RAJA URAT NI UHUM

Monang Naipospos

Sai di pangidohon natua-tuanta parjolo i do di tonggona; “Sai tubu anak sisuan bulu sipungka parik”. Siramoti harbangan di julu siramoti harbangan di jae. Anak siparbagaon tu jolo do pinarsintana disi.

Raja Huta do hasundungan ni anak sipungka parik sisuan bulu, Anak Partahi jala Ulu Balang do hasundungan ni na tang siramoti harbangan julu dohot jae.
Tardok ma ibana Ompu Bona naumpagohon balikkuhu. Disuan ma patik dohot uhum mangaramoti ngolu ni saluhut pangisi ni hutana i. Ibana ma supukka parhombanan, ditupehon ma ruhut pangulaon na jadi hangoluan ni natorop. Ibana ma sipukka parsumangotan, dijamoti do pangisi ni hutana asa ingot di angka tona dohot poda hangoluan sinuan ni angka ompuna parjolo i.
Ditomu do parsaoran tu donganna Raja asa dibagasan hadameon mangaramoti angka golatna be jala marrosu angka pangisi ni luat i dibagasan adat parsaoran. Dipatomu do patikna be asa masipasangapan di angka paruhuman di ganup huta dohot luat marsolup di hundulan, ai sinuan uhum sibahen na horas, ido dasor pangamonon di napinungka ni nasida i.

Sada pangkirimon do angka Raja asa songon hapur di tagan so haliapan, songon bulu di holbung so hapurpuran angka jolma pinarorotna. Dang jadi tarselak jala dang jadi manelak. Dang jadi manangko jala dang jadi panangkoan. Dang jadi mangalangkup jala dang jadi tarlangkup. Tihas do di Raja molo adong anturaparon pangisi ni hutana. Gari halak pamolus tahe molo male ingkon dilenhon do mangan jala didok; “jolo mardaon pogu hamu”, ninna, jala dipabongot tu huta.

Subang do di angka Raja i mangallang indahan ni pinarorotna. Lumobi mangallang sipanganon sian toru ni rere.
Dang jadi aloon Raja, alai jadi do aloon, ima patik ni Harajaon. Dia dalan mangalo? Molo adong pangalaho ni Raja i miling sian Uhum naung pinahotna, uhumna i do jouon tu ibana. Dumokdok do topot-topot ni Raja sian natorop molo miling sian Uhum. Molo diboto donganna Raja dang diulahon “topot” (dangdang) ala naung dipailing Uhum, diselak ma ibana sian lobuan ni angka Raja.

Horja do partumpuan ni angka huta di ulaon pardamean, golat dohot pamungkaon huta, ai pangerbangan ni sada ompu do godangan huta i. Matua haha ni partubu do natunggane ni horja.
Bius do partumpuan ni angka huta di ulaon hariapan santi rea. Opat do Raja na dipaojak di Bius i songon harajaon na marsuhi ni ampang naopat punungka ni Ompunta Raja Uti, jala ido Disingahon Raja Sisingamangaraja di ganup bius naung sinantina.

Ganup Raja na Opat i dipajongjong be do paiduana. Dipatihi do harajaonna i asa jadi parmahan so mantat matahi pamuro so mantat sior. Parninggala sibola tali parhatian si sada ihot na tuginjang so ra mungkit, tu toru so ra teleng. Sijujung ni ninggor si tingkos ni ari ma nasida manindanghon harajaonna i.

Adong dope angka partohap na asing di harajaon Bius hombar tu angka luat dohot angka siradotanna be. Onan do patumpuan ni Bius, ido umbahen didok “Bius marpusoranhon Onan”. Disi ma harungguan ni angka Raja jala pangaluan ni angka natorop na so sidung di Huta. Disi ma papitahon parpatihan, paruhuman dohot paradaton ni ganup huta sinabung ni Bius i.
Diumpamahon angka Raja do ; “Dang sorat horbo manea tandukna”. Tu nasida do lapatan ni hata i, ala dang boi nasida holsoan jala patudu hagaleon parentahon parpatihan, uhum dohot adat. Tung pe dokdok manuhuk, ai ido hasintongan naung disahalahon (padan) tu Mula Jadi Nabolon. Nasida ma Raja urat ni Uhum jala Namora do nasida urat ni hosa.

Dihirim angka Raja do asa mombang marsundut harajaonna i tu pinomparna na jadi panimbang na so tupa timbangon. Lapatanna hot di patik harajaon i unang tartiha sian natorop dohot donganna Raja.

Iklan

5 thoughts on “RAJA URAT NI UHUM

  1. Baginda berkata:

    Makin paten ya lae cover blog lae
    sekalian promosi kita kan lae, jadi kalo ttulisan batak itu apa artinya ale?

    *** Kena deh… 😀 Tdk tau tulisan batak?. Bah… 😉 Sekedar info, font itu buatan lae Binsar Napitupulu. Dia lahir, besar dan tinggal di Australia. Marhata batak, mantap. Marsurat batak, bikin softwarenya juga bisa. Dia berencana buat pelajaran surat batak di blog ini dan memberikan sw font kpd yg membutuhkan. Mau belajar dari beliau? Biar kuberitau alamat emailnya.

  2. Bonar Siahaan berkata:

    Bah…lahir dan besar di Australia? Marhata batak? marsurat batak? Kagum dahhhh… berarti kalah deh… yang di Bonapasogit.
    Salam buat lae Binsar Napitupulu.

  3. B.Parningotan berkata:

    Arga do bona ni pinasa, arga do nang surat ta i, pustaka ni angka ompunta, jadi unang ma lupa gabe ndang tarjahaonsa . Gari molo laho mardalani hita tu Thailand, dipangke nasida do surat nasida di buku2, surat kabar, goar ni toko2, goar ni dalan, terminal, airport manang aha pe disi. Molo naeng manukkun hita, allusanna pe hata Thailand, gabe sundat hita disi, Songon i pe masa molo laho hita tu Kamboja manang Vietnam ninna sada2 halak na nungga ro tusi.

  4. saing berkata:

    boha do carana molo naeng manambai daftar marga. alana marga saing dang adong ter daftar tolong jolo di pamsuk.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s