PARSORION NI AMA NI BENGET 1

Bonar Siahaan

Napadot do Ama ni Benget mangula siulaonna jala tung so olo do ibana dililiani angka donganna tu angka na so marbungbung. Di taon do udan dohot Ias ni ari mangula anggiat boi pasikolahon ianakhonna asa unang songon ibana dirohana. Ndang marsikkola ibana ala so adong patupaon ni naturasna pasingkolahon ibana najolo. Sipata manggadis gogo do ibana asa adong hepeng tuboruna dohot anakna si sadasada i. Tung ngalut do di taon napasingkolahon ianakhonna i alai benget do ibana ndang pola dipataridahon tu donganna halojaonna. Ai didok do dibagasan rohana, anakhon i do hamoraon di ahu tung ingkon do singkola satimbotimbona.
Sahat do antang anakna si Benget i marsingkola na timbo jala pintor adong do dapotna karejona na umbuk tu rohana. Songon goarnaa i do ibana benget di ulaonna. Dihilala rohana do loja ni natorasna uju pasingkolahon ibana. Malo do ibana mulaulaon jala malo manubut roha ni donganna. Hatop do ibana dapotan jampalan nalomak huhut godang na marlomo ni roha di ibana.

Dung pungu hepengna ditahi ibana ma naeng mambuat boru laho parsonduk bolonna. Ndang pola maol antong dapotna, ai godang do naboru marsolom roha tu ibana ala ala burju jala godang hepengna. Dibereng ibana boru-boru nauli na lambok pangkulingna jala pangeol ni gontingna songon pangeol ni dengke na mangolu. On ma tahe sininta ni rohakku ai malo ma on manubut rohangku ninna rohana dibagasan. Boru-boru nasininta ni rohana i pe nunga leleng tarpaima rohana anggiat si Henget tungganedolina. Martuptup ma nasida nadua mardongan saripe. Alai dung dipaboa si Benget tu natorasna parbogasonna i, marsak ma ibana, ai boru sileban do hape na naeng parumaenna. Diholsohon tu anakna i: “Boasa ingkon boru sileban disinta roham gabe parsondukmu? Ai holan ho do anakhu, boha ma bahenohu mangangkupi i marsituriak, ai so huboto marhata jau”, ninna Aman ni Benget.
Alai Dialusi si Benget do amana i : “Ndang pola beha i, niajaran pe muse asa diantusi hatanta dohot paradatanta, jala tabahen pe gabe boru ni tulang”.
“Dang pola bahenon i boru ni tulangmu asi sipalensem do songon i jala holan lua ni langka, ndang denggan agohonon jambar ni pangintubu jala papindahon tu na asing holan pajagar ulaon niba. Boha ma molo tu ibotom dibahen halak sileban songon i, ndang metmet roham ?”, ninna Ama ni Benget.
Alai manang boha pe didok ama ni Benget ndang ditangihon si Benget be, ai nunga pir rohana pasaut sangkapna laho mardongan saripe tu tinodo ni rohana i. Gabe hohom ma Ama ni Benget ndang tardoksa manang aha.

Saut do si Benget marboru sileban na margoar si Monica jala maringanan di Huta Sabungan (Ibukota). Di sada tingki ro ma anak ni tulang ni si Benget masihol tu bagas ni si Benget. Sorta do antong nialap ni si Benget i manghatai, alai dang diantusi hata Batak.
Uju laho martapian anak ni tulang ni si Benget i, disarihon si Monica ma haringkotanna : “Bang, ini handuk kalau abang hendak mandi”.
Ala dibege si Benget hata ni tungganeboruna i dipatingkos ma: “Jangan bilang abang karena itu anak tulang saya. Bila hendak memanggil anak tulang saya katakanlah Ito agar sopan”.
“Oh begitu kalau bahasa Batak” ninna si Monica di bagasan rohana.

Dung adong sataon si Benget namardongan saripe, masihol ma ama ni Benget naeng mandulo anak dohot parumaenna i, di tahi rohana ma mangebati nasida tu Jakarta. Saut do antong sangkap ni rohana i.
Ala ni angka siholna be, dang tarpodom nasida ala tabo ni na mangkatai saborningi. Manogotna gabe matasari ma ama ni Benget dungo hinorhon ni lojana dipardalanan. Nunga pola lao si Benget manopot ulaonna holan si Monica parumaenna i nama dijabu.
Hudungoi ma tahe simatuanghon asa serapan ninna si Monica dibagasan rohana. Dituktuk ma bilut ni simatuana i huhut didok : “Ito, bangun ito biar serapan dulu ito, nanti setelah serapan ito akan saya antar jalan jalan”. Diingot hata ni si Benget taringot tu anak ni tulangna ingkon ito do didongkon. Tarsonggot ma ama ni Benget mambege hata ni parumaenna i huhut manderse rohana dibagasan, hudok do tahe na uju i unang boru sileban dioli baeon, hape dituntun do rohana, gabe marlea iba. Muruk ma ama ni Benget tu parumaenna i huhut marbete-bete.

Longang ma si Monica manida simatuana i gabe didok ma muse: “Kenapa marah-marah lto.., kan saya bilang Ito serapan dulu agar saya antar jajan-jalan”.
Lam bobos ama ni Benget mambege hata ni parumaenna i ai ndang diantusi lapatanna, Dung mulak si Benget sian karejona disonggahi ma ibana jala didok ingkon mulak nama ibana. Sai dielek si Benget do nian amana i asa unang pintor mulak, alai sai manggogo do ama ni Benget mandok mulak ibana. Ndang tarjua si Benget be amana i.

Dung sahat Ama ni Benget tu hutana didok ma dibagasan rohana tung na so laho be manopot si Benget ai so tama ripena i mangkuling. Tung Ito dohononna manjou ahu, ninna rohana huhut martutukian. Dirimangi dibagasan rohana halojaonna, marhoihoi laho pasingkolahon si Benget, hape ingkon taononhu ma ndang bolas marsituriak dohot parumaenhu, ninna laos mangandungandung ma ibana : “Ndang si manukmanuk sibontar andora, ndang sitodo turpuk siahut lomo ni roha”.

Nunga marumur 5 taon anak ni si Benget laos so hea dope diida. Las rohana alai dang tardokna manang aha, ai nunga sanga didok di rohana na so tula laho be manopot si Benget dohot parumaenna i. Ro ma surat ni si Benget tu amana asa ro marnida pahompuna i ai sai disungkun ninna didia ompungna. Alai laos didok asa diguruhon amana i hata Indonesia, anggiat boi manghatai dohot pahompuna. Marsak ma ama ni Benget manjaha surat ni anakna i. Bah, naboha do si Benget on hutaon do loja pasingkolahon ibana, hape dung sae ibana hupasingkolahon gabe ahu disuru muse marsingkola.
Alai ala arga ni pahompu gabe saut do diguruhon ama ni Benget hata Indonesia tu dongan sahutnna na tongon adong namarsingkola di SMP. Sai disungka do antong mangguruhon hata Indonesia i anggiat boi ibana manghatai dohot pahompuna dirohana.

Dung dietong nunga malo ibana marhata Indonesia borhat ma ibana manopot si Benget tu Jakarta. Nunga boi au manghatai tu parumaenhu dohot tu pahompungku ninna rohana dibagasan. Las do rohani si Benget antong dung dung ditahi amana i ro jala dibege baritana nunga jala diboto amana hata Indonesia.
Didok ma tu tungganeboruna asa ditomu ama ni Henget di stasiun, ai mansai ringkot nuaeng karejonghu, ninna si Benget. Ndang pola be hape maol amanghon manghatai dohot pahompuna dohot parumaenna ninna si Benget dibagas rohana.
“Mari kesini pahompungku, aku ompungmu”, ninna tu pahompuna i dung disosoi si Monica mandapothon ompungna i. Dung sombu siholna tu pahompuna i jala dipatudu bunga ni rohana, disise ma parumaenna i : “Hai menantuku, sekarang jangan anggap lagi aku orang, sebab kamu pun tidak saya anggap lagi orang”. Sangkapna mandok, hamu parumaenhu saonari unang etong be ahu halak, ai hamu pe ndang huetong be halak. Mamintor tarsonggot ma si Monica mambege hata ni simatuana i huhut menetek iluna. Alai hohom do ibana ndang pola didok manang aha ai dihabiari sotung hansit roha ni simatuana i.

Longang ama ni Benget ala manetek ilu ni parumaenna i. Bah, so marhasoan ahu. Hubahen hata Indonesia manetek ilu ni parumaenhu, antong pahompungku nama dongananhu manghatai ninna rohana laos dijou ma pahompuna : “Kesinilah kau hai cucuku, agar kakek bercerita”, ninna ama ni Benget, Buruju do pahompuna i mangalusi ompungna. Diuji ma laho patorangkon parmuli ni namboruna tu anak ni Siborongborong na margoar si Tumpak Doloksaribu, na maringanan nuaeng di Dolok Masihol.
“Bibimu sudah kawin sama putra si Kumbang-kumbang namanya Sumbang Gunungseribu, tetapi tinggal sekarang di Bukit Rindu”.
Sai longang ma pahompuna i umbege hata ni ompungna i, alai sai ditorushon ompungna i do hatana. Dipaboa ma na so lomo rohana marboru sileban si Benget, alai dang simanukmanuk sibontar andora, ndang sitodo turpuk siahut lomo ni roha.
“Kusangka Bapakmu ini kawin kepada putri Batak dan bisa mengerti bahasa Batak, namun apa boleh buat, tidak si ayam-ayam si putih dada, tidak sesuka hati siambil saja”.

Iklan

18 thoughts on “PARSORION NI AMA NI BENGET 1

  1. Ompu Matasopiak berkata:

    Gabe mengkel do ahu manjaha ‘parsorion’ ni ama ni Benget on, pintor huadophon ma tu roha ala na ingkon tong do ra marboru sileban ahu, na hutanda di Surabaya on…

    Horas amang Naipospos, tung mansai las do rohangku marnida ‘partungkoan’ muna on, godang ma nian naung huparsiajari sian on, mauliate ma di hamu amang ala sai dilehon hamu do tingki mambahen angka na denggan na uli si songon on

  2. Pahala Panjaitan berkata:

    Cerita sindiran yang cukup bagus, maaf cerita / turi-turian ini akan saya kopy sebagai bahan tertawaan dikala hati sedang galau dalam menghadapi kehidupan ini.

  3. R.Samosir berkata:

    Ndang tartaon ahu engkel hu lae , manjaha sarito muna on . tung na malo do hamu padomu-domuhon angka namasai . Ringkot do tutu hita mangarahon angka ianakkon na di jolonta on laho mangkaholongi adat dohot budaya ni BATAK i . Ima marhite pangajarion / manugan nasida asa olo marparsaoran dohot hata BATAK ta na uli i.Horas

    Note :Ala ni angka hinaringkot ni namangalului ngolu on , ndang tarpasiding hita asa unang marsaor dohot suku si leban , jadi ingkon managam do hita molo tung pe ingkon marhasohotan ianakkon tai tu nasida.

  4. Tung mansai lomo do roha manjaha ganup aha pe nasinurat ni amang on, songon sarito na di ginjang. Alai amang tar songon di Jakarta dohot di luat na asing, tung pe boru hita dioli sasahalak baoa, molo so ditanomhon manang diajarhon natorasna be do sian dakdanak porlu ni hata Batak dohot aturan-aturan panjouon i, songon tu simatua, amangbao, haha doli dohot na asing dope, tong do gabe songon niolini si Benget i.

    Akka boru ni tulangku natubu di Jakarta sontona, manjou akkangna baoa(ripe ni akkangna): si ‘Lae’. Akka anggiku namarpariban (marhahamaranggi simatua i), sude akka Batak Toba do on, tubu di Medan dohot Bandung, manjou simatuana boru: ‘Mami’. Jai molo naeng manukkun ise do dongan ni simatuana boru mulak sian ulaon, inna: “Mam, nanti pulangnya ama siapa?” Molo nipinsang, gabe simatua i do mambela akka helana i. “Dang pola boha i amang, asa jonok. Unang adong batas namarsimatua. Ai dang sarupa be dohot najoloi,” inna do.

    Jai amang, nungnga godang akka jolma nuaeng, lumobi na maringanan di kota, tar songon na pamoderen-moderenton. Dang na so diantusi maksud ni sude aturan dohot ruhut-ruhut ni paradaton Batak i, alai dietong do huroha dang adong artini dohot konsekwensi na. Jai unang pola longang be hita molo akka namarbao, marsimatua, marsiummaan dohot marsihaolan. Dang subang be i di akka halak hita nuaeng on. Songon mode manang hasomalan nama i nuaeng, ala dibereng attong akka halak sileban boi jala biasa do songoni.

    Olo ma ra haduan hita on holan goarna do halak Batak, alai parange, pambahenon, pakkataion, dang adong be ubana sian halak sileban. Ahu pe jotjot do mangarimang-rimangi akka naung muba di halak Batak nuaeng; boha ma molo gabe songoni akka ianakhonhu natolu i haduan? Husangahon ma saotik-saotik mangajar-ajari halahi di siganup ari, tarlumobi taringot partondongon, ruhut-ruhut ni paradaton, hata Batak, dohot akka na asing. Maol do bah, amang. Ikkon sabar hian do iba jala leanon roha.

    Ai tung mansai biar do ahu molo borukku naduai, manang siakkanganhu baoa i, lak marroha-roha tu akka ibotona sian marga Sipitu Ama manang napatutna dang boli olionna. Ai adong do di Jakarta boru Situmorang muli tu baoa Situmorang (Siringo-ringo). Sude do hami Sipitu Ama mangambati, alai amanta i (attar nabeteng hian do, jala pewaris ni karya-karya Nahum Situmorang)dipaloas do boru nai muli tu ibotona, alana inna nungnga tung mansai bagas holong ni nasida nadua, jala zaman pe nungnga modern. Nian dang dibahen be ulaon adat, holan resepsi ma dung sidung sian gareja; ai aha adationna alana nungnga disursari adat i? Dibursikhon halak mada! Holan akka lanok ma ra namangadopi pesta i.

    Molo nirimang-rimangan, on ma ra hinorhon hasalaan ni akka natua-tua. Dang sian na metmet ditanomhon akka partuturon dohot akka tokka ni halak Batak. Palias ma bah, sai dao ma parmaraan, unang masa be sisongoni di hami Sipitu Ama manang di halak hita napatutna dang boi marsiolian. Horas ma di hita sude.

  5. Laris Naibaho berkata:

    Weheeh. Amang tabo nai sarita i, ate. Ai on majolo, minta tolong ma au tu panurat bahasa Batak ni, “Bodat boru-boru, manjangkit sian sada bagot namarhalto, tu bagot na marhalto nasada nari”.

    Amangtuakku mandok songon on “Bedat beru-beru memenjat bregat ke bregat yang satunya.” Toho doi?

  6. tanobatak berkata:

    @ Ompu Matasopiak & R, Samosir
    Asal ma unang songon si Benget i lae gabe dipaksa na dihuta marsiajar bahasa Indonesia ๐Ÿ˜‰

    @ Pahala Panjaitan
    Unang gabe sai mengkel sandiri tulang annon gabe asing hata ni halak ๐Ÿ˜€

    @ Suhunan
    Olo ma muse gabe bahan penelitian halak batak di angka ugari naung bolong ala ni team ni rohana be.

    @ Laris Naibaho
    Olo do toho i lae, ai ise huroha mandok sala i ๐Ÿ˜€


    Dipardalanan do nuaeng amanta Bonar Siahaan mandulo angka ianakkonna. Jumolo ma sian Riau dungi tu Jogya. Pandok ni nasida saat tu bulan Desember, mungkin martaonbaru di Jogya.
    Angka dongan na di Jogya boi do marpartungkoan hamu dohot nasida, pasombu sihol dohot manungguli angka kebudayaanta.

  7. Charlie M. Sianipar berkata:

    Molo ni jaha do turi turian ni Tulang on, on ma hape umbahen na sai dijujui angka natua tua tu gellengna, asa unang marboru si leban nasida.

    Molo pe dang tarjua marboru si leban, sai jolo diajari manian na ni alapna, asa unang gabe gaor.

    @ Lae Suhunan
    Apala toho do nanidok mana i, sian na metmet ajaran do angka dakdanak i, asa unang didok nasida, “Gue Bangga jadi Orang Batak” hape dang boi dipatorang nasida, songon dia do ulaning halak Batak i. Dang holan ala na adong margana.

  8. sahat, m, ngln berkata:

    โ€œIto, bangun ito biar serapan dulu ito, nanti setelah serapan ito akan saya antar jalan jalanโ€, “hudok do tahe na uju i unang boru sileban dioli baeon, hape dituntun do rohana, gabe marlea iba”, dagaaa..Hahahaha, nga maup be.

    Lussu nai puang serita muna on, amang Siahaan.
    Gabe ni ingot ompungku nahinan, sodiboto marbasa indonesia..hehehehe. Mauliate, sai horas ma.

    sian,
    calon hela muna ๐Ÿ˜€
    nainggolan

  9. Bonar Siahaan berkata:

    @.sahat,m,ngln.

    Molo naeng hela nami do hamu,sotung songon pariban ni amanta Suhunan Situmorang i boru niba i,jala hamu pe sotung didok hamu tu nanaeng simatuamu boru “mam siapa kawannya pulang” ๐Ÿ˜€

    Semoga calon hela yang…. ๐Ÿ˜€ ๐Ÿ˜€

    Horas.

  10. jhonson tampubolon berkata:

    hoeras ma di hita sude bangso batak na adong di bona pasogit on.
    Salam kenal buat tulang pemilik blog
    Mauliate ma tulang, ala gabe tarbukka pikkiran ni hami akka panganto.

    *** Horas be ma hita sude

  11. Edison Tampubolon berkata:

    Minta ijin agar cerita ini diceritakan kembali diseluruh arisan halak hita….!!!!
    Memang luar biasa imajinasi lae yang punya cerita ini. Horas.

  12. joicesiregar berkata:

    hahaha…. adong do hape “sikumbang-kumbang”?

    amang tahe baah….. ๐Ÿ™‚
    gabe lam bangga do iba gabe boru Batak on bah…..

  13. Bonar Siahaan berkata:

    Dung dijaha parumaen dohot hela sarito on pintor sude ma nasida mangajari angka ianakhonna marhata batak,ai dihilala rohana do nadohot nasida hona disarito on. Nasida pe ndang hea be manjou ahu “amang” nunga gabe “among” jala manjou simatuana boru nunga gabe “inong” ndang “inang” be ……………

    Horas.

  14. Mansai geog do hape ceritai…..namalo do lae siahaan on manbaen cerita…alai dang mungkin adong terjadi,alana natua tua molo dang diboto mandok paling pake bahasa isyarat do dibaen…ai songonido tong simatuakku sian huta molo mangkatai tu pahompunai….ha…ha…ha…

  15. Horas Tulang……au umakku boru jawa do…diajari bapa do au marhata batak mulai gelleng….alana molo makkatai tu oppung marhata hita do au…..nangpe sala oppungi mandok alai huantusi do aha maksudna…..
    NB: MARPANGIDO JO TULANG BAEN JO CERITA” NAPOSO BULUNG MANGALULUI ROKKAP”

  16. Bonar Siahaan berkata:

    @ Benget Nainggolan

    Ai goarna ma lae turi-turian, godangan do i holan imajinasi ni panurat.( molo angka naung terjadi do dang turi-turian be goarna).

    @ Patar Gultom
    Molo cerita ni NAPOSO BULUNG MANGALULUI RONGKAP, Amanta Suhunan Situmorang ma manurat hupangido pe tu nasida.

    Horas dihita saluhutna.

  17. Alai porlu do pajumpang au dohot si benget on bah ๐Ÿ™‚
    atik dia adong do pe paribanna .. songon na mantap do pandok na i..
    Ito, bangun ito, biar ito sarapan dulu, abis itu nanti ito aku ajak jalan jalan ,,, simatua ma so alang huahuahaua
    Aut sura ama ama na so ture amani Benget on .. da seru ma nian carita on ??? gabe margajjang ma hahahahaha

  18. Bonar Siahaan berkata:

    @ Fernando Hutauruk
    Bah…ai lomo do roham naeng marpariban tu si Benget? Adong do nuaeng paribanna naung mabalu jala nunga marumur limapulusia taon….hupasahat pe tu ibana asa marpariban hamu…..kwakakakakak

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s