PURPAR PANDE DORPI

Monang Naipospos

Uju manotas tahi nauli jotjot do masa parungkilon ala hurang dos ni pandapot. Gulgul pe halak manosohon hatana sipata do ndang siat tu sapean ni hata hadosan. Tulus pe sipata angka pangkataion, alai sipata ndang halehetan ujungna. Ndang adong naholip di angka pangkataion tingkos ala sangkap nauli do i di rohana, ujungna tedak pandohanna. Sipata hinorhon ni i ndang maralangalang rohana marhite sian nasa hamaloonna asa siat tahina i di rohana, ujungna songan na guntur begeon.

Ianggo angka partahi naroa, tung so barani do i mandok hatana sian na patar jala gogo, ala mabiar ibana dibege halak. Molo adong jea pangkorhon ni sangkap ni angka partahi naroa, manigor humotok do angka natorop mangasupi. Ala ni i ma umbahen sai di naholip partahi jat marhusip-husip jala bilolangon matana humaliang manjamoti unang adong umbege hata nasida i. Togu do padan di angka pangkataion sisongon on, manjaga unang tahop jea tu nasida.
Tung so tarida pe partahi jat di angka haurahon namasa binahen ni angka sangkapna, ianggo natorop sai adong do na boi marnida di roha agan pe so marnida di mata.
Hata ni natuatua do na mandok purpar pande dorpi mantat tu dimposna, sip parmihimmihim mantat tu hotokna.

Godang do halak mandok dirina partahi nauli martarias tu desa naualu mandok nidokna i, ala so siat tu lobuan nagodang gabe simpul ni hata. Deba martarias humaliang dia angka sangkapna nadenggan na so dung dijangkon donganna. Angka jolma sisongon on ma na jotjot marjaupalis, molo adong martahi manarea ibana, alusna: ‘Ndang tung ringkot pandapothu di hamu, ai na uju i hudok ndang dijalo hamu’, ninna ma, jala laos marbangkohon i ma ibana.

Angka na manarita tu donganna na so pasiat hatana, jotjot do i patubu bada di angka na sapartahian hian. Molo so adong panganjuon, bada ma ujungna. Uli pe ujung ni sangkap sapartahian, ndang parsidohot be angka parjaupalis.
Angka parmitmit pe sipata adong tubu bada. Molo ndang dos rohana marbagi parbue ni hajahatonna, ujung na sirang be ma nasida di partahian masiula di ibana be. Masionggopan ma nasida, tu natorop marpaula ma ibana partigor manihai donganna parjahat i. Hape songon i do balikna ro tu ibana.

Molo tinumpahan pardamean ni angka parjahat asa marsada nasida dibagasan dame mangulahon hajahatonna, dohot do iba parjahat disi.
Poda ni natuatua do mandok idupan nauli, saemon naroa, manang hata na somal puji nauli, pinsang naroa. Molo nilehon pujian tu siulahon nadenggan, panungkolion do i asa lam marbungaran roha nadenggan i di parulanna siganup ari. Molo pininsang siulahon naroa, asa muba do ibana sian pangalaho na roa i pareakhon nadenggan.

Alai sipata adong do pangkorhon na humurang di angka pambahenan sisongon on, lapatanna, olo do dung pinuji nauli ujungna manggang songon pangaritan, ima angka pangalaho pangarupa. Molo pininsang angka siulahon naroa, gabe manggarpas do ibana mangasupi mangaromparhon naroa huhut mangalului angka angka hahurangan ni si paminsang i.

Molo adong sada lobuan ni halak partahi nauli marsangkap laho mangalului dalan paingothon angka partahi naroa, ujungna marlobuan do angka sisada sangkap tu naroa mangalului dalan laho mangabor sangkap ni angka partahi nauli i. Moru ma hagogoon ni angka partahian i uju adong parjehe sian nasida marsiodop tu solu ni musu. Ido sipata umbahen purpar pande dorpi, burbar dorpina, sip parmihimmihim, tarsuruk jorgong patna.

Bada na so haintopan nama namasa molo ganup masijujur pintorna angka na marsalisi. Lam muse nunga tangkas angka hahuranganna, alai sai dijujur tingkosna dilului hasalaan ni alona. Ima angka na lupa di poda ni natuatua, jujur mula ni bada, bolus mula ni parrosuon. Molo angka napantas marroha mandok molo bada tinahopan, hamagon nunga idaon dijolo, molo dame niluluan, parsaulian nunga idaon dijolo. Tung mamora pe siulahon hagunturon manghalomohon bada, ndang jajabutan sogot lea sian ibana. Alana i do umbahen didok natuatua ummarga do hadameon sian mas, ummuli sian simata godang. Diumpamahon do: Habang sirubaruba tu bona ni saesae, uli pe hata pintor ulian do hata sae.

Iklan

One thought on “PURPAR PANDE DORPI

  1. Songon na susa do mambaca description ni cerita on.
    Adong do bahasan ttg Tahapan ni pernikahan Batak lae, mulai dari Marhusip -> Martuppol -> sampe Ulaon na Godang
    Mauliate ake

    *** baca artikel “anak tubu boru sorang”

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s