BALLADA CAP BULAN DI SABULAN

Monang Naipospos

Uju marujung ngolu ni sada halak naung saur matua, marungkil do angka ginomparna laho mambahen sangap marhite ulaon adat. Hinorhon niulaon sisongon i, mulak do si Suhunan rap dohot sisolhotna tu Toba laho patupahon ulaon adat di natuatua nahinaholongan ni roha nasida. Marhatohon di Pangururan do si Paltibonar ujungna dohot ma ibana mangihuthon si Suhunan.

Mangarade do nasida di angka haringkotan ni ulaon i, dipulung ma sude haporluan tu angka sipanganon, siinumon dohot lan na asing. Aha ma buatonta laho inumon sipalas daging saleleng di huta? Alai dang diboto si Paltibonar manang songon dia rumang ni sipalas daging na adong di Pangururan. Holan Anggur Cap Bulan nama na adong sumirsir godangna. Mangihuthon hasomalan ni si Paltibonar dohot si Suhunan manginum sipalas daging di Jakarta dohot di Singapura, sabotol siinumon i nungnga sarupa argana tu dua poti Anggur Cap Bulan. Ujungna dituhuk si Paltibonar ma dua poti anggur cap bulan i.

Longang do angka na di huta marnida godang ni anggur cap bulan i, ai ise anon manginum on nasai godang, ninna be. Adong muse na mandok molo diinum Anggur Cap Bulan olo do paro begu. “Bah … begu aha ….”, ninna roha ni si Paltibonar. Dipatangkas sahalak natuatua, molo magodanghu diinum cap bulan olo do mordong ujungna sorop begu tu dirina. Alai hurang porsea do si Suhunan dohot si Paltibunar di hata i.

Somalna tar di paandung angka ina natuatua do molo adong marujung donganna natuatua, alai mangihuthon perbinegean ni si Paltibinar nunga hurang hinauli ni andung i nuaeng. Dang piga be hape namalo mangandung, ninna rohana huhut didorguk sabongkor anggur cap bulan i. Bah, ai tonggi do hape anggur cap bulan on, ninna rohana, marningot angka hasomalanna manginum sipalas daging na sian Eropa.

Dung masuk sabongkor anggur i, songon na neang jala las ma pangkilalaanna alai saotik mordong. Ala songon na dauk parmasukna ditambai ma muse sabongkornai. Sian na so pamotoan ni si Suhunan, nunga tunggaling dua botol dibahen si Paltibonar. Marrara ma antong simalolongna, mambal pardalanna, sipata mengkel, sipata songon na mangandung-andung. Ah, Nunga hona be ibana, ninna roha ni si Suhunan marnida sian pangalaho ni si Paltibonar i.

“Ba ua tung andung hamu jolo natuatuai”, ninna si Paltibonar sian laba-laba pudi tu angka natorop i. Sude ma mamereng tu ibana jala sude marhatutuhon dang songon na somal be si Paltibonar. Dilangkahon ma tu tonga ni lobuan paningkir i. huhut songon na dipaandung, alai dang toho songon andung, alang songon ende namasa nuaeng. Sipata marhata-hata, mardongan hata sileban. Ah nunga toho sorop begu tu ibana, ninna roha ni natuatua napaingothon nasida nangkin. Nadeba mandok, natarboan arsakna do huroha ibana dung ditinggalhon si Mary boru sileban i rap dohot anakna nametmet i. Adong muse mandok sahala ni ompunta do huroha naro, tangkasi hita asa denggan marboa-boa. Sada sian ina na disi mandok, na songgop do tondi porbadia tu ibana, partandana ala marhata sileban.

Ianggo si Suhunan nungga ditungkol osang-osangna mangalului dalan unang sanga murak annon. Dihilala rohana molo adong namarujung ngolu olo do ro ninna angka tondi ni angka naung jumolo mate, ia so i angka begu paniliknilik. Sotung sorop do begu i anon, ninna rohana.
Marhatohoan nunga adong tolu begu marnida pangalaho ni si Paltibonar i, ima si Nurnur, si Ganjang dohot si Antuk. “Dang pola loja be hita mangela ibana, nunga hona sandiri”, ninna si Nurnur tu donganna begu nadua i si Ganjang dohot si Antuk.

Nunga lam rarat hata-hata ni si Paltibonar. Godang na so diantusi angka natorop i ala godangan hata sileban. Hehe ma si Suhunan, tahina lao paingothon asa dipasohot pangalahona i unang lam murak. Dipajonok ma tu si Paltibonar laos dihusiphon : “Palti, nunga ro begu maniliknilik, sotung sorop anon tu ho, jadi pahundul ma jolo sangombas, ulahi pe anon”, ninna.
Alai dang mansohot si Paltibonar ala ni pambibiarion ni si Suhunan i, baliksa lam manggasa do. Dianjak ma tu ingana ni natuatua i, dipaherbang tanganna tusiamun dohot tu hambirang, dipatoltol jarina. “Isse…., isseeee”, ninna dipagogo soarana. Uju martomu simalolongna dohot si Suhunan dibahen si Suhunan ma songon partanda na ro begu. Lam gasaon ma si Paltibonar dipangiar soarana; “Mannna beguuuu…. dia begu i…., Ro ma tusoooooooooon”.
Marangkatjial ma begu natolu i ala ni biarna marnida si Paltibonar, dang diboto be angka aha nasamban, ujungna tarronggang jala tarrobung. Dang na ngernger biar ni begu natolu i dung dibereng gasa ni si Paltibonar. “Ah nungga umbeguan ibana sian hita”, ninna si Nurnur tu donganna nadua nari naung galpang ala ni biar dohot lojana na marlojong i.

(ide cerita: sian partungkoan halak batak di hotel Golden Boutique Jakarta 14 September 2007)

Iklan

13 thoughts on “BALLADA CAP BULAN DI SABULAN

  1. Syalom,
    Ok… kita tunggu cerita yang lebih mantaaap lagi.
    Dirimpu dongan au nasoropan manang na rintik ala tompu mengkel sahalak au jala tar gogo ekkelhu manjaha cerita ni lae soal begu na tolu i (ima;begu attuk ,begu ganjang dohot begu nurnur)
    Siiipp dah.
    Mauliate
    Horas !!! JBU

    *** Sotung taringot hamu lae uju di pesta gabe mengkel … 😀

  2. Horas ma di sude dongan panjaha blog Partungkoan on. Anggo au lam jot-jot nama dibahen laekku si Naipospos on gabe bahan saritona. Nanaeng pamauponmu nama au lae? He-he-he…Ai namartaringot do hami di sada tikki–topet sabbil manginum anggur Eropa hami di Jkt, alai dang dohot lae on minum, jus boras ni hau do diinum ibana–parange najorbut ni akka halak namabuk, na pailahon. Jai hupaboa ma daba pangalamanhu, na hea au pailahon di parmondingni damang parsinuan uju i, mabuk anggur cap bulan, alan dipabiar-biar sada inangudakku na tading di huta (Sabulan). Hira-hira pkl 1 manogot, dung sidung tortor dht assara “hiburan” tu parhuta, marmodoman ma sude. Nungnga mansai loja hami manontor jala puas mambege ende ni dahahang si Bunthora dht donganna akka parende sian Medan. Holan au dht inangudakku (br Tamba) nama na so modom, hape hami dijonok ni bakke ni natua-tuai huddul. Talak do sude pittu dht jandela ni jabu. Didok inangudakkon ma asa unang modom hami, alana tokka do inna molo adong namatean, sude halak modom. Ikkon adong do nadungo, inna. “Ai boha huroha inanguda?” nikku attong manukkun. Ro inangudakkon mandok, marsitutu bohina: “Olo annon ro akka naso ni ida i.” Bah gabe mabiar ma au attong, muse apala di lambungku do bakke ni natua-tuai. Ala mansai huta-huta hian jala golap do Sabulan molo borngin, jala marauangi muse akka biang, bohama bahenonku asa unang mabiar, inna rohakku. Molo masuk ra saotik anggur gabe barani do, inna rohakku. Hudungoi ma sada lae (Tobing), manukkun didia disippan anggur na diboan hami sian Pangururan. Dilehon ma, hudorguk ma satonga galas, tamba sagalas, gabe dua galas, bah lam tabo inna rohakku. Mardomu muse apala ngali hian do tikki i alogo, ai pas di topi tao do jabu parsattian ni natua-tuai. Hutabbai ma attong anggur i, lam tabo, lam godang, lam mangido, lam tamba, lam habong pangkilalan…Pola do dua satonga botol anggur i hupaittop, holan au mandorguhi! Hape dang hea huinum anggur cap bulan on. Dungi, dang huingot be aha namasa. Naparpudi huingot, nikku ma tu inanguda: “Jai inanguda, jou pe taho akka begu i, ai dang mabiar be au…Nungnga rata be hubereng. Tung begu aha pe taho i marrrrobean ma tuson! Gue enggak takut!” Satorusna, pasti nungnga boi ra dibayanghon hamu: gaorrrr….ma sahat manogot! Mardungoan ma sude natorop, hinsat ma sahuta dht akka tondong naro sian luat nadao. “Ai aha namasa?” inna nasada. “Mabuk Aman Jogi” (panggoaranhu), “Alani aha? Ai namarbada do nangkin? Ise alona?” Bah, apala najorbutna dope, hatani akka lae, ito, haha, nang tondong botarinai (ala tarpodom do au sadari), sai hudungo-dungoi ma inna natua-tua i, huhata-hatai, jala molo adong manolai pintor mangarutta do inna au. Inna halahi hudok ma songon on: “Ai boasa digugai hamu au manghata-hatai dohot amongku? Aha hak muna? Sotung huribakhon hamu sude da! Ise pe dang huhabiari, salakkon akka begu nungnga marlarian hubahen!” Tung mansai gok ma tahe akka hata nang parange napailahon…, pola do pardijabu (br Nainggolan) sai sip piga-piga ari ala maila ibana. (Dung sidung ualon adat/penguburan, pintor dht ibana mangihuthon simatua i mulak tu Sibolga, ditinggalhon au di Sabulan, jumpang di Medan ma hami muse, alai tong dope sai dipasip au, ha-ha-ha). Marsak hian do inna siakkangan nami tikki i (biasama tantara, ikkon hohom jala disiplin nian) songoni nang pardijabu. Sahat tu saonari, ganup ro au mandulo huta Sabulan on, pittor sarita namabuk anggur on do ditaringoti akka tondong dht parhuta, jala sai dipaddok ma akka hata-hata gaor nahupandok tikki i. Lakso lupa dope halahi, hape Okt’2002 do namasai. Maila do au, alai boha ma bahenon. Indahan nungnga malala…Toho do bah, pailahon do hape namabuk anggur/tuak. Unang ditiru hamu ateh akka dongan. Sotung olo hamu dipabiar-biar. He-he-he…

  3. Charlie M. Sianipar berkata:

    Bah…
    Boi do on gabe sada carita pinatupa ni Tulang Naipospos. Mengkel ahu manjaha sa.
    Gabe umbiaran Begu i tu si Paltibonar.
    Jala kisah nyata don, molo sibonttar mata mandok:
    “True Story”. Pintor ro do muse si Paltibonar i patangkas hon …
    Molo minum hita di Lapo Lae, cukkup ma dua galas ate?
    Unang gabe tabba annon angka sarita, unang ta dok muse: “Nga godang ahu Mullak … Ise pataru ahu Minnum …
    He… he …

  4. Pahala Panjaitan berkata:

    Nung diinum ibana anggur botol patoluhon, marnipi / mangigau ma imana danga adong be nahurang jala dang ditanda be simatuana.

  5. tanobatak berkata:

    Molo tung adong goar na sarupa tu namanjaha dang adong partalianna tu goar na di turiturian on alana viksi do asa mengkel hita 😉
    Molo sarito ni lae Suhunan i lae ma martanggungjawab 😀
    Ai dang boi lupa sian rohangku cerita i. Asal hundul au marangan-angan manigor taringot, mengkel do sahalak au gabe dietong halak naung repot. Asa adong donganhu mengkel sandiri gabe husurathon ma di blog on. Ternyata Amang Sidabutar dohot Sianipar nungga korban 😀
    Jadi nunga adong be donganhu mengkel sandiri. 😀

  6. hahahahaha sai adong do cerita ni lae naipospos on, gabe hansit hian butuha ku manjaha , ai holan na mengkel nama ahu , disambung muse tu komentar ni amang suhunan , bah tambah ma engkel hu, sampe manurat komentar on holan na mengkel suping ahu molo huingot sarito on, horas ma di hita

  7. Parjolo sahali dope au mambukka situs on, alai tung menarik do angka turi-turian on nalao sijahaon. Alai bahasa batak nai ma nian, tingkat “Advance” molo pandokkon ni sibottar mata.. Gabe taringot au tu oppungku nahinan molo marturi-turian tu ahu..pake bahasa batak tingkat tinggi hehehhe….

  8. tanobatak berkata:

    @ A Ivan
    Godang dope cerita ni lae Paltibonar na mambahen mengkel hita. Asal ma unang muruk Sutradarana ima lae Suhunan 😉

    @ Sahat M.N
    Parrohahon hamu laemuna i sotung ditinggalhon ibotomuna i muse. Ai dang binoto atik tung adong muse manawarhon cap bulan gabe mangulahi songon najolo i 😀

    @ Rinto
    Dang apala na Advance dope parhataan i. Adong dope natumimbo sian i, jala molo dung lam malo hita mangantusi hata batak sisongon on, lam patuduon do i muse.

  9. David simatupang berkata:

    ^^^atas

    Santabi tu sude angka dongan..
    Salah kamar Bahh^_^
    Ale jalang2 parhorasan ma di hita sude,..

  10. LERIN SITOHANG berkata:

    horass………..
    goarhu lerin sitohang jala ahu tubu di huta sabulan
    sian SD 173733 SABULAN
    SMP N 2 PALIPI
    SMA BINTANG TIMUR BALIGE beta tu huta nami…

  11. @ Lerin Sitohang

    Horas ma diho namboruhu/ itohu. On dope huida ho ro tu partukkoan namion.

    Disabulan dobe natua-tuanta? Didia maho nuaeng. Kirim ma jo alamat emailmu tu sitohangpm@yahoo.com

    Unangpola pabagas hu diparrohahon ho ceritani lae Naipospos on. Pos rohangku dang songoni par Sabulan molo adong na masa na marujung ngolu.

    Alai adong do tohona saotik, molo pagodanghu cap bulani masuk memang olo do gabe dang nihabiaran agen aja. Jangankan begu natolui simatuaniabe olo do gabe dang tinanda…

  12. DINAWARNI NAPITUPULU berkata:

    horas……….
    bah ai songoni do ceritana
    tohodi
    horas ma ba goarhu dinawarni n70
    molo au sasikkola do dht si lerin na sian huta sabulan nauli…………..
    uli situtu do inna huta sabulan………….
    mauliate

    *** Fiksi do cerita i

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s