HATA BONA, BOHO DOHOT BUHU

Raja Bilher Marpaung

Panghataion na marboho dapot ma namarbuhu. Sasaruas do hata i asa dapot na marbuhu. Umbahen didok: “Unang manuan bulu ho na so ruas”. “Unang manuan buhu ditonga ni ruas”
Jotjot do dihatahon natua-tua; “Sande ma gandar bulu tu soban na tata, unang hita pagulut, ta bege sidok hata”.
Naginoaranna Gandar bulu ima sambuhu bulu na sirsir parbalgana, jala somal do on dipangke bulu suratan. Sian lubang ni bulu i ma diombushon hosana laho pagalak api naung dibahen hian angka rapan rapan manang ranting ranting laho panonggorina.
Muruk ma sada natua tua tu boruna ala so rade dope sipanganon na gabe tugo, tu pangula, dialusi boruna i ma dung jolo dipeakhon gandar bului tu soban natata didok hatana: “Unang ahu muruhi, bereng ma disi”. Dungi dibereng natorasna ma pardahan i hape mellep so mellep api ala ni soban na tata.
Lapatanna, ndang jadi tihaan dongan ianggo so jolo tangkas binoto didia hahuranganna, jala ndang jadi uhumon dongan so jolo binoto didia salana.

MARLUNDU SONGON NAPURAN
MARPADUNG SONGON LOSUNG
MARGADU SONGON HAUMA
MARBIBIR SONGON BATANG AEK
MARBINDU SONGON SURAT

Lundu ni napuran ima angka urat urat ni napuran. Aut so adong lundu ni napuran gabe suman doi songon bulung ni gadong andor nagale gale. Lapatanna tipak pe pangkataion iangkon adong do lunduna napatomuhon jala patoguhon pangkataion i.

Padung ni losung, ima topina namardingding. Molo soadong padung ni losung, maraburan do naniduda. Suang songon i do nang pangkataion ingkon adong do padungna unang seang somartontu, sai mangararat pangkataion alau dang ujung tunasinangkapan hian. Dilapati doon nang tu angka parngoluon asa unang mambur seang angka naniula.

Gadu ni hauma ima marguna, parjolo, manampin aek unang mahiang pangulaan, paduahon tanda ni parbalohan dohot hauma naasing. Pinomat sahali sataon ingon dipature do gadu asa unang tiris jala mapulha dibahen aek namangabolon. Suang songon i nang pahombarhon tu tuhe asa unang mangeak dohot tareak. Ingkon tingos tu tuhe do gadu jala ido ajak-ajakna.

Dilapati doi dang tu pangkataion nang diparngoluon siganup ari, asa dipagopas parbinotoan asa unang mura talu dipollung jala ingkon une jala hot di ruhut ni parsaoran marojahan holong dohot dame.

Songon ima pangalapation ni sude angka umpama ondeng.

MARJUNJUNGAN SONGON DOLOK
MARBANGGUA SONGAN RURA

Dolok manang Buhit sarupa doi di pamerengan, alai dang dos i sian tinorpana/bentuk. Molo manatap iba sian dolok boima berengon nahumaliang. Molo marsoara/manggora iba sian julu ni rura gabe habegean di jae, digoari doi marsaringar.
Halak Batak molo marulaon adong do uluanna, adong raja jolo, adong tunggane, adong panungganei, adong panoropi. Songon i ma ganup adong siulaon dohot uduran.
Nuaengon dang tanda be uluan, dang tanda be angka tunggane songon i nang panungganei. Ai nungnga dipamasa gugu tok-tok, dipamasa jambar mangaris, gabe sosa ma gadu-gadu mumpat angka taluktuk, gabe sega ma uhum nauli binahen ni jolma na so olo marguru.

NUNGNGA PUNGGUR PUNGGUR GABE SAPA
NABURHUNGON GABE RAJA.

Guru dok nama jolma, dang gabe guru di UGARI
Lapatanna, molo adong sada ulaon ingkon tangkas do martanda uluan bahenon manang sangap bahenon raja jolo.

MARDOSDOS SONGON SIMARUNAP UNAP

Simarunapunap sada suan suanan do i suman songon ampapaga. Sai mardosdos do partubu ni simarunap unap dang marsitimboi. Unang mardosdos songon simarunapunap, lapatanna dipambahena unang adong na hurang sirsir.
Molo dung sidung mambuat eme / panen dipamasa do diganup luat mangaruasi bondar. Adong ma sada ama na ungkap roha mangalehon sada lomuk dohot indahan laho panggogo/tugo ni natorop. Dinamangan i nasida roma angka naumposo mambagi sipa nganon dohot lomukna, alai dang marhasurungan dibahen tu angka uluan, panjoloi songoni nang raja jolo.
Dipinsang natua tua ma naposo i : “Mardosdos do dibahen hamu songon simarunap unap”

BONA PINASA : Pandohan na mandok “bona ni pinasa” marlapatan doi paboahon bonana doi. Alai “bona pinasa” asing do lapatanni i. Masa do mandangkai hau mambahen parik ni porlak. Molo Jior manang bintatar didangkai, dangkana i sai mangalambung do (holang sian bonana). Ianggo Pinasa didangkai, dangkanai sai marpungu do jonok tu bonana.
Bona Pinasa lapatanna tung tu dia iba mangalangka ingkon ingot do ditano hatubuan.
Dung ojak marhuta ompunta Tuan Sori Mangaraja di Lumban gorat Balige disuan do disi sada PINASA, digoari ma i PINASA SOPORA, lapatanna, porlu siingoton jala nihasiholan

BONA PASOGIT : Parhutaan pinungka ni sada sada marga manang saompu sahat tu pitu sundut

BONA BULU : Tano na tinombangan manang na ginulut sian marga na asing laos dibahen ma i parhutaanna

BONA SAMBANG : Parhutaan pinungka ni sada sada marga manang saompu sahat tu na marsundut sundut alai dang adongbe tinggal angka pinomparanna disi.

Iklan

7 thoughts on “HATA BONA, BOHO DOHOT BUHU

  1. Humbang Hasundutan berkata:

    Argado bona ni pinasa…..ido na somal binege saleleng on. Hape molo pinaihut-ihutdo hatorangan na di ginjang i, salado hape i.

  2. Robert Naibaho berkata:

    Mauliate godang ma tu Amang Panurat, Raja Bilher Marpaung, suang songon i ma nang tu tanobatak.wordpress.com. Nunga lam nal-nal pangantusion tu angka pandohan na sai laon naung jot-jotan ndang marhapeahan di hasintongan-na. Horas ma di hita saluhutna. Sai anggiat ma lam torkis parngoluonta be jala singkop saluhut na niulanta. Botima. (eReN).

  3. Dian P Sinaga/Tapanuli Sumatea Utara berkata:

    hea do hubege didok sada natua-tua; molo sasintongna bona ni pinasa do; alai ala nga songon namaol luluan bona ni pinasa; gabe adong ma istilah bona pasogit; hape bona posogit on dang jelas lapatanna.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s