JOLMA JAMPURUT

Monang Naipospos

Borua na tangkas di poda do si Rumata marhite sian ajar ni natorasna. Parulanna pe denggan situtu do mangaradoti ruhut parsaoran dohot marpangkuling. Ndang pola longang halak disi, alana jolma nasangap do natorasna Raja Pangulbuk, na garam di panggaraman na gurum di pangguruman, na tangkas di ruhut ni hata na hot di paruhuman.
Sobok do hatana tu pangalahona laos i do sitindangi na Raja ibana siradoti adat dohot dalan hangoluan.
Bangko di angka natuatua, na rosu di paralealeon, sai dilului do dalan patoguhon parsaoran. Unur di partuturon, ianakkonna dipaorohon. Tung so tarpatudos pe hasangapon ni Ompu Bangkudu dohot Raja Pangulbuk, ianggo di pangalaho, sian parnidaan ni Raja pangulbuk ndang hea tartiha. Tung munar do paniseon ni Ompu Bangkudu tu Raja Pangulbuk andos jumpang nang di sihatoropan.

Ndang tarjua si Rumata soso ni natorasna paorohon ibana tu anak ni Ompu Bangkudu. Ndang na so adong nian manopot si Rumata jala naung sahat tu natorasna, alai ima huroha bagian sijaloonna, ai tubu itangitang di na so paritangitangan, ro parsorion di na so panagaman, marujung ngolu oroanna i uju di pardalanan.
Sangarbis do ditanda si Rumata si Hoding anak ni Ompu Bangkudu ala so pola haru sobok tu rohana. Umurna ni si Rumata pe nunga godang, dung sai mulak angka pangaririt ibana, ala sai maol dope dilupahon ibana parbalujongjongonna i. Ujungna saut ma ibana muli tu si Hoding nang pe so apala dihaholongi rohana.

Dung saut parsaripeon ni si Rumata tu si Hoding, mangula ma nasida di hatungganeon, ima angka ulaon adat dohot ngolu siapari. Nunga sai tarida parulan ni si Hoding na so ampit tu rohana. Hormus uju mangan, dung butong galdap renges songon gaja magulang. Pangkulingna pe hurang taris do tu pangkuling ni Ompu Bangkudu. Ah.. bagian i, tung suhar ma on songon lapaon ihan, marpaniha songon boniaga di onan.
“Nunga matompu langge dipopo lombu jonggi, nunga manengneng ateate ala so jolo bonoto tangkas pangalaho ni pangoli. Nunga bagian on da ompung songon jolma lobilobi, ai ndang tartodo sirongkap ni tondi. Tarbarita do nian damang nabisuk paniroi, alai au boruna ndang diboto naung sumolsol bagi”, ninna si Rumata dibagasan rohana.

Di sada tingki laho ma si Hoding sinondukna i tu ulaon adat di horja nasida i. Dung mulak sian i, diboan ma godang juhut. Longang ma si Rumata, diingot uju di jolo ni natorasna ibana hira so hea do adong dibereng juhut songon i godang uju pinaraja Raja Pangulbuk, baliksa sipata laos lia do sahat tu jabu. Jotjot do i diparrohahon si Rumata, sai ris do dibahen jumolo tu angka donganna juhut jinambaranna i jala dang hea gulut di godang ni juhut ibana. Sipata tinggal sangiris jambarna, molo dibereng di loloan manang di dalan horong boruna sipata laos dilehon do i, didok; nion borungku dapot jambar ahu nangkin, bahen ma on tu ingkau rata i daion ni angka pahompungki, ninna do.

Disungkun si Rumata ma tunggane dolina i. “Sian dia songon i godang jagalmu? Gari amanta Raja Parhuta so adong sadia jambarna”, ninna.
“Ummangat do ahu sian i, ninna si Hoding mangalusi si Rumata parsondukbolonna i. ”Aut so ahu ndang saut ulaonna i”, ninna. “Ahu do mangalap lombuna, on jambarhu sian i”. “Ahu do maneat lombuna, on jambarhu sian i”. “Ahu do mamuri butuha, on jambarhu sian i”. “Ahu do mangalompa jagalna, on jambarhu sian i”. “Ahu do pabolak amak, on jambarhu sian i”, ninna.
“Ba…ai jampurut do ho hape. Ianggo ahu boru ni Raja do”, ninna si Rumata, laos ditinggalhon.

Iklan

One thought on “JOLMA JAMPURUT

  1. Humbang Hasundutan berkata:

    Tandama tutu boru ni raja si Rumata on. Alai ndang apala polin dope ibana sada boru ni raja, ala pintor ditinggalhon ibana do tunggane doli na, so jolo di sosoi ibana asa unang gabe hatoban parhalanguluna i. Asing muse do si Rumetep sian si Rumata. Raja panggonggomi do nian ianggo si Hodong tungganedolina i, alai ala (sai) otik do jambar ni amanta na i, sai di jujuima si Hodong asa songon si Hoding ibana. Sai dipanjukjukkon si Rumetep do hatana tu amantana i: Aut so ho, ndang saut ulaon i (ndang mardalan pemerintahan i). Ho do mangalap lombuna (Manontuhon APBD, aut so ho ndang naik i gabe hampir samilliar), buat jambarmu sian i. Ho do maneat lombuna, mambutuhai, ho do pabolak amak, ho do sude. Buat jambarmu sian i. Ueeeee da inang parsondukbolon hu, ai jolma hatoban do molo jolma si songon i. Sai ninna si Hoding do nian mangalui tungganeboru na i. I don’t care daddy, napenting boi au margolang marbelian, maila iba tu akka dongan sai holan suasa on pakkeon. Dungi muse ianggo olat olat ni sakkae do di buat ho, ai aha ma i molo ni bandingkon tu ……..Nga sae be i inang, marsogot hu hallungpe, asa sombu roham.

    hehehheeh, gak nyambung

    **** Nyambung do … 😀

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s