ANAK TUBU BORU SORANG 11

Raja Bilher Marpaung (Op Miduk)

SITUPUK BULUNG-BULUNG

Molo naeng palolo pesta halak Batak dipapungu nasida do bulung asa adong bahen rahot ni indahan. Ala hudon ni nasida uju i hudon tano dope dipangke. Jolo ditupuhi ma bulung i, somalna bulung ni pinasa do dipangke nasida. Ganup mardahan indahan, jolo dipamasuk nasida do bulung i tu bagasan hudon tano bahen lapikna unang godangan hurhur. Songon i ma dipargantihon nasida ganup mardahan indahan.

Angka sisolhot dope manang olat ni ompu martinodohon dihara laho manampuhi dohot manupuhi bulung i, ndang apala sahat dope ulaon sisongon i tu liatan manang tu dongan saulaon. Disi ma hataridaan ni dos ni roha namarsada ompu.

Molo adong na so marrindang anak sian sada ama, holan boru do rindangna, dung marujung ngoluna marrapot ma angka sisolhot dohot dongan sabutuha ni naung marujung i. Manang ise situpuk bulung-bulung di boruna na so mariboto i.

Molo adong tubu boru na so marpinaribot, anak ni amangtuana ma manang anak ni amangudana na gabe situpuk bulung-bulung di nasida. Molo boru sihahaan, olo do dipatondong tu anak sihahaan. Molo boru sipaidua olo do dipatondong tu anak sipaidua, laos songan i boru sipaitolu dipatondong tu anak sipaitolu, hombar tu angka denggan ni palilung.

Hauma manang golat parbagianan ni boru i, na ingkon do topihon ni nasida sian i, asa adong parbagianan ni situpuk bulung-bulung, jala situpuk bulung-bulung ma martogi manopot ulaon ni boru i, di ulaon na metmet manang ulaon na balga. Laos songon i nang boru i manopot hulahulana. I do umbahen adong hata Batak mandok, ise do situpuk bulung-bulung di ulaonmu?, ninna. Tanggung jawab nabalga do di halak Batak situpuk bulung-bulung.

MANEAN

Ndang apala sude halak Batak na lomo rohana manean arta ni amangudana manang amangtuana. Alai molo ro parsorbanna na ingkon do. Molo adong sada ama marujung ngolu na so marindang di anak dohot boru, gabe teanon ni hahaanggina ma sude arta tinadinghonna. Jala hahaanggina nama patupahon na hombar tu partuaonna, manang diparmondingna. Alai di parmondingna dang padalan parjambaran. Unang gabe marutang raja, ai ndang olo raja manjalo jambar ianggo so adong na laho manjalo panggararan.

Hahaanggi nasumolhot do paneaan ni artana molo so adong ama martinodohon manang ompu martinodohon. Ruhut nahot do i di halak Batak.

Tartangis-tangis do siboru Tumbaga dohot siboru Buntulan, ala sai naeng teanon ni amangudana arta tinadinghon ni amang nasida. Gabe maporus ma nasida tu tombak ni Sabulan, disi ma nasida marmianan. Dung ro pe parburu dua halak, gabe diboan ma nasida nadua tu hutana jala dibahen pardijabuna.
Jolma na raja do parburu sidua halak i, ai denggan do dibahen nasida nadua tu si boru Tumbaga dohot siboru Buntulan. Ndang hea dipaulak manang didok boru-boru nabolong-bolong manang boru najinomput-jomput. I do patandahon togu ni padan nasida. Gabe sumolsolbagi ma amanguda nasida manungir-nungiri pambahenanna, di naro i helana dohot boruna nadua manopot hutana. Songon i ma binoto torsa-torsa najempek taringot tu si boru Tumbaga dohot tu si boru Buntulan.

RAGI-RAGI NI SINAMOT
DOHOT RUHUTNA

Namargoar ragi-ragi ni sinamot sarupa do i dohot pauseang. Alai marpauseang di hutana ma. Songon on ma hatorangan na jempek. Dipangolihon si M ma anakna tu boru ni si S, dihatai nasida ma sinamot sigararon ni nasida tu parboru Rp 400 (opat ratus rupiah), hatihai asam sakaleng boras ma sarupia, horbo silima hae sada, dohot mas. Mamboan pauseang ma boru ni si S, santurpuk hauma margogo hira-hira opat pulu lima kaleng eme. Diligi-ligi paranak ma hauma i dohot parboru, ndang pola sidabuaekon.

Holang do huta ni paranak tu huta ni parboru, daona dalanan satonga ari. Jadi molo laho dohot mulak, nunga dalanan sadari. Nunga dihatai nasida hian ia ulaon unjuk di huta ni parboru (dialap jual).
Dipingkiri paranak ma molo mangula hauma pauseang i anakna dohot parumaenna nunga suda-suda di dalan tingki. Dielek ma hulahulana i: “Rajanami, marpauseang di hutanami ma borumuna, unang pola parhauma tandang helamuna dohot parumaenhu tu hutamuna on”. Dung unduk masioloan nasida dipatudu paranak ma tu parboru singkat ni pauseang. Borhat ma parboru dohot paranak mandege-dege hauma naung niunduk ni paranak i. Dibereng nasida ma hauma i, ingkon sirimbaon dope jala sidabuaekhon.

Dipaondong ma bolak ni hauma i margogo 70 (pitupulu) kaleng jala urupan ni natoras pangintubu ni paranak ma mangarimba hauma i, gabe moruma sinamot naung diunduk hian. Saratus lima pulu rupiah (Rp 150) nama sipasahaton ni paranak, mas pe ndang dohot, alai ianggo horbo naung diundukna hian dohot do i dipasahat tu parboru na gabe sinamot pangoli ni anakna. Jala ulaon unjuk gabe di huta ni paranak (ditaruhon jual).
Songon ima hatorangan na jempek taringot tu ragi-ragi ni sinamot dohot pauseanghon di hutana.

MANGUPA

Adat ni ompu naparjolo diupa do anak na tubu dohot boru na sorang, alai somalna dung sidung mangebang ma i asa diupa. (Hatorangan ni namangebang pinatorang pe i muse disada tingki).

LAGETIAR DOHOT AMAK TIAR

Lagetiar, somalna di tingki angka ompu naparjolo holan tu jolma siupaon do i. Umpamana tu parumaen ro. Asing do na mangupa tu na mangupa-upa. Molo mangupa-upa tu natarsonggot (songgot ni roha) alai molo na mangupa tu parumaen na ro dohot tu na paborhathon mangalului jampalan na lomak dohot na manopot parsingkolaan na tumimbo (songon namasa nuaeng on).

Diupa do najolo anak pinajolo dohot jolma nabegu, jolma asang-asang jala hombar tu tohonanna do dibahen. Siupaon dipatupa (upa-upa) ndang holan dengke diupahon, mamereng tu haringhotanna do i di angka jolma siupaon. Somalna dipahundul/dipajuguk diatas ni lage tiar, jala lage tiar dipaherbang ma i diatas ni amak, ipe asa dihatahon na mangupahon i. Holan jolma siupaon do padop-adop na niupahon i.

Hatorangan najempek taringot tu na mangupa parumaen ro.

Di tingki pesta unjuk i diboan parboru do dengkena dipasahat ma i tu paranak. Sian dengke napinasahat ni parboru tu paranak dipasuhi ma i manang piga-piga dengke, ima nalaho siupahonon ni paranak tu parumaen dohot anak dung sidung pesta unjuk i, (manang bodarina) jala adong dope mangulahon on di manang na piga-piga luat (huta). Adopan ni angka dongan tubu (dongan sabutuha), dongan saripe ni hasuhuton do i. Ido umbahen adong umpama: Tua ni salaon, salaon situa-tua, Tua ni halak natorop sabutuha, Molo adong sibagion godang dongan marpardua, Molo adong sijuaon torop dongan manjua.

Dihatahon namangupa ma songon on hatana: Nuaeng pe dianakhu dohot parumaenhu nunga hundul hamu diatas lage tiar. Sai tiar ma panggabean, tiar ma parhorasan na laho sipadop-adoponmuna tu angka ari nanaeng ro. Dison dengke sitio-tio dohot indahan na las peak diatas pinggan puti: asa puti sahaliapan, puti so hapurpuran panggabean dohot parhorasan sahat tu pagian ni ari. Dison indahan nalas, las ma rohamuna, dengke simudur-udur sai siripe mudur-udur ma hita tu joloan on mangudurhon anak ma hamu dohot mangudurhon boru tupagian ni ari

Pir ma toras ni pongki bahul-bahul pansalongan
Pir ma tondi ni parumaen siboan tua ma marangkup sinadongan
Bintang narumiris ombun na sumorop
Maranak pe hamu riris marboru antong torop
Andor halumpang ma togu-togu ni lombu
Narap nang saur matua hamu pairing-iring pahompu.

Ndang sidohonon ni namangupahon hata umpasa, sahat-sahat ni solu. Alana ingkon raja panggohi do natalup manghatahon i (manggohi).
Dung sidung diupahon jumolo ma naniupa i manganhon ipe asa rap mangan ma natorop namangadopi ulaon pangupaon i. Dung simpul marsipanganon, marhaliang ma angka natua-tua, mangalehon hata pasu-pasuan tu naniupa i, manggohi adat pasu-pasu naung dihatahon di tingki pesta unjuk di arianna i. Ima naginoaran ni angka ompu naparjoloi panggohi ni ulaon, Mangampu pasu-pasu i tangkas do ingkon na ni upa i do.

Iklan

5 thoughts on “ANAK TUBU BORU SORANG 11

  1. kawansyam berkata:

    Boleh tahu terjemahannya, minimal terjemahan judulnya saja, hehehe…

    Sekadar info saya tertarik membuat tautan antara blog ini dengan salah satu blog saya dusunlaman [http://dusunlaman.blogspot.com] yang juga fokus pada tema-tema lokalitas.

    salam,
    Syam

  2. tanobatak berkata:

    @ Kawansyam
    Menjelaskan judulnya saja harus panjang.
    Anak Tubu Boru Sorang artinya anak laki dan perempuan lahir.
    Bagi orang Batak bagi anak lakilaki disebut lahir (tubu) karena dia berakar di klannya sendiri, sementara perempuan lahir (sorang) karena kelak dia akan memperkuat klan marga suaminya.
    Serial tulisan itu menjelaskan proses perlakuan adat istiadat dari sejak manusia lahir hingga dia melahirkan manusia kemudian.
    Terimakasih atas perhatiannya.

  3. o gitu ternyata kirain apaan???
    tapi napa judulnya seperti itu yeach?
    Anak Tubu Boru Sorang
    tukan anak lahir perempuan lahir napa harus judulnya seperti itu???

  4. dwuh mey salah yeach???
    kalau misalkan anal perempuan nikah dengan yang bukan satu agama dan mengikuti agama pasangannya,apa perempuan tersebut masih dianggap anaknya???
    karena mey pernah dengar cerita seperti itu????

  5. ron li berkata:

    Mey
    , ko kata ompungku siapapun yg kucintai ko uda dos tahimuna boanma tu jabuon , pasautma, yg penting jgn suami/istri org, ko bisa jgn pemabuk/judi/narkoba, ko bisa yg kerja, agama apapun yg penting dia mau dtg ke rumah kita dan makan sama2 gitu, usahakan kalian sah dulu diagama/negara, nanti ko kalian rasa ortu uda gakmarah datanglah minta maaf, bikinlah adatmu ko uda ada uangmu, adat kcl atau bsr sama saja. cem mana? ko dibilangnya dia agama ini tapi ko dia tak mau makan di rumah ortumu apa fikirmu dia itu bertuhan dan berperikemanusiaan, beradat ,beradab?

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s