HALODE NAPISTAR

Monang Naipospos

Naburju do si Sahat mulaulaon. Nunut jala irik do ibana di angka siulaonna. Alai jotjot do ibana dipaingot halak ala hurang toho pangulahonna, ala manigor diantusi dohot dioloi, didok halak do ibana nabisuk ala dioloi siajaron. Nang pe songon i, godang do halak mandok naoto do si Sahat ala godangan sipatureon do ulaonna. Ala tobok ni rohana, sai dituluthon do halak molo adong marnida ibana mulaulaon, betak tung adong nahurang suman asa dipaingot ibana dirohana.
Sipata adong do najuit manjekjehi ibana diulaonna i, nang pe naung suman sai ditihai paula songon na mangajari tu na toho, hape lehe do pandohan ni halak najekjek i, ujungna loja ma ibana dung dipatingkos naburju roha muse.

Di sada tingki, tuat ma ibana sian dolok ni Habinsaran laho manggadis kopi tu Toba. Halode do dibahen manuhuk boanboanna. Angka donganna na asing hoda do dibahen, hombar tu tuk ni sinadonganna. Diampehon ma boanboanna i tu tanggurung ni halode i laos dirahuti asa gopas dirohana, hape dung mardalan halode i, runsur ma boanboanna i laos mambal ma dohot halodena.
Adong ma halak pamolus marnida, dipinsang ma ibana; “Oto ma hamu da ale, ua rahut ma sada nari goni na dos dokdokna, ampehon ma goni nadua i tu tanggurung ni halodemi, sada disiamun sada dihambirang”, ninna pamolus i. Dung mangulon ibana sangombas, ditipani ma hata ni pamolus ondeng; “Adong tutu tohona”, ninna rohana dibagasan. Dibuat ma goni sadanari sian hajutna, digohi ma rihit, ditimbang dos dokdokna dohot kopina i. Dibahen ma songon binegena sian pamolus i, ujungna hot ma tutu pardalanna agan pe lam soratan halodena i.

Mamolus ma ibana sian sada inganan na tar godang pangisina. Disise angka na di dalan i ma si Sahat. “Bah, ai aha do binoanmuna i ale amang”, ninna nasida. “Ah kopi do i tulang”, ninna huhut dinunuti mardalan. “Ah, tung ramosan do huroha kopimuna i pola soratan halodemi mamboan parbuena maradu naeng masuak hau tanggurungna”, ninna panise na asing.
Mengkel supping ma si Sahat dibagasan rohana; Apala naoto do huroha angka jolma on, ia kopi i duansa, hape so diboto rihit do i sagoni, ninna huhut dinunuti dalanna. Dibagasan rohana dang adong be nahumurang angka pangulahonna i, ai angka pujian nama dijalo sian angka jolma nilaosanna i.

Dung lam dao pardalananna, nunga loja dihilala jala halodena i pe nunga songon na mambal mardalan ala ni soratna manuhuk boanboanna i. Dipahombar ma tu sada bona ni hau na tar rugun bulungna parlinggoman maradian. Dung dipatuat ibana boanboan ni halode i, dipillit ma inganan laho hundulanna, hape sian na so diparrohahon hian nunga adong dapotna disi sada halak baoa tarpodom huhut dilangkophon tahulukna tu bohina.
Tarsunggul ma baoa i di haroro ni si Sahat tu lambungna, huhut disise ma ibana.
“Ise do hamu, sian dia, laho tudia, aha binoanmuna?”, ninna manungkun si Sahat. Songon na mogap ma si Sahat umbege doras ni sungkun-sungkun i, alai di pasabar do rohana mangalusi.
“Ia goarhu si Sahat do marga Tanjung, sian dolok an do ahu laho tu Toba an mamboan kopi, ninna ma mangalusi. “Ia hamu ise do sian dia laho tudia?”
“Ia ahu si Sarli do goarhu marga Silaban, di Siborongborong do hutanami, holan mardalani do ahu tuson mamereng angka luat humaliang”, ninna mangalusi si Sahat. “Tung godang ma kopimuna i, pola soratan halodemi manuhuk, tung so asi do huroha roham holan laho mangadu hepeng tuhor ni kopi i”, ninna si Sarli ma tu si Sahat.
Ala tulus ni rohana dipaboa ma na holan sagoni do i kopi, rihit do i sagoni holan timbang sidokdohi do i. Ditagam rohana do dapot pujian ibana sian si Sarli ala ni bisukna, alai balik na do ro.
“Bah, tung ho nama huroha naummoto ni jolma. Ianggo holan mambahen timbang dosna do, ua apala kopi i bagi dua tu goni na sadanari, nda hot ma borat ni kopi i hallungon ni halodemi?”, ninna si Sarli. Bah, tahe toho do nidok ni baoa on, ninna rohana.

Ala marningot nabisuk do si Sarli sai disungkuni si Sahat ma angka habisuhonna i. Hehe ma antong rak ni si Sarli paboahon sude hamaloonna, habisuhonna, hapistaronna, boi diraksa banua ginjang, ditorsa banua toru, dijaha banua tonga, bilang ni dolok dohot bolak ni tao. Pangalaho ni jolma, dorbia dohot suansuanan. Tarsonggot ma roha ni si Sahat ala didok si Sarli diboto do mambahen ramos marlompit ganda parbue ni kopi.

Maradu so diingot si Sahat be naung leleng ibana namangulon i holan ala ni lengen ni parbinegeanna di angka torsa habisuhon ni si Sarli i. Ianggo tung on, didok rohangku on nama jolma naumbisuk ditanoon, tuson nama au marguru. Sadia dao pe hutana tung ingkon huebati nama asa huida jolo sude angka parbue ni hamaloonna i laho tiruonhu, ninna rohana dibagasan.
Disungkun ibana ma si Sarli: “Didia ma lae hutamuna asa hupangguruhon jolo parbue ni naniulamuna i, anggiat lam tamba parbue ni kopinami on”, ninna. Tarsonggot ma si Sarli, alai dialusi ma si Sahat. “Holan ruhutna do huboto, alai ianggo mangulahon ndang hea sanga dope”, Ninna.
Marsak ma si Sahat umbege alus ni si Sarli i, hehe ma ibana, diampehon ma kopi dohot rihit i tu tanggurung ni halodena i. Hobas ma ibana huhut didok tu halodena i; “Umpistar dope hape au dohot ho halode, so taboto ruhut alai taulahon”, ninna huhut ditinggalhon baoa i.

(ide : Ir Tahsin Tanjung)

15 pemikiran pada “HALODE NAPISTAR

  1. Halode jot-jot do songon gabe tudos-tudos ni pangalaho na tobok dohot burju ni roha. Alai adong do mandok tipis do beda ni burju dohot oto.
    Di Bona pasogit godang do binereng tong nuaengon halak na pamalo-malohon mulai mai sian Anggota DPRD sahat rodi Bupati nang dohot aparatna.
    Sai anggiat ma nian lam gumodang halak Batak na marroha bisuk tarlumobi di Bona Pasogit asa masihol iba mulak. Horasma

  2. Tung na bisuk ma tahe lae Sarli on.
    Gabe taringot iba tu dongan na margoar si Sarlen. Tingki marsingkola na timbo ibana di IPB tung singkop do di parsiajari ibana parbinotoan taringot tu suan suanan. Sian na doa dope ibana mamereng sada suansuanan manigor boi do di boto ibana jenis, keluarga, dohot lan na asing ni suan suanan i. Molo dibereng ibana jagung rupani, pasti jenis hibrida do an, C1. Molo di bereng ibana kopi, ah….pasti kopi sigarar utang do an, ninna.
    Asing ni parbinotoan tu suan suanan di boto ibana do tong ragam ni parbinotoan na asing. Adong do sada pandohan na dilopokkon ibana tu rohana, attar songon on ma hata Indonesiana: Manusia yang paling di butuhkan dunia saat ini bukanlah manusia yang menguasai tekonologi perang bintang, yang menguasai komputer, yang ahli Ngeblog/blogger, tetapi manusia yang mampu membuat pohon jagung yang tadinya berbuah dua satu pohon menjadi berbuah tiga sampai lima buah satu pohon.

    Hinorhon ni i, disi tammat iba manigor mulak ma ibana tu huta naeng marporlak, ndang songon halak na asing i au gabe karejo di kantor dinas pertanian manang gabe Akuntan di perusahaan na balga, gabe sala jurusan ninna rohana. Mardomu muse songon na di galakkon bupati Tobasa do sonnaari on manuan jagung, nanggo apala gumodang annon hasil ni jagung i par hektar, asa tong tarida goarhu ninna rohana di bagasan.

    Baen inong tugongku da, asa laho au tu ladang. Diboan ibana kalkulatorna, bukkuna, dohot akka na asing. Alai bulan marsalpuan tung so adong do marhaujungan na kinalkulatorhonna i.

    Di sada tingki didok si Sampe tu si Sarlen songon on: Unang pola sai loja be ho lae markalkulator, alusi ma jolo sungkun-sungkunhon
    “Aha do hau ujung-ujung, tongkini sinuan, tinapu parbuena?” Sip do si Sarlen.

    Bah, ai dia do, nunga gabe gumanjang komentar sian nakinomentaran………eeeeeeeeeeeeeeh.

    *** Bah gabe tudia do ujungna lao si Sarlen? Atik na pajumpang do dohot si Sarli ?πŸ˜€

  3. Satabi jo Ito, manukkun ahu..aha do lapattan ni “halode”…hulului di kamus Batakku dang adong kata Halode..Keledai do maksudna atau sayur lodeh?. Susah sapata manjaha bahasa/hata batak…molo na simpel boi diatusi..molo tinggi bahasa/hatai…sulit…Kadang dang adong di kamus. Mungkin dang lengkap kamushu. Dihuta nami nunga jarang hubege bahasa/marhata batak…sada dua halak….ipe hata na sehari-hari do. Boi do kan…dibantu lapattan nai.. Mauliate.

    *** Keledai do maksudna. Bai do disungkun Humbang Hasundutan, ai godang do halodenaπŸ˜‰

  4. Ooooo…halode lapatanna keledai…
    Olo bolo da ito on.. molo godang halode ni halakki. boi do ate dikirim sada tu huta namion..Mungkin adong bedana halode i…sian halode halak western….Songon na hoda boban. Terkenal do Humbang Hasundutan dohot hoda boban. Saonari halode…hebat do Humbang Hasundutan…hahhahhahaha…..

  5. Halode na pistar, hehehehehehe
    hape sering do jolma na oto dipatudos tu halode, hape dibaen tulang on ma turi2an na mandok halode i pistar.Bah!

    ***πŸ˜€

  6. Ndang adong tahe halode di doloksanggul ito Rondang, holan di Habinsaran do adong, ipe sada nari nama, nunga maup paihut-ihut gaja marhonong.

    Sonnari on, ndang halode be na adong di western, Mule nama.

    ***πŸ˜€

  7. Molo di Humbang antong dang halode na godang, alai jagal hoda… ai penggemar jagal hoda do hami.

    **** Ahh.. gabe ro ijurπŸ˜›

  8. Ha…hahahhha…hahaha….
    I do ate…dang halode di western…mule nama…ito..ok…molo tarsongonni …
    Mangalang jagal hoda boban….taringot ahu tu dongan sian Humbang Hasundutan..goarna Halashon Sinaga…Didok ibana tuahu…Akang molo mulak hamu tu huta mardalanni ma tu huta nami..dolok sanggul…asa mangalang jagal hita, jagal aha ma i…jagal hoda boban..marengkeli ahu manjaha i..songonna rittik….mangalang jagal hoda boban…amang tahe…hahhhhahhhha

    *** Molo dang diallang ito jagal hoda pinasahat ni Humbang Hasundutan i, ba, taruhon tu Partungkoan TanoBatak, godang do dison na olo mangallang jagal hoda, termasuk Imran Napitupulu dohot Amanta Bonar Siahaan. Jagal kanguru pe diallang do. πŸ˜€

  9. Tumagon ma ro hamuna da par Partungkoan i tu Mount of Sanggoel laho mangallang jagal hoda i, asa huhut di bereng hamu songon dia prosesna mulai sian na maningkang, mangolos, dohot manghuliti, heheheheh. Molo parbornginan, pos roha muna adongdo Losmen Berbintang di son, singkop dohot tuak na marraru dohot tambul biawak, asa tong adong baheononta balada sap arirang, heheheheh. Ia so i, ba marborngin di bagas nami hita, laho pe hita mardalani tu downtown na i, asa dibereng hamu hinariburna i.

    Ito Rondang, ndang adong be hoda boban sonnari di Doloksanggul ito, alana nunga masuk be motor tu huta nami i.

    Sotung pola marsarito ito Rondang tu wordpress paboa na diallang pardoloksanggul jagal hoda ate ito, sotung gabe dohot Partungkoan annon disulingkit.
    So binoto nian, boasa ma jagal lombu dohot horbo diallang hamu par western i, ia jagal hoda indang.

  10. Jagal kanguru huboto dialang do…hea do ahu mangallangi, alai jagal hoda…dang tarpikir ahu..i….jadi….tutu do diallangi..dang holan kombur donganku, dohot ito…molo biang hea do hu allang…tabo do molo biang..dohot tuak… Jagal hoda?…Tarsongon dia rasanai…

  11. Adong do pikiranku tarsongonni.. angka pardolok sanggul mangallang hoda boban…alanii marengkel i sahalaksa ahu dison…(Sukkun2 amanta mambereng ahu mekkel di jolo komputer on)..
    Molo jagal lombu dohot horbo …biasa do..ai sude hita mangallangi i..Jagal hoda?
    Alani i sukkun2 ahu…tutu do diallang pardolok sanggul manang holan kombur…
    Hea do manarita ahu tu dongan dison mengenai hoda on…marengkelli halakki…antara percaya dan tidak..hahahahahaha…

  12. Horas ito, dang na holan kombur i.. ai tabo do jagal hoda, alai dohot catatan ingkon jagal hoda na special sipanganon do.. dang hoda boban…
    ingkon sipiliton do i, adong do halak na ahli na mamboto dia do hoda na cocok. hami di Jakarta sering do mar-binda jagal hoda molo acara2 tertentu songon ari natal, taon baru, paskah, dsb… tergantung supply ma i… hehehee, molo menyangkut rasa do.. boi ma dokkonon dao untabo jagal hoda on sian jagal sapi manang lombu, mancai asing, boha ma dokkonon da… ba.. mantap ma!!!

    *** Toho do i daba ito Rondang. Kirim ma jolo jagal kanguru asa dikirim hami jagal hodaπŸ˜‰

  13. Nunga percaya ahu saonari alana hari Sabtu nabaruon kumpul sekeluarga hami, sian ni huboto masyarakat Paris, mangallang jagal hoda….na spesial.
    Ido tahe dang jagal hoda boban..sian andingan namai…di Indonesia mangallang jagal hoda…alana di tikki ahu di huta/P.Samosir, Medan,Jakarta..,dang adong hubege jagal hoda on. Molo ahu mulak asa hurasa jagal hoda on…alana di huta namion dang adong di jual jagal hoda…manang restaurant.

  14. Sai tong do antong mamolnit nappunasa ide , ima
    Tahsin Tanjung, so binoto be saonniari manang na didiado boi manghatai manang pajumpang.
    Sahat ma angka habisuhonna i tu hita be.
    (tahsin tanjung par sibolga i do ??)

    Sai horasma nian hita sasude, horas.

    *** Tahsin Tanjung Konsultan do nuaeng di PNPM. Dongan sakarejo hian do ibana, na godangan ceritanaπŸ˜€

  15. jagal naso si allangon tarburu-buru, tibu mokka-hokkak molo dang hati-hati :

    hoda mitsubishi, babiat mercy manang honda, kijang toyota manang honda, babiat tutul isuzu, bebek suzuki
    kancil bajaj, puma super (pesawat tempur).

    namartiga-tiga transportasi do manang na tiga-tiga siallangon – pasintong hamu diskusi on rajanami.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s