HINATA BIRA HINATA HALTO, DOS LAGATNA

Monang Naipospos

Molo jinama halto, manigor hinilala do pangkorhonna rintop (gatal). Songon i do nang bira, dos do lagatna mambahen rintop tu pamatang.

Sipata do jolma japa-japa mandiori sibonsiri haroro ni rintop tu pamatangna, ai dang dituntun rohana na dais ibana tu halto dohot bira. Dang diboto naung mangararati lagat ni halto tu inganan na asing ujungna dais tu pamatang. Molo pinangan bira dung dilompa, sada do podana didok natuatua; “unang nidok rintop”. Toho, rumintop do halto sian bira.

Molo masa parungkilan di sada halak manang natorop pe, sai didiori do dia bonsirna. Molo sian pangalaho dohot pambahenan ni halak, sipata do i dipatupa sian dalan naholip. Godang do nang sibonsiri i ro sian dalan napatar, alai dang ditagam parungkilan ujungna.

Godang do halak marhite hateamon mangulahon siulaonna ujungna manghorhon hasusaan dijoloan ni ari, di ibana. I do umbahen didok natuatua; “Nateam roha di ulaonna, hasusaan do ujungna di jolona”. Jolma na so jamot di angka parulan dohot pambahenan ni halak na asing pe jotjot do dapotan “siharhar”. Sai dipodai natuatua do angka naumposo asa mangula dibagasan hasintongan jala jamot mangaradoti. Marhite poda do didok sipaingotna; “Pingkiran na so mardasor tumundahon sahit ni ulu”.

Sipata do binege soara ni natorop manihai pargomgom (pamarenta) mandok ; dang tarboto i, dang namotan i, dohot lan na asing rumang ni insak-insak. Molo sinungkun angka pargomgom i, deba mandok, ndang tartata natorop, dang taranju, ndang tartogu, dohot lan na asing tiha-tiha. Mardondon ma angka hateamon dirohana be, laos masipasombuan. Molo adong haringkotan di nasida be, marpanimbangi ma di hata pandohan, lehon diau asa hulehon diho.

Nuaeng on binege do na padedal angka pandohan ni angka partogi, tudos songon ipon napanjalon, padeha-deha songon pat ni hoda-hoda. Dipodahon ompunta naparjolo do, molo padedal pat ni rua-rua, milingiling ma panguhatan. Sai patrogi do ditagam roha sisuan duhut sirumatabulung, sipadimpos namabikbik. Alai molo anak asang-asang i do mambahen singkam mabarbar, masirehean, masitihaan, tagamon do sogot nasida manghirap tiha-tiha diulaonna.

Tudos do pangalaho sisongon on ginorahon ni ompunta najolo; patundal pe parsidua tali alai sada do iaggo nidapotna. Marnida sisongon on, milingiling ma roha ni natorop, ai hata binegena sian angka nabisuk i songon tiopon tanduk do marlambianan, songon haolon unte marsinggaulan. Bobos ma natorop na so tangkas mangantusi marhite bisuk, na so umboto manapis marhite hapantason.

Molo margapgap angka partogi di namanghobasi patujolohon dirina, gapgap do gok di ulaonna. Molo mangansi do natorop pajongjong uluanna, manehenehe ma ujungna sogot ulaonna. Bangso sisongon on, dang tagamon songon pinarsinta ni ompunta naparjolo “sitiop hatian nasintong, na tuginjang so ra mungkit, tu toru so ra teleng”. I ma jambar ni bangso molo pargapgap partogina jala panehenehe pangihutna.

Iklan

14 thoughts on “HINATA BIRA HINATA HALTO, DOS LAGATNA

  1. ima tutu amang Monang, mansai timbo do ilmu muna di sastra Batak i, Sai gumodang ma niang mangihuthon hamuna angka generasi muda…mansai kagum ahu.

    boi do publikasihonohu artikel muna on di surat kabat ni halak kita ate,


    **** Malo do hamu marhata batak, alai marga aha do hamu, asa binoto mandok ito, lae, tulang manang ampara. Sasintongna dang pinatudi hian be angka komentar ni halak batak na jo jelas patuduhon dirina. Mauliate di responmuna.

  2. Bernat sinaga berkata:

    HORAS MA DI ” GURU I”

    Santabi ma jumolo pinasahat, atik beha dang dijalo rohamu di panjouonki.
    Alai molo pandapothu(aha do tahe hata batak ni?) sandiri , GURU I do hamu.

    Ai nuaeng on godang do na marGelar guru alai dang pantas di Gugu. nadeba molo hurang gaji dang tikkos mangajar.
    Guru nadeba molo dang tikkos pangalaho ni muridna,ibal-bali sampe naing mate, gabe markantor polisi. hape ido sipatikkoson.

    Alai molo Guru i, dang digaji, dang diparrohahon pamarenta, manang napaula so ditangihon jolma ipe(pembaca), sai tong-tong do sabar pararathon akka
    poda nauli poda nadenggan na niajarhon ni sijolo-jolo tubu.

    molo sai hu parrohahondo,molo adong tulisan ni Gurui sisongon on,akka parsiajaran tentang poda “perilaku hidup yang baik”, ai antar hurang do hubereng na berkomentar, hape sai tarpaima iba.

    Mungkin ra,ala poda nadenggan do i sude, gabe sude sitolopi nauli nadenggan ate Guru?

    Sai hu paihut ihut akka parsiajarani, gabe lao turohakku; molo adong sasahalak jolma laho sampe tu TIBET marguru sampulu taon holan naing marparsiajari “Mandalanton ngolu nadenggan”, dosmai tu impola ni nanisurathon ni Guru i.
    Molo marsikkola sadasada jolma sampe dua pulu taon sahat gabe Master, holan mamikkiri butuha sisanjokkal ido ujungna.

    Mauliate ma Guru, sai anggiatma dilehon Tuhan i hahipason tontong, ganjang ni numur, tamba passamotan nag parsaulian di hamu nang keuarga, asa boi tontong di ajarajar i Guru i hami akka naumposo on,nang bangso i asaunang gabe lilu di habatakon i.

    Molo tung adong di pandohanki nahurang lobi, sahali nai au marsantabi.

    Mauliate

    BRAVO
    HORAS TANO BATAK

  3. tanobatak berkata:

    Horas Lae Bernat

    Toho, hea hujua jouonmuna au GURU dang na hurang dengganna, baliksa na patimbohu do.
    Angka Ompunta najolo godang do martohonan Guru, Raja, Datu, dohot Tuan. Sian i sude, holan dua do na marsahala, ima Sahala Guru dohot Sahala Raja.

    Husurati pe i, tong do na marsiajar, jala marnigot sude angka habisuhon ni angka ompunta najolo. Mansai hansit do roha umbege hata namandok angka ompunta najoli i “nalilu, sipelebegu dlna” na so patut jaloonna marnida angka habisuhon binahenna di parngoluon habatakon i.

    Godang do halak eropa naung marsiajar “batak wisdom” alai batak sandiri marsiajar tu eropah, mengutip ; aristoteles, lao tse dohot lan na asing. Ima na so diharingkorhon batak i laengku umbahen marungkil iba patubotohon ise do batak i, ompunta napinalea ni sileban i.

    Molo tung so adong pe komentar dison, dapot roha do i, godang na maila gabe batak, deba dang diantusi hata batak, hata inggerisnama siganupari di parsaoranna. Nadeba nai, ima angka naung marurat dirohana angka ompunta najolo “sioto-oto” do sude. Sahat tu saonari didok dope “batak makan orang”. Alai ompu ni ise ma ate manggallang ompu ni halak? Dang hea hubege jala sai huteliti dope on. Molo tung adong pe, klaim do i tu bangso batak?

    Mauliate ma lae di panunggulionmuna, alana sanga do leleng dang husurat sisongon on ala dang piga penggemarna. Alai ala naung profil ni partungkoanta on ingkon adong do i jala torushonon. Tung holan lae pe namanjanghon, las do rohangku.

  4. G. Meha berkata:

    Sagari so margapgapdo partogi i, sai tong marnehe nehe pangihutna. Ba, lamma molo margapgap?

    Onma naso niantusan sian angka partogi i, ala ni pargapgaponnape gabe marnehenehe bangso i, alai ala team ni roha do na mian di dugul ni patna, gabe ndang team pangihutna i.

    Sai anggiatma tujoloan on jumpang di hita partogi sitiop hatian na sintong, naso ra mungkit so ra teleng binahen ni nehe nehe.

  5. Liberius Sihombing berkata:

    Horas ma tutu di Guru i, dohot ma ahu manjou amang Naipospos gabe Guru, ai nunga dimulai laenta Bernat Sinaga. Toho do tutu hamuna Guru. Jala autsura diendehon Hymne Guru: “Terpujilah wahai engkau ibu, bapak guru….engkau patriot pahlawan bangsa TANPA TANDA JASA”. Sengaja husurathon ‘”TANPA TANDA JASA” dibagasan huruf besar ai sabotulna tu hamuna do ende pas, ai so adong gajimuna manang balas jasa sian pangajarionmuna i. Alai nang pe songon i tongtong sai didukket-dukketi hamu pasahathon angka hata poda na mansai marimpola nasian ompunta sijolo tubu.
    Termasuk setia do au mambuka blok on jala sai huparateatehon do sude angka naginurithonmuna i, nang pe dang sai hupataridahon marhite komment, alai pos ma rohamuna hutangiangkon do hamu amang Guru sian nadao asa anggiat ganjang umurmuna jala boi dope patuduhon tu hami angka hata nauli na denggan i. Sai husuba do nian sasaotik pabagashon habatakon on alai, tong ma i, dang ala gogo ninna manang alani malo. Jala dang alani na manjaha ninna, soal kharisma do tong dohot talenta. Jadi satolop ma au dohot laengku Bernat Sinaga manjou hamu Guru, agia pe manjua hamu. Songon ima saotik hata sian ahu di luat ni si Thaksin di Thailand
    Liberius

  6. B.Parningotan berkata:

    molo taparateatehon lapatan ni guru di angka surat dohot buku batak najolo, tar berbeda do i sian lapatan ni guru di bahasa indonesia dohot bahasa batak si nuaeng on. Molo lapatan ni guru na jolo, dewa do i manang super natural jadi ingko pertimbanghononhon hamu ma jolo molo naeng lehono manang pangkeon goar i, alai molo goar ompu bahenon, toho do i.

  7. Parjoloma hupasat Selamat TAHU BARU 2010 sai anggiatma
    di ramoti ,di pasu-pasu TUHANI dihamu amang Gurui……..
    Taringgot tu artikel muna on amang iba pe dohot angka anggi niba na kebetulan marpunggu hami di tahun baru on dan hupatudu do tu haha anggiku ,halaki merasa salut do.dohot “angkat topi”.Alai adong do pendapot na ,alana halak amang jojot mamake hata batak asli jadi halaki hurang mangatusi,beha ma sude angka na tubu di medan on do +pergaulanna pe angka halak melayu jadi santabi ma amang guru molo boi(maaf usul don)angka hata batak asli mangido hami aso diperjelas ,jadi hatop mangatusi / memahami artikel munai amang.mauliatema………….GBU

  8. tanobatak berkata:

    Horas ma di hita sude. Jala partingkian on hupasahat selamat taon baru. Amang Nainggolan, tumagon ma adong sungkun2 di lapatan ni hata i asa boi alusan. Sian ias ni roha manghirim torop dope na mangantusi hatanta i. Jala laos dalan masisungkunan hita sama hita. Mauliate

  9. Bonar Siahaan berkata:

    Dihilala roha,na dituntuni parhobas ni tanobatak on do manurathon hata batakta i asa unang mago hata i sian tongatonga ni bangsonta.
    Molo tung adong nahurang tangkas mangantusi,pos do roha rade do parhobas i patoranghon.
    Horas

  10. Bonar Siahaan berkata:

    @ B.Parningotan
    Pangantusionhu sarupa do Guru nahinan dohot nuaeng alana, guru nahinan pe tong do mangajari ulaonna alai huhut mangulahon niajarhonna.

  11. Horasma dihita sudena; parjolo ma iba mandok mauliate tu Amanta pardengan basai,ala boi dope hita taripar tu taon 2011 on, sai anggiat Taon parasian on di bangso ta,bangso batak. Di amang Monang Naipospos mauliate godang di hamu amang,di haradeon ni rohamu na dilehon hamu dope rohamu tu bahasanta i ,bahasa batak i.ai molo binereng do tu jaman sao nari, lomos do roha sotung gabe mogo i hata batak i, ai ngatung mansai bahat nuaeng on holan goar nanama halak batak hape mar bahasa batak pe dang di boto be.molo soal gelar do ahape gfoar ni i ,dang gabe masalah i. ahama artini sebuah nama, jadi horas ma di hita saluhut na, mauli ate godang ; Nb ; molo adong nasala ba santabi godang ma alana hurang malo iba manurat hon hata batak.

  12. tanobatak berkata:

    Paulus : Dohot mambahen margana pe maila ate….. Alai tahe marga aha do hamu, asa diboto dongan. Tiniptip sanggar bahen huruhuruan, sinungkun marga asa binoto partuturan… Horas

  13. Hilmar Hutahaean berkata:

    Boasa dung saonari blog on jumpang ahu? Mansai godang impola nauli dapotniba sian angka nasinurathon ni GURU i. Alai lam tamba taon hira na lam moru do parsitutuonmuna manurathon angka parsiajarani.
    Ahu HILMAR HUTAHAEAN, magodang di HUTATINGGI, Laguboti. Uju sihadakdanahonku sai jotjot do tarbege ahu goar ni GURU i, molo ndang sala, pahompu ni Ompu Si Marnangkok do hamu, sian Huta Naipospos di sabola habinsaran ni Nasanggak.

    Horas ma TULANG…!

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s