BAGI PANG

Monang Naipospos

Di sada tingki, marburu do par Uluan tu harangan mangalului ursa bolon. Torop do nasida sada uduran masiboan bohalna be dohot ula-ula na ringkot tusi. Dung das nasida mareak topi harangan, songgot ma diida nasida ursa mangambur dompak dalan nasida. Tarsonggot ma ursa i, laos mamedu dalan ma muse ibana mangalului haporusan. Dilete nasida ma, hape pajumpang ma nasida dohot parburu sian Siruar, disi diboto ma naung dibereng ursa i do parburu Siruar umbahen mangambur, hape tongon tu jolo ni parburu sian Uluan.

Sian na so pola masidasdasan, rap mangalohot ma na dua uduran parburu i masibahen gogona asa jumolo mandapot ursa nabolon i.
Patinatina do antong gogo nasida, rap dijolo-rap dipudi, rap naeng hona pantomna-rap naeng dapot tanganna niaduna. Tung diheal ursa bolon i do antong nasida, alana nunga umbotoan ursa i angka dalan di harangan i. Dang adong na olo sian nadua uduran parburu i mambahen angkal manghaliangi tombak manutup dalan ni ursa i, mabiar nasida so jumolo dapotan. Ujungna sai rap tu dolok ma nasida rap tu toruan laos heal, loja so martontu.

Di sada dalan jonok tu tala nametmet, adong ma arbat sada hau tar sirsir bolonna. Laho mangangkat ursa i, hait ma patna tu hau i ujungna garbas ma jonok tu tala nametmet i, tarhinos dang humosing. Ursa i pe nunga tung loja huroha, tarpaima ma ibana di soro ni arina sian parburu i. Dung sahat parburu na dua uduran i tu hadabuan ni ursa i, rap maniop ma nasida songon patuduhon na rap dapotan. Adong ma deba sian parburu i pintor hundul, nadeba galpang ala ni lojana. Dipansangkothon be ma angka hampilna, hajutna na marisi bohal tugo tu parburuan nasida di tanduk ni ursa i.

Mangkuling ma sahalak sian uduran ni Uluan: ‘Boti, hamu angka dongan na sian Siruar, na rap dapotan do hita di ursa on, ala ni i dos ma rohanta mambagisa’, ninna. Dialusi na sian Siruar ma parburu na sian Uluan i: ‘Nauli ma i, antong songon dia ma hadosan ni rohanta?’, ninna patangkashon na ro sian Uluan.
‘Nauli, ianggo pangidoannami na sian Uluan, ingkon bagi dos do hita nadua uduran, beha hamu angka dongan na sian Uluan, tolop do hamu?’. ‘Tolop ma hami disi’, ninna angka uduran na sian Uluan.
‘Ima hatamuna na sian Uluan, ianggo hami na sian Siruar mandok ingkon bagi pang do, beha hamu angka dongan na sian Siruar, tolop do hamu?. ‘Tolop ma hami disi’, ninna angka uduran na sian Siruar mangalusi.
‘Boti, hamu angka dongan na sian Siruar, na martongdong do hita jala na sai jotjot jumpang di parburuan. Poda ni natuatua do i mandok ndang adong na mangambi sian dos ni roha, ala ni i do umbahen hudok bagi dos hita di ursa on’, ninna parburu sian Uluan.
‘Nauli do nidokmuna i angka poda ni natuatua, jala laos poda ni angka ompunta i do nang diingot hami asa olo hita marbagi di roha mardua di tangan, alana ni i do umbahen didok hami bagi pang’, ninna na sian Siruar mangalusi.

Dang adong na dua uduran on na olo talu sian hata pangidoanna be, pola do gabe songon na naeng lam posi angka hatana. Soara nasida pe nunga lam gogo, masisoroan ma nasida mangkatai, ranggang-jargang tanganna mandok hata, nadeba sipata hehe-hundul ndang marhasoan. So sidung dope didok nasada hatana, nunga disoro nasadanari.
Nunga pola lobi sajom nasida namargulut i, ndang tarida na laho ujung pangkataion nasida, soara nasida pe nunga songon parhotok ni ronggur.

Ursa i pe nunga lam sumuang gogona, tarsunggul ma ibana. Dibege ma angka soara nahumotok i, dibereng ma angka jolma namargulut i jala ditangihon angka soara na pasebut.
‘Bah, ai au do hape na naeng bagion ni angka jolma on’, ninna rohana. Hehe ma ibana laos mangambur sian nasa gogona tu harangan nagolap huhut diboan angka hadanghadangan na marsangkotan di tandukna i.

(ide: ceritera rakyat)

Iklan

4 thoughts on “BAGI PANG

  1. Panjaitan berkata:

    So nari pe masa do na songon i, ndang di ho, ndang di au ba di begu i ma.


    *** Holan ala so masiantusan ate tulang, gabe begu ma mangallangi 😀

  2. Pahala Panjaitan berkata:

    sada sindiran tu halak hita batak nasai marpartahanhon pendirianna nahurang denggan

    *** Pas ma i … 😀

  3. Gom gultom berkata:

    Gabe taringot do au amang tu cerita nihalak batak toba dohot halak pakpak, narap marburu ursa nasida rap dapotan, (tarsongon cerita i). Alai ala naso marsiantusan bahasa do. Rohalak batak mandok sambariba diau sambariba diho, jd ro muse halak pakpak srek mba’mu srek mba’ku. Jd lalap do nasida martahanton pandapot nasida sahat tu nalari muse ursa i. He he he…

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s