patik naimbaru mambahen marsinggaulan adat i songon haolon unte, marlambianan roha angka namarnida songon tiopon tanduk. Dang adong be pator hasintongan di adat tu angka naposo, ai nunga sintong be na lehe hian.

Adong ma mandok ndang namabalu dohonon tu naung gabe, alai dung tinangkasan na boha do? Ndang adong alusna. Ndang tujung be goar ni ulos sipasahaton tu namabalu naung gabe, sampe tua nama, ninna be. Dung tinangkasan ulos aha na pinasahatna tu angka pahompuna, didok tong do sampe tua. Antong nunga disarupahon tujung ni namabalu tu ulos ni pahompu, rap sarupa sampe tua. Ima parbue ni adat tinotaran ni angka natelhang na so umboto hasintongan ni adat dibagasan patik dohot uhum. I ma haroro ni uhum naimbaru, sisamak, ima na so umboto ojahan ni adat nauli dohot pambahenan naroa.

Mulleulle sanggul ni parjabu bona, beha pe soso ni raja, guru disuhut do hasuhutonna. Hombar tu sigamuon di ulaon i, metmet manang balga, i do pangguruan tu suhut. Alai ianggo patik ni adat hasintongan ni uhum tong do marpangguruan tu Raja. Nunga bile raja nuaeng sian suhut. Molo adong suhut namora, nagabe, dibahen ma lomona, gabe maroloan tu ibana ma angka Raja. Dibuat angka raja i ma dalan haluaanna namandok guru di suhut do ulaonna. Alai lupa nasida, na ingkon guru di raja do ruhut ni adat namasa di horja i tinolopan ni bius.

Parsorion, namarharoroan do i sian hata “sori”. Sori, ima bagian na so tarpasiding, turpuk na so hasingkatan. Molo naung ditodo rohana do jadi soridalu ujungna mate di porang ibana, ndang sitihaan be i. Songon i nang na hasomalan di tao silumallan, molo tung mate manongnong ibana, tong ndang adong be sitihaan. Nunga disi be sori ni arina, ai nunga ditodo turpukna disi ngoluna jala managam hamateanna disi.

Adong do sori na boi tarhaishon, ima molo nuimpat pator ni ngolu naung niundukhon. Molo dietong hamatean sambing do soridalu, ujungna sumurut ma ibana sian i.
Di parngoluon pe adong do sori na boi tarhaishon, ima molo hamatean do halosohon namanghorhon hapogoson, ujungna sumurut ma ibana sian i tu haringgason dohot hapadoton.

Sori na so tarhaishon ima tihas diboan tubu dohot tihas ala ni sahit. Ima nidok ni natuatua ndang tarhaishon sori ni ari. Ianggo hapogoson, haotoon, na boi do i haishononhon. Molo hapadoton niulahon tarabor ma hapogoson, molo ringgas marguru tarabor ma haotoon.
Di adat dohot uhum, ise pangguruan ? Didok natuatua na hot di tuhe do sungkunon tuhe, na hot di gadu do sungkunon gadu. Haliluon do molo sungkunon tuhe tu pangansi, haotoon do molo sungkunon gadu ni uhum tu pangeak.
Molo tung so adong be nuaeng sungkunon tuhe ni adat dohot gadu ni uhum sian natuatua di halak Batak, ra on ma nidokna sori ni ari di adat Batak?.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s