NA MASA DI JAKARTA

Monang Naipospos

Barita ni lampedang, marsaor bulung bira. Barita haulion na masa di Jakarta, mangararat do di Toba. Manggun nasa bitis, mambal nasa botohon, hata ni turiturian pagodang-godang dohonon. Suhutan ni si Henry,  tubu do tu roha manurathon.

Tung panihalnihalon do Ama ni Basiha dung mulak sian Jakarta. Sude do jolma salapo di hutana i digalang asal ma ditangihon sude angka barita binoanna sian pardalananna di Jakarta. Dang tarhatahon sude angka namasa disan tu na adong dihitaon, sai ninna do tu angka naumbegesa.

Dang sonang rohana holan na di hutana i umbotosa angka namasa niidana di Jakarta, lao do ibana manopot laena Aman Tiurlan tu Lumban Sinornor. Boru ni Aman Tiurlan do gabe dongan saripe ni si Basiha na marhuta di Jakarta i. Ringgas do si Basiha dohot parumaenna i mamboan Ama ni Basiha marnida angka namasa di Jakarta. Rap sapanggoaran do nasida di anak ni si Basiha namargoar si Mikael. Rap Ompu si Mikael do nasida.

“Ah tahe lae tung mansai na ribur ma Jakarta i, godang angka namasa na so hea niida nohot naso hea nidai di hitaon.”, ninna Ama ni Basiha mamulai nonangna.

“Sahat do iba martonga langit lae, holan tindang do iba dibagasan poti. Holan ditullukhon lae jari ni tangan i, dang tinagam naung sahat iba martonga langit. Holan diosos salapa ni partiga-tiga i, bah dang dijalo be tuhor ni sipanganon na nialtupan i”.

“Ah…. begu aha do i lae, songon na so dapot roha do sude nidokmuna i”, ninna Aman Tiurlan dibagasan longang. Pola songon na talak satonga simangkudapna umbege sude nonang ni Ama ni Basiha i.

“Ido lae…”, ninna Ama ni Basiha paondolhon hasintongan ni hatana i. “Apala napalongang roha lae, na boi i ma disi marbal (main bola) dengke.”

“Ah… lam so dapot roha do sude hatoranganmuna i lae, gari jolma dang sude boi marbal, bah… lam ma dengke,… begu aha ma i”, ninna Aman Tiurlan lam longang rohana.

“Ah… nunga ringkot jolo lao hamu lae, jala muse ditonahon helamuna do hamu asa ro tu Jakarta”, ninna Ama ni Basiha pahehe roha ni Aman Tiurlan.

* * *

Marbunga gorat, harotas panggugutan. Molo molo dung diontom dongan magodang, dae do so oloan. Pidong harangan pidong huruk, sitapitapi pidong toba. Loja pamatang sinamot pinapurguk, asa adong do bahenon tu lungun ni roha. Ditolopi Nan Tiurlan do sangkap ni parhalanguluna i borhat tu Jakarta madulo pahompuna haholonganna i.

Nunga saminggu Aman Tiurlan di Jakarta, alai sai songonna nihulamean do pangkilalaanna. Lambas do bagas ni helana i, alai holan parorot ni pahompuna i do donganna di jabu. Buha ijuk dope nunga borhat helana dohot boruna i manopot ulaonna, urmun ari do asa mulak. Paganggang langka dang diboto tu dia haeretan, tu hombar jabu dang masitandaan.

Nunga piu on da songon tali, putor songon langkitang, ia barita ni Ama ni Basiha dison do dapot hasonangan. Nunga tung songon horbo jinail iba so malo marhamiohan. Manolsoli ma Aman Tiurlan na ro tu Jakarta i, mangan pe dang be langku. Ditahi ma naeng mulak tu huta, alai sai dipingkiri, ba aha ma namasa di Jakarta on sibaritahonon di huta?

Dihilala helana dohot boruna i do naung busisaon natuatuana i, ai hurang do tingki nasida marsirarion dohot mamboan mangebati hariburon ni Jakarta. Alana marhatohoan di haroro ni Aman Tiurlan i dang adong tingki ni nasida na lumbang sian ulaonna. Ari Minggu on pe marpungu do nasida samarga di jabu ni si Hendry di Cikarang.

Songon na mangubati holso ni simatuana, diangkupi Ama ni Mikael ma Aman Tiurlan mangkatai. “Songon na moru hamu amang mangan, unang oloi hamu asa sehat hamu. Molo adong nahurang paboa hamu tu pembantunta i asa dituhor, betak tung sihol rohamuna mangallang natinombur, diboto i do patupahon”

“Ah tabo do amang hela sude sipanganon i, gari dang hasudaan. Holan sada do nian pangidoan ni rohangku sian hamu”, ninna tar songon na marpaima gorak ni helana i.

“Paboa hamu ma amang, unang pola halang rohamuna”, ninna helana i dibagasan hinsa ni roha.

“Pangidoanhu nian andorang so mulak ahu, asa boan hamu jolo ahu tu namasa-masa i, asa nidai jolo manang na songon dia do tutu”

 ide cerita : Hendry Lumbangaol. AddThis Social Bookmark Button

Iklan

28 thoughts on “NA MASA DI JAKARTA

  1. Sega, nungnga sega be. Onma alani ula-ulani laekku si Hendry Lbn Gaol par Pakkat, gabe dohot laekku Naipospos dijergothon tu akka nageok alai subang. Mengkel sahalak au manjaha sarito muna on 🙂

  2. Maulina br sirait berkata:

    Bah…lucuni cerita on, polos ni rohani A. Tiurlan do nian pasahathon naponjot di bagas rohana… ..hape olo ma salah pengertian helana mambege pangidoan ni simatuanai …..laos leleng muse di pikkiri….!!!!!

  3. Jones Napitupulu berkata:

    Ha ha ha, ai tung geok ma attong aman tiurlan on… naso diattusi do hape lapatanni namasa-masa i.. tarsonggot ma attong hela nai umbege pangidoan ni amang simatuani…apalagi molo diboto borunai. mauliate lae di turi-turian muna on

  4. Bonar Siahaan berkata:

    Kwakakakak… tu namasa-masa i…????…. bah….bahbaaaaah holan ala hata ni ama ni basiha ma paboa namasa gabe didok Aman Tiurlan namasa-masa i…. gabe huingot Ama ni Benget na diboan anakna tu………namasa-masa….

    Nunga godang hape nahurang tangkas mar-hatabatak.

  5. H. MALAU berkata:

    wakkakkak hix’g!
    marbirong jala marsalaon ma bohi ni helana i ala so hea dope helana i tu namasa masa i!?
    xixixixixi

  6. radja nadeak berkata:

    hahahhaha…..naeng hu namasa masai amang simatuana…
    sambil manambai, adong hubege sangonon kisah nyata…

    helana di bali… disuru ma ro amang simatuana on tu bali, jala di boan ma mardalani tu pantai kuta…gabe holan nabondil ma amantaon mamereng akka borua namarlangei i…hehhehe

  7. Dita br Sitorus berkata:

    ya ampun………!
    ngasampe didok donganku au ni nakesurupan ala na mengkel sahalakku.
    sai na adong do tahe..

  8. Bah… bah… ai aha NAMASA…??? 😀 Erget nai tutu bah…!
    Ai anggo ito si Hendry on dang hea kehabisan cerita ibana. So binoto sian dia dipapungu2 ibana i…!
    Adong dope tong na lussu cerita ni ito si Henry on. Adong ma ninna sahalak donganna na mongkus. Ala ni mongkusna habis didorguki sup ni lomok-lomok sampe so mattak. Dirimpu sup ni lomok2i na nidorguhanna i, hape “PARBASUAN” do…..:D:D:D Bah…ketawa guling2 au manjahasa….

  9. G. Meha berkata:

    Pamasaon nama di Doloksanggul angka na masa na di Djakarta i bah, ia na dangket dangket do manang na Lomang Pakkat/Parlilitan naeng altupan, sae ma holan mangosos salapa ni partiga tiga i. Hehehe.

    Mangihuthon suhutan on, na samarga do si Hendry dohot Amani Mikael? Molo ido, ba boi do si Hendry mamboan Aman Tiurlan da, paima adong tingki ni si Basiha. Hehehe jo muse sahali nai.

  10. napitupulu_chaidir berkata:

    ai so jo tahe lae, dipamanat lae jo aha do tahi ni simatuanai, na giot laho tu na masa-masa i do manang tu na masssa masssa i, alai ninna asing do pangantusionna.
    memang lussu hian saritaon bah

  11. Bah …. Maufs …… antar hutanda do ra amani mikael on…. ai di Cikarang do anggo so sala jabu na ….
    ai pintor diboan amani mikael do Simatua nai tu RSCM ….. ai di si do godang angka namasa …. angka na tabrakan pe di si do dipapungu …. he .. he.. he….

  12. Pontaseddy berkata:

    Sai naeng huketik comment hu, alai sai pintor “hang” Laptop hon, berarti ” No Comment” ma ate.
    Next time better,

  13. tanobatak berkata:

    @ Lae Suhunan, Dita, Chaidir, Desy

    Molo chatting au dohot si Hendry pantang so godang do ceritana. Olo do mengkel sandiri iba. Unang apala mengkel sandiri, ba pinaganjang ma cerita i dison asa adong dongan na menkkel sandiri 😀

    @ Maulina, Mr Bin, Jones, H Malau, Raja Nadeak, Charlie

    Mangihuthon cerita ni si Hendry gabe marbadai do nai Mekkel dohot Ama ni Mekkel. Alai tumagon ma si Hendry paganang cerita on 😀

    @ Bonar

    Dang na hurang tangas i lae, hita do nasala mangartihon namasa-masa 😀

    @ G. Meha

    Dang dipaboa si Hendry marga aha na di cerita on. Alani dang tumangkas ra ibana di cerita ni marga na asing ate?

    @ Michael

    Aman ni Mekkel do ibana di jou di huta lae 😀

    @ Pontas Edy

    Bah tulang, boasa hang… atik na hona namasa-masa nuaeng do…. ima nanidokna pirus 😀

    @ Goklas

    Ho ma jolo poang marcerita asa mekkel sandiri au…. 😀 Ahhhh tabo na i di ho ate… Na taon baru i pe dang dipaboa ho na mulak, sai hudiori di onan Porsea 😉

  14. Adonia Sihotang berkata:

    Ah tahe ate. Loja au mekkel….

    Halak hita do mambaen istilah namasa-masa on gabe geok ra ate.

    Boha do a,ani Mikel mangalusi simatuanai ate

  15. agustinus Hutauruk berkata:

    ai boasa tutu gabe adong istilah namasa-masa on ate?
    hape puang nauli do nian aha nadiparsitta ni roha ni amani sitiurlan on.
    ba jadi boha do nuaeng ekspresi ni hela dohot boru ni amani sitiurlan on. Ndang so tarsonggot mambegei naeng “mandai namasa-masai” ninna!
    Dagoooooooo!!!!!!!!!!!!!!!!!!!!!! ai aha do namasa!
    naung masa do namasa-masai?

  16. Liberius Sihombing berkata:

    Wakakak…pokokna hamu angka na di Jakarta i ma mangartihon pangidoan ni Aman Tiurlan i, aha do maksudna na masa-masa, ra naung pintor boi do ditangkup hamuna lapatanna, ai na godangan na masa di Jakarta. Oho,,,,aman Tiurlan, suda ongkosmu holan nang mandai namasa-masa i, alani Amani Basiha mai. Beta ma mangkail tu tao toba, manang mardalan-dalan tu lumban silintong ni Balige disi pe nga godang namasa-masa

  17. goklas sinurat berkata:

    anggo rohakku luluakku do bapatua sahat tu laguboti…. bln Januari 2009, alai gagal do sude bapa tua angan2 i???
    ai gabe maila do muse au di huta di pauru2.. daonai mulak si goklas tu huta holan mambuat CPNS.. na solakku be aroa di jakartaan i…
    songoni ma di dok akka dongan sahuta tu au???
    hape toho do na didk nai nian,,, dung di jakarta on iba las so hea boi lulus CPNS nunga sappe 3 hali, as hucoba tahe tuhuta akka dongan na oto do ra na dihutaan inna rohakku….. hape ahu do naummoto sian sudena…….
    alai dung sonari nunga sadar be ahu , se andaina di jalo au gabe guru Geografi di Tobasa ba oto2 ma ra sude siswa i???? ai na otoan hape ahu…..
    Selama ma Tu akka dongan2 na lulus CPNS na di TOBASA 20008,
    sai anggiat ma gabe akka guru namalo manganju hamu sude,
    ………………………..
    salam perjuangan..

  18. siregar naburju berkata:

    aha na masa ?
    aha puang on,,!

    asyik saya lihat ini,,aq copy dulu lae cerita lucumu ini
    haha..
    mauli ate dohot horas

  19. Alfian Simanjuntak berkata:

    Attar songon na burju jala marsintuhu do ra idaon bohini amani Tiurlan on ate. Sega ma anggo amani Mikael. Lobi sian na jumpang begu antuk anggo songgot ni hatihai. Byarrrrrrr….sepft. Tuani do dang tos hosa ni hela nai… Huh ruar biasa…..kwekekkkeekkkek….

  20. Jansen Sitorus (jkt) berkata:

    On dope hujahe cerita ni Lae on, jala margak-argak do ahu. Jarang do dapot kesempatan sisongon on. Huhilala nasala mandongkon do Aman Tiurlan, nanaeng dohononna ra
    angka namasa naribur, nasohea masa dihitaan dohot lan na asing. Hape tardongkonna
    gabe namasa-masa. Iba sandiri pe pertama mambege istilah i taon 1987, tingki baru ro sian hitaan ndang pola pintor niantusan na begu ahai… horasma

  21. ND Hutabarat berkata:

    LAM BIDANG TIMBO PARBINOTOAN
    (INDIVIDUALISASI SOSIALISASI MANUSIA)
    30 7 2010 HH

    1. Nunga saut huebati hira sude luat portibi on.
    2. Nunga saut huattusi sude nasa na di portibi on
    3. Tarlobi di Adab Dunia I II III : Timbul Tumbuh Masyarakat Adab Manusia
    4. Di tikki umur 4 taon sukkun-sukkunhu tu Lae Siakkangan
    5. Alai sian dia Tuhan i, ndang dialusi be, holan dialusi unang be sukkun ninna
    6. Jalo ro di rohakku; Ikkon marsikkola jala studilanjut au muse
    7. Gabe masuk ma kelama interkontinental saut ma hobas ni rohakku.
    8. Kato ni Amang Monang : ima tema ni Rilis on
    9. Horas di GP Generasipenrus Batak ! Sian domisili Eropa Dunia I.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s