TINGGALHON NA ROA

Monang Naipospos

Masiboan ulaonna do angka jolma hombar tu angka hasomalanna. Sian i do dapot botoon ulaon ni halak na manghorhon ngolu ni dirina. Adong ma i pangula, adong ma i parmahan, adong ma i partoba dohot angka lan na asing dope. Haguruon pe tarmasuk do i na manghorhon ngolu di angka jolma, alai adong do deba na mangalehon parbinotoaanna i marhite haguruon na so manghorhon ngolu ni dirina, alai sonang ni rohana mangulahon do. I ma di angka halak naung adong bahonan ni ngoluna jala adong rohana dohot tingkina mangalehon parbinotoan tu angka donganna.

Dang sude jolma tama dohonon naung didongani sahala guru nang tung tardok ibana namalo. Adong do deba timbo parbinotoanna, alai ndang tarlehonna tu donganna nanggo apala sanjongkal, ima ala so adong di ibana sahala guru. Adong do dang apala timbo parbinotoanna, alai ala didongani sahala guru ibana, boi do dapotan parbinotoan donganna jala sipata rap mangalului ibana dohot siseanna i tu angka parbinotoan na tumimbo.

Angka sisean ni guru pe adong do tong na marsimaoli dohot marsimurai manjalo angka parbinotoan sian guru. Adong do i deba ala tobok ni rohana laos so diboto mangalapati hata pandohan ni guru. Taringot ma i tu parguruon ni si Tardas, naung leleng ibana mangihuthon guruna alai laos so hea do dilehon ajar pangubation hombar tu hasurungan ni guruna i. Disungkun si Tardas ma guruna i aha do poda tu ibana asa adong parbinotoanna. Ala dibereng guru i do tobok ni roha ni si Tardas umbahen dang manigor dilehon parbinotoan tu ibana. Jotjot do diuji guru i ibana asa bidang nian panatapon ni rohana, alai diparrohahon ndang boi dope. Ala pangidoan ni si Tardas i songon na jut ma roha ni guru i laos dialusi ma: “Ah, namura do i, molo adong diboto ho sahit songon on ma tabasna; hututung sibahut tu gara ni api, manang beha pe posi ni sahit boi malum huubati”, ninna guru i huhut ditinggalhon si Tardas. Pos do roha ni si Tardas di hata i, hape sian na so pamotoan ni guru i, gabe datu bolon do si Tardas holan ala ni poda sigait ni guru i. Laos tarnono ma guru i ala ni team ni rohana.

Taringot ma muse tu haguruon ni si Imran. Sian ias ni rohana do mangalehon parbinotoan haburjuon tu donganna lumobi angka naposo. Adong do ulaonna siganup ari na manghorhon ngolu ni dirina, alai disangahon do tingkina dohot rohana manata roha ni angka naposo tu hasintongan ni roha asa mardalan nian di ulaon nadenggan. Ndang manghirim ibana di angka upa guru sian angka siseanna i, ala ni i toho ma ibana guru di haburjoon jala laos burju do ibana mangajari nang so majalo upa guru.

Dung pungu angka naposo i torop marhaliang di naung dipillit nasida sada inganan parguruan, las ma antong roha ni si Imran ala ringgas ni roha ni na ro i laho marguru tu ibana. Sian Tuhan i ma hujalo angka pasupasu nadenggan na hubahen on, ianggo apala sian angka na ro on do sadia ma i, ninna rohana do dibagasan.

Dung diujungi guru Imran pangajaranna dibagasan ari i, ditandosi ma tu angka siseanna i asa diingot dibagasan rohana be songon poda siulahononna be ima; asa dibuat angka nadenggan, ditadinghon angka naroa. Denggan do antong panjanghon ni angka sisean i laos mangundukhon mangoloi poda nauli i.

Sai jolo dijalang angka sisean i do si Imran uju naeng mulak tu jabuna be. Dibagasan gok ni roha do ibana manjalo sangap sian angka niajaranna i. Dung mulak angka sisean i, diapus ibana ma andorana songon na mandok maulitae huhut ditatap tu ginjang, ala nunga tamba sangapna dihilala rohana marnida sian angka haburjuon ni na marsiajar tu ibana i.

Dung laho borhat ibana mulak tu jabuna, dilului ma sipatuna alai ndang dapotna. Dibereng holan sapasang nama adong sipatu disi, ipe naung buruk do jala matombuk. Muningan ma rohana, ise ma ulaning mambuat sipatungki, dang tung ala na golap dohonon umbahen so ditanda be sipatuna, alana galak di palito listrik. Bah, boha nama on, ninna rohana. Ujungna dipangke ma sipatu naburuk i, unang apala lonjananna angka narotak di dalan sibolusonna tu jabuna.

Dung jumpang tingkina parguruan tu minggu namangihut, jumolo do sipatuna i disuhuni tu angka siseanna i. “Ise sian hamu na di minggu nasalpu mamangke na so sipatuna?”, ninna huhut songon na mardongan holso. Masiberengan ma nasida angka na ro i dibagasan lomos ni roha. Biar do roha ni nasida molo tung muruk guru i tu nasida. Bah, ai na adong dope hape sian hami on na olo manangko na so ugasanna, hape nunga loja guru i mangajari, laos ugasanna muse dope tangkoon, ninna rohana be dibagasan.

Adong ma sada sian nasida patoltol tanganna tu ginjang tanda naeng mangalusi guru i huhut didok: “Ahu do gurunami”, ninna. Dilului si Imran do dalan unang mardongan muruk ibana paingothon siseanna namambuat sipatuna i, nata pe nunga sogo hian rohana. Alai disungkun ma siseanna namanangko sipatuna i: “Boasa tung buatonmu na so sipatum?, adong do ajar na songon i hulehon tu hamu?”, ninna.

“Podamuna do nahuingot gurunami”, ninna ma mangalusi. Marrara ma bohi ni si Imran umbege hata i huhut didok: “Sadihari hupodahon sisongon i tu hamu”, ninna mardongan muruk.
“Na di minggu nasalpu gurunami, asa buaton nadenggan tinggalhonon naroa. Marhatohoan sipatu ni guru i nama nadumenggan ba i ma hubuat” .

(ide: Ir. Imran Napitupulu)

Iklan

8 thoughts on “TINGGALHON NA ROA

  1. tanobatak berkata:

    @ Charly

    Bubuason ma antong si Imran Napitupulu 😀

    Dang manjaha surat pustaha au, hasomalan nahubege do angka hata sisongon i uju haetehon sahat tu namagodang. Godang hujaha angka surat na marhatabatak sinurat ni natorashu nahinan. Holan i do lae.

    Molo surat Batak na diginjang i sian Prof Robert Sibarani do i. Adong do sofware aksara batak di nasida, hulehon pe tu lae. ianggo sasintongna hurang uli do hurfna i.
    Adong do versi surat batak naung disepakati sude tokoh masyarakat Batak tingki jaman penjajahan. Sian kesepakatan i ma dibahen percetakan surat batak di Laguboti. Adong dope diau buku parsiajaran surat batak hasil cetakan sian i, jala mura botoon jala denggan disain hurufna. Jolo hudiori ma jolo asa hu-scan hukirim pe tu lae. Molo boi dirancang lae font tu komputer dohot standar i, uli ma surat batakta i, jala naung distandarisasi do i najolo. I ma jolo programta lae “revitalisasi aksara batak” marhite sian na mambahen software font asa boi digunahon tu komputer secara umum.
    Sian hasil cetakan Laguboti ma tabahen refrensina asa boi diterima publik khusuna halak batak.

  2. Charlie M. Sianipar berkata:

    @ Tulang Monang Naipospos
    Toho doi Tulang, buaton nadenggan tinggalhonon naroa 🙂 , ni jaha serius hape ido alusna.

    @ Lae Charly
    Molo do boi adong font surat batak, mansai las roha.
    Boi ma iba marsiajar humatop.Songon na ni dok ni Talang Naipospos i “revitalisasi aksara batak”

  3. Horas ma dihita saluhutna,

    amang molo boi software ni aksara bataki di expose ma ate asa boi sude halak mamparsiajarii tarlumobi ahu. he..he..he

    Mauliate,
    Jackson Purba

  4. ridwan simanullang berkata:

    huingot tingki singkola dasar hian di hitaan, diparsiajari do surat batak. boha do ia saonari, diparsiajari dope ulaning?
    Mauliate

  5. Humbang Hasundutan berkata:

    Tau poda sude na ginorgahon/naginorgithon muna i amang Naipospos, mansai las roha manjahasa. Tungpe rupani sala mangantusi sisean ni amanta Imran i di poda i. Bangkona ma huroa i sai dumenggan ugasan ni dongan sian ugasan niba. Ra, sian hulit ni unto do sipatu ni siseanna i, alai ala songon na marhillong dibereng sipatu ni guru i, heheheheheh.

    Molo siat pangidoan amang, bahen amangma jolo turi-turian taringot tu paranduhuron. Alana tingki maranduhur iba nabaruon, tung lalap do iba sai holan anduhur i nihataan (hinataan?). Manang didiape pajumpang dohot dongan parpikkat, sai lalap holan i. Ndang suda tano allangon ni gea molo maringoti anduhur i. Nahumebat muse, nangpe giliran arisan di bagas niba, lao do iba tong maranduhur/marpikkat, ina i ma tusi sai ningon do. Sipatado nunga marjanji iba tu dakdanak naeng mardalani, gabe sundat do i holan pasari sari anduhur.

    *** Memang godang do siingoton ala ni anduhur i ate ? 😀

  6. Bonar Siahaan berkata:

    Halo Humbang Hasundutan.

    Adong do donganhu paranduhur nautusan ditingki ngoluna,jala tingki monding ibana mangandung ma inanta nialapna songon on;
    Ba nunga marujung ngolum among rajanami hape sai mangukui dope anduhurmon.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s