Huboto dope manortor..

Monang Naipospos

Manggun nasa bitis, mambal nasa botohon. Hata ni turiturian pagodang-godang dohonon. Adong ma sada baoa najogi namargoar si Jonggi naung mansai masihol tu si boru nauli nilonggi ni lilina tinoptop ni pordana, sinolo ni panailina, tinodo ni rohana. Tiodor do goar ni naboru i, na sai manggorgori rohana uju singkola SMA di Toba, di siala hamaloonna manortor. Tarpillit do si Tiodor juara I manortor, salunggu, sa kecamatan dohot sakabupaten.

Si Jonggi pe da na serser pengindit ni roha ni angka naboru marnidasa. Disi do pistarna, domu dohot togosna, mardomu ma tu jogina. Tarpillit do uju i si Jonggi penggerek bendera kabupaten jala sai jotjot do gabe utusan di hamaloon tu luat na tumimbo ima Propinsi.

Dung tammat si Jonggi sian SMA masuk do ibana tu ITB Bandung, tading do rohana na marisi sihol na tarpompom tu si Tiodor alana sataon ditoruna kalasna. Alai masipatariparan sihol do nasida marhite surat uju i, alai lobi dua taon dang masipaidaan rupa. Di IKIP Medan do hatorusan ni singkola ni si Tiodor dung sidung SMA.

Somalna adong do pesta naposo di huta. Dipatongon ma i uju mangolani parsingkolaan (libur) hombar tu aturan ni pamarenta. Marpadan ma nasida asa mulak be marsirumpa di pesta naposo i huhut pasombu sihol. Mansai las jala hinsat do roha ni si Tiodor, tarpaima tingkina sadihari ma dohonon ni si Jonggi hata holong tu ibana. Saleleng pardonganon ni nasida dang adong dope hata sitioponna sian si Jonggi.

Dung jumpang arina marsiraion ma nasida nadua masipapuasan sihol ni rohana, alai dang adong hata pinaima ni si Tiodor. Dung jumpang mata ni ulaon naposo i, masidasdasan ma angka naposo boru asa manortor, mangarade ma angka naposo baoa mangolopi.

Pingkal ma ate-ate ni si Jonggi marnida pangalaho ni si Tiodor na manortor i. Paheanna pe songon siganupari di kota, donganna sude marmandar. Ulosna pe dang diboan, disintak ma ulos ni donganna. Jambulanna pe dang ditimpus. Jangge songon lau ni manuk jambe. Uju didasdas dongganna naboru ibana asa dipasuman panortorna, dipaula ma didok; “Dang huboto be manortor”.

Bingkas dangka hasonggopan ni lali, monggal roha ni si Jonggi naung malamun gabe bibi. Mangaruntus ibana sian loloan ni panortor baoa pangolopi. Mangunsimpu ma iabana sian lobuan tu balian marhusari.
Marnida namasa i, ro ma si Tiodor mandapothon ibana tu balian ni huta. Aha alana, dia bonsirna, ulao las ni roha alai boasa si Jonggi songonna tartuduk sira?

Didompakhon si jonggi ma si Tiodor huhut ma didok hatana: “Tiodor, saleleng on mansai sihol do rohangku marnida ho. Huhilala do adong holong na tanom di rohangku, naeng hatahononhu hian mai uju mangolopi tortormu. Asa tangkas diboto ho, holong na tubu i sian nahinan na tarsolo do roha marnida panortormu. Alai nangkin huida nunga mago be mual natio pamborbori ni holonghi tuho, ai so diboto ho be manortor. Dang tarpasari-sari be i luhutna, dang tarpasura-sura. Nunga redem holong i dang adong be hasahatanna”

Songon sinintak ni ronggur ma panghilalaan ni si Tiodor umbege hata ni si Jonggi i. Tangkas dibege hata holong tu ibana songon ombun manorop mangalambohi rohana. Alai marudut tu hata mangarotap hasampean ni holong i, songon na robung tu lombang liung panghilalaanna. Perek ma iluna laos tumatangis. Na so dung hea ditiop si Jonggi tanganna alai ianggo tung ala ni arsakna i, didahop ma si Jonggi huhut sai tumatangis sumolsol bagi jala didok ma hatana;

“Ito Jonggi, sasintongna huboto dope manortor, jala mangajari panortor do au di Medan”

“Haaahhh….?, tarsonggot si Jonggi umbegesa.

3 thoughts on “Huboto dope manortor..

  1. w.manurung berkata:

    @ Na so dung hea ditiop si Jonggi tanganna alai ianggo tung ala ni arsakna i, didahop ma si Jonggi huhut sai tumatangis sumolsol bagi jala didok ma hatana;
    ‘I LOVE YOU’ , dung tarsunggul ibana di ingot ma namar ‘nipi’ do hape ahu ninna rohana, hehehehe …

    Taringot najolo dinalaho mangaranto tu tano sileban (p.jawa) marjanji setia dohot si “boru haholongan” naso jadi mangoli di tano pangarantoan.
    hape dung tolu taon salpu, sahat ma ‘surat narara dohot bunga nabontar’, namandok unang be sai tongos surat mu ito ai nunga muli be ahu ninna .
    (jujur,, ndang tar alusiahu dibagasan surat) hanya ini yang aku tuliskan ,
    “MUNGKIN KAU TIDAK MERASA HERAN APABILA KAU MERASAKAN APA YANG SEDANG SAYA RASAKAN PADA SAAT INI”
    kutipan dari cerpen sinar indonesia baru oleh arifin siregar (judul lupa).
    hehehehe…. bersambung..?!.

    horaass..
    bks151012

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s