Unang mangasahon lajup ni ulu, tangka ni abara

Monang Naipospos

Lajup ni ulu, ima; habisuhon, harajaon dohot hasangapon. Tangka ni abara, ima; hagogoon, hamoraon dohot hatoropon.
Adong do nabisuk, ndang maralang-alang rohana mangasahon habisuhonna paoto-otohon. Nasangap, mangasahon hasangapon paleahon. Nagogo, mangasahon hagogoon mamorduti. Namora, mangasahon hamoraon pasipalhon. Natorop, mangasahon hatoropon mangarupa.
Adong do nang nalea, naoto, nagale, napogos, nabile, ndang maralang-alang rohana marhatangkangon mansoadahon hasintongan.
Nang tung adong pangkuling, parulan dohot parange ni nalea, naoto, nagale, napogos, nabile i gurgur sian uhum, sampur sian patik, ndang pangasahononton lajup ni ulu tangka ni abara mamisat. Sondang hatiuron do patuduon manulu rohana pareak hasintongan

Angka jolma na sai mangasahon lajup ni ulu, ndang tarsolanghon poda hasintongan tusi uju memedu langkana sian hasintongan ni patik dohot uhum. Hagogoon do luluannya manambai lajup ni uluna i laho mangalo angka siboto ruhut paminsangon i.
Angka nalea, naoto, nagale, napogos, nabile pe sipata jotjot do martangkanghon hahuranganna i maualakhon poda nauli, sipata dietong do lea ni roha ni naburjuroha molo dipasingot pangulaonna naung mamedu sian hasintongan.

Ianggo pangidoan ni angka natua-tua siboto ruhut, habisuhon-harajaon, hasangapon-hagogoon, hamoraon-hatoropon ingkon marguna ma i manungkoli angka nabojok, nabile, nagale, dohot napogos. Molo marguna habolonon dohot hagogoonna i manaongi parngoluon ni ganup natorop, nepnep ma saluhut dibagasan dame. Ndang mataut begeonna be angka ungut-ungut nang angka sarita, lumobi tuhas-tuhas di habolononna i. Maminta, manami ma angka natorop asa lam tamba hasangaponna i marbungaran jala mombang marsundut sahat tu pinomparna. Ima nidok ni natua tudosan ni Raja; Hariara nabolon pangunsandean ni sihorsihor, Raja parroha nabonar pangidoan uhum natigor.

Angka nalea, naoto, nagale, napogos, nabile i ndang mamedu be sian uhum, sampur sian patik, ai nunga dipatindang nagogo patik dipahot uhum. Marhabiaron ma angka namarbangkohon pameduan sian patik dohot uhum ai nunga diida sondang ni hasintongan di angka sipahot uhum i adat diparadat, uhum diparuhum dibagasan ngoluna.

Molo marlolo angka nabisuk, nasangap dohot namora sapatahian matatap humaliang laos sada sangkap mangumbol tahi nauli, las ni roha ni natorop ma parbuena. Masitomuan ma angka roha ni nagale, nabile, napogos mangumban ulaon i rap mangurupurup pasidungkon, ai nunga sisada sinabul nasida manungkoli sangkap ni partahi uluan ni gogo i. Ima nidok ni natuatua; Masitatapan songon dolok, masipairingan songon rura.

Timbo pe pakpak ni dolok, i do bangguana, disi do hasangaponna. Bagas pe rura, i do ojahanna, disi do habadiaonna. Songon ima ngolu ni Raja molo tinumpahan ni natorop harajaon dohot ulaonna. Ndang tarunggil be i sian rura ojahanna i ai tarrahut do ngoluna dohot ulaonna di natorop jala sande di natorop i do hasangaponna.