UEEE……AMANG BAO DO…

Monang Naipospos

Masa nahinan, holan angka na di kota do adong telepon. Naung narnidok ma i molo dung adong telepon dijabuna. Dung ro wartel, boi ma na sian huta martelepon sian wartel i. Tupa so haru ringkot sihataan, olo do ditolohon sian dolok asal ma boi martelepon tu anakna, boruna dohot sisolhotna.

Dung masa saonari, dang martanda halak be nampuna telepon. Nunga asing telepon ni ama, asing telepon ni ina, songon i nang ianakhonna. Dang longang be roha molo sabagas i olo 7 telepon.

Ama ni Haposan dohot ripena adong do sada be teleponna. Ibotona par Medan Nai Benget pe sada be teleponna dohot sinondukna. Mansai rosu do parsaoran ni nasida jala radot di angka paradaton. Namarlae pe nasida mansai rosu do, songon i nang namareda.
Di sada tingki di ulaon adat, ditait Nai Haposan ma ulos sian abara ni Ama ni Benget baona i. Dang panagamanna na baona namanghadang ulos i, ai sian pudi do ditogu. Sambar ni parnidaan olo do sipata molo niulahon siulaon huhut marnonang. Ai huhut do dialusi Nai Haposan donganna mangkatai, huhut ditait ulos i.

Tahi ni Nai Haposan, asa jimpo do ulos i, alana nunga dua hali agoan ulos Ama ni haposan di ulaon adat ala ni lolosna. Dang pamotoan ni nai Haposan na diinjam baona i ulos ni Ama ni Haposan uju adong joujou tu nasida.

Songgot ma manaili Ama ni Benget ala adong manait ulos sian abarana, masiberengan ma nasida. Tarsonggot ma Nai Haposan, ai baona do hape na manghadang ulos i.
Beal tandok parbue dibagasan. Adong nageok sai do parengkelan. Songgop ila di Nai Haposan alai dang adong nahaurahan. Mengkel ma sude namamerang namasa i huhut sai direhei Nai Haposan dibagasan engkel sirarion. Geok di hilala nasida. Ama ni Haposan pe dohot do mengkel marnida namasa i.

                                                         * * * * * *

“Dang adong pulsa ni teleponhu amang siadopan, huinjam jolo teleponmi, asa hupaboa jolo naerget di roha on tu eda”, ninna Nai Haposan tu parhalanguluna.

Ala ni na marhobas di parsahutaon do Nai Benget umbahen so dohot di ulaon adat na nidohotan ni Ama ni Benget dohot Ama ni Haposan i. Dang mulak dope sian parhobasan hape tinggal teleponna. Jumolo do sahat Ama ni Benget di jabu.

Dibege ma mangkuling telepon ni Nai Benget, dibereng goar ni Ama ni Haposan. Naung sihol do huroha roha ni lae Ama ni Haposan umbege soara ni ibotona, lumobi ala so di ida nangkin di ulaon adat i ninna rohana, dialusi ma dibagasan hahormaton huhut nanget soarana.

Sian na so ditagam sian bariba, soara ni inang baona do tarbege, jala mansai doras manghatai so jolo marpanungkun.

“Eda…..eda…hihihi…..nahebatan daba eda…..hihihi…. maila au nangkin, hutait ulos sian abara ni amang bao….hahahahaha…. Nunga dipaboa ra tu eda ate….”, ninna huhut songon na marpaima alusna.

“Horas inang, ai au do on….baomuna”…

3 thoughts on “UEEE……AMANG BAO DO…

  1. Rolan sianturi berkata:

    Nga piu be. Songon tali tutu,putor songon langkitang molo songonido namarbao. Alai mantap do turi2an on amang parmisi majo molo hushare tu anngka dongan.

  2. w.manurung berkata:

    Masa nahinan (dung merdeka)holan “telegram” do na adong bah…! ima na adong di kantor pos… (molo so salah ahu)
    dunghon ni (zaman ordebaru) adong ma talipon masuk kota provinsi,lanjut kabupaten,torus kecamatan . Unang lupa adong do “telex” di perusahaan , manang kantor pamarenta.
    ba nuaeng dung zaman milenium talipon sahat ma tu huta-huta alias desa. Sonnari na “canggih” handphone (HP) nunga bolas tu huta manang hampung, tamba ma muse ima “internet” dang holan na tinggal di kota be mar HP dohot internet.
    Alani ido ra gabe dang diboto angka nadeba ise donganna manghatai ,dohot baona pe olo di goit.
    pesanhu tu nai haposan unang sai pasalpuhu hata so jolo di boto ise donganna manghatai di telpon manang HP.
    Etika menerima telpon : hallo….selamat pagi dengan amani benget…!

    eeeehhh …tahe…. sai na adongdo hata sopisik…..

    bks,091012

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s