NDANG JADI UJAON NALUMBANG, SOLANGON NAPONJOT

Monang Naipospos

Molo solangon naponjot, na mamolai do i, molo ujaon nalumbang manipuli pasi do i, jala ndang na mambahen denggan i. Ido umbahen dipodahon natuatua; Ndang jadi solangon naponjot ujaon nalumbang.

Roha pe olo do ponjot; ima honorhon ni angka dokdok ni ulaon dohot godang ni rambusungsangna, ala ni arsak hinorhon ni pangalaho ni parianakhonon, parsaoran. Deba, godangan ala ni harugian, parsahiton, hamatean dohot mumut ni ngolu. Uju di hagogotan pe, jotjot do i patupahon ponjot ni roha; ima ala ni angka tihatiha hinorhon ni pangulaon nahumurang, parmaraan na so tinagam ni rohana, na managam uhum ala ni angka hasalaan pinatupana.

Poda do sipalumbang roha ni angka naponjot roha, deba marhite sian pangurupion mangalului dalan nadenggan sipareahonna. Godang do halak marpaula patuduhon “holong” tu parroha naponjot, alai marhite muruk ibana, dirangrangi sude angka hasalaan ni naponjot roha i. Sipata dope diasupi laos didok: “Nunga dijalo ho be nabinahen mi, taon ma”, ninna be. Hinorhon ni i lam ponjot ma roha ni naung ponjot, bobos roha ni naung bobos, tarnono roha ni naung maoto, ujungna silbak ma roha sintong sian ibana. Sampilpil di pudingku haramonting dijolongku, sude do hamu magigi marnida pangalahongku. Gasaon ma ujungna ibana mandopang sude angka hata ni partigor i na sai mangaromparhon angka hata nadokdok tu ibana tamba ni nadokdok naung tinuhukna i. Sega ma ujungna.

Parroha nalumbang, ima tudosan ni parroha bulus. Aha pe namasa tu ibana, diporsan do i dibagasan benget ni roha. Dang mangarajumi ibana tu angka pingkiran na asing na olo mambahen lipe sian rohana poda nauli, sulu hatiuron.
Urat ni gandar bulu sipaonsop-onsopon, angka prroha naburju sitongka paotootoon. Godang do halak patuduhon “holong” tu halak parroha lumbang, suman songon na manulu roha, alai ujungna patubu hosom di parroha bulus nangkin. Dirangrang tu siamun siambirang, diraksa tuginjang, ditorsa tu toru, dialithon tu halak, dipatali tu sisolhot, dipatongon tu hombar jabu. Geang ma ateatena naung bulus hian, alana gabe dietong do i haotoon. Ingkon baloson do najat dohot najat, baloson pambahenan naroa dohot naroa, ninna. Unjung na marhosom ma ibana.

Tarsongon soban di rahutan do parsaoran on, adong natigor adong nagerdung. Rahutrahut, ima patik dohot uhum mangaramoti parsaoran i. Molo soban, manigor tarida do nagerdung dohot natigor, alai ianggo jolma, maol do i tandaon ianggo holan marnida rupa do dohot pamatang. Sipata do na nietong mangharat, hape mangumma. Sipata nietong mangumma, hape mangharat. Tung tigor jala lemes pe hata, ingkon tuluthonon dope sian parulan siganup ari.
Hurang ni panandaon di dongan siganup ari ma umbahen jotjot tarjollung pangalangka. Ima nidok ni natuatua; aek namarhalisung tu aek namarhutobung, binahen ni palilung gabe nioloan tarrobung.

Lam pistar halak nagerdung dohot natigor, lam maol do tarida parasinganna sian pamerengan. Ianggo sitangko manuk dohot gadong, manigor tarida do i, bilolangon ala ni otona. Alai ianggo sitangko ngolu dohot hosa ni natorop, sipatangi-tangion do i marpollung diloloan.

Angka parroha bulus pe adong do naoto. Nang pe naung dilonjani ibana ndang malo ummiok, ujungna malangke ma dagingna. Ianggo parroha bulus napistar, dipasiding do jumolo dirina sian parmaraan hinorhon ni hatangkangon ni halak. Sinuan sanggesangge pinopoan bandaulu, manjua ateate pinapodom pusupusu. Alai dilului do muse dalan boha laho mangintopi api panoksohi di pambahenan ni angka natangkang i unang gabe parmaraan tu dirina dohot tu angka donganna.

Saleleng marbangkohon haotoon dope jolma, ingkon magodang do angka bangko ni halak na sai olo mambola roha ni naponjot asa mura rajaanna. Songon i nang bangko manguja roha ni angka nalumbang asa olo mangihuthon ibana. Haotoon do dihalomohon angka parharajaon sisongon i, jala pangaliluon ma dipatupa asa unang tarida hajahatonna.

Ianggo poda ni angka ompunta najolo, sai didok do: “Taor dop ubat ni sahit ni daging, poda do ubat ni sahit ni roha”. Holong do uhum, mangarahut nagerdung dohot natigor dibagasan holong, unang magopu nagerdung jala unang runsur natigor. Taor dohot poda i do margogo paporhothon natigor unang runsur sian uhum, padaukhon nagerdung unang magorpung dibahen uhum.
Palumbang roha do uhum i di angka naponjot roha patuduhon hasintongan. Solang pangarompu do uhum i di angka parroha lumbang unang taripar sian hasintongan. Ima siramotan ni Raja nabisuk.

Iklan

3 thoughts on “NDANG JADI UJAON NALUMBANG, SOLANGON NAPONJOT

  1. Bonar Siahaan berkata:

    Emma tutu amang,sai anggiat ma diparrohahon jala diulahon Bangso Batak songon i.

  2. Garth M. Meha berkata:

    Boi do dohonon “Sahabat Sejati” na so manguja nalumbang na so manolang na ponjot?

    *** Boi, paima so berhianat muse 😀

  3. Horas.. Lae ! Nunga tung lambas parbinotoan taringot tu hata (bahasa) batak, dohot turi-turianna, namartaringot mai tu hata batak, tung mansai godang do hata batak i naso huantusi (jarang) hubege, jujur Lae dang namandok gabe sipanggaron ahu, alana halak batak
    sian Motung alai tubu di Kota Lubuk Pakam, Mangaranto tu tanosileban (P.Jawa), sahat sadarion ndang hea do pe hubege hata namandok :
    napulpal, ditandosi, marihot, patutahon, dohot na asing nai dope (mansai godang).
    Mauliate ma ,
    Horas Tano Batak

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s