PARSORION NI AMA NI BENGET 3

Patuan Raja Bonar Siahaan [Martua ujungna Ama ni Benget]

Dung hipas Ama ni Benget dipangido ma asa mulak ibana tu hutana, jala dang pola jolo sian bagas ni si Benget. Manang boha pe didok si Monica asa jolo sian jabu, ndang olo Ama ni Benget.
Hupataru ma simatuanghon tahe sahat tu hutana sotung gabe masalah di dalan nina si Monica dibagas rohana. Borhat ibana manuhor angka naringkot di simatuana i. Di na naeng borhat nasida didok si Monica tu tungganedolina : “Saya mau mengantar Bapak ke kampung, dan kata Bapak tidak mau bertemu dengan abang, nanti setelah Bapak sampai di kampung akan saya tanya mengapa tidak mau bicara sama abang”, ninna si Monica tu si Benget. Tarhatongtong ma si Benget mambege hata ni tungganeboruna i huhut didok : “Dimana kamu bertemu dengan Bapak, dan bagaimana keadaan Bapak?”
“Nanti setelah saya pulang baru kita bicara dengan baik, sekarang Bapak hendak pulang soalnya bila saya lama datang menjemput nanti malah membuat masalah baru”.
Ndang dialusi si Benget be hata ni tungganeboruna i. Hohom nama ibana huhut sai margundokpong.

Saut do borhat ama ni Benget dohot parumaenna mulak tu huta jala marhopal habang do nasida. Dung adong manang sadia leleng nasida na marhopal i dilehon parhobas ni hopal i ma sipanganon tu ama ni Benget, alai ndang olo ibana manjalo nang pe disosoi si Monica asa dijalo. Dung sahat nasida to paradianan ni hopal habang i tuat ma nasida. Ditogihon si Monica ma simatuana i tu lapo laho mangan.
Dung simpul nasida mangan diuji si Monica ma manungkun ama ni Benget boasa ndang olo manjalo sipanganon sian pramugari i.
Sedangkan di darat kita beli roti sudah sangat mahal bagaimana lagi kalau sudah di udara dan di kapal terbang, tentu lebih mahal lagi
Mengkei suping ma si Monica umbege hata ni simatuana i huhut didok, “Oh.. itu tak perlu Pak, sudah dibayar duluan waktu beli tiket, maka walaupun Bapak terima tak perlu lagi dibayar”.
“Bah… otonai ahu”, ninna ama ni Benget dibagas rohana. Si Monica pe ndang diganjangi be hata tu simatuana i.
Borhat ma nasida mandapothon hutana. Uju maradian mobil na tinompang ni nasida i di stasiun mardorom ma angka partigatiga masisonsonhon angka sipanganon tigatigana be. Dijaloi Ama ni Benget ma sude angka pinansotsothon ni partiga-tiga i. Dirimpu rohana nunga domu tu ongkos i panggararna. Alai sian na so tinagam ni rohana dipangido partiga-tiga i ma gararna sian Ama ni Benget. Muruk ma ibana tu partiga-tiga i huhut didok: “Ai dirimpu hamu do naoto ahu?, nunga digarar parumaenhu hian i tingki manggarar ongkosnami nangkin”, ninna tu partigatiga i.
Alai pintor dijoloani si Monica ma manggarar unang marsoali simatuana i dirohana. Ditangkasi ama ni Benget ma parumaenna i : “Katamu tadi itu sudah dibayar mengapa sekarang masih dibayar? Berarti kamu juga berdusta sama saya, karena bicaramu maluku sudah besar”.
Tarsonggot si Monica umbege hata ni simatuana i alai ndang pola didok manang aha.

Dung sahat nasida tu huta, disungkun si Monica ma simatuana i manang aha umbahen ndang olo pajumpang dohot si Benget, alai ndang olo ama ni Benget paboahon jala si Monica pe ndang pola olo manohot simatuana i. Mabiar sotung hansit rohana.

Di sada tingki mamolus ma sada ina nambalu huhut dipangke jas ni nahinabaluhonna hian. Bah tung sai diingot inanta an do huroha amanta i umbahen pola dipangke jas tininggalhon ni tungganedolina i, ninna rohana. Gabe marningot ma ibana tu tunggane boruna naung marujung ngolu uju metmet dope si Benget dohot ibotona i. Dirimangi ma tingki mangolu dope ina ni si Benget sahat tu parmondingna. Tarsunguul ma angka parniahapanna pature-ture si Benget dohot ibotona sahat ro di dung mabalu ibana.
Hupangke ma jolo, tahe pahean ni ina ni si Benget on mandaoni siholhu ninna rohana huhut dibuat kebaya ni Nai Benget nahinan. Tarsonggot ma si Monica manida simatuanai alai ndang barani mandok dia, angka halak namarnida pe gabe didok ; Bah… dung mulak ama ni Benget manopot anakna i nunga gabe adong dua ni rohana, angka ninna be.

Sai manginongi roha ni si Monica marnida pangalaho ni simatuana i gabe ditelepon ma si Benget asa mulak jolo tu huta. Hatop do ro si Benget jala dialapi dohot ibotona dohot laena sian Dolok Masihol. Marpungu ma nasida dibagas ni amana i, dipatorang si Monica ma manang ala ni aha umbahen pola ditelepon si Benget asa mulak. Dihabaranihon iboto in si Benget ma manungkun amana i manang ala ni aha umbahen sai songon na gondok rohana. Leleng ama ni Benget hohom huhut mamingkiri manang aha dohononna mangalusi ianakhonna i. Diuduti si Benget ma sungkun-sungkun ni ibotana i.
“Apala aha do huroha umbahen songon i margundokpong Bapa?”
Dialusi ama ni Benget ma : “Metmet dope ho dohot ibotom nunga monding inongmu, jala hutaon do marhansit-hansit sahalakhu pature-ture hamu sampe pinahuta ibotom, dohot ho hupasingkolahon sampe dapotmu nasininta ni roham. Hape so boi diantusi rohamu nadibagasan rohangku”, ninna Ama ni Benget tu anakhon na i.
Marsiberengan ma si Benget dohot Iaena. Morot ma si Tumpak lae ni si Benget ai dihilala rohana ndang talup dohot ibana mangangkupi simatuana manghatai angka sisongon i. Tumagon ma tahe lae si Benget dongan ni amang on manghatai unang pola songon na subang, ninna rohana huhut hehe ibana laho morot. Alai digora ama ni Benget ma helana i : “Boasa laho hamu ala hudok songon i?. Ai na so dietong hamu do natuatuamuna ahu?”
“Ndang talup among dohot ahu manghatai, dumenggan ma lae si Benget dongani hamu”, ninna si Tumpak mangalusi simatuana. Muruk ma Ama ni Benget tu helana i: “Ai sai pintor asing be do dirajumi rohamuna. Ninna rohamu do huroha na naeng mangoli ahu. Aut sura na mangoli hupingkiri nunga tibu ahu mangoli, ai metmet dope si Benget dohot ibotona marujung ngolu ni simatuam nahinan. Alai nahudok songon on do. Nunga godang hepeng ni si Benget jala nunga adong jabuna di dolok-dolok, hape huta on ma hatubuan dohot hagodanganna, alai laos so dipingkiri do anggiat unang hatinggalan huta on sian angka huta na asing”, ninna Ama ni Benget tu anakhon na i.

Dung rampak si Benget dohot laena i, dipatolhas Ama ni Benget ma na di rohana; “Nasailelengon hutaon do didadang ari ditinggang udan laho pagodang-godang hamu. Hutaon do marsadasada bulung anggiat boi hamu marsingkola. Dang huhapian angka namaulibulung na tong-tong rap dohot inantana di siulubalang ari holan pagodang-godang hamu nadua. Dapot do tutu nasininta ni roha. Gogo ni tanonta dohot tangiang ni hutanta on do umbahen boi hamu dapotan ampapaga nalomak huhut papungu pansamotan diluat ni deba. Nuaeng nunga suda napu ni tano dohot gogona tu hamu uju marsingkola hamu, hape lupa do hamu tu huta on, gabe dolok-dolok na di tano sileban do dipature hamu. Hea do tarjaha ahu di ribak-ribak ni surat kabar na tongon saput ni gulamo tarsurat GEBU MINANG (Gerakan Seribu Minang). Huingot ma hamu naung didok halak mamora di tano parserahan. Aut ma nian olo hamu na diparserahan i patupahon songon binahen ni halak Minang i”.

Tarsonggot si Benget mambege hata ni amana i. Dang dirimpu rohana sahat tu songon i pingkiran ni amana. “Nunga huantusi among na diroham i, alai na maol do dapot songon i di halak hita. Alai nang pe songon i hupatolhas pe tu angka dongan na diparserahan”.

Saut do dipatolhas si Benget panghataionna dohot amongna i tu donganna diparserahan jala suman do diroha ni nasida hata ni ama ni Benget i. Ditahi nasida ma mangula adaran na adong dihuta jala dipapungu ma hepeng dung tangkas dietong nasida manang sadia sipatupaon laho patulus sangkap i. Diojur nasida ma si Monica nioli ni si Benget mulak tu huta asa adong manguluhon angka na dihuta anggiat tulus sangkap paturehon parngoluon ni angka natinggal di huta tarlumobi angka naumposo naso sanga marsingkola tu singkola natimbo.

Marparbue tu nauli do tutu binahen ni angka anak pangaranto i dipadomu tu habisuhon dohot haburjuoan ni si Monica. Ringgas do angka natorop rap dohot angka naposo mangula, suang songon i nang angka anak sikola pareak hapistaron.
Dung tulus ture pangabahan ni ngolu dohot haringgason ni natorop si huta ni si Benget i, marpungu ma angka natuatua marsangkap asa bulangbulangan nasida si Benget dohot niolina si Monica suang songon i nang angka anak pangaranto namangurupi sangkap nasida peture hutana i. Dang lipe sian roha nasida dipambahenan nadenggan gabe boi sahat hamajuon tu huta nasida. Dititi ma ari, diontang ma dohot angka hombar balok jala dipampe ma marga ni si Monica songon marga ni ina ni si Benget. Dipalolo ma ulaon mardongan gondang sabangunan pasahat BULANGBULANG SILIMA ODOR tu si Benget dohot tu niolina si Monica naung samarga dohot ina ni si Benget.

HORAS TONDI MADINGIN PIR TONDI MATOGU.

Iklan

27 thoughts on “PARSORION NI AMA NI BENGET 3

  1. Cerita yang sangat menarik dan bersifat membangun, sai adong ma muse akka cerita si songon on alana boi gabe parsiajaran diakka naolo mangalehon roha lao martabe ( marsipature hutana be )

  2. PANAHATAN TAMBUNAN berkata:

    Ah………anggo roha i nian. Alai holan angan-angan do na adong. Godang do ide, alai mangulahon ma na maol. Tarlumobi ma dos ni roha. MAOL DO PA SADA ROHA, ala na GODANG DO PAR ROHA SADA.
    Sai anggiat ma tujoloanon ro na burju songon inanta ni si Benget na so benget i.

    Bravo turi-turian, Horas Mauliate-Parlopes Tambunan

  3. Carlos berkata:

    Sebuah cerita yang sangat menggugah, kompleks (lucu, konyol, real …) dan sangat bagus. Salut buat amang Siahaan, Mauliate

  4. Bonar Siahaan berkata:

    @ Panahatan Tambunan.

    Dang nasai ingkon sonari boi pasauton sada ni roha,alai molo sai laho roha paturehon,sai adong do muse dalan patulus sinangkap ni roha.

    Mauliate.

    @ Carlos.

    Trims atas pujiannya yang selangit.
    Tapi tinggalkan pujiannya untuk orang lain 😀

  5. sahat, m, ngln berkata:

    Ima tutu, sai anggiat ma taingot laho pamajuhon akka hutata be. marsipature hutana be 😀 Horas! Mauliate godang di hamu.

  6. Marudut p-1000 berkata:

    Amang Bonar Siahaan, tung masai tabo hian manjaha turi-turianmunaon. Salut do au mamereng hamu, atik pe nunga matua alai tong do olo mangalean perhatian to aka naposo melalui interneton. Marpangajuma hamu tu au alani marpasir-pasirdo hata batakku, mauliate, horas.

  7. Bonar Siahaan berkata:

    SELAMAT TAHUN BARU UNTUK SEMUA PENGUNJUNG BLOG INI.
    SEMOGA THN 2008 PENUH DENGAN KEDAMAIAN DAN PENUH
    BERKAH DARI TUHAN KITA YANG MAHA PENGASIH.

    AMIN

  8. Anson Simanjuntak berkata:

    Naburju ma ate parumaen ni Amani Benget on, Aut sura boru batak tulen ni, ra hatop do sada roha mangulahon akka nadenggan di bona pasogit.

    Horas ma di hamu Tulang Siahaan.
    Sian ahu tubuni baru Siahaan sian Hinalang, Dolok Tolong, Balige.

    Ditunggu cerita selanjutnya untuk mengugah hati para perantau yang lupa akan kampung halaman.

    Horas.

  9. Bonar Siahaan berkata:

    Horasma nang dibere Anson Simanjuntak.
    Mauliate ma di resfon mu,jala sai anggiat ma tutu unang lupa angka anak ranto nasian hitaan paturehon angka hutana be.
    Molo dung adong insfirasi nigurithon pe di website on.
    Molo naeng botoonmu didia ahu maringanan jaha di sosok dan perilaku naadong di blog on.
    Mauliate.

  10. Erikson Hutahaean berkata:

    Horas ……mauliate Tulang…..Sai anggiat ma nian akka pangaranto na di luat silebannan ro tu hita an pature2 huta an lam tu nadumengganna

  11. Marcyus Siahaan berkata:

    Horas di dongan tubu
    Sadarion dope sahat tu ahu barita naung di BULANGBULANG SILIMA ODOR si Benget dohot tu niolina si Monica naung samarga dohot ina ni si Benget.
    Boha bahenon ma hudok siala parhuta di punsu ni dolok Parrabian Aekbolon do ahu, susa do sahat barita siala porsuk ni dalan.
    Aut ma nian sahat tu ahu barita so dung diulahon hian dope namambulang-bulang i, dohononku do tu ama ni Benget dohot tu si Benget, asa jolo mamampe goar Ompu ….. Ama ni Benget jala goar Ama ni….. si Benget dohot goar nai …. si Monica, ima nagabe dongan sagoar nasida sian ianakkon ni si Benget.
    Hulompit nama tanganhu marhite pangidoan : Tuan Mauli pahompu si Somba Debata, marhuta di Paindoan
    Nunga sahat sude angka nauli ditumpak amanta Debata, tulus ma luhut pangidoan.

    Tuhan mamasu-masu hita saluhutna
    marcyus siahaan/ op inamora
    sd/tm/dm sundut 13

  12. Bonar Siahaan berkata:

    Horas ma nang di Ompung pardolok parrabian Aek bolon.

    Ahu sundut pa 15 hon sian SOMBA DEBATA, ala ni i do umbahen marompung ahu tu hamu.
    Ai ditanda ompung do tahe Paualu(santabi) ? huhilala solhot do hamu tu nasida, jala tangkas do ditanda ibana ahu ai di Siboruon do ahu maringanan.

    Boha roha ni Ompung,dos roha tabahen ma goar ni Ama ni Benget i Ompu Rintar Mauli Tua ? Jala si Benget gabe Ama Rintar Mauli Tua ? Suman do goar i pampeonta diroha ni Ompung?

    Molo naeng berengon ni Ompung gombaranhu, klik ma di SAYA CINTA BUDAYA BATAK na adong di blog on,atik naung hea do hita pajumpang.

    Horas ma di Ompung,jala nunga marhasohotan tahe Ompung? Molo dang marhasohotan dope adong do anggi ni si Monica naso muli dope,goarna si Marsyelus Putri Bange….hehehehe…

    Sahalinari hudok tu Ompung, HORAS.

  13. Marcyus Siahaan berkata:

    Horas ma tutu
    Toho nidok ni pinompar di daompung, siala ompung didok ho manjou ahu. sd/tm/dm sundut 13 jelasna ima, Somba debata/ Tuan mauli / Datu martahuluk sundut pa 13 hon sian SOMBA DEBATA . Siala na huboto do do di siboruon umbahen hubahen dolok parrabian aekbolon siala tangkas dope huingot huta hatubuan dohot tano hagodangan s.d umur 10 taon). Tingkion sahuta dohot si Dumoli + Sinthon
    Mar Bapa Tua do ahu Tu Paualu (no,8 sian sa ama) tegasna Ompung ni amonghu no.5 Ompung ni Bapa Tua i No.4.
    Nunga mansai suman jala uli goar Rintar Mauli Tua ni riritmi, satolop ma ahu disi. Musengani goar Rintar do panggoaran ni damang dohot dahahang. Marboa-boa ma nian hasuhuton bolon andigan ma pampeonna,
    Ummuli nama di rohangku si Marsyelus Putri Balige i tapaorohon tu angka pahompu, alana ulaonku siganup ari MC do (marompa pahompu/momong cucu)

    Asa boi hita lumambas manghatai, molo suman diroham, pangido ma alamat e’mail hu tu parhobas ni blog on

    Didongani jala dipasu-pasu Tuhan ma hita tong-tong
    Op.Inamora Siahaan

  14. Gerfandi Siahaan berkata:

    tergugah do ahu manjaha sarita on, nga nisadaran be hape naung ni sedot gogo ni tano na di huta niba sandiri. sonari porlu pikkiran bao ma asa napu muse tano na dohuta i????
    Horassss…..

  15. Bonar Siahaan berkata:

    Horas di Ompung par dolok Parrabian Aek Bolon.

    Sotung hansit roham Ompung ala leleng hutanggapi boa-boa ni Ompung on, antusi Ompung ma, sipata adong kegiatan sahat tu luar ni TOBASA gabe dang adong tingki manjaha blog on.

    Pahompunta sian anakta si paidua si Rintar do goarna,jala ama Rintar ma ibana nangpe boru sileban parumaenta i.

    Molo tu si Dumoli maranggi do ahu ai anak ni amang-uda do i (dua do Among hu martinodohon), jala molo tu si Sinthon marompung do ahu (nunga marondok-ondok ompung on sian hami angka pahompuna nang pe poso ibana…..).

    Bereng ompung ma di SAYA CINTA BUDAYA BATAK e’ mail hu asa sian i hita gumodang marsarito,sotung muruk maon angka pengunjung ni blog on ala angka pribadi hita manghatai.

    Pasahat tabeku tu Ompung boru molo mangolu dope ate ompung.

    HORAS.
    Sian ahu pahompum
    Op.Tumitang Siahaan.

  16. Bulus Sianipar (Ama Martin) berkata:

    Horas ma di hamu Amang Bonar Siahaan. Songon halak batak naung tubu di pangarantoan iba (P. Siantar) tung mansai las do roha bergabung di forum on, lumobi dung jinaha nonang muna on. Gabe boi do dapot niba hinauli ni bahasa batak i di bahen hamu. Sahali nai, ganjang ma umur muna amang asa adong hamu na boi mambahen panorangion taringot “habatahon” lumobi ma tu angka genaerasi muda. Horas.

  17. Bonar Siahaan berkata:

    @Bulus Sianipar (Ama Martin)
    Nahea do ahu di Jakarta jala laho tu puncak diboan dongan, hubereng di inganan i dang pola adong na istimewa…..hape sai marsigulut pajongjong bagas (villa), gabe hurimangi angka naposo pangaranto na sian hitaan na soolo pature hutana, ido mambahen tubu roha manggurithon turiturian on atik tung adong namangharingkoti hutana.

    Horas

  18. horas nainggolan berkata:

    horas ma di hita saluhutna sai jaga hamu ma hutantai asa boi dope berengon ni aka ketturunanta ate

  19. Debora Sitohang berkata:

    tertawa
    tanda tanya
    geli (mertua-menantu)
    serius
    terkejut
    mengangguk
    tersenyum
    7 kata diatas yg saya alami tatkala membaca turi-turian ini,saya tunggu karya bpk lainnya ya.Jb.

  20. Bonar Siahaan berkata:

    @Horas Nainggolan
    Horas ma nang di hamu.

    @Debora Sitohang
    Hira na hea hubege goarmon…..atik ditanda hamu do Lumban Uruk

  21. aku baru dapat info mengenai adanya cerita ini dari Pdt Herland Hutahaean… Setelah kubaca,aku jadi tertawa-tawa sendiri… eh tahe… songon i ma hape hita halak Batak on… dang huboto mandok, manang simatua ni si Monika do na pa-kolot-hu — dang boi hinsa mangihuthon perkembangan zaman/hamajuon, manang si Monica na so olo marpanungkun, manang si Benget na so ra mangajari parsondukna?? Na pasti masa do angka kesalahpahaman si songon i, molo so adong ‘komunikasi’ na tenggan.. alai mauliate ma, “happy ending” do hape turiturian on… anggiat ma sai jumpang angka na happy ending di tano Batak tu jiloan on. I’m proud to be Batak… karena BATAK ITU KEREN… Sayangnya lompatan peradaban Batak dari “inward looking” kepada “outward looking” terkadang terjadi terlalu cepat, sehingga sebagian yang tak bisa menyesuaikan diri menjadi teralienasi di tengah pesatnya perubahan dunia ini… Ditunggu Amang SIMA cerita-cerita selanjutnya… Horas!

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s