LUMBANG SINGKORU PONJOT SAPADANG

Monang Naipospos

Molo lumbang singkoru mura do i marurut. Alai molo ponjot, tung nialbashon i ndang olo mapeut. Molo ponjot sapadang di pangalompaan, ngaltip do i ndang mardai panganon. Alai molo lumbang, ture ma i. Ura do i ganda jala tabo panganon.
Tung ramos pe hata manghatahon uhum, ianggo lumbang do di roha ni namanangihon ndang marguna i. Molo lumbang do di roha ni namanghatahon, sungkot di urur ma i sangkot diransang ndang diboto natorop mamutihi.

Molo jumolo sitindangi ni uhum i manompas hata na nidokna, busisaon ma natorop di duru ni uhum, ndang adong hahotanna. Molo marhapilingan panindangi uhum mandalanhon paruhuman tu hinaholongan ni rohana, mandele ma natorop ndang marhasoan.
Ditudoshon nabisuk do nuaeng on uhum ni bangsonta songon asar ni sijombing, ia nametmet boi dibuat, ia nabolon malua.
Didok natuatua; Ndang habajaan lobang. Lobang di hasintongan i ma pangalaosion. Tung beha pe dibahen namalo mangholiphon hasalaanta marhite parpollungon, ndang diida mata doboto roha do. Alai molo margogo Uhum tinindanghon ni Pargomgom ni bangso niuluhon ni Raja Natigor, ndang malua nagogo, namora, nabisuk sian hasalaan molo dung hot hatian sijujung ni ninggor sitingkos ni ari.

Nirimpu tundunna hape babana. Songon i ma angka pandohan ni angka natorop naung tarpaima di hasintongan sitindanghonon ni angka pargomgom naung pinajolo. Marpangela do dimulana mandok huhut manggoari angka pangalaosion ni angka partogi di bangso nabolon on. Marpadan do nasida molo dung dipabangkit natorop gabe Raja, na ingkon maniop hatian si sada ihot, tuginjang so ra mungkit, tu toru so ra teleng.

Marpangela do nang di mulana asa manjae angka luat, jongjong pargomgom diluatna i. Tarhirim do natorop dung jongjong harajaon i manjae, tubu ma angka denggan ni parngoluon, tindang ma uhum hasintongan, pita ma ulaon ni Raja Pargomgom. Hape, dung dituluthon, holan pabornokhon bibirna do parleapleapan ni dilana, gabus sambaing do tarida sian ulaon ni angka Raja Pargomgom.
Dung dialathon di pudian ni ari didok be ma nirimpu tundunna hape babana. Nirimpu burjuna hape lagana. Nirimpu napasangaphon hape na mangaleai. Nirimpu napangoluhon hape lam nanusai. Na manuan itangitang do hape di na so paritangitangan, na pajongjong angka parhilang do hape di na so panagaman.

Tung tedak pe angka napinajolo i mangulahon pangansion mangulahon hajahaton pasudahon ngolu ni natorop, lumbang do nasida sian uhum. Alai baliksa jolma nametmet i molo tarida hasalaana maradophon donganna dohot bangso, manigor hatop do panguhum i manindanghon uhum nadokdok tu ibana ndang hatopotan.

Tungkot jumulluk munsung, namasa on di natorop saluhut, ai ndang boi marpalias so dohot ibana manungkoli namasa i, alana pinahot ni natorop do angka partogi i marhite soara torop. Sabungan ni hata torop do pahothon angka partogi i laho mangalingkuphon uhum hasintongan “paluahon dohot panenang uhum sian angka parsinabul i” jala mandabu uhum nadokdok (nasintong) tu angka natorop, nametmet, napogos huhut napinalea.

Iklan

3 thoughts on “LUMBANG SINGKORU PONJOT SAPADANG

  1. Andaikan saja semua orang batak baca partungkoan ini terutama pemimpin alias pejabat atau generasi muda batak khususnya, mungkin akan bermanfaat sekali .kira2 gimana caranya ya ?

  2. mansai las rohangku manjaha sude gurit-gurit ni amang Monang Naipospos on,sude digurit songon sada sasra Batak nauli, jala masuk tu roha. Sai ganjang ma umur muna amang Moang….sian Tarutung do au, jala publikasihon do gurit-gurit muna on tu halak batak na di bona pasogit on.

  3. Pontaseddy berkata:

    Gabe maila do ahu, manghatindangkon na halak Batak ahu, alana ndang huantusi aha na ginurithon ni Amangboru Naipospos namarjudul LUMBANG SINGKORU PONJOT SAPADANG
    Eeee tahe, Batak ahu alai dang huantusi bahasaku…

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s