PARSORION NI AMA NI BENGET 2

Bonar Siahaan

Dung tar leleng Ama ni Benget dijabu ni anakna i, martuptup ma si Bengel dohot si Monica mamboan amana tu Puncak anggiat sabam rohana mian di jabuna. Hiras jala hinsa do antong roha ni ama ni Benget dung sahat to punsu ni dolok i. Ditatap ibana ma sian tu na humaliang, dibereng ma angka jabu na mansai uli.
Bah, uli nai angka jabu on dipauli di dolok on hape godang do naso pola diingani. Diingot ma di hutana na mansai torop dope bagas na martarup hadudu dohot sanggar, bulu do ditopas bahen dorpina jala manangkas tu tano do lantena. Hape dolok-dolok do on tung mansai uli angka jabu, laos disungkun ma anakna si Benget :
“Ai angka jabu ni ise do on?”
“Angka jabu ni na sian hita an do i, apala na umbalgaan jabu ni anak ni ama ni Padot do i, ima na mamestahon simin ni ompuna nauju i”.
“Ia jabu na taingani on jabu ni ise do on?”, ninna ama ni Benget muse.
“Anggo on jabunta do, nahubahen do on asa adong paradianan molo loja jala sogan hami di jabu naniinganan na saleleng on. Molo hami na di pangarantoan on ndang digoari namora molo so adong dope jabuna di Puncak, jala angka jabu nahumaliang on digoari do on villa”.

Sai longang ma ama ni Benget pabegebege hata ni anakna i huhut sai ninna rohana. Nunga torop hape naung mamora ianakhon ni hamian jala nunga olo paulihon jabu di dolok-dolok on boasa ulaning ndang dihamian dipauli halak on jabuna. Aut olo ma nian halak on mangurupi na dihutana pature dalan dohot angka tano na so tolap diula ndang godang tano be na tarulang. Hape Iaho pasingkolahon halak on do angka natuatua gabe suda gogo ni danging, gogo ni tano, suda manuk, pinahan lobu, lombu, horbo. Jumana pe tahe disindorhon do holan laho pasingkolahon anakhonna anggiat unang songon nasida sai manaon udan dohot Ias ni ari mangalului parbodarian. Aut ma nian diingot halak on gogo ni tano na sian hamian do mambahen halak on marsingkola jala mamora, hape lupa do tu hutana, ninna dirohana huhut martutukhian.

Sungkun-sungkun roha ni si Benget marnida amana i, boasa songon na marsak amanghon, ninna rohana dibagasan. Na so lomo do rohana nuaeng di dolok on? Tumagon ma huboan tu inganan naribur an ninna rohana. Ditogihon ma amana i tu parminuman na ginoaranna cafe, ai diingot si Benget olo do amana i minum tuak di huta. Dipangido si Benget ma inumon nasida, pintor hatop do ro napinangidona i jala laos mangihut ma dua halak boruboru nauli mangangkupi nasida hundul. Diuji ama ni Benget do manginum na jinalo ni anakna i alai songkak do dihilala ditolonanna.
“Tuak ma jalo inumonta ai so mardai nanilehonna on”.
“Ndang adong tuak dison ai cafe do on ndang songon lapo tuak na dihutanta i, inum Bapa ma tabo do i annon”.

Dioloi ama ni Benget do hata ni anakna i unang maila dirohana si Benget marnida angka natorop dohot boru-boru na dilambungna i ai dirimpu ama ni Benget naung marsitandaan hian si Benget dohot boruboru nadua i.
Toho do antong, dung lam leleng ama ni Benget na minum i lam tabo do dihilala, jala si Benget pe diida do amana i naung sonang rohana naminum i. Tumagon ma tahe hupasombu amonghon diangkupi boru-boru on minum anggiat unang sai diingot hansit ni na dihuta i, ninna rohana. Didok ma tu boru-boru i asa diangkupi amana i minum, jala molo mangido tamba asa dilehon boru-boru i, huhut dihirdop simalolongna laho morot manadinghon amana i dohot boru-boru i. Dipahombar boru-boru i ma tu lambung ni ama ni Benget huhut diusehon minuman tu galas ni ama ni Benget molo dung suda sian galas i.
Bah….burju ma itoan on ai ise do on ulaning, ninna ama ni Benget dibagas rohana laos disungkun ma boru-boru i.
“Ai boru aha do hamu ito”.
“Aku tak mengerti ucapannya Om”
“Boru apa kau ito”
“Baru masuk Om”, ninna boru-boru i, ai dirimpu boru-boru i na mandok baru apa kau itu.
Bah…ai adong do hape boru masuk ?, ninna roha ni Ama ni Benget dibagasan huhut didok ; “Siapa namanya”
“Sorhian Om”
“Bah… jadi Sorhian boru masuk”
“lya Om Sorhian baru masuk. Kalau Om mau, Sorhian bisa membuat Om senang”, ninna boruboru i muse huhut didampol-dampol jarijari ni ama ni Benget
Bah… tung na burju do hape si Sorhian on, ninna Ama ni Benget dibagasan rohana jala sai dipasombu do jarijarina i didampol.
“Kalau Om mau minum sambil nonton mari Sorhian antar”, ninna boru-boru i muse tu ama ni Benget huhut ditogu tanganna. Dioloi do mangihuthon si Sorhian i tu bilut ai nunga mulai songon na mordong diida. Burju do si Sorhian i manogu ama ni Benget sahat tu bilut i jala pintor dibahen ma tontonan laho mangela ama ni Benget.
“Ini film enak Om khusus Sorhian putar agar Om senang”.

Dibereng Ama ni Benget na dijolona i huhut marlobok tarontokna, dibereng ma angka jolma na marsaemara.
“Peh….. ai angka naso marpaho do hape on”, ninna Ama ni Benget huhut jongjong, habur ibana haruar sian bilut i. Sude ma angka na di cafe i longang mamereng tu ibana dirimpu na manangko, laos digorahon angka nadisi ma : “Maling…..Maling…”, ninna nadeba. “Rampok…rampok…”, ninna na asing. Pintor digulut ma ama ni Benget. Adong na maninju, adong na manunjang, laos peak ma ama ni Benget huhut morong-orong.
Mamintor ro ma Satpam ni cafe i mandapothon na gaor i ditiop ma ama ni Benget huhut disungkun manang ala ni aha umbahen na songon i ibana. Mengkel ma sude umbege hatorangan ni ama ni Benget, jala dung dipatangkas si Sorhian bonsirna Iaos dipasombu ma ama ni Benget haruar.
Sai di dalani ama ni Benget ma anggiat dao ibana dirohana sian cafe i, ai nunga tung maila jala hansitan ala na hona tinju i. Tung na so hasea do hape si Benget on tung bahenonna songon i tu ahu, ninna huhut sai di dalani ibana dalanna.

Dung ro si Benget tu cafe i naeng mangalap amana i, tarsonggot ma ibana dung disungkun si Sorhian naung lao amana i. Hatop ma ibana haruar laho mangalului alai laos so jumpang si Benget do.

Leleng do ama ni Benget peak didalan i so adong na barani mangurupi, ai godang do mabiar sotung dipareso polisi gabe saksi. Nadeba mabiar loja, nadeba ndang sanga tingkina ala godang ni ulaonna. Alai marhatohoan ma mamolus si Monica laho mangalului sinondukna si Benget ala nunga jotjot si Benget ndang mulak tu bagasna. Tarsonggot si Monica dung ditanda simatuana do hape na peak di dalan i. Dirabin ma simatuma i laho pamasuk tu mobilna laho mamboan tu ruma sakit. Longaag angka parkerejo rumah sakit marnida si Monica ai dirimpu nasida gelandangan na ditaruhon ni si Monica tu rumah sakit i. Sanga do maol dijalo parrumah sakit i ama ni Banget marubat. Muruk ma si Monica huhut didok : “Saya membawa orang yang sakit, tapi kalian malah bingung, apakah rumah sakit ini bukan tempat berobat orang yang sakit?”
Alai dialusi pegawai rumah sakit ima si Monica ; “Benar ini tempat berobat, tapi siapa nanti yang membayar biayanya”.
Tarsonggot si Monica mambege alus ni pegawai ni rumah sakit i, laos muruk ma ibana. “Semua biaya saya yang menanggung, dan tolong bapak ini diberi pelayanan yang terbaik”, huhut dilehon si Monica hepeng jaminan. Hapogan ma angka parkarejo ni rumah sakit i mamboan ama ni Benget tu bilut parubatan jala tongtong diihuthon si Monica.
Dung tarjolma ama ni Banget longang ibana manida inganan i, ai diingot didalan do ibana peak ala ditombom mobil, hape dibereng nunga angka nabontar humaliang ibana. Ai na marnipi do au nuaeng? ninna rohana dibagasan huhut dipilos simalolongna. Alai mangkuling ma si Monica parumaenna i : “Bapak sudah sadar ya tak usah banyak bergerak, kalau ada yang perlu bilang saja sama saya”.
Bah…sian dia diboto parumaenhon dison ahu, ninna ama ni Benget dibagas rohana huhut dipahosing dagingna naeng mandompakhon parumaenna i alai pintor hansitan ma dihilala gabe morongorong ma ibana. Hatop do ditiop si Monica tangan ni simatuana i asa unang pola humosing.
“Kalau Bapak mau bicara bilang saja tak usah segan segan, dan bila hendak duduk biar saya bantu”, ninna si Monica.
Bah, ai burju do hape parumaenhon, alai boha ma dohononhu mandok naeng tu kamar mandi au. Hira na diantusi si Monica do na di roha ni simatuana i.
“Kalau Bapak mau buang air biar saya ambil pispot”, ninna.
Alai mansai subang do dihilala Ama ni Benget mangoloi hata ni parumaenna i jala didok ma asa haruar jolo parumaenna i sian bilut i. Mangantusi do si Monica laos dijou ma perawat asa adong pature simatuana i.
“Rawat Bapak ini sebaik mungkin dan jangan tinggalkan”, ninna huhut morot ibana. Alai digora Ama ni Benget ma ibana : “Jangan pergi dulu inang, saya mau bicara. Bila saya sudah sembuh tolong diantar ke stasiun dan jangan bilang sama si Benget”.
Longang ma si Monica mambaege hata ni simatuana i alai dang pola didok manang aha.

Iklan

9 thoughts on “PARSORION NI AMA NI BENGET 2

  1. sahat, m, ngln berkata:

    Ai diado muse si Benget on, dipajuju tu itoanni Sorhian baru masuk..wakakakakak..nga sandap si benget. Mauliate 😀

  2. alai anggiatma nian angka halak hita namora, jumolo mambangun jabu di hutana baru asa mambaen villa….alana natinggal di huta nungaeng holan oppung opung nama…olo nama angka halak naasing haduan tinggal dihuta molo dang tabaen jabunta dihuta…..

  3. Bonar Siahaan berkata:

    @ Benget Nainggolan

    Si Benget do lae na somamboto lapatanni goarna, alai Ama ni Benget tong-tong do benget manaon parbaluonna. Jadi porlu do sungkunon natua-tua niba taringot tu goar, alana Natorasta do mambahen goarta be.

    Hea do husukun Damang nahinan boasa Patuan Raja Bonar dibahen goarhu, ondo alusna; “Nahuririt do goar i sian “Purbam”, jala dung songon i alusna pintor manetek do ilu sian simalolonghu mangarimangi angka pambahenanhu, gabe hutinggalhonma angka nahuula nasosuman tu goarhi.

    Alai tahe, songon goarmi do pambahenan ni lae?

  4. Bonar Siahaan berkata:

    @ Nani Gultom
    Imada…..jotjot do naposo nuaeng naso mangantusi panghilalaan ni natorasna.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s