HELA NI TOKKE HAMINJON …

Monang Naipospos

Uju di haposoon ragam do pangkilalaan di ganup halak di sinolo ni panailina. Adong ma i ala hinauli manang hinajogina. Adong ma i marnida sian haburjouonna. Adong do deba holan umbege barita hadengganon ni pangalahona. Alai adong muse do hinorhon ni ulaonna naung denggan dohot hamoraon ni natuatuana.

Molo dung pantis holong tu sada halak, sipata so binoto do mandok na di bagas roha. Sai naeng godang do hata sodohonon alai solang panundati di pamangan. Andorang so jumpang nunga nirangrang hata sidohonon, alai dung jumpang hallang songon gansip nidegehon.

Sai marlambianan ma roha dibagasan ai so adong dope hata na unduk masipaoloan. Aut na langgengku silumambe dulang, nunga tubu hariara di adian nagodang. Aut na ambengku ambe ni sidoli/siboru hasudungan, nunga adong alu-alu hata masihaholongan.

Nunga leleng naung diboto si Jabingar haulion ni si Purnama ampit dohot haburjuonna, solo ma panailina. Bangko ma i di angka na jumpang di pangarantoan, sai disungkun do ; “Didia do huta ni Amanta?”

“Oh, molo damang di Dolok Sanggul do”, ninna si Purnama mangalusi sungkun-sungkun ni si Jabingar.

Ah, on ma hape nilonggi ni lili tinoptop ni porda, sinolo ni panaili tonodo ni roha. Mangunduk do si Purnama di hata pangidoan ni si Jabingar dibagasan holong masihaholongan.

Dang na iran las ni roha ni si Jabingar di pangoloion ni si Purnama i, lumobi muse dibege barita nunga godang doli-doli pasahathon holong tu ibana alai sai dijua. “Ah… au ma hape si godang paruntungan, nunga uli, disi burjuna jala boru ni Par-Dolok Sanggul na tarbarita parhaminjonan i”, ninna roha ni si Jabingar dibagasan.

Manggun nasa bitis mambal nasa botohon, hata ni turiturian pagodang-godang dohonon. Barita ni lampedang marsaor bulung bira. Barita ni Dolok Sanggul nunga sahat ro didia. Haroroan ni haminjon nahushus taripar marbanua-banua.

Dung sidung adat parsaripeon ni si Jabingar dohot si Purnama di Jakarta, ditahi nasida ma mangebati huta ni natuatua i di Dolok Sanggul. Rap do nasida dohot simatuana boru sauduran sian Jakarta. Saleleng dipardalanan, sai adong do tubu sangkap ni si Jabingar marnida hatubuan ni haminjon di porlak ni simatuana. Boha do ruhut “marsugi” dohot lan na asing na hombar tu parhaminjonon. Dibege ibana do hinaarga ni haminjon i. Jala adong mai annon boanonna mulak patuduhononna tu angka donganna songon dia do rumang ni haminjon na arga jala natarbarita i, huhut laos patubotohon na tokke haminjon do simatuana.

Dung mareak sahat tu Dolok Sanggul, mangulon ma motor tonompang ni nasida i. Hobas ma si Purnama dohot simatuana boru laho tuat. Muningan ma roha ni si Jabingar, ai boasa disi nasida tuat, ai songon na hurang ribur dope luat i. Alai disungkum ma simatuana; “Ai boasa dison hita tuat inang? Ai dang di jolo an dope Dolok Sanggul?”.

“Ido amang hela, alai tu siamun an do hita mardalan asa sahat hita tu huta, Bakkara”


(ide cerita, P.M. Sitohang)

Iklan

19 thoughts on “HELA NI TOKKE HAMINJON …

  1. Gale ma ra roha ni si Jabingar i ateh lae…dung diboto dan jadi helani tokke hamijjon ibana… holan hela ni tokke bawang do hape… Ai didia ma adong tokke hamijjon di Bakkara…so tubu hamijjon di Bakkara…holan bawang do tubu di luat i…

    hehehehehe….

    gabe dirukkari lae Naipospon on ma sejarah masa lalu ni si bawadi…

    *** Ai dang haminjon i keputusan ni holong ate lae? 😀 Ai bawang pe molo digoreng angur do

  2. Sitorus Par Lobam berkata:

    Bah…..
    nasala persepsi do hape si Jabingar….
    Jadi boha do pakkilalaan ni si Jabingar dung di boto ibana na sebenarna.

    **** Lam marsigorgor holongna dung martapian di mual sitio-tio na di Bakkara i. 😀

  3. Maulina br sirait berkata:

    Sian dia do asli ni ito Jabingar i ??? molo kecewa do ala nasundat hela ni ” tokke haminjon ” berarti dang holong natutu sian bagas rohana tu si Purnama ( holong mamparbuat ) adong keinginan dibalik niat /tujuan. Horas….ditunggu cerita selanjutnya.

    *** Sahuta do ibana dohot lae Sitohang Parbintan 😀

  4. Ba dang jadi helani tokke hamijjon…helani par bawang pe lumayan do dah…

    Arga do bawang sonari on…

    Jadi taringotna songon dia ma panghilalaanni si Jabingar i nung sahat di Bakkara ateh…

    *** Tumangkas nama si Hendry manganto songon dia i 😀

  5. G. Meha berkata:

    Lae na sundat hela ni tokke haminjon,,,,,,,,hita ma marlae…….asa lae ni perkemenjen hamu. Hehehehehh.

  6. @ Meha,

    Songon komentar ni lae Naipospos nama ra i lae…Ala dung martapian di mual Sitio-tio na di Bakkara gabe lupa do si Jabingar i tu nipina na hinan…Gabe marsigorgor do ninna holongna tu boru tokke bawang i…

    Atik na toho tokke bawang… alana binege dang denggan tubu bawang di Bakkara ninna 3 taon parpudi on…

    Jadi martua ma hamu na gabe hela ni par kemenjen i…

  7. Hendry Gaol berkata:

    heehe……………….ai adong do songonon suhutan uda….

    jei kenalan ma iban dohot bayon….di jakarta on do…

    kampung dimana lae??
    Orang medan saya…
    di medan dimana??…..
    masih jauh dari sono…di tarutung namanya…
    oo..tarutung….ditarutung dimana???…
    ke kanan dikit lah….dolok sanggul??
    bah…di dolok sanggul…dimananya??…
    di onan ganjang lae….
    rumah lae dekat pasar itunya??…
    nggak lae…masih jauh lae….agak lurusan lagi…
    dimana??
    nama kampungnya PAKKAT…
    Bah…didia ho dipakkat??….ise goar ni bapam! hudege ma hon, ise honnuaeng, babanion…ise do ho, pardia ho, didia jabun dipakkat
    (didok nanget…) par sirandorung do au tulang…
    pailahon ko!!! 😉 😉 😉
    apa susahnya sih ngomong par-pakkat???

  8. Hendry Gaol berkata:

    Ba dang jadi helani tokke hamijjon…helani par bawang pe lumayan do dah…

    Arga do bawang sonari on…

    Jadi taringotna songon dia ma panghilalaanni si Jabingar i nung sahat di Bakkara ateh…

    *** Tumangkas nama si Hendry manganto songon dia i 😀

    …adong parabangon mambuat boru sian desa PuloGodang, Dolokpinapan,..je abang on par Pollung do, molo nga nidok abang, berarti marga Lumban gaol ma i…didok ma,…holan sahat au tu jabu ni simatuakku, nga hupikkir be dang di indonesia au….dago-dago,…..di rura do huta i,…jala ikkon gadu-gadu do dalanon…

    Taotton…nikku…

  9. Ginomgom Simanjuntak berkata:

    Adong do nian sabatang bona ni haminjon ni simatua ni si jabingar i, alai ipe dang magodang…ai tong mai, memang tongke haminjon hiando cita-cita ni simatuana i, hape dang sahat, ai sotubu nang disuan.

    Alai ipe ngalumayan i mangubati rohani si jabingar gabe ditanda bona ni haminjon, ai sona diboto hian manang songon dia rupani i. Ai dirimpu hian do i songon bana ni Jengkol..

    Ai hutna i tahe, songon dia do bana ni haminjon,…molo adong photona posting hamu ate…!

  10. G. Meha berkata:

    @Lae Par_Bintan

    Ndang tarpapulik (tidak bisa dipisahkan) Bakara sian Doloksanggul lae. Ala nunga gabe Department of Jungle nampuna TOMBAK dohot JUNGLE ni Doloksanggul i, gabe ditabai nasida bona ni haminjon ni pardoloksanggul tanpa merasa bersalah. Ido alana umbahen na gabe so dengganbe tubu bawang di Bakara saonari on, ai marsak mamingkirhon hombar balokna. Sisada nasib do nasida.

    Kemungkinan besar punah nama kemenjen i lae. Alana, molo dibandingkon penghasilan siah LOG dohot panghasilalan sian GOTA ni haminjon i, dao hian perbedaanna. Molo haminjon di suan, paling otik lima taon asa boi margota. Paling otik lima toan nai asa boi di sige sahat tu ginjang (dua polang), jala paling godang gotana saparopat kilo sabatang.

    Molo punah do haminjon i, dang na laho adongbe hela ni parhaminjon. Hela ni mantan parhaminjon nama adong.

  11. @Lae Meha,

    Molo bona ni kemenjen pe nungnga suda ditabai, bawang pe dang tubu be di Humbang Hasundutan tokke aha nama gelar ni Par Dolok Sanggul hape lae?

    Sanggul Mas pe hubenge nungnga dituhor halak jala diganti gabe Fajar…

    Mudah-mudahan ma bona ni andaliman dang dohot ditabai ateh…Nanggo apala adong haduan begeon tokke andaliman sian Dolok Sanggul….

  12. goklas berkata:

    Tarsongoni ma ra nahona tuhami namatua doli-dolion amang naipospos, bolo pajuppang tu sada anak boru pittor marrara do mata, lupa ma tudongan naparjolo songoni ma satorusna…………………
    hape nung marumur ma si goklas 33 taon dapotna ma boruni tulang, hape pariban nai nunga janda…..napogos muse????

    *** Unang sude paboa 😀

  13. rapmengkel berkata:

    unang palungunhu roha ni si Jabingar i, ba lean ma disakkui haminjon i mulak ….., asa sekalian marjogal saluwarna i … he he he
    btw, tanpa ijin ; aku link ke bloggku . terus terang, aw rindu bahasanya yang mantab …

    http://rapmengkel.wordpress.com

    sihomb par surabaya

  14. Anson Simanjuntak berkata:

    Ai boasa ikkon tokke Haminjon dohot Bawang huroa naikkon gabe tokke.
    Boha molo tabahen naimbaru muse goarni tokkei sian Dolok Sanggul ima Tokke HODA.
    Ai disude luat portibion holan di dolok sanggul do adong Jagal HODA, Jala tabohian muse puang dongan ni Kamput bodarinai. Investasi baru namaon horasa.

    Horas pardalan-dalam, mamora partiga-tiga (Terutama par Jagal HODA)

  15. pahala panjaitan berkata:

    Toho doi inna hamu na lae tolong ma patudu hamu jolo poto / gombaran ni haminjon i asa binoto jenis manang spesisna.

  16. Eston H Sianturi berkata:

    Ala so denggan be bawang tubu nungnga gabe “par-kapal be nuaeng simatuani si Jabingar i. Lae Naipospos, baen hamu jolo antong gambar ni Bakkara i asa sombu sihol ni si Jabingar tu simatuanai.Mauliate.

    *** Adong do lae 🙂

  17. medianty silitonga berkata:

    Tokke aha pe taho goarna, na penting ito si jabingar i hela ni tokke. Alai molo di balige ndang adong tokke disi, tokkelpok do adong.

  18. PANGASAR PARSIBORBORON berkata:

    Niporos unte angir huana i denggan baen marpangir. Molo tung sojadi pe hela ni tokke haminjon/tahir, nauli jala na denggan do tung pe hela ni tokke ingkan jahir. Imatutu… Taolophon ma i.

  19. Molo dang jadi hela ni parhaminjon
    Olo do tubu roha lao manibbung si pulak an
    Alali tahe hupikkiri ma dao ni huta nami di peadungdung laos gabe susa ma natua tua i annon
    Ah anggo songon i sae ma i sarito ni si jabingar i

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s