BALADA CAP BINTANG DI HOTEL BERBINTANG

Monang Naipospos

Nunga hasomalan di halak hita molo jumpang angka na marale-ale sai manigor dilului do aha do siinumon. Najolo dang apala adong didok lapo tuak songon sinuaeng on, alai molo adong paragat di huta i, dihara ma donganna minum tu jabuna, ia so i laos dibona ni borta i do nasida minum huhut marnonangi. Angka hasomalan on ma na nidokna “pahire”.

Uju diboto angka dongan ahu ro tu Jakarta, manigor manggogo do nasida ingkon jolo pajumpang paima so mulak tu Toba. Dang tarjua be pangidoan i ala mardomu au sandiri pe nunga masihol tu nasida be. Ditagam rohangku masipaboaan be ma nasida asa pungu, alai na adop disi ima, Suhunan Situmorang Sigorga Hata (Pengarang, Pengacara), Viky Sianipar Sigorga Soara (Pemusik), Charlie Sianipar Sigorga Rupa (Photografer, Tokke Komputer Laptop). Udut do muse ro si Merdi Sihombing Sigorga Abit (Perancang Busana) dohot Tumbur Siallagan Sigorga Hau (Panggorga na sasintongna).

Dang jumpang lae Charly Silaban ala marhatohoan di Toba do ibana rap dohot si Tongam Sirait. Lae Sahat Sipahutar pe dang tarida dohot Si Aryono. Dang sahat boa-boa ninna tu nasida.

Pahire, tusi ma sundung ni punguan i alai dang tuak namarraru be siinumon, Alana di hotel berbintang do. Ah, bir bintang ma tainum ninna be, ima ujungna. Songon i do hape molo naminum, paet mulana, lam leleng lam so binoto be manang naung piga salung pinamasuk.

Dang apala hasomalan di au minum na maralkohol, molo tung tarsor minum tuak di Toba, dang lat sian tolu galas, ipe nunga marrara bohi jala tamba hinsa marnonang. Ipe ala hinorhon ni angka hata do namandok adong do ubat sian tuak namarraru, toho manang daong dang tangkas dope risa ni hata i, alai molo sinok modom nunga pinangkilalahon.

Nunga adong opathali sumuang marisi salung panginumanhu ala hinsa ni lae Charlie dohot Viky mangisi molo dung rumar. Holan na mengkel do hami saborngin i dung sidung dihatai taringot tu sangkap pendokumentasian gondang batak, tadisi ulos, gorga batak dohot surat batak.

Godang do sarito sibahen na mengkel sian lae Suhunan Situmorang, alai sipata ala naung tar miduk huinum bir bintang i nunga songon na lam samak parnidaan. Sipata ma huida si Paltibonar marhata-hata agan pe hurang hutanda do ibana. Bah, jogi ni si Paltibonar on ninna rohangku, alai huhut huapus bohingku unang tarlalap di nipi-jongjong i. Ah naung hona do huroha au, on ma ra nidok ni dongan halusinasi ninna rohangku dibagasan.

Alai laos i do umbahen dang haambatan be aha naro, ai lam ditambai do siinumon i hape sai hudorguhi. Huida ma si Paltibonar i sai dihatahon hatana.
“Bah nunga tolu galas na kosong boasa dang diisi”, ninna huhut dihilap parhobas ni lapo i.
“Disi kosong galas on isi, da!”.
“Olo amang” ninna parlapo i.
“Bah, ai si Merdi do namarende i, tarsunggul na di roha umbege ende i”, ninna huhut sai diihuthon ende ni si Merdi na rap dohot parende ni hotel i.
Ditaringoti si Palribonar ma tu napungi i angka pangalahona na gabe siringkot-ringkot ingoton. Gabe siriburon do i antong tu roha. Dipanotnoti ma si Suhunan huhut didok : “Diboto hamu do, adong dope namarlomo roha mangolu au, ima ito Limantina Sihaloho. Alai boha ma bahenon, dang husalahon hamu, tong ma i ala ni pelor na hurangajar i”, ninna.
Dialathon ma muse dompak si Viky. “Viky, pahibul roham puang laho mangargahon gondangta i, masitungkarpingkiran hamu dohot si Suhunan. Ingot hamu nang lae Sahat Nainggolan, alana huboto mansai arga do di ibana gondangta i”, ninna huhut sai mangunduhi si Viky huhut diapus janggutna i.
Digora muse ma si Charlie. “Lae Charlie, andigan do bahenonmu pameran photo haulion ni Tao Toba dohot Tano Batak i, anggiat marhite sian i nian boi tandaon ni si Diandra dohot si Mary haulon ni Tao na so sanga ujung hupatudu i”, ninna.
Diunduk si Charlie do hata i alai dibagasan rohana dope.

Dung loja si Merdi namarende i, hundul ma ibana. Disise si Paltibonar ma.
“Muliate lae di endem nagkin mansai tabo huhilala. Alai hubege barita naeng bahenonmu photo dibagasan aek ni Tao Toba, artis ibukota marpahean batak, toho do i lae?”
“Toho do i lae, sai unang ma adong abat-abat”, ninna si Merdi mangalusi. “Marungkil do au patuduhon haulion ni gatip tonunan ni batak i tu liat portibi on”, ninna si Merdi patangkashon sinta-sinta ni rohana.

Mangunduk-unduk ma si Paltibonar patudu las ni rohana. Adong dope hape namanorushon angka sangkap ni rohangku na so ujung huulahon ninna rohana huhut diranap humaliang napungu i. Tarbereng ibana ma si Tumbur Siallagan, songgot ma rohana.
“Bah, nandigan hamu ro sian Tomok? Naung pinda do hamu tu Jakarta on? Na so ditorushon hamu be namanggorga i? Bah, bohanama kesenian gorganta i?”, ninna songon na manghudus manulingkiti ala lomos ni rohana molo bungkas sude pande sian Toba tu Jakarta mangadu ngolu nadumenggan.
“Tong dope au di Tomok lae, namangihuthon pameran kesenian gorga do au di Jakarta Convetion Hall. Dungi mulak do au muse tu Tomok”, ninna panggorga i papos roha ni si Paltibonar.

Tarida do las ni roha ni si Paltibonar umbege sangkap ni angka napungu i. “Dok hamu tu si Charly Silaban asa dirongkom surat batak itu tu komputer da?”. Alai nungga lam borat pangkilalaanna ala ni godang ni na minum i. sipata medep-edep ma simalolongna, sipata jebe simanjujungna.

Dung hehe be nasida mandok mulak, didapthon si Paltibonar ma au huhut dijalang. “Horas ma lae da, horas ma hamu sahat tu Toba. Pasahat hamu jolo hata mauliate sian ahu tu si Tami namanalahon au ala dang huoloi hata ni si Diandra asa luahononhu ibana tu tao Toba”. Marisi do jalang-jalang ni si Paltibonar tu si Tami tanda balga ni rohana.
Alai songgot ma ibana muse mangkuling : “Isse do pattaru au mulllaaaak?”.
“Au tussiiiiiii”, ninna si Charlie.
“Somal do au dipattaru dongan mullak uju di Astanaria Medan, ba au pe antong lera do pattaru dongan mullak”, ninna ibana papos roha ni si Paltibonar huhut hehe ibana.

(Dung lam suda gogo ni cap bintang i mangarajai pingkiranhu, tarjolma ma au, huida ma angka dongan sapartungkoan i do donganhu marnonangi. Hotel Golden Boutique Jakarta 14 September 2007).

Iklan

15 thoughts on “BALADA CAP BINTANG DI HOTEL BERBINTANG

  1. imran napitupulu (naeng manggorga langit) berkata:

    Horas di hita sasude.
    Apala di ombas on, adong otik naeng gurathonon.
    Nian indada pola panggorga, manang ginoaran panggorga manang dia hami.
    Alai, perasaan, hinorhon ni ala tar jot jot hami songon na marangan-angan, gabe songon si gorga langit ma.
    Gabe tarsingot ma tutu di angka balada na ginurathon ni Lae Monang.
    Adong otik sarito namangkorhon siriburon, hinorhon pangottak ni sap bulan dohot sap bintang na diminum ni sada ina na mabalu.
    Songon on pardalanna :
    Ujui i, adong sada na masa, di sada ulaon bot ni roha. Marujung ngolu ma sada ama.
    Pola do antong songoni lungun ni roha ni inanta na mangkabaluhon i.
    Somalna do i antong molo di huta. Sai marborngin do na monding manang marpiga ari songon paima angka sisolhot dohot keluarga dekat na asing, andorang so dipataru tu udean.
    Ditahi roha ni akka paidua ni hasuhuton ro di angka paribanna ma, laho palumbang roha ni inanta na balu i. Unang maon diago arsak ni roha hinorhon ni lungunna. Gabe dilehon ma tutu minuman namaralkohol.
    Disampur ma i antong anggur sap bulan dohot bir bintang.
    Tabo-tabo jala manis do minuman i didorguhi inanta na mabalu i. Pola do sampae songon na mordong pakkilalaan na.
    Udut ni, naeng dapot muse ma acara marende huria dohot mamilang tangiang, ala topet adong ro sisolhotna sian angka luat na dao.
    Diuluhon guru huria ma laho marende.
    Laos diendehon ma, songon on logu na.
    (LAGU HURIA) :
    Nungga laoooooo … nungga laoooooo …
    sada dongan, tu na daoooooo ……
    dst.. dst ………..

    Hinorhon terlalu diresapi inanta na balu i syair lagu na diendehon na torop i, gabe tung mansai lambat situtu ma attong dipaihut ihut ibana logu i. .Lambat, jala mansai lambat.
    Nungga laoooo … nungga laoooo… (lambat)
    sada dongan tu na daoooo…..

    Gabe digoit pariban ni inanta, nadilambung na i ma na mabalu i, huhut di dok :
    “Akkang, pahojot saotik irama ni lagu mi”, ninna.

    Hinorhon ni sap bulan dohot sap bintang nakkin, pintor sigop do antong dirobah inanta namabalu i ‘tempo’ ni lagu na, gabe irama na hatop.

    Alai, gabe tar hira songon na marjoget na ma inanta i mengendehon (dohot lagu na asing jala irama na pe, gabe asing muse na ma, jala hatop ) :

    “Nungga Lao, Nungga Lao. Lomokki tu na dao….
    Nungga Lao, nungga lao, ..Ima si doli tu luat na dao….”

    Bingung marsampur sekkel ma roha ni na torop i.

    Alai muse,
    Apala namambahen gabe tamba ribur lagu nadiende hon ni namabalu i, ditingki na manarik ‘refrein’ ni lagu i, do :
    (Huhut di tudu inanta namabalu i, bangke ni amanta namangkabaluhon ibana i.
    Laos diendehon muse :

    “Sombu ma roham,… Ale amang,,, parhalang ulukku.
    Alai anggo Au, saut na ma au tu lombang lurus i šŸ˜€
    *)… irama na asing dohot lagu na asing.

    gabe dang mardongan ilu be antong halungunon i ala pangontak ni sap bulan dohot sap bintang nanidorguhan ni namabalu i.
    Pola do gabe tu riburna angka natorop i pabege-bege dohot paida-ida gaya ni inanta i mangekspresihon lungun ni roha na i.

    Bah. gabe godang tahe angka na gaor, hinorhon ni ballada sap bulan dohot sap bintang binahen ni Lae Monang on.

    Tu lombang ma na roa, atehe.

    (santabi godang, tu sude.

    To. Lae Merdy (sigorga abit) :
    – mauliate di hamu,
    gabe bolas ditanda hami, sada sian panggorga
    na Top sian ibukota, tikki ro nasida tu bona
    pasogit on.
    songon ginoaran ni Lae Monang.

  2. imran napitupulu (naeng manggorga langit) berkata:

    Tong do pe, alani pangottak ni sap bulan sinampur tu sap bintang, na didorguk godang.
    Adong songon on sarito na.
    Ala tar ngali do huta inganan ni sada doli-doli, na tong fanatik manginum dua sap namarsampur, ima sap bulan sampur sap bintang.
    Di sada tikki, naeng laho ibana tu Jakarta.
    Songon paima bus ALS, ala berangkat tonga borngin. Gabe tong ma sai didorguhi Lae nakkin minuman songon naginoaran onteng.
    Bakko na ma i huroa. Pangottak na pe tong ma muse asing. Ai sampe manang na marpiga ari holan na nona-nona pangkilalaan na.
    Dung nakkok ibana tu bus ALS, toho dilambungna hundul sahalak anak boru na uli rupana. Alai ditiop-tiop itoan i sada buku Bibel.
    “Huroa, sada na poso na taat marugamo, na pantun marpangkuling jala na donda marpangalaho do itoan on”, ninna roha ni baoa nangkin di bagasan.
    Jompok hata dohonon rupani, saleleng pardalanan i, akrab ma nasida. Marsirarion sahat ro di dia. Ai huroa, hira pajumpang ma mata ni doton, tu mata ni dekke.
    Baoa nakkin pe antong, tamba ma garangna. Mardomu, adong dope huroa tading-tading ni sap bulan dht sap bintang na ni inumna piga ari naung salpu. Gabe lam dihabaranihon ibana ma dirina. Alana, jonok na ma ujung ni pardalanan. Naeng sahat ma, tu Pulogadung Jakarta.
    Dungkin i, nenget didadap ibana ma tangan ni anak boru donganna sapardalanan i.
    Ai dietong rohana, selama 48 jom pardalanan, “pedekate” binahenna i nungga naeng marbungaran. Lambok, burju jala hira mangoloi do itoan i. “Songon na menak, jala hira na jinak do itoan on”, ninna rohana tong di bagasan. Marlobok do attong taroktokna. Alai tong di habaranihon ibana dirina. Ditiop ibana ma tangan ni na boru i nenget.
    Nian, sip do na boru, alai huhut mekkel suping. Jala dang apala manjua. Alai didok naboru ima, huhut dipatudu buku Bibel tiniop na i. Laos ninna ma mandok :”Ito, ingot hamu na tarsurat di Corintus 2 ayat .. i, ate”, ninna huhut mekkel suping.
    Tarsonggot ma antong, baoa nakkin. jala gabe sai disolsoli ibana dirina. “Bah. Nga sala hape ahu. Na hurimpu do naung jatuh sinta itoan on, hape sintua do. Nga sala. nga sala. Nga tung maila au”, ninna rohana dibagasan. Gabe ditait ibana ma muse tanganna i mulak. Sip ibana. Huhut maila.
    Dang piga dan nari, sahat ma bus i tu sitasiun. Turun be ma panumpang i. Ibana pe misur ma. Marsirang sian anak boru nakkin. Tongon ma adong partiga-tiga buku na mangajo-ajohon lan akka buku sijahaon ro di akka bukku ende dohot buku bibel.
    Huroa, tar jarang do baoa doli-doli nakkin manjaha buku Bibel. Ai dang diboto ibana aha na tarsurat di Corintus 2 i. Dipinjam ibana ma buku Bibel i, huhut dibuka-buka dipaula songon naeng manuhor. Dungkon i, dibukka ibana ma Bibel i, laho manjaha, manang aha na tarsurat di “Corintus 2 ayat ….”
    Tarsonggot situtu rohana.
    Tarjaha ibana ma na tarsurat di “Corintus 2 ayat.. i : ‘AI DIHALOMOHON ROHANGKU DO ANGKA PANGALAHO SISONGONI”…… (hurang lobi ninna, tar songoni do natarsurat di si. / *maaf. santabi godang. alana dang haru takkas)
    Gabe diingot ibana ma antong na masa i. Hape, ditingki natiniop ni ibana tangan ni anak boru i, dirimpu rohana do na mangorai. Dirimpu ibana na laho pasingothon pangalaho na hurang suman, hinorhon pengaruh ni si dua sap nakkin.
    “Bah. Itoani pe hape, arop do rohana. Diulahi ibana muse patakkas hon manjaha na tarsurat i. ~Ai dihalomohon rohangku do pangalaho sisongoni~
    Hape, ba dang tarsolsolina be dirina. Nga borhat itoan i naek taksi.
    “Maup ma i, tahe. Tong ma alani sap bulan sampur sap bintang nakkin sude”, ninna rohana huhut sai disolsoli ibana dirina.

  3. tonggo sianipar berkata:

    bah. sai na adong do tahe sarito ni lae si imran napitupulu on.
    Hea tingki di dok ibana : Lae, bulan do tahe na diginjang an manang mata ni ari, ninna. Tong ma i alani naung teler.
    Horass.

    *** Lae Tonggo, pagodanghu do hubege pengalaman ni lae Imran taringot tu na mabuk. šŸ˜€

  4. Bonar Siahaan berkata:

    Attar didok lae Imran donganna hape ibana do i tingki mar bus ibana tu Medan,alai didok itoani do muse dungpajumpang halak i tu lae imran,dijaha ho huroa natarsurat i ninna huhut mengkel suping,lam mallobok mataroktok ni lae i huhut ditiop tangan ni itoan i…..hape… pintor ninna itoan i ma,eee hamu angka dongan na di motor on, bereng hamu jolo tangan ni itoanon dipadomu tanganna tu tanganhu…. šŸ˜€ Laos maaaa iiii… Lae Imran šŸ˜€

  5. Simon Simanjuntak berkata:

    Tong do dongan parmabuk hinan huroa Lae Imran on ate. Songon na godang do perbendaharaan ni sarito na tarsingot tu angka “na hona”. Da so tung pengalaman na pribadi on ? Gabe paula songon na di papilit nasida Asa songon na asing ninna rohana ?
    He…he..he.
    (santabi bah Lae Imran. Asa marsiriburon do Lae, alana gabe tong sekkel hurasa manjaha komentar ni pak Bonar Siahaan)

  6. imran napitupulu berkata:

    Lae Simon Simanjuntak,
    Dang apala na gabe “parmabuk” Lae.
    Alai, minum sasaotik tar hira jot jot hinan do.
    Tarlobi ma i, uju di haposo on nahinan.
    Jala sisaonari on, gabe tong do nian hira mangalobi i.
    Alana, parminumon i pe horoa saguru tu “jam terbang” na do.
    Lam tu tambana umur, boi do tong mangkorhon tu gogona nang parminum on.
    Holan talu dipanggararan na ma.
    Jot jot muse do, molo dung masuk manang piga-piga galas, gabe hira naung selesai sude angka paretongan.

  7. imran napitupulu berkata:

    Philosofi ni ‘ILMU PADI’ tong do marlakku di ulaon na marmitu.
    Lapatanna,
    Semakin banyak diminum Semakin tunduk.
    (manang : tukki dung godang masuk).

  8. Marlon tampubolon berkata:

    Horas,
    Salam ‘parmitu’
    Semakin banyak kutengok komentar tentang halak hita na mabuk.
    Saran saya untuk tulang pemilik blog :
    Buatkan rubrik khusus, sehingga kita bisa saling komentar ataupun berbagi pengalaman tentang ‘permabukan’ terutama akka halak hita.
    Oke.

    *** Ide bagus, untuk sementara ini di halaman LAPO dan NONANG di beri kesempatan šŸ˜‰

  9. Peterson Pangaribuan berkata:

    Tung na ribur hian ma tahe sarito muna i hamu angka lae ima taringot tu angka na mabuk, memang ala pengaruh ni alkohol i huroa, olo do berkurang ke sadaran ni namabuk, alana jotjot do namabuk melakukan sesuatu dengan sangat serius, hape dihalak nasomabuk, sangat lucu bahkan kadang sangat konyol, gabe siparekkelan. taringot ma iba angka cerita ni na mabuk songon on.

    Hira jam 9 borngin dung mabuk di sada lapo tuak di hitaan, mulak ma tu jabu sada ama na antar poso dope ibana, jadi pinor mar suhap ma ibana, jala gosok gigi asa unang pa tanda hu uap ni alkohol i, jala santabi marganti pahean ma ibana markaus-kaus dohot jala marlopes-lopes (tarsomal do najolo angka ama marlopes-lopes/ marsarung/marmandar). Hundul ma ibana di kursi on, jala di baen kopi, paula-ula songon naso mabuk ibana nangkin di rohana. huhut ma antong pintor di pagalak ibana gudang garam i sabatang, tarsongon na agak dior-dior ibana. ” Ai na tudia do nuaeng pardi jabu, si uccok pe dang dison, na tu dia do halak i nadua nuaeng?”, ninna rohana sukkun-sukkun di bagasan. hira 5 minut nai, adong ma manjou sian duru, “ai na dijabu do ho amani adui?” dibuka ibanama pintu ni jabuna, jala didok amanata naro ima tu ibana tar songon na songgot, ai naso diboto ho do tulang mu naung marujung ngolu nangkin, umhaben so lao ho tusi ninna, tarsonggot situtu ma ibana antong umbegesa, dang dialusi ibana be donganna on, pintor maringkat ma ibana lao tujabu ni tulangna on, ai kebenaran dang pola sadia dao holangna. Dung jenek dibege ibana ma antong angka soara andung jala nga torop di disi angka sisolhot dohot dongan sahuta. masuk ma ibana tu jabu, diida ibana ma antong tulang na naburju i nungnga bostang di tongani jabu, pintor tangis ma ibana jala mangandungi “Tulaaang sibijaon naburju, boasa pintor songoni tulang tinggal honon mu hami tulaang, pulut ni rohami ate tulang tinggalhonnon mu ma hami marhansit-hansit…ninna ibana diandung na i. Tung mansai lungun do rahana antong di paninggalhon ni tulang nai. dung agak leleng ibana na mangandungi i, dung agak tenang, mulai ma dibege ibana angka hata-hata ni natoropi, andong ma na deba na mangapuli ibana asa dipasadi na tangis i, adong deba na mandok “pasombu hamu jo diandungi tulangna naburjui, ai on nama parpudi, lot jo di pasombu andung na asa haru sombu di hilala.

    Ditingki na mangandungi i ibana huhut do ditutup ibana bohina dohot duansa tanganna.
    Roma sada ina sian natorop i mangapuli ibana ninna ma:” oee amani adui, toe ma, pasadi ma namangandungi, unang pola manderse hu roham boha bahenon, nga i tingkina, nga sonang be tulang mi, jadi apusi ma ilumi, unang be sai tuma tangis be ho, muse dang maila ho, nasai godang jolma na mamereng ho?” ninna. alai ala dang mago dope pengaruh ni tuak i, lam dianggisson ibana do muse tar songon na lam dipagogo ibana suara ni andung nai, tar songon na digasak ibana do muse, songon na mandege gas ni motor lam ditancap, bah angka natorop i pe antong, lam tamba godang mangomentari ibana, dung lam habis kesedihan i, antar songon na di paso ibana ma na tangis i, naeng mangkatai manungkun ai aha do sahit ni tulang nai umbahen songoni songgotna monding, alai antar songon na dipaula-ula songon na tangis. toe ma apusi ma ilumi, asa mangkatai hita ninna na deba. Jadi tar sadar ma ibana na tangis i, songon na ilama ma rohana alana gabe ibana do antong pusat perhatian ni natorop i sude, hape secara tidak sadar di angkat ibana ma antong mandar/ sarung/lopes nai laho mangalap iluna sian bohina, pintor sude do antong marnida, gabe gaorma sude angka natorop i, ai so marsarawal ibana hape, adong ma na mandok,” ua dabu mai bah, tunjankon mai, sipakkon mai, pamate mai, hurang ajar do baeon, ninna na deba, dohot naasing dope. Songgot ma tarjolma ibana antong, ndang diboto be ila niroha na, dang diboto be sabban pintor lari ma ibana sagogo ni gogona…sian jabu ni tulangnai… ima jo taringotna na na mabuk ate..alani pengaruh ni sap bulan i, holan dibege barita ni tulangna pintor humalaput ibana dang diingot be denggan marpahean….amangoooi amang ilani rohai…

    *** Ai didia do nuaeng namasa i ate, sotung na di sitoluama do šŸ˜€

  10. Amang Pangaribuan…..
    Adong dope suhutan ni na mabuk,…na jelas dang marga naipospos on, jala dang situdu goar ateh, sotung habang isang-isang niba annon….jai narmartaringot ma hita, carita ni dongan do nian on di lapo ni oppung ni si billok nadi cikarang i…songonon ma caritana,…..

    Jai, di sumatratimur an, diaerah kobun, godang do halak hita disan, jai amatta on, karejona olo do masuk malam, olo masuk sore jam 3. jala sandu du do amanta on lao tu kode tuak na jonok tu jabuna i. disada tikki, mulak karejo amanta i, ai di pakke dope baju dinasna, jala dibereng jom na…aahhh ai jam 9 malam dope narohana, ni dorgukhon ma jo sandorguk, ..dungi lao ma ibana tu lapo i. hape sandorguk tambah sandorguk, nga masuk sappulu galas jala nga tabo be na mangkatai on jala lancar sude urat-uratna…..
    Dibereng amanta onma nga jam 1 malam, ditahi ma lao mulak tu jabuna. ala jonok do, mardalan ma ibana mardapalan. Hape niantusan ma molo jabu disan sai sarupa do sude, mulai sian alaman, dibugasan, sarupa do sude ala jabu ni karyawan do. dungi dang pola di parrohahon, masuk ma ibana.
    pittor masuk ma amattaon tu bilut/kamar, jai dungo do pe inantai, manonton di ruang tengah. ala nga dibereng masuk amantai tu kamar, bah didapothon inanta i ma, dibereng ma nga tukkap modom…..

    “aah…nga loja amantaon tahe, binahen ma jo paridian, aek las jala kopi, asa tabo daingna i…naruha ni amattaon…”
    dungi misir ma inanta i tu dapur pagalak api….

    Hapee…dinalao inanta i tu dapur. tarsunggul naget, naget ma amangta on, ninna rohana lao manggati baujma…dipabollang ma matana, di ida ma samar-samar,..asing rosbang on, adong kulambuna, na baru dipasang inanta do naeng?? naruhana…dipanot-noti muse,..bah…dinding ni kamar on, ba balau, nandigan di cat???…dungi dipanot-noti ma lamari,..bah…lamarina opat pittuna….dungi tarsunggul situtuma ibana, tarsadar ma,..dibereng nga salah masuk tu kamar ni jabu ni donganna…..

    haluarma amanta on naget-naget, pittor lao marimbosi tu jabuna,…..

    dipudina, ala nga gurgur aek las on, lao ma rohani inanta on, mandungoi suamina, didapothon ma tu podoman i, alai di ida dang disi be…ninna rohana muse..” na manuhor sigaretna do ra i tulapo an, hupaima ma….

    dang sadia leleng, mulak ma amanta na asli, pittor didok inanta ima,…” ai tor tudia do ho, dang loja daging mi?? nga binaen paridianmu, tor lao muse, nga ngali-ngali aek i dohot kopi i….”

    bingung ma amanta on,….aha maksudmu? baru mulak dope….
    ro inanta on, baru mulak?? ai baru o ho nankinon sajom na lewat, nga modom ho dibilut an,…

    ise modom di biluut??…..marbadai ma keluarga i, sai curiga ma amanta i tu inanta i,…..
    alai gabe adong do pengakuan, mardame ma,…jala dipatorang ma aha namasa….

    eeee…tahe……akka parmabuk,…
    mabuk juga ada aturannya donk.!!!

    *** Bah… atik na pengalaman pribadi ni si Hendry do nuaeng on, šŸ˜€

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s