Tonggo Mulajadi

Raja Bilher Marpaung [sian tonggo-tonggo ni ompu parjolo]

Ale Ompung Mulajadi Nabolon,
sitompa hasiangan, sigomgom parluhutan,
silehon aek na tio, asa tangkas na di banua.
Ho do na jumadihon hau umbahen na ginjang,
na tumompa dolok umbahen na timbo.

Pangalapis do ho sian toru,
pardingding sian lambung,
panaongi sian ginjang.
Ho do haroroan ni sangap,
ho do haroroan ni badia,
parsangapi ma hami, parbadiai.
Ho do haroroan ni hagaben dohot hamoraon,
tantan hami laho gabe,
tatea hami laho mamora.

Hutonggo hami ma ho, Ompung Mulajadi,
ndang tumonggo mangan, ndang tumonggo minum,
tumonggo panggabean do,
tumonggo parhorason.
Adong pinsang ni mata, adong humor ni roha,
Hurang gabe hami, hurang mora,
hurang do hami di habisuhon,
hurang di pangkataion,
tuturi ma hami, tungkoli, ajari jala bohali.

Baha ni ompunami do baha raja,
paisoranghon ma di hami harajaon, tamba ni naung adong.
Baha ni ompu nami do baha na begu,
paisoranghon ma di hami habeguon, tamba ni naung adong.
Baha ni ompu nami do baha datu,
paisoranghon ma di hami hadatuon, tamba ni naung adong.
Baha ni ompunami do baha pande tungkang,
pangimbalo pande suhul, pangarapat pande sarung,
pangarompu pande harpe.
Sorang ma i bahen di hami, pomparan ni anak dohot pomparan ni boru.

Porda marungrung mulak ma tu songkirna,
horbo manurun mulak ma tu barana.
Sinok ma ogung di sangkena,
hot ma pinggan di rangkena.
Unang munsat talitali sian simanjujung,
unang mumpat tanduk sian ulu ni horbo.
Pahot ma i di hami.

Ompung Mulajadi Na Bolon,
na mian di ginjang ni ginjang,
di langit ni langit, di ombun ni ombun,
di ombun na pitu tindi, di langit na pitu lapis.
Ho do haroro ni hasongtion, haroro ni sahala,
patektekhon di hami hasongtionmi, parsahalai ma hami.

Diparsahalai ho do ompunami na parjolo i,
ompunami Raja Isumbaon, ompunami Tuan Sorimangaraja,
Sahat rodi ompunami raja i, Singamangaraja,
singa ni adat, singa ni uhum,
singa na so mangalompoi, singa na so halompoan.
Asa manuturi huhut manotari,
di bangso Batak na tinompami.

Iklan

3 thoughts on “Tonggo Mulajadi

  1. Humbang Hasundutan berkata:

    ………Sahat ro di oppu nami raja i, Singamangaraja, singa ni adat, singa ni uhum…..
    Dia do sejarahnya umbahen na di goar “singa” oppu i? Alana ndang adong singa di tano batak, babiat do na adong.

    Mauliate

    *** Taringot tu Paningaon (kata dasar “SINGA”) boi dibanding tu sinurathon ni Sahala Simanjuntak
    Kebudayaan Batak Diantara Putik Yang Berkembang

    Hata “SINGA” di hata Singamangaraja dang adong partalianna tu binatang (hewan). “Singa” lapatanna cara berpikir (S Simanjuntak) Maningahon lapatanna mangulahon dibagasan harajaon.

  2. Didia do boi tuhoron buku tulisan ni amanta R.B.Marpaung on alana tung mansai porlu do on tu akka naposo na baru marumatangga dope apalagi na so tinggal di huta

    *** Hubungi hamu ma ibaba melalui telepon naung adong di blog on.

  3. Bonar Siahaan berkata:

    Hata ni amanta RB Marpaung, sabar ma jolo alana mangalului dongan naolo mangurupi pacetakhon dope.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s