RAJA OMBUN

Monang Naipospos

Ia na gaung so marihot ima ombun. Tung boi pe moru las ni ari diholipi ombun, ianggo hatiuron i ndang boi mago. Tung beha pe lambasna marpungu mangondingi mataniari, ndang marimpola i, molo mangullus alogo masarsar sandiri do ombun i laos so tarida. Tung sumorop pe ibana di harangan, ndang sangkot di dangka ni hau jala ndang peak di tano.

Angka parroha ombun, ima na so mangaloas sondang natiur masuk tu rohana. Musu so habiaran do i dongan so tarhilala.
Tung sura pe sumorop ibana tu sada loloan/punguan, handang so pinaris do ibana disi pagori so pinagohon. Tung sura paingoton, mamintori dirina do i marungut-ungut laos maporus. Sihampir gabe gambir do i tandiang gabe toras, tu begu pe so tampil, tu adopan ni jolma ndang bolas.

Di angka pardalan di las ni ari, sai diparar do pamolus ni ombun mangondingi mataniari mangorui mohopna, alai dung sumisi, ngirsaon ma jolma i songon horbo jinail ai nunga disorop pilngas ni mataniari i. Dang boi hape apala haru hirim jala pos roha di ombun mangalehon halambohon, ai ndang margogo ibana mangalo hagogoon ni alogo.
Dung so alogo mangullus ibana, dokdohan ma ibana dibahen arina, mamirong ma ibana paboahon nanaeng madabu ma ibana gabe udan.

Jolma parbangko ombun ndang boi i panisioan, ai uju bidang ibana di roha, tarparar do i pangaluan, alai tongkin muba do rohana dibahen alogo pangapianon na paboanboan dirina dohot pingkiranna, ujungna sumisi sian iba.
Angka ompunta sijolo tubu, jamot do i mamillit tohap tu angka anak sipajoloon jala “natangas di roha natangkas tubu”. Sai dihirim rohana do angka naposo natau gabe tundun di jolo asangasang dipudi. Ima angka jolma na boi manghophop sabangso, saompu, sahuta, saama, songon i nang di angka na sadongan marojahan dibagasan patik nauli, uhum natingkos. Didok ma i adat diparadat, uhum diparuhum.

Molo dipabangkit sada anak gabe raja, dipatihi do i asa “manjujung uhum natingkos”. Patik ni harajaon didok sijujung ni ninggor sitingkos ni ari. Tuhe so ra mumpat batangi so ra husor. Parninggala sobola tali, parhatian sisada ihot. Disingahon Raja Sisingamangaraja do patik ni harajaon i, na gabe sitindangi tu sude angka Raja partohap di Bangso Batak, asa gabe Raja Tumurut Uhum, Raja Tumurut Adat, Raja Sintamardongan, Raja Panghophop.
Dang adong be hagogoon na asing mangunggil tohap ni Raja si songon i asa ditadingkon nirajaanna disoluk haporsuhon dohot hapogoson. Sapala naung tinuhuk pinorsan, ima padan sidalanhonon ni angka Raja na holong mardongan i, sihongkop bangsona. Pangunsandean ni nagale ma ibana pangaluan ni nabile, ndang mardia imbar patindang holong dohot uhum natingkos.

Molo taida saonari angka partohap di harajaon, pargomgom di Bangso Batak, nunga tung balik songon lapaon ihan suhar songon taiton bulu. Ditimbangi natorop do nuaeng on angka Rajana ala dibereng manirpang sian patik dohot uhum hasintongan. Pasuksuk artana be do nasida, mangonsop mudar ni natorop, mamisat ngolu ni napogos, mambarobo ngolu ni paradongan. Marbangkohon mangallang sian toru ni rere, pasuda indahan ni pinarorotna. Dibahen pe patikna i, dalanna manguhumi angka nagale do, dalanna mangonsop hosana.

Tudos ma nuaeng natorop pangisi ni bangso on songon na maronding tu Raja na marbangkohon ombun. Mangalului dalan ma nasida ganup sahali lima taon unang miling nian sian “batuan” harajaonna jala unang munsat “salenggam” hatongamonna. Alai hagogoon ni alogo do manontuhon “masarsar do ibana manang ndang”. Hosa, holso dohot arsak ni natorop i do manambai hagogoon ni alogo laho mangullushon harajaon ni angka jolma na marbangkohon ombun.
Gaung so marihot do nasida peak so maringanan, ai dang siat nasida di roha ni angka natorop na sai holsoan paima adong raja panindangi uhum natingkos patik nadenggan.

Natorop pe godang do songon na marbangkohon “sibaharubaharu”. I pe gaung somarihot do peak so maringanan. Molo gomodang jagal ni si Pohul, ido dietong na boi gabe Raja, nang pe pamosat do ibana tu donganna. Molo malo marpollung songon si Talmis, ima dietong gabe raja, nang pe jotjot do ibana marsipalensem di parulanna. Molo malo mangarangrang songon si Raksa ima dietong gabe raja, nang pe so hea tulus ulaonna. Nadumokdok, molo girgir mangalehon jagal dohot tuak songon si Polgak, ima dietong gabe Raja, nang pe nasinamun do pandapotanna.

Angka jolma sisongon on ma nagirgiran di sileanlean, patorsok pandaian, manghirim di hasurungan. Dipabangkit ma raja, napunggur petaho, asal ma marhasurungan ibana sian i, asal ma gomparan ni ompunta, asal ma dongan sahutanta, asala ma tabo hatana, tabo jagalna, hapal jalangjalangna. Ditaon ma “jorgong” di jolona asa adong sijamotanna saleleng marharajaon raja pinabangkitna i.

Iklan

5 thoughts on “RAJA OMBUN

  1. empat aline terakhir, itulah kenyataan yang ada jaman sekarang. bahwa ‘hepeng do mangatur adalah benar. kepala desa di tempat saya sekarang harud menghabiskan biaya ratusan juta, bahkan menurut kabar na binege, sampe tu EM…ember kalee….hanya untuk menjadi kepdes…menang dimaklumi, disini daerah industri dan perumahan dan tentunya uang masuk sian toru ni rere sanagt banyak…

    jaman na rittik on, mana ada lagi raja obbun,..yang aja raja tornado, manang aha pe di kipas….
    tapi…kadang saya berpikir,…ibban na so mamora ido ra iba…anggo mamora lobi kejam sian i do ra …

    mauliate nidok dituhan ala so dilean hamoraon, ai mungkin diboto dang sanggup iba manean….

    nang songoni di hitaan,…kalau mau jujur, setiap pemilihan, berapa banyak duit habis???…nisukkun ma kaleng-kaleng, sehingga masyarakat diajari untuk makan duit ‘begu’. napenting mardalan “duit biru=istilah anak tetangga” anggo suara hati, tusadaa an….

    seyogianya semua orang khususna halak hita, ikkon bersipat ‘raja obbun’, alai holan mudar ni halak batak do na makkuling, jai nangpe peol otik dongan tubu i, ikkon pilliton ma i……

    sai boi ma nian roha niba on marroha raja obbun ateh

  2. pahala panjaitan berkata:

    – Apala tabo do halak amang Naipospos on marhata batak, ai
    hurasa dang piga be songon amang on naboi marhata batak
    sisongoni sai masihol do iba manjaha artikelna.
    – Memang nunga songoni amang parngoluon siganup ari,
    ibarat ni hata naung umum saonarion “sedangkan yang
    haram susah dicari apalagi ayng halal” jadi manang na
    sursar pe uhum dang pola bohai ai tutupon ni siuhumisik doi
    annon.

  3. G.Simanjuntak berkata:

    ……Ai molo najolo antong Raja ni halak Batak Raja Binangkit ni Debata do, jadi ndang adong dipingkirhon asa mamora sampe 7 Turunan nasida..
    ……Ba ianggo nuaeng on do, Angkan raja-raja partogi binangkit ni situan natorop asa marharajaon ibana….ingkon boi ma didok rohana 5 taon periode punguhon sampe sungkup pangoluhon pinomparna pinomat 7 Turunan..

  4. Partongaan taon na salpu i tarsor ro ma telepon ni sada partulangon tu ahu. Apala aha ma nuaeng barita sian tulangon sukkun-sukkun ni roha. Hape na paboahon na naeng mangulahon acara pelantikan ni punguan ni halak Batak do nasida di inganan nami nuaeng on. “Nauli mai Tulang” nikku mangalusi partulangon i. “Ta baen ma denggan ulaon i, ta bulang-bulangi ma ketua lengkap dohot tunggal panaluan dohot piso halasan” nikku mambaen usul.

    “I ma da lae. Walikota pe ro do annon. Asa bahen hamu ma nian pangurupian muna tu si,” ninna. “Molo boi nian, asa ta pakke ma tunggal panaluan ampuna ni lae di acara i,” ninna partulangon i.

    Ro di si na hurippu do partulangon i na bage ketua ni punguan ni batak i. “Taringotna ise do tahe ketua ni punguan i dipillit, halak Tulang do kan?” hupatakkas ma tu partulangoni.

    “Daong au lae. Wakil ketua do ahu. Si Adonang anggota dewan do” ninna partulangoni paboahon sada anggota dewan ni kota nami naung takkas tinanda.

    Na ringgas hian roha naeng mangurupi toppu ma bage losok huhilala.

    Huroa tudos tu na sinaritahon ni lae Naipospos on ma parrohaon ni akka dongan halak hita di huta nami on uju pemilihan i. “Ise ma dongan na humapal sihumisikna ima taparrajohon.” Hape tangkas do diboto angka dongan i manang songon dia ma ula-ulani dongan napinillit na. Dang adong na sitiruon nang di parulaonna dohot pakkataionna.

    “Ai tiga-tigani boru muna do tunggal panaluan i tulang” nikku ma dung dapotan alus asa unang babe hansit rohani partulangon i.

    Jempek ni hata bage margarar ma tunggal panaluan hulehon hami tu nasida.

    Bulan Januari na salpu i, tarbarita ma na tartakkup ni polisi ma sada anggota Dewan ni kota on marjuji dohot akka donganna akka pamborong. Dua minggu na salpu diputus pengadilan ma nasida terbukti melakukan tindak pidana perjudian dengan hukuman 3 bulan.

  5. HUMALA SIMANJUNTAK berkata:

    songonima realita namasa saonarion sungkun2 boa do merobah manang mangatasi luar biasa hebat lae Monang menyajikan realita i dohot hata batak nauli aha do istilah tusi lae ! mauliate horas

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s