SONGON BONANG DI PANSOPAN

Monang Naipospos

Molo mambahen rupa ni bonang, ragam do pangulahonna. Ditubar do asa marrupa narara, disop do asa marrupa nabirong. Di pansopan i disintak disornophon do bonang i mambebe asa dos rupana asa unang marlaok dung ditonun bahen ulos. Halak pangandung, jotjot do ditudoshon dirina songon bonang dipansopan manurisahon pardangolanna na sipata disintak, sipata ditombomhon.

Parsorion na tuhuk hinorhon ni hapogoson, parsahiton, harugian dohot hamatean sai soluk do i diparngoluon ni deba jolma. Ima angka parsorion na so tarpasidingna, na so sian pambahenan ni donganna jolma. Adong do parsorion i ro hinorhon ni bojok ni roha, didok natuatua ma; “Taha-taha tu pat, songon panghudali ni na so malo”. Molo hinorhon ni tangkang ni rohana do, didok natuatua ma; “Binahen ni timbahom do timbaho lata, binahen ni pangalahom do umbahen na hona hata”. Molo ala ni hateaomonna di ulaonna do jala dilalapi parnonangon, didok ma i “Lilian martanjung, lupa mangusa”. Deba adong parsorion i hinorhon ni na so adong pangurupion sian donganna, ima halak parbiasbias.

Nada holan ala ni hahurangan asa ro pardangolan di sada jolma. Sipata do i nang hot dihasintongan pangulahonna alai sai dipabile halak diparsaoranna. Sipata dohot dipogo ngoluna, ala ni pangalaho ni halak na sai olo pajolo gogo, papudi uhum.

Sada do parsihohotan ni angka halak naburju di ngoluna, tung sura pe mamorso halak di na tutu, marsoada ibana di na toho pangulahonna, ndang holip angka i sian pamerengan ni Debata. Tung nasa batu ni sabi pe i, tarida do i sogot, nauli manang naroa, ima pos ni rohana. Tung sura pe dipabenda halak ibana diparsaoranna, songon bonang di pansopan dipasintak dipasornop, patanggo urat ni haserepon dohot bonor ni rohana do i. Tung sura pe mangosong halak nagogo marsoadahon hasintonganna, ndang masuak parsihohotan ni rohana bahenon ni i. Mandasdas gorakna do i, asa hobas mardalan maniop sipusipu panghirimonna manulu pardalananna.

Songon pantil do halak na daulat marroha diparnidaan ni halak nabonor marroha. Ndang tinggang halak na marhaposan di hasintongan. Marhaporseaon do halak sisongon i, Debatana mangaramoti jala manata ibana ala serep ni rohana, unang manimbil tu siamun tu hambirang sian parbalohan ni uhum hasintongan. Tung songon sipusipu pe hataridaan ni hasintonganna i, marpanghirimon do ibana sogot, marsinondang do sipusipu i, imbuson ni alogo habahaba i, ima paruhuman. Torhon ma panailinna di hamamasa ni habahaba i, ndang polpol haporseaonna hinorhon ni haholomon. Tubu sitata dipambaruran, molo manumpak Debata, santetek nambur do hangoluan.

Tung sura pe songon bonang di pasopan ngolu ni halak partigor, ndang marioho rohana pasudahon ariarina. Ndang martutungkian ibana manderse manang mandele. Ndang tondan ibana manang sumurut sian dalan hasintongan marpanghirimon di haluaon. Diumbol do siulaonna paradehon bohalna. Benget do ibana marhadaulaton, marhahormaton, marhapantunon dohot marhaserepon. Dihaporseai do; “Tudoshon singgogop do pangunjunan i pareakhon buha siang ari”

Ianggo halak parjahat, siparngoluhon hagigian siparumpak patik sipailing uhum, tudoshon hau na tandean do i. Tung togos pe parjongjongna mariaia, marolopolop, jala marsonang-sonang, ianggo tondina nunga rupahon di hamatean. Marbiasbias do na bonor marroha mida halak pargeduk. Papeol uhum hasintongan do ianggo dasingan ni pangansi. Landit pe hatahata ni parjahat maneleng-neleng, amporotan do ibana maradophon uhum. Ndang tagamon holip manang ise sihatahon gabus, jala ndang lias sian uhum halak sitindanghon gapgap. Ndang ditumpahi sitiop timbangan hasintongan tangan ni parjahat sidurushon mudar ni na so marpipot. Pingkiran dohot pangalaho marparulanhon hagigian, manambori halumlamon do i, manambori parhosoman, manambori parbolatan di topi rurus. Songon bagot natuatua do halak parhosom, tarpangan unokna.

Tung diandunghon napinabile pe pardangolanna songon bonang dipansopan ala mardalan di uhum hasintongan, paima tingki parasian do i, ima sihirimonna mangapuli rohana. Tung mangegal pe angka parjahat namambahen haporsuhon marhite pangansion dohot pangaleaion tu donganna jolma, paima uhum madabu do i mandondoni tondina. Didok natuatua, “Sai tu na gong do hau marobo”.

Iklan

17 thoughts on “SONGON BONANG DI PANSOPAN

  1. G. Meha berkata:

    Tung sura pe songon bonang di pasopan ngolu ni halak partigor, ndang marioho rohana pasudahon ariarina. Ndang martutungkian ibana manderse manang mandele. Ndang tondan ibana manang sumurut sian dalan hasintongan marpanghirimon di haluaon. Diumbol do siulaonna paradehon bohalna. Benget do ibana marhadaulaton, marhahormaton, marhapantunon dohot marhaserepon. Dihaporseai do; “Tudoshon singgogop do pangunjunan i pareakhon buha siang ari”

    Tung diandunghon napinabile pe pardangolanna songon bonang dipansopan ala mardalan di uhum hasintongan, paima tingki parasian do i, ima sihirimonna mangapuli rohana
    —-

    Mauliate.

  2. goklas sinurat berkata:

    bahasa batak nai bahasa batak hian do haroa ate bapa tua, jadi hami akka naposoon hurang boi mangattusi?

  3. @ Kakang GM di luat yang jauh : Seperti pandohan ni dongan hu, dukkon masa tu ibana akka beberapa pangunjunan, dia mulai berkacak pinggang alias martungkol genting, seraya menengadah tu atas, say soimthing to his god. Didok ma begini ” ai aha huroa tuhan, lomo-lomom do tu au, dilean ho satokkin pasu-pasu i, dungi di buat ho muse, diburjui ho mangalean akka passarian na dumenggan, tapi kau ambil lagi. Kau pikir aku akan menyerah dalam hidup ini, haru tuhaphon akka pardanolan i, alai life mas go on,..ninna. …..

    Attar termasuk lah kali ini sebuah parngoluan seperti benang di pasopan. marragam do mara manang cobaan, alai aha sai dipuhuti ulaonna. Dang marsak disude akka pardangolan, nunut ba gabe manusia na tahan ujian.

    Dang lalap marpesbuk, jala dang lalap curhat alias marsitariashon parniahapanna be tudongan jolma terlebih kepada ketik reg sipasi mitto kirim ke 9888.

    horas ma

  4. Dita S berkata:

    sangat menyentuh hati,
    Terima makasi Pung, ..menyegarkan kembali
    Iman yang kadang2 rapuh, mamereng bunga bunga ni portibion.

  5. patuan simanjuntak berkata:

    Horas ma di hita sude,na dibona ni pasogit dohot na di pangarantoan. hita jaga ma adattai asa unang sega hita. horas ,mauliate

  6. Jansen Sitorus berkata:

    Tabo jahaon ulasan na dirangkai dohot umpasa alai hot pahatushon lapatan ni SONGON BONANG di Pansopan. salut tu penulis. Horas.

  7. Saor Silitonga berkata:

    Mauliate godang ma di hamu Amang Raja. Tung mansai las roha adong dope hata Batak namansai lambok jahaon jala tung bagas lapatanna. Jut roha sipata di akka ende manang akka pandohan na tarjaha di piga-piga tikki, ai lomo-lomo ni nadeba do mandok pandohanna. Sai hira na so tuk gogo ni hata Batak i laho patoranghon sada-sada, hape tarida ma di son, tung denggan do dipaune hamu hata Batak i hape. Mauliate ma Lae, Ito, Haha, Anggi, maradu sude hamu na mangalehon roha mambahen parbalokan (hata Batak ni Blog, boha pandapotmuna?) on. Horas tondi madingin, pir tondi matogu.

  8. yoga putra berkata:

    Seharusnya situs ini menyediakan terjemahan…contoh terjemahan bahasa inggris dan bahasa indonesia contoh kamu sedang melakukan apa bahasa inggrisnya what are you doing.itu adalah saran saya…..aja kaya kue wkwkwkwkwk wong batak sip lah…mantep
    Watur nuwun ^O^

  9. bramastara berkata:

    maantaaf nai fhuang… !!! sombu sihol, tubu holong ni roha memperkaya perbendaharaan kata khusus bahasa poda yg bgitu sarat makna, memperkaya iman… horas.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s