Guru Parmabuk

Adonia Sihotang

Marsiribur-ribu ma hita angke. Hira-hira taon 1980-an ma on, tingki singkola SMA di Barus. Adong do sahalak guru nami marga LG. Gogo situtu minum tuak. Di laponta on didok : SEPULUH GELAS TUAK, MASUK NERAKA, molo ibana SEPULUH GELAS TUAK, MATA MENYALA dope. Jala muse so pola dianturehon ibana natarsurat i. “Tu narokko pe taho, ai disi do godang kode tuak,” ninna ibana do molo dipasingot donganna. Boi ma dohonan amanta on tungkot ni lapo. Molo di kungfu China, sarupa tu “suhu” ma ra level ni ibana.

Sude do diboto amanta on lapo tuak di luat Barus. “Tuak ni Ama ni Jonggi Tarihoran na di Sihorbo an songon na ngali-ngali. Mual i do haroa ditahui disampur tu raru i,” olo do ninna amanta on tingki pas minum di lapo ni Ama ni Hendry Lumban Gaol di Pasar Baru on, di topi ni Aek Sirahar i. Jonok tu Pasar Tarandan an do i. Molo ro tuak sian paragat, sude do parlapo i manabunihon apala dua botol laho di ibana. Alana ris do ganup ari lapo on diedangi mulai haruar singkola di hos ni ari sahat tu tonga borngin. Sai marsepeda do amanta on mangadangi lapo i. Olo do sepedana on holan ditogu-togu, molo mirdong dihilala . Manang songon i di tinggalhon di topi dalan i, baru hami ma disuru mangalap. Adong do meja dohot karosi spesial di ibana di ganup lapo. Molo ro tu lapo i, ingkon disi do ibana hundul. Molo istilah saonari, tamu VIP ni ganup lapo ma amanta on.

Molo mangajari di parsingkolaan pe, jot-jot do mardongan mabuk. Marpilitan ma olo dipandok, kapur tulis do na soada, alai didok do pangapus. Sude do angka parsiajaran na nilehonna sai dikaithon tu lapo tuak. Molo tugas, manang PR saonari on, sai mambahen pembukuan ni lapo tuak do disuru (alana pelajaran tata buku do ditiop). Susa ma iba, ai so adong parkode tuak i mambaen pembukuan. Olo ma ala ni PR na so sidung i, gabe tarrimas ibana. Balobas na ganjang i ma olo dipangalotakhon tu ulu nami be.

Adong ma daba donganhu tingki i, goar na si Kalapas, marga Manalu, hutana di Janji Maria, jonok ni Huta Pananggahan on do i. Jot-jot do ahu dohot lae on tu lapo marnonang huhut marende-ende, alana sai rade do gitar disi. Sahalak naburju do ianggo lae on mardongan, jala malo muse nang marende. Sai parekkelon do dibahen. Alai adong saotik na hurang (antar maju saotik simanggugut i tujolo-santabi).

Di sada bodari, marende ma hami di Kode Tuak ni Ama ni Gomos Pasaribu di Sigambo-gambo on. Huendehon hami ma ende “Marudur do sude”. Molo so sala au Nainggolan Sister do mempopulerkan lagu on di tingki i. Hape naso panagaman, ro ma da amanta on tu lapo i. Habis minum tuak sian lapo ni Ama ni Juande Panjaitan di Kampung Mudik, martambul dengke aso-aso. Pintor sip ma hami marende on. Ai biar do roha mangida guru ni iba najalo, pajumpang di sada kode tuak muse. Soara pe namarende on gabe mellop-mellop saotik ma, jala bohi pe ni padao-dao ma manaili tu na asing, asa unang tarberengsa, ima dirohanami. Hape dibereng do daba.

“Boasa gabe sip hamu, torushon hamu marende i asa adong begeon”, ninna amanta on

“Daong bapak, naeng mulak nama hami, alana marsogot sikkola”, ninna hami mangalusi.

Sip-sip ibana, huhut laos gabe dipajonok tu hundulan nami i. Hape nasopanagaman daba, pintor di pastap amanta on ma hurum ni laenta si Kalapas on. Gogo hian, huhut didok, “boasa sai parengkelan mu au sian nangkin, ai dirimpu ho do na mabuk au?”. ninna ibana. Hape so adong mengkel laenta on, na songoni do nungnga keadaanna. Marpitor ma laenta on, marrara ma nang hurum i. Pola do hira-hira tolu ari marbosar.

Di sada tingki muse, dilaon-laon ni ari, pas hami di lapo ni Ama ni Juande Panjaitan, ro ma amanta on. Nungnga marrara bohi i, mangkatai pe so tangkas be batu ni hatana. Angka bahasa Inggris nama deba dipandongkoni. Angka jamita deba. Dung dibereng hami di lapo i, pintor dijonoki. Mabiar ma hami da, tarlumobi laetta si Kalapas. “Sotung dipaduahali muse mamastap ahu,” hira-hira songon i ma dibagasan rohana. Sai sip-sip ma ibana di suhi-suhi ni lapo i, mamurgut huhut ma ditutup pamanganna dohot tanganna. “Betak annon salah pengertian bapak on,” ninna rohana.

“Ho”, ninna amanta on manudu si Kalapas ondeng.

“Tuson jolo ho alias come here”, ninna amanta on muse.

Hira hungkam ma da bohi ni laenta on ala ni biarna. Manggirgir ma dohot ulutot na. Hosana pe nanget-nanget ma diombushon, mabiar taranggo uap tuak ni si sagalas naung didorguk na i. Alai dipatogar-togar ma badanna, Dipajonok tu amanta on.

“Tenju au, sagogom baen”, ninna amanta on.

Dang olo antong laenta on manenju da. Ba ise do halak olo manenju guruna. Sotung dipecat sian parsingkolaan. Sai sip ma laenta on jala unduk.

Alai sai dipaksa amanta on ma asa ingkon tenjuonna ninna ibana. Dang tarjuasa, gabe ditenju laenta on ma butuha ni amanta on sagogona. Marsogot na pittor dilehon do punten 9 di di ibana daba. Alasanna diboto hamu do? “Keributan adalah salah satu parameter yang harus dimasukkan pada kolom keterangan dalam Buku Harian dan Rekening Koran Kode Tuak”.

Molo hea hamuna tu Barus, gareja HKBP pas ma di topi ni parbalan i. Jonok tu benteng ni Bolanda najolo. Parsingkolaan SMA Negeri Barus pe jonok do tu si. Balga do antong gareja on. Jabu ni amanta pandita hira-hira 100 meter ma sian gareja i dompak Pasar Batu Gerigis on. Jabu nia manta padinta on balga, timbo tombarana, jala lambas emperna. Model ni jabu na jolo ma.

Disada bodari hira-hira pungkul 9 borngin, pas mabuk amanta guru on, laho ma ibana tu jabu ni pandita on. Ai jotjot do songoni, molo nungnga mabuk jabu ni halak pe gabe dianggap do jabuna.

Dipasingot amanta pandita on ma haroa asa unang holan na mabuk ulaonna ganup ari. Sai dialo do antong hata sipasingot i. Gabe umbalga do soarana sian soara ni amanta pandita on. Ujung na gabe burbar ma sude.

“Ai so adong do diargai ho au amang pandita, ro au tu jabum las sagalas tuak pe so adong dilehon ho. Alai sai dimuruk-muruki ho au. Hepengku do manuhor i,” ninna amanta guru on ma muse.

“Tu balianan ma ho lao, begu laut i pe so olo mandongani ho. So maila do ho”, ninna amanta pandita on mangalusi, ala ni rimas na.

“Timbo singkolam panditanami, au pe timbo do singkolangku. Nang pe untimbo ho marsingkola, holan marmahan do diula ho (lapatanna : penggembala umat), hape ia ahu holan sarjana muda do alai boi do gabe guru ni SMA. Ahu do napatut mangajari ho”, ninna gurua on muse. Boha ma hata ni na mabuk, rarat ma songon api di ri, ai so diboto be manang ise angkup na mangkatai.

Muruk situtu ma antong amata pandita on. Balga-balga ma tong nang soarana. Dipabali ma guru on sian jabu i. “Kaluar ho begu,” ninna. Alai dang olo amanta guru on mijur. Gabe dipahundul do teang di balatuk ni jabu i, huhut sai didatdati marbete-bete. Ujung na didok amanta pandita on ma songonon:

“Ai ho, sai dilaosi ho do angka hata ni Tuhan nahujamitahon i. Unang mabuk ningku, sai mabuk do ho. So diboto ho, ai targantung tu au do molo naeng masuk tu surgo i ho. Au do maniop karcismu tu surgo i,” ninna amanta pandita on. “Ala so tardok be poda dohot hata nadenggan tu ho, saonari huribak ma karcis mon, dang na degeionmu be surgoi”, ninna amanta pandita on manguduti muse. Dibuat ma harotas sian sangku ni bajuna, laos di ribak-ribak, digete-gete hian, jala diambolonghon. Marserakan ma di alaman ni jabu i.

Hape diboto hamu do. Ai karcis ni motor tu Sibolga do na digete-gete nai, laho pangkeonna hian marsogot nai……….. (Ai sama-sama mabuk do hape nasida).

40 pemikiran pada “Guru Parmabuk

  1. Gabe sundat ma amanta pandita i laho marjamita tu Sibolga..? seang ni karcis nai, hape molo tinuhor tuak dos tu arga ni karcis i, nga dapot sajereken tuak di Pollung.

  2. Alai tung pe par mabuk guru i, anggo murid na i, jago do ate.
    Apalagi ma molo dang par mabuk hian amanta guru i, ba ra nunga gabe menteri murid nai bah…
    (sedang sibuk saonari amantai manusun kabinet, gabe dohot komentar niba sahat tu menteri)

    horas

  3. Bang Adonia…… Paitte!! molo mulak ho tu Pakkat ikkon husmbst ho di jabunami,…dibarita-baritahon ho lapo ni bapak nami, lapo parmabukan. Dang hea i dah, …terlalu!!!……..

    Molo nauntabo tuak ima sian huta LAKSA do, tuak namangapayang,..ia so i sian TUKKA nama….ro be ma hamu tu Pakkat molo naeng minum tuak hamu. Dokkon sabbong goarghu!!….heheheheh 😉

  4. Bah Hendry, pola muruk ho. Hape promosi doi tanpa biaya.. B-)
    Molo mulak kedanta i, ba au ma pengawalna, asa diboan jolo au mangalang sombom he..he..

  5. @ Ampara niba Henry Lbn Gaol

    Ha…10X horas ampara ba. Adong kesamaan karakter ate. Maaf ma puang. Alai daba di dok Amanta Na di Pasar Baru i do tong tiokki i songonan: Ai bona nia aek sirahar on sian pakkat do ima temba, sihombang. laksa, sibambanon. Ai disi do gok bona ni bagot lao siagaton. Jadi ba tung aek sirahar i pe ditahui di kode i, ai tong do godang tuak nai. Apalagi ma di laksa, siniang, sihombang tung mansai godang do tuak. Alai ikon sian hutanami do daba raruna, sian Siambaton, anggo i pe baru topek, dicampur dohot jengkol natata.

    Ido kan amparakku

    Horas

  6. Alai ikon sian hutanami do daba raruna, sian Siambaton, anggo I pe baru topek, dicampur dohot jengkol natata……

    Jadi buti suhutanna bang…..

    Sahat do barita I TU is Jamordong, sahalak na gogo minum tuak sian huta Laksa. Didok rohana, naeng pauba dai ma Jo nian ibana, AI anggo tuak nadi laksa, siniang, sihombang nunga dai aek be dihilala ibana. Lao ma ibana TU Tukka, tong ma didai tuak I, mulai sian lapo in Sipardosi di Tukka Na Jonok, sahat ro di tuak in is Mutte di Tukka Ambobi, jonok TU lombang sigurung-gurung I.
    Ninna rohana , dang main tong tuak di tukka on, dang anggo mongona I.

    Angon-angon di nalao mulak ibana sian Tukka, dibege ibana ma di lapo di pasar Pakkat I adong piga-piga halak na minum tuak. Di tangi ibana ma nanget, dungi dapotsa ma batu in hatai, didok ‘di Siambaton do tabo tuak, sagalas pe in inum alai tor mangonai”.
    Bah..naruhani is Jamordong, AI nabinoto dah “Siambaton panakko” hape on, tuak na tabo ninna disi. Huroa manginongi ma dirohana, jala ikkon Lao ibana Tu Siambaton. Balik arina, toho ma tutu, Lao ma sahalakna.

    Attar 15 kilo meter ma nuaeng on, sian huta Laksa TU siambaton. Dihatopi ma borhat sian laksa ASA sahat potang air disi.
    Tutu ma dah, godang do tutu tuak I di Siambaton, apa di lapo in sihotang tokke gota I.
    Disobur ibana ma tuak on hatop, sagalas, dua galas, tolu galas…. ” dang mardai!!…tumabo di laksa!” ninna mandok nadihutana.

    Huroa, dang pe dang mardai ninna, alai anggo tuak I, nunga mangula be. Nga tabo be makkatai ibana dilapo I. Disuhuthon ibana ma na jalo go ibana. Dang parbiar. Hape sabotulna parbiar do bayon. Alai ala nunga tuak i namakkatai, bah barani ma ninna ibana.

    Sai na adong do na sipanggaron.

    disuba parhuta i ma ibana. Molo na jago do ho, lao ma ho mulak sahalakmu tu Pakkat. Ninna.
    Dioloi si jamording do attong, ai bohama nunga hona raru i.

    Mardalan ma ibana sian Siambaton mulak tu Pakkat, mamolus borngin, lalnglang, golap-golap i.

    Mula na i, barani do ibana, huroa tong dope makkatai tuak i dibagsan ibana. Ise urroa, asa hutanda. Par-ciambaton do, curu tu con….cada, dua tolu halak, cahalakku pe …ninna.

    hape, dung lewat Aek Sopang, huroa moru ma KINERJA ni raru on, gabe satonga sadar ma ibana. Diboto ibana, nunga mardalan pitu kilometer. Holan lewat huta i, ro ma biarna, balga ma uluna, sigurbahon.
    Dilului ma akkal.

    Digalaki ma tolu batang sigaret. Dungi dibuat ma sappipil, di ihoti ma sigaret i sabatang disi, dungi di ihoti ma muse sappilpil i tu uluna, tu samula siamun. Duni nadua nai di tangannga ma. Sada di hambirang, sada di siamun.

    Makkatai ma sahalakna.
    “Sian dia lae…” ninna ibana, alai bongor soarana.
    “Imadah lae,..sian Siambaton do nakkinon, adong pesta adat…” ninna ibana muse, tonng salalakna markkatai. Alai songon na tinggil anggo saulak on.
    Sibata ma dialsik sigaret o, marulahulak, marsoring soring, sai makkatai sahalakna.

    Berengon ni halak attong, tolu halak namardalan i. Ai tolu api ni sigaret, jala tolu soarana.
    Lewat ma Sidulang Dalan. tong ditorushon ibana gaya na on. Hape adong ma mamemreng dakdanak ni parhuta i. Disuraki ma ibana. “Nagila…nagila…..”

    Dia dang didok na gila, ai tolu sigaretna, makkatai sahalakna, jala marihot-ihot uluna.
    “Nagila..nagila…onne nagila..ninna dukak-dukak ni parsidulang ma……”
    Bah…tarjolma ma ibana, dang toho be on, ninna rohana dialusi ma “Heh!….dang na gila au dah….napolaon do, asa diboto ho!!” ninna ibana.

  7. Guru parmabuk…?? bah,, boha muse ma molo sanga dibahen guru i, mata pelajaran: LISSOI…?? apa kata dunia. . . ? ha,ha,ha. . .
    HORAS MA DIHITA GANUP. . . .

  8. Holan sahat tu Sihorbo do ra daerah jangkauan ni amantai ate, dang sahat tu hutanami Sijungkang. Diboto hamu do aha alana ? 1. Dang tartulak ibana sepedanai di nangkohan ‘Koderura’. 2. Dang marrem sepedanai, molo tuat ikkon mangarusrur ma he… he…

    Horass

  9. @ Ampara Henry Lumban Gaol
    Apala ditanda ho dora guru nami di SMA Barus na jolo Marga Lumban Gaol ate, asalna sian Dolok Sanggul on. Adong do gelar na hubahen hami tikki i si Kalapas. PMP do diajarhon amanta on. Alana beragam do agama di Barus jadi penekananna ima tu hidup toleransi. Burju do amnat on, jala dang parminum. Imana do Ketua ISTI se Kecamatan Barus.
    ISTI = Ikatan Suami Takut Istri

    @Argha
    Ai dida haroa jabum ampara di Si Jungkang. Ditanda ho do paribanta goarna Moi Lubis? Sahat do daba ibana tu si. Gari ada sahat tu Pancuran, martapian-tapian huhut mangallang lomang. Alai molo naeng tu Sijungkang ibana, ikkon maradi do ibana di lapo niSimanjuntak di Jambatan Husor on. Mangalap hosa ninna, huhut mandorguk tuak i apala dua botol.

  10. Ai ise muse Simanjuntak parlapo na di Jambatan Husor i……….. boru aha dialap?
    Pasahat hamu tabengku sian parserahan….mauliate

  11. Molo bagas (hata Barus > jabu) nami jonok tu KUD do dijolona adong bubusan. Paribanta si Moi Lubis huingot doi, alai dang salevel daba au tu imana alias ‘ketteng (dakdanak nabalga ha… ha…) kodo’ au di jaman munai. Taon 83 ipe au masuk SMP. Kepsek nami Panggabean, adong ‘dukak’ na songon Bolanda. Dongan sakalashu Tumpal Sihotang sian Pananggahan sihambirang habis nakkohan molo ro sian Bukkit. Molo au saonari dipangarattoan do (parjalang do, baaa… nga 20 taon…) di Kaltim – Kutai Barat. Alai molo Abangku no 2 pas ma rai saksi sejarah ni ceritami. Attong diingot ho ‘kodo’ dai ni korket i ate ? Tokoh ni ceritamipe songon na samarga do. Baen jo attong marga naasing ha… 100x (sampe madede…)

    Horas da alias ‘akke’

  12. mantap ate gurumu i ate uda……gurukku pe adong do songoni waktu SD na turun temurun do ra adong guru tukang mabuk…….

    horas……………………..

  13. @ Argha

    Di bagian aha ho puang di Kutai Barat. Tahun 2006 sering do au tu Melak, Tering, bahkan sampai ke Long Iram, Long Bagun, kehulunya lagi Long Pahangai. Mmenyusuri hulu Sungai Mahakam

    Pasti kita ketemu nanti. Saya mau kerjasama dengan BLH untuk proyek-proyek di bidang lingkungan hidup

    @asdi

    Ai diboto ho do anggia boasa godang angka guru na mabuk? Alana godang tuak… ..jal;a dung mabuk pe baru diingot aha nanaeng ajarhononna…

  14. Di Barong Tongkok do au salelengon membidangi bagian ‘perdagangan’. Alai dang Kantor Dinas da, ‘Kode-kode’ do songon hata dihitaan. Molo dison didok marwarung ninna.

    Molo jadi do ro tu Kubar, paboa da

    Horas…

  15. @My Brother>> G. Meha

    Jarang do au tu Bppn. Ai dao hian do daba sian hutanami. Kubar-S.Rinda 380 kilo, S.Rinda-Bppn 80 kilo. Jadi total jarakna gabe 460,01 kilo ma (on ma rumus matematika naniajarhon ni Guru Parmabuk… ha… ha…)

  16. @ampara Argha
    Bah, dao nai huta i, ate appara. Sai hira dao ni Medan – Barus molo mangalaosi Doloksanggul. Haru tu Sangata pe dang pola songon i daona. Godang dope Payo (Gompul) di huta muna i?

  17. “Sonto soal…..” ninna guru parmabuk i sian bangkunan, huhut mondohondok

    “Molo daoni Kubar-S. Rinda 380 kilo, S.Rinda-Bppn 80 kilo” sadia leleng dalanan i, molo kecepatan 46 kilometer parjom, hatop alusi…” ninna tu akka siseanna i.

    Hatop ma si HumbangBarat nang si Argha mangalului dapot ni sukkun-sukkun i. Molo di kalas i attar halakon nadua do naunjago maretong. Ai biasana sai dapot nasida do putten onom, sia so i lima satonga.
    Didok guru parmabuk ido, molo murid naummalo na niajarhonna ima ikkon sahat tu putten 7 do. “Molo putten ualu, guru nama i, ima au…jadi dang ummalo hamu sian au, anggo ummalo hamu sian ahu, bah hamu ma gabe au, jala au gabe hamu…” ninna ibana

    unduh-unduk do na sakalas i di hata ni guru i, tarlumobi si Humbang Barat nang si Argha ai diboto marga Naipospos do guru i, sotung muruk innon. Ai najukkatan i, hea do dialo nasida guru on, alai didok “dang diajari akam ho? ai boha do poartaromboonmu tu au…”
    “Marbapatua do bapa”
    “Ima hape,..basa mangalo-alo kodo ho?” ninna huhut mallapak tu salok sahali be.

    Toppu ma martudu si Humbangbarat, lao mangalusi sukkun-sukkun i, dibereng ibana tu bariba meja nasadaan, sai maretongi kodo si Argha. Diloppiti kodo jari-jarina, jala songon na marhusip-husip simakkudapna. Mekkel suping si Humbang ala dihilala ibana ummalo saulakon.

    “Sappulu jom guru” ninna ibana.
    “Bah, basa sappulu jom, ai nantoari pe au sian i, dang adong nanggo sappulu jom, patorang ninna”
    Humitir ma sihumbang, dibaen ma nabinotona, songon na hatop disurathon di papan tulis i, jala dapotsa 10 jom.

    Diapusi guru parmabuk on ma matana, sai dipanotnoti papan tulis i. Marpikkir ibana muse. Diingot ibana ma nantoari, adong mandok tu ibana, ai lima jom do tusi, hape didok di Humbang dang lima jom alai 10 jom do. Ise do halahon na dua pargabus naeng, naruhana.

    Dungi, martudu ma muse si Argha.
    “Dang sappulu jom guru, ualu do, ualu jom do” ninna

    “Bah sian dia dapotmu i, unang pajago-jagohon ho”, ninna. Dialusi si Argha do guru parmabuk on, dipatorang ma attong denggan. Didok ibana andorang naeng sahat tu S-Rinda, adong dongan ni ibana lewat, kebetulan marmotor, gabe di bonceng ma ibana, ido asa gabe sia jom.

    Didok guru parmabuk ma mandok nasida. “Ise do hamu nadua na toho, nuaeng, ise do na manggabusi au” ninna. Humitir ma nasida nadua, ai diboto molo margabus nasida, ba, olo mallapak balobas pajjang i tu tanggurung i.

    Butima i guru nami, ninna si Humbangbarat
    “Ai namardongantubu do hami, bah songon nidok ni situa-tua ninna, ba manat mardongan tubu ninna, akkup ni i, satolop ma hami, sia satonga be ma hami” ninna

    “Ido…ido…ikkon songoni do attong, unang marsigodangi, ai ido nang tona ni opputta” ninna guru parmabuk i mangalusi, huhut ma disuru nasida nadua hundul……

  18. Lae Pontas,
    Gompul i, beruang do i lae. Molo di san, dijapjap do i.
    Heama sahali di jabu ni dongan, manganma jo hita ninna, diparade ma jagal sapiring, jagal ursa (payo) do i, japjapma ninna dongan on. Hujapjapma attong, jala laos pasdo daina i, dai ni ringgarung. Dung suda jagal si sapiring i, di ho dope? Ninna dongan on. Bahen tuson bah molo adong dope, nikku. Diboanma uluna………hape ulu ni gompul………

  19. @Brother G. Meha

    Memang dao hian do hutanami on, balobima sian Medan tu Barus. Ra hira-hira Medan-Manduamas ma on. Sukkun ma si Adonia, ipe dang sahat dopei tu Long Pahangai tamba ma 2 ari nai ai lewat riam dope. Molo payau (ursa>rusa) dohot Goppul (beruang) amaol mangaluluii

    @Brather Hendry L. Gaol

    Terlalunai ho Ampara didokho huloppit jarijarikku mangetong soal ni Guru i, markalkulator do au alai hutabunihon di toru ni meja ha ha
    Alai memang marpilitan do Matematika ni Amanta Guru on. Dang diingothobe tikki minum tuak ibana di lapo munai ? ” Suratton majo ate, padomu tu sinattuari, tolu satonga galas diau” ninna. Hape nga opat galas didok dope tolu satonga ? Paretongan sian dia mai ? he he

  20. Lae Pontas,
    Bearuang, eh beruang do gompul. Tongdo siallangon i. Nunga hea hu allang (tarallang) jagal gompul, songon on dalanna: Hea mangan au di jabu ni dongan, jagal dibahen lompanna. Jagal Payo (ursa) do i lae, japjapma, molo hurang adong dope di dapur, uluna pe adong dope. Tingki hupatangkas tu dapur, hape ulu ni gompul do. Hehehe. Nga sanga ni allang.

  21. >>Meha, boha do daini goppuli ? Tabo dorai baen tambul ni tuak ate ? Tingki dipatangkas ho tudapuri, dang tarserom ulu ni goppuli tu ho ?

  22. Horas Lae L Gaol,
    ai di barong dope hamu? borngin on laho do ahu tu si, sian samarinda. di dalan dia alamat muna tahe???

  23. Bah.. tung tabo do hujaha sude cerita nangpe angka balasan balasan i, parribur do hape halak kitai, jala kwalitas tata bahasa nang tingkat kelucuan pe boi do masuk kategori tinggi, ndang lawak rendahan rupani.
    horas ma ate…..

  24. Horas ma dihita sude.
    Gabe langa saonari di lapo ni Amang Naipos-poson ate. Ai na tudia be do angka dongan laho. Robe hamu bo. Uang sai holan na mr facwbook antong. Di lapo on pe happy do. Nynga diganti amantaa on gitar na gabe naimbaru. Lompanna pe tamba mantap. Ikan mujahir dioseng-oseng

  25. Adonia
    Nga holan na marfesbuk nuaeng jolma, Jarang nama mangebati lapo partungkoan on. Nunga rugi be ala dang suda tuak dohot tambul. Holan jekkolnama

  26. Tuak on ma gabe masalah nuaeng……jalo hamu ma bibit ni Bargot asa nisuan sepanjang jl.naso hona penghijauan asa adong agatan ni naposo muse, ai molo harambir di agati sega do boras nai

  27. Ima da uda. Narfasebuk on so adong informasi na utuh hudapot. Holan disutahon sangkababa dungi masibalosan. On mara nadidik jolma di nadao naeng pinardongan, hape jolma di dilambung niiba jarang marsituriak dohot iba.

    Adong info baru sian Barus.
    Songonon. Oajumpang ma ahu dohot dongan sasikkola hian SMA di Barus. Apala kakak kelas. Hami pajumpang di Pangkalpinang, Bangka. Ibana karejo di Perusahaan tambang bijih timah. Ahu menjadi konsultan nasida di bidang Lingkungan Hidup (Ketua Tim Penyusunan AMDAL nasida.
    Jadi molo di Barus saonari on, ninna akoor on, nungnga susa mangalalui huting. Alana adong ninna pengusaha makanan yang cukup kreatif di san. Daging huting on, diolah imana ma sedemikan rupa, digoreng, dikasih tepung, sampai garing. Tarsongon daging ayam di KFC ma dibahen. Dungi dia;long-alonghon ma on tu angka kode tuak na adong di luat Barus. Tabo do ninna daging ni huting i, jadi godang do antong namanuhor. Dibahen ibana ma goarni tiga-tiga nai : KF atau Kucing Fried.

    Alai ima ra angka pantang-pantang tasringot tu huting on, tutu do adong. Di nasadari nalaho maralong-along ibana, martkareta, tompu ma olat guting di dalan i. Ala so terelakkan be, gabe ditabrak ibana ma daba huting i. Madabu ma ibana, maponggol ma patna, mabarbar butuhana. Gabe cacat saonari.
    Inti ni cerita on. Sotung dibunuh kucing. Alana sijaga jabu doi.

  28. @ Alfian;

    Jadi marsogot nai amanta on laho ma tu sirpang opat na di Barus on. Ganup motor na lewat di stop, disungkun laho tudia. Jadi lewat ma sada truk sian Manduamas, mamboan gota, truk ni Tokke Gota Sian Binjohara, marga Situmorang. Di stop amanta pandiaton ma truk i. Hape tung takkas ditanda amanta tokke on do amanta pandita i. Pintor dipanaik ma amanta on tu ACC…Sahat do ibana tepat waktu tu Sibolga.

    Alai mulak sian Sibolga…adong dope cerita ni i….

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s