AU DO AMANGNA …

Monang Naipospos

Di hata Batak, “pamaritai” do didok angka wartawan. Barita do dilului na dietong rohana hinalomohon ni angka na manjaha. Holsoan do pamaritai molo so ra dong barita dapotna na gabe sipujion ni indukna laho bahenonna jadi barita bolon tu mangajana.
Nunga lobi saminggu si Torhon mangalului barita, alai laos so ra adong dapotna na tarjangkon tu indukna. Mordong ibana tu dolok tu toruan maradu marsipal, alai tong do angka barita hadosan dapot ibana, jala sipata sai jolo halak naasing jumolo umbotosa.
Nunga diusoi indukna ibana disiala ni i, lam sai dokdok ma tu rohana, “bah, tahe nunga mamparampar iba songon hortuk ni lombu jonggi, sian dolok ditihai, lao tu toruan ndang adong namanumpahi, hansitnai hape gabe pamaritai”, ninna rohana dibagasan.
Hea ma di sada tingki dibereng ibana adong jolma ditompas siruminsir (mobil), marlojong ma ibana mangadu asa dapot gombaronna. Alai nunga jumolo angka jolma na jonok tusi manarunggui, ujungna laos so bolas dapot digombar ibana. Hape sian na so dapot rohana dalanna, nunga adong donganna disi jala boi mambuat gombar ni nahona tompas i.

Pajumpang ma ibana dohot donganna sada ulaon marsituriak, boha do bahenonna asa unang luangan sian barita sibaritahonon asa tedak roha ni indukna tu ibana. Ah, mamura do i, ninna si Tahop donganna i. Molo adong namasa rupani “pelanggaran lalu lintas”, asa boi dapotmu gombaranna ala naung gok humaliang jolma manarunggui, paula ma ho mangangguk bobar. Ala ni i sumisi ma angka jolma nahumaliang i, alana dietong rohanasida sisolhotna, ninna si Tahop. Olo tutu, ninna roha ni si Torhon dibagasan. Mulai sadariaon ndang hatinggalan be ahu sian dongan, nunga huboto be angkal. Tung tuani ma huangkupi si Tahop on manghatai asa adong dapothu parbinotoan, ninna rohana.

Di sada tingki, tongon ma adong dibereng ibana martarungup jolma di topi dalan. Tarontak ma tu rohana songon sada pamaritai na ingkon dapot sipujion ma ibana sian indukna ala adong ma baritana. Molo so naung mate pe, pinomat ingkon naung dokdok pangaean ni nahona tompas i, ninna rohana. Sian hadaoan marlojong ma ibana, Alana tar holang do sian panatapanna i tu namasa i. Pos do rohana dibagasan, ibana do jumolo sian horong pamaritai marnida namasa i. Huhut diparade ibana ulaula laho manggombar, ditahi rohana dung das ibana tu lambung ni nahona tompas i, manigor mandogilhon nama ibana di ulaulana i.
Dung hira sampulu langka ibana jumonok tu namasai, diingot ibana ma poda ni si Tahop i asa sumisi jolma namarhaliang i laos tulus dalanna. “Amang ooooiii, loas hamu jolo au, amangna do au …”, ninna huhut paula diapus iluna. Sumisi ma angka jolma i pasiding si Torhon ala diida songon na ojong langkana. Dung sahat ibana ditonga laho mambuat gombaran i, dibereng ma, hape pinahanlobu do na mate.

(ide : Herlan Hutahaean Sth)

Iklan

5 thoughts on “AU DO AMANGNA …

  1. Maulina berkata:

    Sai lucu 2 do nian ceritani Oppung on, mambaen sai tarpaima roha (penasaran) molo so manjaha partungkoan on.

  2. bonar siahaan. berkata:

    Alani i do umbahen didok manat unang tartuk-tuk,dadab unang tarrobung.
    Unang tujolo gabe tarmunsung tupudi gabe tarihur.

  3. Carlos berkata:

    Molo adong mandok “intel melayu”, mungkin on ma ra “wartawan melayu” ate..!

    **** Mungkin …. Nuaeng ditoba nagodangan wartawan alai dang piga barita 😀

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s