PANANDAION NI HALAK BATAK MARHITE ADATNA

R.B. Marpaung (Op. Miduk)

Halak Batak nunga digoari i sada Bangso. Mangihuthon nabinoto sian angka natua-tua umbahen digoari sada Bangso, nunga marharajaon sandiri, Mardebata (Mula Jadi Nabolon/Pencipta Yang Maha Besar), marpatik, mar-uhum, mar-adat dohot marpartuturon. Nunga marhepeng sandiri, ima naginoaran na ringgit Batak (ingot ringgit si tio soara). Alai ianggo nuaeng on nunga sada negara sude Indonesia, alai nang pe sada negara hita ianggo ugari dohot adatna mar-ragam do.

Tinanda do halak Batak: 1. Sian Ulos na hinadangna. 2. Sian jambar napinaadpo-adopna hombar tu namasa di luatna. 3. Sian tali-talina. 4. Sian tungkotna. 5. Sian tortorna

Nuaeng on nunga torop so piga halak Batak Toba naso haru tumanda ulos dohot pamangkena. Nunga adong nuaeng on bajubajuhinadang dope, nunga pintor manghadang ulos punsa, na so aturan tohapna dope. Laho ma huroha tu pingkiranna ala ni ulina dohot argana. Jala nunga hea binereng dongan ama manghadang ulos ragipangko. Ruhut ni adat, sabe-sabe ni ama natunggane do i.

Adong muse do hea ina manghadang ragipangko dohot ragiharangan, tona ni natua-tua tong do i sabe-sabe ni ama dohot sabalikna ama manghadang sadum, hape sihadangon ni ina do i molo diruhut ni adat Batak Toba. Angka doli-doli pe dohot namarbaju nunga adong manghadang ragihotang dohot punsa. Songon i muse dohot anakboru nunga adong marhoba-hobahon ulos runjat, hape ianggo ruhutna ina naung tunggane do marhoba-hobahon i.

Miduk do dipatupa dohot diraksahon Ompu Naparjolo i ulos sipaheon ni naposobulung, ima: “Mangiring, ranta-ranta, antak-antak, simarambasang, dohot na marhadomuan tusi tupena sengka-sengka dohot gatip-gatip”.

ULOS RAGI NAPITU

1. ULOS TAPOLTUA

Dung sorang dakdanak (si uncok manang si butet) dipasahat ompung na bao dohot tulangna do ulos di tingki mangharoani manang martutuaek, ima ginoaranna Ulos Tapoltua. Alana dirajumi halak Batak Toba do naung hot tua diboru dohot helana molo sorangan dakdanak nasida. Tapol-tapol ni anak nabisuk dohot tapol-tapol ni boru namarroha ma pininta ni ompung na bao dohot tulangna. Nuaeng on ala hurang mangantusi namangalehon dohot namanjalosa, gabe digoari ma ulos i ulos parompa, hape jotjotan do sengka-sengka dibahen ina parompa ni ianakhonna.

2. ULOS PANGHOPOL

Molo laho borhat angka doli-doli dohot nabarbaju mangalului parsingkolaan na tumimbo manang mangalului pangabahan ampapaga nalomak, laho ma ibana mangontang manang manopot huta ni tulangna songon napabotohon asa dohot tulangna paborhathon dohot manangianghon. Diulosi tulangna i ma ibana huhut mardongan pasu-pasu dohot hata poda. Ima ginoaranna Ulos Panghopol asa pir tondina, hisar nang pamatangna manopot natinuju ni rohana.

Napaduahon: “Molo adong dakdanak na sai benge-bengeon, hurang hipas pamatangna, diboan natorasna ma dakdanak i tu huta ni tulangna asa dihopol tulangna dakdanak i laos huhut diupa. Songon i do sialana umbahen digoari Batak Toba ‘tulang do sitopap sambubu’.

3. ULOS SAMPETUA

Dung marhamulian sahalak boru tu anak ni paranak, di pesta parunjuhon i dipasahat natoras pangintubu ni namarhamulian i do ulos tu helana dohot tu boruna, ima naginoaranna Ulos Sampetua asa martua helana martuahon boruna i jala martua boruna i martuahon helana. Ai tua natumimbo di halak Batak Parianakhonon do dungi pe asa angka ondeng (arta).

Longang situtu do roha sinuaeng on gabe digoari ulos i ulos hela. Molo piningkiran do dia ma ulos ni boru napinamuli i, hape ingkon si sada ulos do nasida di tingki pesta unjuk i.

4. ULOS SAMPUBORNA

Ia ulos na sian amangtua manang amanguda ni namarhamulian ima ginoaranna Ulos Sampuborna, asa sampuborna di hela dohot di boru i panggabean, parhorasan, dohot pansamotan. Dipahombar do silehon Ulos Sampuborna tu tulang sijalo todoan. Tona ni natua-tua marsingki soring do sijalo todoan nagok molo di ulaon parunjuhan di angka namarhamaranggi manang na martinodohon. Olo do sipata opat manang lima ama martinodohon, alai ingkon tangkas do dihatai sijalo todoan. Ndang ala ibana sihahaan gabe ibana torus sijalo todoan di ulaon unjuk molo dung marhasohotan boru nasida. Mangihuthon ruhut ni adat dohot uhum, aut sura tading mali-ali dakdanak i ingkon do ampuon ni amangtua na manang amanguda na jala ingkon do pangolihononna anak i jala pamulionna boruna i.

5. ULOS SABINMALIGAS

Sabinmaligas do goar ragi ni ulos na sian namboro dohot pariban ni namarhamulian. Sabin, pajonok do hata i dohot hata abit. Molo didok marsabin manghatai manang marabit manghatai, nanidok na disi unang adong hata natarsubang manang lehe-lehe. Ingkon didongani hapantunon namauliutus do, loloan paradaton di halak Batak Toba (segala pembicaraan harus sopan dan beradab).

Ulos Sabin Maligas nasian namboro manang pariban ni namarhamulian i patandahon dang dos tohonan ni i dohot tohonan ni ulos na sian hula-hula. Hataridaanna: “Molo adong tarsubut di pingkiran ni sada-sada halak, tu tulangna do lao ibana asa dihopol tondina”. Mangihuthon ruhut ni adat dohot uhum di halak Batak Toba, molo tung lao pe ibana tu huta ni namborona manang ibotona dohot paribanna holan namanjalo ongkos do i manang balanjo di dalan.

6. ULOS HEMBANGTUA

Ia ulos napinasahat ni tulang namarhamulian ido ginoaranna Ulos Hembangtua asa hembang tua i, si ripe gabe si ripe horas namanjalosa. Jala tong do dipahombar i tu tulang si jalo todoan nagok. Molo tulang na martinodohon manang na marhamaranggi si jalo batu ni sulang do i atik pe sama-sama ringgit si tio soara. Si alani ido umbahen tulang parpudi pasahathon ulosna asa tulang i do pahembanghon pasu-pasu dohot mambahen tangiang panutup.

7. ULOS NASORABURUK

Ia Ulos Nasoraburuk digoari muse do i Pauseang. Angka ulos nahinataan na di ginjang on, ulos natinonun ni tangan do i, alai ianggo ulos nasoraburuk hauma do i manang tanotur. Ulos tonunan buruk do i molo dung jumping tingkina alai anggo tano hot do i saleleng ni lelengna. Ido umbahen adong hata Batak namandok seang do pauseang molo so adong marhaseangkon. Lapatanna: “Boru si jalo pauseang i sai marurat tu toru, mardangka tu lambung, marjujungan tu ginjang. Lapatanna marpinompar anak nabisuk dohot boru namar roha jala unang si pansuasaehon pauseang dohot arta.”

Sian arta pauseang do mula ni adat umbahen tulang ni namarhamulian si jalo todoan nagok (sinamot paidua) di boru muli di ulaon unjuk. Boi do muse pauseang i dipauseangkon muse. Mar-ragam dope goar-goar ni ulos nani ragihon ni angka ompu naparjolo, alai olat ni ulos nasoraburuk do naginoaran nasida ulos raginapitu.

ULOS PARGOMGOM

Molo mangolu dope ompung ni pangoli di ulaon (pesta) unjuk, ruhut ni adat naingkon do manjalo ulos ompung na i sian simatua ni pangoli mangihuthon pinta-pinta ni natua-tua asa tu ganjangna umur ni namanjalosa, siripe gabe siripe horas sijalo ulos pargomgom manggomgom angka pomparanna, hot marsipairing-iringan, masiajar-ajaran di angka na uli asa tu dolok rap dapotan ampapaga na lomak tu holbung rap dapotan mual na tio.

N.B : Magihuthon tona ni angka natua-tua na rihit di adat dohot uhum dipahombar do ulos herbang dohot ulos nasoraburuk tu sinamot, unang adong na mangururi. Songon i do hatorangan ni natua-tua di ruhut ni adat dohot di uhum ni halak Batak Toba.

ULOS PANGOSE

Ia naginoaranna ulos pangose, mangihuthon hatorangan ni natua-tua songon on ma bonsirna : “Olo do adong namardongan saripe mar-rongkap badan ndang mar-rongkap tondina, lapatanna ndang tubuan anak ndang tubuan boru (ndang mar-rindang na mardongan saripe i)”. Di sada tingki gabe sirang ma nasida sian dos ni roha nasida be. Di jolo ni raja-raja dohot angka natua-tua, si paulahon ni paranak do ulos sampetua najinalona hian di tingki pesta unjuk i tu parboru, i ma naginoaranna ulos pangose. Ai nunga mose padan ala so mar-rongkap tondi. Jala gararon ni nadua toha do (paranak dohot parboru) pago-pago tu raja. Dung mulak ulos pangose ipe asa boi muse marhamulian boru nasirang i.

Hatorangan ni natua-tua najolo, molo marhamulian boru naung sirang ndang mulak ulos sampetua jala ndang dipagoi raja parsirangan nasida didok nasida doi namahilolong. Molo adong tubu ni boru namarhamulian si songon i, dirajumi nasida doi rindang ni baoa hamulian na naparjolo. Songon i do ruhut ni adat dohot uhum di nasida. Sialani i do umbahen disungkun halak boru naung sirang manang naung dipagoi asa barani halak mangolisa.

Songon i ma jolo hatorangan sabagian raksa, risa, dohot ruhut ni ulos dohot parulosan di halak Batak Toba.

Adong dope ruhut ni ulos di habatahon dohot raksana: di ulaon maujana, halion holi, mangompoi jabu dohot angka na asing. Di sada tingki pe tataringoti raksa ni i.

Nuaeng on nunga naia sian tonga-tonga ni halak Batak nampuna ugari i mandok: Ndang sipangkeon be ninna ulos, ndang sihuntion be tandok, ndang paluon be ogung, ndang patupaon be parjambaran, ndang jujuron be dohot ari, ai manghorhon dosa do ninna ulaon si songon i.

PARJAMBARAN

Nunga adong muse sian tonga-tonga ni halak Batak Toba nampuna ugari i mandok: “Ndang sipatupaon be ninna parjambaran”.

Dipalolo manang dipatupa angka ompu naparjolo pe parjambaran i diraksahon angka ompu i do i tu angka tohonanna be, asa tanda jala tota partuturon dohot tarombo.

Tudosanna (contoh): di Toba Balige, molo dipadop-adop do jambar namarngingi nunga binoto horong hula-hula ni hasuhuton ma napadop-adop i. Molo dipadop-adop jambar osang, nunga tangkas binoto horong pamoruan ni hasuhoton ma i.

Molo dipadop-adop jambar ihur-ihur di ulaon unjuk, horong simatua ni pangoli ma i.

Molo panamboli do dipadop-adop, horong ni dongan tubu ni hasuhuton ma i dohot dongan saliatan na. Songon i ma sabagian ruhut parjambaran di Toba Balige.

Molo so dipatupa do parjambaran di ulaon pesta mangajana dohot maujana, mardosdos ma songon si marunap-unap, ndang tanda be talatak, ndang tanda be talutuk, ndang tanda be talaga dohot halangulu.

TALI – TALI

Binuat silinjuang, ampe tu pangumbari. Jagar do simanjujung, bahenon tali-tali.

Sampe taon 1960-an diharingkoti halak Batak Toba dope mamangke tali-tali lumobi hasuhuton ni namarsiulaon (pesta) asa tanda berengon ni natorop, hasuhuton bolon. Adong do hata Batak namandok: Martampuk bulung, marbona sangkalan. Marnata suhut, marnampuna ugasan.

Mar-ragam do tali-tali tinonun ni halak Batak Toba, jala dipahombar do pamaheon ni i hombar tu tohonanna be dohot peak ni ulaon na. Sabagian sian goar-goar ni tali-tali i pinatorang ma jolo sintap ni nabinoto, ima: 1. Tali-tali mangiring. 2. Tali-tali tutur-tutur. 3. Tali-tali padang ursa. 4. Tali-tali tompi. 5. Tali-tali tuntuman punsa. 6. Tali-tali tigabolit. 7. Tali-tali tuntuman baringin. 8. Tali-tali detar

Nuaeng on ala soharu masiantusan be sabagian sian natorop di raksa dohot ruhut ni tali-tali, gabe adong ma sian tonga-tonganta sandiri namamahe natinonun ni halak Padang dohot Palembang, rait na pe ndang rait ni tali-tali ni Batak Toba. Aut sura adong halak na asing di ruar ni halak Batak Toba manunghun hita, naso adong hian do tali-tali ni halak Batak Toba umbahen tinonun ni halak Padang dohot Palembang dipahe, boado bahenonta mangalusi nasida?

TUNGKOT

Mar-ragam do naginoaranna tungkot di halak Batak Toba. Nahinan di masa ni gotilon, diparade do tungkot ni sarudan asa adong adean ni tangan ni pardege. Molo mardalan di na rahis diboan pardalan do tungkot na hauanak asa adong siadean ni tanganna manganangkohi dohot manuati dalan na rahis i uang tinggang namardalan. Molo adong sipata naung marhamulian ndang tubuan dakdanak nasida, olo do sipata diompot anggina manang maenna digoari do i di adat tungkotna.

Alai sude naginoaran i, ndada tungkot harajaon i. Hata Batak mandok: Ompu raja i jolo, martungkot mundi-mundi. Pinungka ni ompu naparjolo, ihuthonon ni na umpudi

Torop do dongan marpingkir, dihirim rohana do ompu raja ijolo i angka natua-tua naung monding. Ruhut ni adat dohot uhum di halak Batak Toba, jolma na pinajolo, naung niojur manang pinabangkit gabe raja manang uluan ni sada marga manang punguan ima naginoaranna raja ijolo naung talup martungkot mundi-mundi.

PANORTORON

Molo panortoron mangihuthon ruhut na pinatorang ni angka natua-tua, nunga adong manimbil sian na pinatorang nasida i tor-tor namasa nuaeng on. Ianggo tor-tor ni halak Batak Toba ingkon do didongani hapantunon dohot hadondaon. Jala paheanna pe ingkon do didongani hadomdomon, ndang jadi tuit-tuit dohot tingkal-tingkal.

Hea do panurat laho tu Sianjur mula-mula mangkatai dohot sahalak natua-tua marga Situmorang tarsingot ruhut-ruhut ni tor-tor ni Batak Toba. Molo angka namarbaju manortor asing do ruhut ni tor-tor na dohot ruhut ni tor-tor ni ina atik pe rap manortor nasida. Asing muse do tor-tor ni naso mar-rindang dohot naung namariananghon. Pulik muse do parjongjong ni puang bolon dohot imbang di loloan panortoron.

Di ulaon mangajana pe (Saurmatua), subang bolon do digoari manortor atik pe dipalu ogung sabangunan (laung tinangihon). Ai sitongka do di ruhut ni adat dohot uhum ni Batak Toba tortoran namonding, maronda-onda do didok (berkabung).

Namasa sinuaeng on, nunga torop nalipe sian ruhut-ruhut na pinodahon ni ompu sijolo-jolo tubu.

Songon i ma jolo pina andap tu tonga-tonga ni natorop. Molo adong dope dongan naboi mangalehon hatorangan na ummuli, rade do roha manjalosa jala tarpaima-ima do roha na sai leleng on.

Molo tung adong pasintak, patebur songon sabe-sabe ni na hurang malo di panuraton on : Masi amin-aminan ma hita songon lampak ni gaol. Masi tungkol-tungkolan songon suhat di robean. Asa hot songon pulo. Tingkos songon parsihodoan

Horas Tondi Madingin. Pir Tondi Matogu

13 thoughts on “PANANDAION NI HALAK BATAK MARHITE ADATNA

  1. Mauliate Amang ….di hatorangan naung pinasahatmu dison…. bangga do hita hape halak batak , molo tung adong pe namaila mengaku halak batak alani haotoon namai…molo boi nian pangidoan goar2 ni ulos i sekalian dohot photona , asa lebih jelas ditanda angka naso mananda ragam ni ulos. Horas ….!!!

  2. Horas Amang RB Marpaung( Op Miduk)

    Mauliate ma amang di hatorangan ni goar2 ni ulos na hombar tu pamakkena,alana uaeng on nunnga godang sala pandohanna, conto Ules Sampetu, uaeng on nungga gabe Ulos Hela,adong muse mandar Hela godang do pe akka naasing sala pandohan di akka pesta2 ni adat batak di Bona pasogit dohot Jakarta on, dohot do Poco2 musik na di palu dohot Gonndang Batak. Mauliate

    Horas jala Gabe.

    .

  3. Nunga nian diphoto amanta M Naipospos angka ulos dohot goarna,alai naso disetting dope ra, sabar ma jolo hita ai ahu pe naeng do idaonhu asa lam tamba nabinoto.

    Horas.

  4. Horas Amang Marpaung.
    Mauliate godang ma hupasahat di hatorangan muna taringot ulos songon nadipatorang muna di ginjang. Nian saleleng on nunga attar bahat hujaha jala bege taringot ulos (Dainang nahinan partonun do, alai holan sipakkeonna, dang digadis tu onan. Nahuingot, tingki kalas dua SD mau au so ibana martonun alani panahit. Dua ulos nanitonunna dipasahat do tu au tingki di ngoluna, Ulos Sibolang). Hatorangan muna on lam manambai parbinotoanhu taringot adat-istiadat dht kebudayaan Batak (Toba). Mansai marlapatan jala porlu do di au nadigurat muna on alana di pudini ari on songonna lam jot-jot au dijou angka naposo (HKBP) Jakarta-Bekasi-Tangerang manghatahon “Arti dan Manfaat Adat Bagi Orang Batak.” Tungpe dang adong honor na:-) jala loja do pamatang (biasana borngin), las do roha mamereng giotni rohani angka naposo natubu jala maringanan di tano parserahan laho mamboto adat-istiadat dht kebudayaanta. Torushon hamu ma manurat, Amang, tung mansai porlu do parbinotoan muna tu hami naumposo.

  5. @ SS

    Tu Penang do nuaeng amanta B Marpaung marubat, laos tatangianghon ma asa tumibu sehat, alana asam urat nina sahitna.

    Horas.

  6. Mauliate ma amang RB.Marpaung.
    Lam tamba akka parbinotoan taringot tu Ulos on.
    Dang terasa habis 2 btg sigaret alani tabona manjaha bah, lae Monang..Horas lae!

  7. Imada, molo tajaha surat ni Op. MIduk on tutu do nuaeng on nungga bahat halak batak dipangarantoan on , ndang di boto be paradaton ni halak batak, holan goarna do Batak.
    molo hita na namarhaha maranggi , ingkon masipairingiringan do . Ho do ahu hita na saina. adat na marsaina namarsaboltok, sada panganan ingkon marsitorang, ndang masa disi angat dohot angkal angkal.
    alai nuang on dibahen sihahaan papudi uhum pangasahon gogo, manang simanuk sibontar andora, ndada sitodo turpuk siahut lomoni roha.,
    molo ni sungkunan boasa bahenonmu songon i , manang songon an ninna ma ingkon songon on do, ndang adong di adat batak sisongon i. ndang laho tu pingkiranna parjolo laho manungkun tu angka hapistaran.
    Lupa do ibana tu hata na mandok: sise mulani hata, sungkun mula ni uhum.
    Di tingki mangadathon, misalna ditingki mambahen marga, tu sada boru manang baoa na nioli sian huta na leban, asal dibahen do adat i, lupa do ingkon bahenon do boru manang baoa i siboto adat asa niadathon,
    jadi boha do pendapat muna di adat ta on, boi do i lupahononhon manang ingkon digali kembali SURAT TUMBAGA HOLING NA TINUMPA NI SI RAJA BATAK NA DIUHIRHON DIBAGASAN SURAT BATAK na disurathon di buku laklak na binahen sian laklak ni Hau Raja Tualang na bolon nahinan?, ai disi do disurathon angka patik taringot tu hak ni anak, anak sian na metmet, anak tubu di porlak, anak sian namarjabu talak, anak sian na mansalong, anak sian gampangan, anak sian na margundik, anak mata, anak niain, anak niimbang, anak lobu, anak andilandil, hak ni ina dohot boru, sian hatutubuan, sian hamulian , sian namabalu, paramaon, parsirangon, arta pusaka paneanon, paneanon tali mangulang, tean jonjong, tean mate, tean begu dll?
    Ai Di tingki jaman penjajahan Bolanda nahinan, dicoba nasida do menghapus adat ta na sai arga i. jadi dibahen nasida do songon hata na mandok, hata parpudi do gabe hata sihahaan. gabe adat ni sibontarmata , jahudi manang arab i do gabe adatta na tarpangke nuaeng on.
    tading hirang niba dibahen hirang ni halak, tading adat mamangeaki adat ni halak.

  8. Horas ma di ito RB Marpaung naung manurathon taringot tu ulos on. Adong do huboto tona ni tua-tua didok: Molo jinalo ulos sian Tulang, dang boi munsat i sian iba. Toho do tahe i ito? Antar songon dia do lapatan ni i?

    Alana tingki marhasohotan au najolo adong do dipasahat Tulang ulos. Jala didok Tulang on do asa unang dipasahat manang tu ise ulos i. Alai ala naung leleng, mardomu ma muse ala ni godang ni adat sidalantonon di Jkt on, gabe dang binoto be tudia hea hupasahat ulos i. Horas ma dihita.

  9. ***Tu Penang do nuaeng amanta B Marpaung marubat, laos tatangianghon ma asa tumibu sehat, alana asam urat nina sahitna.***

    @ Ito. R.B. Marpaung (Op. Miduk)
    Sai anggiat tumibu malum ate ito. Tuhan memberkati.

  10. mauliate ma Tulang marpaung, mansai las situtudo rohakku manjaha hatorangan munai,kebetulan au na baru mangoli dope tu br siburian sabulan nasalpu di siborong2. jd taringot tu adat batak buta do au sm sekali alana mulai met2 tggl dilingkungani halak jawa dohami(perkebunan), pengen do au belajar lebih dlm adt batak tar lumobi di tano pangaratoan on! Asa anggiat manian labu ringgas Tulang mangajar2i hami akka naposo on.molo adong marga manik na tinggal disekitar gunung putri( bogor) tolong jo hub tu son 081399900200. alana pengen marsitadaan, songon mau hudok nakkaning sabulan dope au tinggal dison. Mauliate ma di hita sude. Horas horas horas

    **** Lae Manik, sasintongna ingkon lae do manungkun boha dalan manghubungi natuatuai amanta B. Marpaung. Boi ma nian sungkunonmu melalui email ni blog on.

  11. Mauliate ma tutu dihamu amang Marpaung, sai tumibu ma sehat asa boi muse manutur nuturi hami naumposo marhite angka tulisan muna.

    Ima ate, mansai ragam do jala uli do partording ni adat dohot uhum di hita bangso Batak.
    garima nian lam godang generasi muda nuaeng na olo marsiajar unang lam mango angka ugasan ni Batak i digilas zaman.

    Sipata nidok do tunatua tuai,
    ai tuaha tuhoron ulos i arga arga sona nipakke age tudia, holan dilamari doi.
    eh… tahe…nga dohot iba hape naeng menghapus adat dohot budayani hita Batak i. ia mengaku iba boru batak.

  12. Molo ni jaha do hatorangan di amanta B Marpuang onteng, ni kaithon tu namasa saonari di Bonapasogit (Silindung, Toba, Humbang dohot Samosir)tarlumobi di tano parserahan Jakarta, Medan, Lampung, Surabaya dll)kesimpulanna boi dohonon ndang sintong be ta ihuthon adat dohot paradation i. Alana ndang adong sada pedoman na masiantusan, nungga masiboan na binotona. Sasintongna aha do usaha dohot upaya padiposhon adat i? Boha do akibatna tu bangso Batak si saonari? Gabe pamaolhon do adat i di akka na masa saonari. Adong do pilihan asa unang lam dao halak Batak i sian adatna? Manambai, nungga mansai godang na mandok ‘adat batak’ on dang effisien jala ndang efektif tarumobi di luat sileban na mar siadu dohot tingki. Onma mangihuthon na huboto porlu tapikkiri ditikki naeng malestarihon adat batak hita. Horas.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s