BEGUA AHA I… SEAAAT.

Monang Naipospos

Naringgas do Nai Manotar mangula siulaonna. Ragam do dihobasi siganupari asa adong boanonna tu onan gabe boniagana. Diputik haleo, ditapu ingkau gadong diboan rap dohot dengke jahir tinoba ni Ama ni Manotar.

Hetong di bona ni bagot, mordong ala so sadia nidapot. Sipata molo so sadia dengke nidapot ni parhalanguluna i, sude ma balian dihaliangi mandiori haleo asa gumodang gadisonna.

Ianggo Ama ni Manotar, sae ma holan dengkena i daga-dagana. Lalap di lapo ma ibana muse paima so lao tu tao manaon dotonna. Parpollungon do di ula, jala ringgas do tu paradaton dohot tu angka parhataan. Molo adong sihataan, sai tarida do Ama ni Manotar disi. Girgir do ibana marsiajar di parhataan. Mandurung situma asa adong lompaon, pinagodang hata asa adong ulaon.

Dung lam leleng dipasingkolahon si Manotar tu STM Balige lam dihilala ma naporsuk ala ni hapogoson. Mangihut ma muse ibotona tu SMA Laguboti, sadanari tu SMP, dua di SD.

Gadong ni Bonandolok ias so binurian. Ia so tarhatahon lungun, buruk di sibunian. Ia tung tarhatahon sogot, songon turiturian. Ima tu roha ni Nai Manotar umbahen diporsan hangalutonna humongkop ngolu ni gelengga i. So tiur dope ari nunga laho tu balian, golap ari ipe asa mulak sian balian.

Sada tingki, uju ari onan, tar gomodang do diboan boniagana tu onan, jala godang ragamna. Godang do boniagana di nasadari i diboan maronan tu Balige. Hinorhon ni i, tar leleng do nang parsudana. Nunga diontom rohana ingkon manuhor mira ni entok ibana sian pangomoanna asa adong panggararan ni entokna naung diseat mirana di minggu nasalpu uju ro hulahulana.

Nunga pukul onom dang ra ummiok dope ibana sian paronanan, uju i holan CV BETA 17 do dalanna laho mulak tu Laguboti. Sai digora angaka par-motor Opranto ibana, alai sai didok do, ndang, ai sai dirimpu na so sahat dope BETA 17. Hape sasintonga nunga borhat motor i, ai dirimpu naung jumolo mulak Nai Manotar ala so adong boa-boana hian na ingkon salpu pukul 6 botari ibana mulak.

Dang toho be dirohana dung sahat tu pukul 8 dang marna tarida motor pinaimana i, ujungna adong ma naburju roha patariparhon ibana sian Balige tu Laguboti. Dung tuat ibana di Sirpang Sirongit, nunga tonga sia borngin. Nunga langa dalan, golap, ai dang songon sinuaeng dope adong listrik.

Mamolus sian Lumban Balian laho tu hutana, manindang ma seraserana, jimput rohana. Ai adong disi tar-langgak siboluson, hariara bolon di siamun, angka bulu duri di siambirang. Dihojot ma mardalan huhut sai mamulasi dirohana dibagasan, ai tung so adong ma panomuon ni Amani Manotar di ibana nahabornginan i. “Bah … amang da inang, boha ma annon molo tarpaida au angka na so si-ipion borngin … Saep ma roham da … Amang siadopan molo tung disintakhon na so niida i au,” ninna dibagasan biar huhut sai momar, jimbolangon. Angka na patujongjong marbirong di topi dalan i nunga dietong angka nanaeng mangambat hape sasintongna angka bunga-bunga sigohi-ladang do. Alai molo dung dionjor biar, sude namai gabe begu.

Di na so panagamanna, toho di inganan na hinabiaranna i mangkuling ma soara nanget ; “Haassss …. ”
“Masidalani dalanna”, ninna Nai Manotar huhut dipahojot pardalanna.
Tompu ma muse songon na adong manait boan-boan nahinuntina i ala panghait ni ranting ni bulu duri na jomba tu dalan. Lam manindang ma sera-serana, songon na mansohot pangombut taroktokna.

“Unang apala au daaaaaa …,” ninna huhut manetek iluna.
Dung salpu inganan na langgak i, adong ma lumumbang rohana, alai na so panagamanna mangkuling ma muse soara nangkin; “Haaaaasssss”.

“Dage amang da inang, tung tuntunonna do huroha mambuat au borngin on”, ninna rohana huhut diuji manggora. “Hamu huta … naung pidom do hamu sudeeeee … “, ninna satonga mangangguk. Alai dang adong naumbege soarana i, ala tar holang do pe angka jabu.

“Sahala ni daompung, sahala ni damang … dongani da ompung …. tamparhon parmaraan. Molo tung manoro ba dijabu ma daaaa …”, ninna marbete-bete dibagasan biar.

Dung lam umpos rohana, manjonok ma tu harbangan ni hutana i, mangkuling ma muse soara i; “Haaaassss”. Mangambur ma ibana tu tonga ni alaman mangangguk bobar. “Buatonna nama au daaaaaa, amang ni Manotaaaaar”

Humalaput ma Ama ni Manotar mangungkap laba-laba ni jabuna. Sian na so sanga manungkun aha namasa, mangompas ma Nai Manotar tu jabu. Laos ihut ma muse angka dongan sahuta na tarsonggot di pangangguk ni Nai manotar i. “Aha namasa”, ninna be.

Nunga diihuthon au sahat tu huta, soarana, soarana … aaahhh. Ninna dibagasan lomos.
Sude ma nasida na ro i mangampoti rohana asa unur patorang aha namasa. Dipatorang ma sude namasa dipardalananna i. Hohom ma nasida sude dibagasan lomos.

Mangkuling ma muse soara i. “Haaaassss”. Sigap ma simanotar manigat paronanan ni inongna i, ditop ma entok mira i disintak tu ginjang, manggarpasi huhut marsoara; “haaaasss … haass … haass …”

Tarjolma ma Nai Manotar huhut dibagasan ila mardongan muruk. “Bah … entok naburiapuuuus. Tangkup ….. Seaaaaat”

Iklan

28 thoughts on “BEGUA AHA I… SEAAAT.

  1. Eston H. Sianturi berkata:

    Ha..ha..ha, ndang masuk dope ra ugamo kristen ditingki i ate?

    *** Nunga masuk lae. Alai bangko di hamian molo dakdanak tangis, inongna do dijou, nuaeng omaaaaa … ninna. Molo marende andung, ooo inong among, ninna. Molo mabiar, ompung, ninna. Molo heran, ya Tuhan, ninna. Dung hea sian kota, molo tarsonggot, oh my god, ninna. 😀

  2. Adong dope ama-ama na songon Amani Manotar i nuaeng di Laguboti lae? Tulus rohana nangpe dang mulak dope inang ni gellengna sahat tu jam 9 borngin? Marga aha do Amani Manotar i lae?

    Sampe begu-beguon ito nai Manotar i…

    *** Memekati adong lae. Lalap dilapo tuak, tenggen mulak tu jabu, galdap renges, dang diboto piganai jolma dijabu, naung mangan manang dang. 😀

  3. Boike sitorus berkata:

    Alani biar mida begu nasoada i ma hape gabe ingkon tu paneatan muse mira ni entok nai ate tulang.

  4. Hutahaean par kerinci berkata:

    Memang alani CV Beta no 17 doi, boasa dang dipaitte akka sewana hape ngamarlangganan nai manotar on setiap ari onan. Untong ma Adong Entok i asa adong mangupa nai Manotar i ate.

  5. Maulina br sirait berkata:

    Manjaha cerita ni Tulang on gabe ni ingot naujui molo mardalan borngin dihuta ….mabiar molo dihatai begu hape so hea nian binereng songon dia rupa ni begu…..sai adong do binege di huta songon pangalahoni Amatta si Manotar on hira naso peduli tu keluarga, hape sebenarna Ama ( kep. keluarga ) ingkon melindungi ma nian jala bertanggung jawab penuh untuk urusan materi.

  6. Sahat Ngln berkata:

    Hahahaha,, las didok do songon on ate lae, masidalani dalanna. Oalahhh, hape entok i do na sai pabiarhon nasida. hubayangkon ma songon dia parbiarni nai manotar di golap2 i,, hahahahah. mauliate, horas!

  7. sambor ma nipi entok mira i. Holan niago biar ni Nai Monotar, gabe ikkon di ‘eksekusi’. Hape, rencana sebelumna, naeng gabe pejantan tangguh hinan do, mangganti entok mira naung parjolo dialap raut ala ro hula-hula ni Nai Monotar.

  8. G. Meha berkata:

    Sada parsiajaran do tong on tu angka hula hula akke jo hamuna, ingkon tongdo berengon keadaan ni boru na nidapothon i, unangdo sana nari nama mira ni entok i ingkon tong tu paneatan. Boi do dohonon: unang pola repot repot hamu ito, holan sihol ni rohangku do mamereng hamu dohot angka bere i umbahen na ro ahu. Hehehehehe.

  9. Anson Simanjuntak berkata:

    Horas dihita saluhutna.
    Ngeri ma nian perasaan mambege ceritaon bah.
    Holan humokkop akka dakdanak i ditaon inang nauli basai lojana nang biarna.
    Taringot tu akka parbiar, ra rata-rata sude do jolma adong biar. Songon cerita ni dongan na putus cinta,
    Disada tikki lao ma mahi tudolok-dolok kuburan umum di huta SImpang dua, Siantar. Hira-hira pukul 6 botari sambil ma hami minum tuak huhut mamboan gitar. Dung hira-hira jam 8.30 malam, marende ma imana muse laguna ” Sittakon ahu da Begu, ulusson dan sombaaon……………………. , hape pittor habang pidong siburuk alani gogoni soarana, ala putus cinta ibana dohot mardongan Tuak. Pittor sip ibana, dibereng tu hambirang nang tusiamun dang adong manang aha. Dilanjuthon ibana ma muse lagu i ” Gait-gait tu doi Begu ………………………
    KaaBuurrrrrrrr…………………………..

    Horas ma dihita saluhutna.

    *** Ise tulang pargitarna 😀

  10. Peterson Pangaribuan berkata:

    Mamereng gambaran ni lokasi na on, Marga Naipospos manang Hutahaean manang Hasibuan do ra Ama ni Manotar on. ate..Tulang?

    *** Olo do ra 😉

  11. Bonar Siahaan berkata:

    @ Lae Pospos

    Ganti hamu ma entok mira i sotung somarretteng annon entok ni Ama ni Manotar, gabe dang adong pabiar-biarhon muse. Molo dang adong entok ni lae tu lae Imran ma jalo hita, ai adong do entok ni lae i na sabalga ni toronton. Alai molo dilehon lae i do entokna i ingkon luluan nama buldozer manarat…hehehe….gaithu do i.

  12. michaelsiregar berkata:

    Bah……
    Ai pas ma ra di toruni bulu duri ditopi dalani ate Lae…?!
    Ni ingot na ujui tikki martandang tu Gasaribu, tu jabu ni amang “Dewan” ai marlapo inantai….mulak sian i mardalan tu sirpang Sirongit.

    *** Dapot do ? 😀

  13. michaelsiregar berkata:

    Bah….kalau sudah dapat, mungkin saya nggak sampai ke Amerika Lae…mungkin kita jadi tetangga….he…he…he…tapi tak apalah …PANGLATU juga sebuah status……lagipula kata pangula ni huria…semua akan Indah pada waktunya…menghibur diri..!!!
    BTW, saya mencoba membuat blog sendiri (mambukka sandiri istilah partambal ban di jalur Pantura) jadi blog Lae saya link, Mauliate.
    http://michaelsiregar.wordpress.com/

  14. Marcyus Siahaan berkata:

    Lae Pospos
    Molo so sala marnida jala sala marbinege ahu, ra sarupa tu begu antuk do na mambiar-biari nai manotar i.
    Molo begu attuk do nunga pinda tu Blitar Jawa Timur,jala nunga mansai torop anak dohot pahompuna.
    goarnape ndang begu attuk be nunga marganti gabe ketoc magic jala ndang di toruni bulu duri manang gompang di hariara bolon be.
    saonari gompang di bengkel ketoc magic di piga-piga huta na ribur
    tronton, bulldozer ndang ringkot pangkeon manarat, holan diantuk uluna i nunga manigor habang

    *** 😀 Botul lae. Molo di Sabulan, mabiar do begu antuk tu si Paltibonar 😀 https://tanobatak.wordpress.com/2007/10/14/ballada-cap-bulan-di-sabulan/

  15. desy pardd berkata:

    Aha do ubat ni molo mabiar tu begu?
    Alana nabiaran au tu begu nang pe so hea dope binereng/terbukti adong do manang na dang begu i.
    Molo mardalan borngin na ujui,apalagi molo adong nabaru monding tung mansai mabiar do iba. Molo adong dua halak dongan niba sapardalanan, pintor hupillit do attong di tonga-tonga. Alai molo holan sahalak do dongan niba mulai ma au bingung, di jolo do au manang di pudi. Serba salah ate. Alana molo di jolo iba, atik boha do dijolo begu i gabe parjolo iba diroro…, hape molo di pudi iba, atik boha do di pudi begu i sotung disintakkaon iba sian pudi… hahahhha
    Tu amang parhobas: ai toho do adong begu??

    *** Ai so adong dope binoto disoro begu 😉 Hal na menakutkan, i do begu. Najolo molo didok nabegu, halak na sangar do. Adong do jabatan harajaon najolo didok “nabegu” mabiar do sude angka parroha na roa molo disi “nabegu” Jadi molo mabiar sada halak didok do “begu aha i” belum tentu nanidokna menyangkut makhluk halus i, alai godang do pengertian ni i mahluk kasar ima jolma na olo mambaen mabiar donganna ala ni garangna manang jungkatna. Jadi kesimpulanna, hal na mambahen mabiar, ido “begu” tarmasuk jolma namangolu. Molo dung mate jolma molo mabiar iba, ido umbahen didok “marbegu” lapatanna dang roh ni namate i gabe jahat manang jungkat. Rasa takut menimbulkan “begu” sasintongna dang adong sepanjang nahuboto tingki mate jolma. Dang mungkin angka naburju molo mate gabe begu sihabiaran. Gari najungkat hian ngoluna pintor so adong do effekna tu jolma namangolu.
    Tumangkas ma tasungkun paraphisikologi aha mambahen iba mabiar tu hal na so binereng ni mata. Au pe mabiar do mardalan borngin kecuali terpaksa uju habornginan mulak mardalan pat. Hape horbo do dang bara di harbangan, tarsonggot au laos maringkati dang huboto samban maradu tinggal sipatungku. Dung pe sogot na i asa huboto na horbo do diborothon di harbangan. 😀

  16. B.Parningotan berkata:

    adong do bogu antong, begu antuk, siharhar, begu nurnur, begu ganjang jala adong do parbegu, sipele begu
    umbahen i ndang boi ma burjuhu hita , ai adong do hata di hita Batak na mandok:
    parjolo do na burju allangon ni siharhar

  17. Tamin Jonner Simatupang berkata:

    Manjaha barita ni nai Manotari tung mengkel-engkel do ahu alana lucu dht boi do hubayangkon situasi ni hutai, ai dihuta simatupang pagi sore do asal nami. Alai namambahen carita i sangat bisa dan meramu situasi perjalanan yang sunyi senyap bila sudah menunjukkan jam 18.00. Memang pada zaman cerita ini sangat menakutkan ada kuburan, bambu, pohon rindang, dan rumah yang jarang namun zaman sekarang tidak lagi. Cerita perjalanan ni nai Manotar i naeng dohononna tuhita tanggung jawab dohot manghopkop anakkon, ikkon bersusah payah ibana mangalului naboi gadisonna laho keperluan tu anakkonna. Memang menurut hakristenon ikkon ama do nabertanggungjawab alai ima namasai gabe ina do dibalian ama marpollung. Ba tung dirobah ma angka pangalahonabe unang gabe marbalik-balik ate. Mauliate.

  18. tanobatak berkata:

    @ jonner
    Didia jabunta di Simatupang. Molo si Wakil, mantan Kades, maranggi do au ala ompungborunami boru Simanjuntak

  19. Tamin Jonner Simatupang berkata:

    @ Monang
    Sahuta do hami dht bapa udai ( Op. Bastian ) alai manungkun majolo ahu ate, ditanda hamu do Naipospos partiga-tiga timbaho hian di Laguboti? Molo nasida martulang ma tuhami. Mauliate.

    *** Molo tu Partimbaho, maranggi do au daba.

  20. hutajulu bontang,kaltim berkata:

    bangkona doi lae molo dang lakku dope tiga tiga ….ai jot do sipata pikkiranna .tarlumobi golap lampu luar dohot lampu jalan mate ……salam hami parlumban bagasan do laguboti ..jonok jabuni partimbaho….pagodang hamu angka umpasa naimbarui….mauliate

  21. HUMALA SIMANJUNTAK berkata:

    molo porsea tu begu ba roma antong begu tu parngoluonna molo porsea tu Tuhan Jesus ba Tuhan ima ro dingoluna. ima taringot tusi

  22. Renita. Pangaribuan berkata:

    Molo adong na manganggap cerita on luccu jala mengkel2 manjaha, au daong,lungun do rohangku bah,pola ro do ilukku mangkilalahon parniahapan ni nao manotar i, jala bo i do hu bayangkon nuaeng huta na binolus na i, adong do attong kuburan boluson dht akka hauma paima sahat tu huta nai,attar pardinggaran ma ra i, jala marga pangaribuan ma ra i amani manotar i molo dang hutapea.

  23. Tung namalo ma mambahen sigeokgeok, apalagi muse sai di simpang sirongit ido ahu paimahon motor najolo molo mulak sian paredekosan di balige laho tu sibalingga, sipata habornginan iba sahat ditopi dalan pe holan kuburan, torus ma marsisirsisir imbulu sampe sahat tu jabu.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s