GOGO MAMAUK

Monang Naipopos

Adong do ula-ula ni ompunta najolo laho pabalik tano di pangulaon, i ma hudali.
Na so umboto ruhut ni panghundalion, asal paukna do disi, ndang diboto dia naholbung dohot na buntul.
Molo holan mangasahon gogo mamauk do, tagamon do ro tolu ragam parmaraan. Ianggo hudali do seda, manang naniula i, boi dope patureon. Beha ma molo iba singgalak tu pudi andos manogu? Nunga adong hailaon. Lam beha muse molo rompar do hudali songgot andos manait, nda taha ma tu pat? Ndang haholipan panaili ni halak.

Ndang tarsuhat hamaloon ianggo so ture pangulana jala ndang marguna hagogoon ianggo so diboto ruhutna.
Ruhut dohot gogo silinduat do i di angka siulaon. Molo tarida sian bogas ni pangula na pasebut, rundut, ulaon ni na geno do didok sisongon i. Jolma sisongon i ndang tarpatudu i tu huta ni deba mangumbol siulaon, baliksa di hutana i pe sai dipasiding nama jolma sisongon i, ai ndang ture tuganon mangula na so umboto ruhut pangulaon jala na gale di pamatang.

Bangko na roa do di halak Batak molo sai dijukjukhon dirina agan pe naung sai tartiha niulana, ai dietong rohana naoto do jolma humaliang na so umboto nauli dohot naroa.
Haotoon do dietong parjuma molo sai lehononna upa ni jolma na so umboto ruhut pangulaon. Nadeba, ala asi ni roha, ala ni sisolhot, ala ni palilung, janggur petaho, jahul petaho, jurgang petaho, gamua petaho, ala ni palilung nangkin dioloi ma tarrobung. Angka jolma na sai girgir tarrobung ala ni palilung, didok do i; siidupi naroa, sijalin handang naburuk dohot sihurak namate asa adong andunganna.

Molo tarurak pangula sijahul, dua pangaean siaeonna, ima hansit dagingna huhut dapotan tiha-tiha ibana. Molo sai ditugan parjuma sijahul mangula laos tarurak, dohot do ibana tartiha, didok deba; “pinangido ni roham do i tarurak, sombu ma roham nunga mangae ibana, ho do sibaen i”, dohot angka tiha-tiha na asing sian natorop.

Natangkang do didok jolma na so mangoloi siajaron. Dilehon dalan parbinotoan tu ibana, sai na dirohana i do diulahon. Sisongon on ma na so adong mangeahi uju tarurak, jala laos didok natua-tua do; “Taon ma na so siat sijaron”, ninna. Adong do hata ni natua-tua do tu halak sisongon i; tahataha tu pat songon panghundali na so malo

Ianggo natua-tua nabisuk, ndang olo i sumurut mangalehon siajaron di angka naposo pamatang di ruhut pangulaon. Andong do sude patik-patik ni pangulaon jala ingkon radot do mangguruhon asa peam mangulahon. Sian parulan ni halak Batak do manomu tu roha ni angka naposo gabe tiruan nauli, di ruhut paradaton dohot pangulaon.

Molo dibege angka parsiajar poda nauli sian na tumua manang natorasna, dituluthon do tu pangulaon ni silehon poda i. Molo sohombar, silompit do harorangon ni sibege poda i, didok rohana holan hongkang sambing do hata i, ai diida silehon poda i jurgang do pangalahona, marsipalensem.

Siengenon nama hata mandok: “Hata nauli ima tangihon unang tiru pangalahongki”. Molo sai dihasomalhon bangko sisongon on, salongonna ma dingoluna pangaean na dokdok; rompar ma tu ibana halenjengon ni anak/boruna i gabe haurahonna.
Ianggo holan ala so malo do mangulahon si ulaon, na boi tuganon do i muse tu nauli molo olo ajaran, jala jolma napantun pangguruanna, ima guru di poda nauli, hombar podana tu pangulahonna.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s