HORBONGKU ….. HORBONGKU ….

Monang Naipospos

Ulaon “manaro” hasomalan do i di angka ompunta najolo sahat ro di nuaeng. Manaro jonok do pangantusionna tu “manubut”.

Molo angka pande lolo pajongjong bagas, jumolo do i disaro suhut, sangkapna asa ojak “sahala guru” mangajari angka pande i laho palolo bagas i. Olo do sipata pande i gabe pajolo hisap. Sipata gale olo sipata losok. Lumobi molo masuak laho-laho didegehon dohot malua tuhil sian tangan, manigor marhusari do roha ni suhut, ujungna disaso ma pande lolo i. Angka sipanganon natabo do dipatupa manaro.

Olo do sipata adong sahala guru maisorang tu sada-sada halak, gabe tamba habisuhonna, adong hamaloonna, tubu hamaloonna sian bangkona hian. Adong ma i na gabe boi manghatiha, martondung, mangaraksa hadirion ni jolma, marpandang torus sahat ro di patupahon pulungan daon ni sahit. Sipata adong do na ingkon jumolo disaro sahala pangajari i asa rintar maisorang gabe sada hadirion dohot jolma tinodona i.

Ima na ro uju i tu Ompu Binanga Leap gabe tarbarita ibana gabe panungkunan di ugasan mago, patomu rongkap, manghirap tondi dohot mangalehon ubat ni pamatang namarsahit. Nunga sada hadirion ibana dohot tondina diajari sahala na ro tu ibana. Tardok ma ibana “nasusur” di hatana jala tingkos tulutanna.

Godang ma mandok mauliate tu ibana di sude namangkilalahon pangurupionna i, huhut mardongan sinamot. Lam dihilala Ompu Binanga Leap ma antong tamba ni panamotanna i, boi ma dituhor horbo saparinaan laho panggararan. Lam leleng, lam ida-ida ma Ompu Binanga Leap di silehon-lehon ni angka tinuturanna i.
Ianggo di mulana i, holan hata mauliate pe didok na ro i, sonang do rohana. Alai dung lam leleng, sai hirim ma rohana di silehon-lehon angkup ni hata mauliate.

Uju dibege ibana naeng manggadis horbo Ompu Balubu ala dang tarparmahanna be horbona i, ingkat ma roha ni Ompu Binanga Leap, alai dihilala ma dang tolap sipeopanna laho manuhor. Tarpaima ma rohana di angka na ro manjalo siajaraon, poda dohot taor pulungan sian ibana mangalehon nagumodang asa boi ibana nian manuhor horbo ni Ompu Balubu i.

Sundat do Ompu Binanga Leap manuhor horbo i ala hurang sibahenonna. Lam leleng lam diparhatutu angka jolma na ro i ma nunga hurang susur ni pandohan ni Ompu Binanga Leap. Dang malum be sahit diubati, dang dapot be tinondunganna, dang dapot rongkap angka angka nauas di jolma. Marsiding ma angka jolma marsungkun tu ibana.

Tinggal sada nama horbo ni Ompu Binanga Leap, nadeba nunga suda tu pargadisan laho manggohi hasomalanna di angka hasonangan ni rohana. Diparhatutu ibana ma naung lam sumisi sahala pangajari i sian ibana. Muningan ma rohana, huhut ma mangandung-andung.

“Ba, dia do i dan Ompung namanjadi
Pandok ni silulubalang ari na so tarjua i
Pidong harangan pidok huruk
Sitapitapi pidong toba
Soada be naniula
Aha be sipasonang roha

Nunga harpahalpa baoadi
Nunga be holpuholpu
Nunga dihatahata
Nunga ro hata na solpu”

Tinallik hotang rusrus bahen sampir ni tagan. Tagan simudurudur, mudur tu hadanghadangan. Langka unang manulus, denggan manungkun dalan. Ianggo natalu diundangundang dang boi be tu partongtangan. Ah, dia ma dalan asa unang sai sai martutukhian sumolsoli bagi?

Tubu ma tu roha ni Ompu Binanga Leap manaro sahala pangajari nahea maisorang tu ibana. Dipatupa ma ulian Debata, ulian habonaran, huhut dipalu gondang bolon. Renta do tutu angka siseanna naung hea marguru dohot manjalo taor pulungan tu ibana.
Manortor ma ibana, nunga lobi sajom alai dang dipangkilalahon na manjonok sahala i tu dirina. Holsoan ma ibana, alai dang dipatudu sian panortorna, angka napungi i pe nunga sai tarpaima.

Nunga dua jom ibana namanortor i, pargonsi pe nunga lam loja, marsak ma ibana, alani i mangaljak ma ibana ditompashon dirina huhut tangis. Hape pamotoan ni angka napungu i naung ro do “ompu” i maisorang, laos ditaea ma dibagasan tungkun ni roha. “Marsoara hamu da ompung”, ninna nadeba. Nadeba mandok; “Totari hami da ompung”.

Tompu ma adong soara Guntur dibara jabu. Manggarpas horbo ni Ompu Binanga Leap mangarunta ala songgot ni rohana umbege soara nagarbas di jabu di pangaljak ni Ompu Binanga Leap i. Tarsonggot muse ma Ompu Binanga Leap ai dirimpu naung adong horbo na asing mardugu dohot horbona i. Mangmbur ma ibana sian laba-laba ni jabu tu alaman huhut marsoara gogo dibagasan lomos : “Horbongku …. Horbonggku….”

Iklan

6 thoughts on “HORBONGKU ….. HORBONGKU ….

  1. Bah lae, apala sabornginon sai marangan-angan au aut boi ma nian apala dua manang tolu taon nai mardua huta au; di dolok ni Samosir dht di Jakarta nabalauon. Adong ma nian sihumisikku manuhor tano attar nabidang, laho mambahen parhorboan dht parlombuan. Dohot ma au marmahan mandongani dua dakdanak parhutai huhut manurat-nurat di laptop; molo mulak au tu Jakarta ba halahima mangaramoti pinahani. Sasahali mardalani ma au tu Sabulan, Nainggolan, Onan Runggu, las sian ima tu Balige dht Laguboti laho marnonang dohot lae Imran, lae Yunan par Napitupulu Bagasan, lae Jarar, amang Bonar Siahaan (parumaen nami sada br Siahaan), songoni nang lae Naipospos. Tabo nai markopi-kopi huhut manghata-hatai, huisapi negnget-nenget sigarethu—alai holan au pe marisap, unang batuhon angka dongan 🙂 Sadia do nuaeng argani anakni horbo manang lombu, inna rohangku nangkin saleleng pardalanan tu ktr. Olo do naeng par huta di dolokni Pangururani tuhoron tanona?

    Dung hubungka blog on pintor tarida sada karangan taringot horbo. Bah, aha ma nanigurathon ni laekku si Naipospos on, inna rohangku. Mansai sungkun-sungkun roha, alai huorom jolo “hosup” paima sidung ulaon—unang dihata deba iba annon. Hape taringot horboni Oppu Binanga pandei do hape. Mauliate ma lae di turi-turianmon, gabe sada sipasingot mai, alana au pe nangkin nungnga sanga targoda boha do sarana asa boi hatop papungohon horbo dohot lombu 🙂

  2. Lae Naipospos,

    Tabo situtu jahaon cerpen (aha tahe hata batakni cerpen?) muna on. Ala songon i do tutu namasa nuaeng on. Jala hampir di sude inganan do huparrohahon, hatop do jolma gabe muba dibaen sihumisik.

    Uju mulak tu huta, songgot hian do roha tikki dibukka toddong na dihuta i do jalang-jalang niba. Jala didok songon on, “Ai holan nasaon do pangalehon mu? Akkangmu si adonang namasahai dilean do 5 lembar hepeng ni si Suharto i?”

    Dang huboto songon dia mangalusi…

    NB: Hepeng ni si Suharto, maksudnya hepeng Rp. 100.000 na margambar Suharto nahinan..

    **** Mago ma holong i ate, nilai nominal nama … Dang huboto hatabatak ni cerpen, alai najolo didok ma siringkotringkot.

  3. @ Lae Naipospos,

    Hea do tarjahahu Kamus Batak Indonesia disurathon disi hata “torsa” lapatanna “cerita rakyat”. Hea dope dibege hamu di Laguboti manang di Toba dipakke halak hata “torsa” on?

    Molo turiturian disi didok kisah yang berlatar belakang sejarah masa lalu.

    Molo di bahasa Indonesia cerita muna on ma ra nanidokna parodi ateh?

    Sai anggiatma lam tu ringgas na Lae pature torsa ni Batak si singonon.

    *** Mauliate lae, sai diurupi tamiangmuna. Asal ma husurat na dapot roha lae, hamu ma mambahen margana 😀

  4. Huhilala denggan ma nian molo adong na boi mangurupi menerbithon kumpulan torsa (siringkot-ringkot) pinatupa ni lae Naipospos on. Asa adong jadi bahan pelajaran kebudayaan batak di sikkola (kurikulum muatan lokal).

  5. B.Parningotan berkata:

    Lae Monang, aha do perbedaan ni siringkot-ringkot sian siribur-ribur?

    *** Siringkotringkot, marisi pesan, siriburribur, asal ma mengkel dibaen

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s